氣上心頭

尋晚因為湊住囡囡，將相機放番枱上o既時候，一時放得唔好相機就跌係地上，跌既時候聲音好響亮，我都心知不妙 。

我即時大叫老公入黎幫我手執番，佢見到部相機係地下已經好緊張，再開部相機檢查一下，發覺部相機睇唔到任何影像，噢！真係跌壞左喇！佢好嬲咁鬧我點解唔放好部相機，我若無其事咁答佢我抱住潼潼，已經將部相放番係枱面，或者放唔穩就跌左落黎。跟住佢就開始發癲，好大聲咁係度鬧我唔放好d部相機，d野亂咁放，部相機睇唔到喇....................................... 。好大聲.... 簡直係咆哮，我唔知佢為乜要咁大聲咁激動咁鬧我，我果刻只係望住阿囡，怕阿囡會俾佢嚇親。呢個時候，我只係淡淡咁回左佢一句：部相機係我既！佢聽到我咁講，就只有晦氣咁話：咁又係... 你錢多！跟住就走左出房，剩番我同阿囡係度。

我真係好嬲，但我無同佢嘈，我繼續湊女。但係我真係唔知佢發咩神經，我做乜會同d咁既人一齊，整跌部相機係我想既咩?部相機係我既，跌左心痛既應該係我丫。我覺得成日都係咁.. 我每做錯小小事情，佢反應都好大，話我唔小心，話我輪頌。咁佢呢? 佢唔會做錯事既咩?佢有d乜野整爛野.... 做錯野... 我都從來無怪責過佢，錯左就係錯左啦，咁咪諗辦法補救囉，做乜要咁發哂癲咁鬧人。

或者係我小器，到而家我心情亦然未能回復番。雖然佢尋晚已經若無其事咁同我講番野，但係佢知唔知俾佢鬧既人有幾唔好受，佢咁樣鬧人，就係o係塊花左既鏡上面再加一條花痕，我唔知呢塊境仲有幾多位置可以俾佢再去劃花，甚至乎佢打算一直將佢劃花，直至一日佢親自將佢掟爛。我覺得一直以黎，我都完全享有唔到香港女性所擁有既「特權」，即使係大肚既時候，都唔可以有額外既關心同疼愛，唔通呢種疼愛真係一種苛求？我有d乜野做錯，點解普通一個女人都可以有既「特權」我唔可以享有？係為左令佢自己方便，為佢左自己唔蝕底？你話呢d就係愛？你叫我點相信。

話我記性好又好，話我記仇都好，我會好好記住你對我所做過既一切。