出生經過

1月11日

雖然囡囡既預產期係1月8日，但係到1月11號都仲未有動靜，我依覆診日期番聯合醫院度覆診。我原以為會即時催生，唔想再無了期咁等，點知醫生只係話我有血壓偏高既情況而要我入院觀察，但係因為bb未過41週而唔肯幫我催生。我留係醫院真係好悶，只係不斷做檢查，係醫院入面好無聊，好想出院。

 

1月12日

想向醫生要求出院，點知早上起身就見紅，咁更加唔駛走啦！點知醫生依然話唔可以催生，好失望

 

1月13日

約凌晨12時開始覺得肚痛。我去問d姑娘陣痛同攪肚痛點樣分別，點知姑娘答我話：你第一胎邊有咁快丫，如果真係陣痛就痛到你腰都企唔直，你仲點行到出黎，你快d番床訓仲好啦。但係我望下個鐘，又真係幾定時定候約10分鐘痛一次。我唯有自己每次肚痛都寫低時間以確定係咪陣痛。到凌晨約兩點鐘，肚痛既頻率已經去到約5分鐘痛一次，有時痛得不自覺地係床上呻吟。直到3點鐘，我好辛苦咁坐起身按鈴召護士。經醫生診斷後確定子宮已經開到三度，可以進入待產房待產，醫生即時幫我穿羊水準備生產。途中我不斷call我老公通知佢我要準備分娩。但係佢實在太"爛訓"，要到4點鐘(我已經開始痛到乜都唔知，4點鐘係我老公講我知既)先搵到佢，佢仲要之後賴床，攪到早上8點鐘先知醒起身過黎。 

之後既事，其實我知道唔多，因為我已經痛到幾乎無哂意識，只知道最後因為度數一直開唔夠 - 10個多小時依然只有4度，所以最後需要開刀分娩。

17:08 - 係醫護人員報上既時間，亦係我囡囡既出生時間，bb體重只有2.59kg，但總算健健康康。

1月19日

生產之後，係醫院既日子一直都唔好過，每日都俾醫院既schedule限住餵哺bb既時間，真係好辛苦，尤其是我地呢d新手媽媽，學習用母乳餵bb唔係易事，但感覺上不被醫院既醫護人員體諒，晚上動軋花上兩個小時去餵哺bb，但係bb仍然啼哭不停。曾經試過一次，係深夜二時多bb依然未能飽肚入睡，我唯有進入育嬰室要求姑娘替bb補奶粉，卻換來冷言冷語：又要學人餵母乳又無ｄ耐性。然後敷衍又粗暴地餵了幾口奶粉俾bb便作罷。bb係3點鐘左右已經又因肚餓而啼哭，我無奈地抱著bb哄她入睡，但到凌晨四點，又被醫護人員按佢地既schedule叫醒去餵bb。果一晚我真係忍唔住喊左出黎。

我一直好想快d出院，離開呢個無情既地方。1月19日係我期待已久出院既日子。可惜果日卻因為谷奶發燒，痛得我整個人係度震，最後經姑娘勸喻後都要多留一日。 幸好，呢段期間卻又俾我遇上一位好既醫護人員 - 朱賀寶姑娘。佢對我悉心照料，仲囑咐其它同事對我特別照料，晚上仲抱bb到我床邊好等我可以繼續給bb餵哺母乳，一日後我既情況終於得到改善。終於可以同bb番屋企喇！

 

愛心編織2

完成晒所有愛心編織：

一張包被，出入冷氣地方時可以俾囡囡遮一遮

另外係一對鞋仔。不過size太大，恐怕要等一歲大果陣先岩著喇

 

已經完成晒d愛心編織，點解阿囡仲未肯出世o既？

囡啊囡~ 你知唔知你真係萬千寵愛呀?已經好多人送左好多玩具同衫仔俾你喇。媽咪又準備左咁多愛心牌俾你，點解你仲未肯出黎見人呀？

二人世界

 

1月8號 - 到左預產期喇，但係囡囡仲未捨得出黎見人，真係懶豬。我話佢咁快已經學足佢老竇 - 成個豬油包咁

 

bb就o黎出世，有時會懷念而家好享受o既二人世界，好自由自在。但係諗深一層，原來做人真係好予盾，當有朝一日仔大囡大，佢地有自己o既天地o既時候，你又會唔捨得放手。睇過電台DJ梁繼璋既一篇文章，入面就提到佢o既一對寶貝。佢同老婆講，要抱要錫的話就好趁呢一兩年，再過一段時間小朋友就長大要獨立，唔可以再咁樣攬攬錫錫喇。睇到呢段文章，就好似睇到自己o既將來一樣。

 

與其而家懷念二人世界o既生活，係咪更加應該學懂去珍惜囡囡依賴我o既日子呢？

千言萬語

呢排因為太懶，因為放假，因為地震上唔到網，因為.......

好耐無再寫blog，儲埋一次過講哂先 。

 

事件簿一

37週，整個星期屋企都掛滿萬國旗。囡囡o既衣服被鋪都係時候要清潔好喇。

 

事件薄二

對腳好腫，老公成日叫住「豬仔腳，豬仔腳」。究竟有幾腫？俾你地睇下丫。

都幾犀利架，原來水腫用力按落去ｄ肉真係唔識彈番上黎架喎！我都係第一次見咁既情況，有時覺都幾過癮架。

 

事件簿三

聖誕節期間無乜特別點慶祝，只係老公請左幾個朋友上黎食下o野傾下偈。到午夜兩三點鐘過後。所有人離開哂，屋企開住柔和o既燈光，播住d慢歌。突然感到好relax，好enjoy，好悠閒。我首次感受到對將會所去o既二人世界唔捨得.......

 

事件簿四

38週。報報數先：增磅共27磅，肚腩37吋。原本以為B囡大約會o係呢個星期出世。但一直都無乜動靜。

 

事件簿五

完成左愛心編織 - 披肩。仲差個毛毛球要搵人代勞添

。

 

事件簿六

都39週喇。囡仲未出世，而家訓覺好辛苦，好多時都唔係訓得咁好。個肚既位置亦好似開始向下移，好似隨時準備要生咁。我一方面想囡囡快d出o黎，唔駛而家馱得咁辛苦。但另一方面又好驚。唔知要痛幾耐呢？

 

 

躍動肚皮

 

買左部數碼相機之後，好想可以拍下囡囡係肚入面滾動時肚皮起伏o既情況。

 

當佢係你肚入面滾黎滾去o既時候，果種感覺真係好奇妙，

要經歷呢一種感覺，機會並唔係咁多，亦都唔係人人可以有呢個機會。

影像可以拍下，聲音可以錄下，可惜觸感卻無法保存落o黎。

我唯有退而求其次，希望可以錄低肚皮跳動o既情況。

但係唔知點解，每當我拎起部攝錄機，肚皮就動也不動，

無論我對佢按﹑搓﹑揉，亦無甚反應，呢個囡囡真係識得同我開玩笑，

抑或佢太聽話，真係俾我胎教成功，每逢夜晚都活動力減低準備休息訓覺呢？

 

唔得！我要繼續嘗試，希望終有一日可以拍低肚皮跳動o既情況。

心又喜，心又慌

 

我o既心又喜，我o既心又慌。

 

哈哈~ 我日又去完產檢番黎喇。

今次又再係3個星期內重o左5磅，而家一共重o左23磅，肚腩有37吋。

醫生幫我摸肚，話我個bb已經調左頭，可以出世架喇

我兩星期後再番去檢查，到時就37週，而37-40週就叫做足月喇。

 

我聽到bb就黎可以出世我真係好開心呀！

但係諗起生bb o既情境又有d緊張同驚驚地喎。

不過我依然係咁期待佢出世o既一刻o既

 

唔知係咪今日太興奮呢？今日全日阿女都踢得我好犀利。　

新玩具

哈哈~~ 呢個唔知係囡囡o既玩具，定係其實係我o既新玩具。

尋日終於買左呢部SANYO o既數碼相機。

 

其實數碼相機我屋企都有，買呢部機最主要原因係想為寶寶拍下一d生活短片。將來睇番可以有個美好o既回憶，將佢o既童年永遠咁留住。

出面一般o既攝錄機價錢都較貴，而且體積亦較大，我怕自己無咁好心機日日帶住部機出街為囡囡拍短片。呢部機係數碼相機之中o既攝錄功能最強o既，而且價錢較巿面o既攝錄機都平，咁我就可以為囡囡拍下每一刻令人感動o既生活片段喇。好開心呀！！！　

 

囡囡~~　你快ｄ出o黎見我啦！我好心急想見你呀！！

32週，好辛苦.... :(

你睇下我，肚腩圓圓，係咪大左好多呢？我都覺呢個幾月黎個肚大得好快。

唔知個肚臍遲ｄ會唔會消失呢？不過最緊要唔好凸肚臍就得喇　，好肉酸架嘛！

 雖然個肚係咁大，但係而家都算圓滑，無肚紋架！

可能咁係因為我比較少打側訓既原故啦，因為聽人講側訓好易有肚紋架。

我個ｂ女又曳曳，我一打側訓佢就猛咁踢，做就左我唔會打側訓囉。

但係亦可能係因為無打側訓而壓親條腰，每次想轉身條腰都好痛呢。　

 

除此之外，而家行路都覺得好辛苦，辛苦到唔想出街。

已經唔識分係因為舊患定係因為馱住阿囡，而家行路真係好辛苦好痛，要行得好慢好慢。

每朝番工要慢動作起身，心怕動作太快會因對腳無力而跌親。

又要預早出門口，對腳好似無力咁，行唔得快。

仲有個股關節位行路會痛，有時痛到連大腿內側o既肌肉都痛埋，真係好痛苦呀　＞＿＜

唔怪得之ｄ準媽媽臨生果個月成日嗌住想寶寶快ｄ出世啦。

 

聽日去做物理治療，希望情況會好轉啦，不停食止痛藥都唔係辦法呀！

 

8個月了

 

時間往往都係不知不覺間流逝，尤其是當你望番轉頭既時候，

先會驚覺原來佢真係跑得咁快。

轉眼間，肚入面既bb已經8個月大喇

 

8個月，終於出現左豬仔手﹑豬仔腳（水腫）。

手指好似屈唔埋咁，手指關節會有少少痛。

對腳唔知幾時開始”長大了”，又要特意買過一對新o既球鞋。

還好，自從我每晚訓覺把雙腳墊高之後，小腿抽筋o既現象得到改善。

我o既肚仔亦都大左唔少，不過其實比起好多大肚婆，

其實亦都唔算太大，所以應該都唔算太辛苦。

只係....... 3年前有次自己懶勤力咁學人做運動，又唔做熱身，可能因為咁扭親。

而家馱住左b女，令到舊患復發，痛得我要死，簡直寸步難行，坐立不安。　

因為太痛，走路既速度好似一個老婆婆，有時甚至要企係度休息一行先行到。

 

今日番去做產前檢查，醫生都主動問我點解好似行得咁辛苦。

我將情況同醫生講左，佢就俾左d止痛藥同冬青油藥膏我，

仲排左期俾我下星期去做物理治療。

不過仲有兩個月b囡先出世。唔知我可以捱得幾耐呢?

 

 

p.s. 增磅共18磅，肚腩36"

 

 

成為真正大肚婆

 

懷孕已經29週，我終於成為一個真真正正既大肚婆喇。

 

由懷孕初期開始，幾乎所有害喜現象都從未係我身上出現過。

我飲食正常，無作嘔作悶，極其量係額上多了點點暗瘡。

老公成日話我駄得舒服。

 

但係呢幾個星期開始作怪喇。

腰骨痛﹑怕熱 (只是比從前怕熱，其實仍是怕冷一族)

尿頻﹑抽筋等時有發生，手腳開始出現少許水腫情況。

我終於成為一個真正既大肚婆喇，我係咪應該覺得高興呢？哈哈！

 

呢個時候令我感到最有趣既，就係睇住自己既肚皮起起伏伏，好似波浪咁。

哈哈阿囡，你咁快想同我玩遊戲嗎？

 

(懷孕29週，體重增加共13磅)

胎教?

 

睇小S的媽咪日記，其中一篇提到胎教。

http://blog.yam.com/clarins/

睇完佢既文章，突然覺得好神奇。

 

一直以黎我都相信胎教，所以平時都有聽音樂，

最初懷有BB既頭五個月仲要讀書考試添，希望BB第日出黎都會鐘意讀書啦。

不過最神奇既係，入面提到胎教內容包括埋同BB講希望佢長得長一點，

如胎位不正的可以同BB講移番正位等，聽聞都幾有效。

 

突然諗番起，由知道有孕開始（應該不到一個月），

我同老公已不斷稱呼肚入面既BB做"囡囡"，

果然到懷孕20週後照超聲得出的結果果然是BB女。

唔通連BB性別都有得胎教既？？？　

懷孕27週身體變化

不知不覺有左bb已經27週喇，個肚真係大左唔少

而家連稍為彎腰都感到有難度，行街又好快就覺得"支力"，

再係咁落去，真係要盡快買齊所有bb同我呢位準媽媽既必須品先得喇。

到目前為止，我增磅共11磅，肚腩34"

肚皮上出現明顯既中分線，肚皮脹到肚臍都開始消失喇，

可幸既係暫時仍未出現婬娠紋  ，希望遲d佢都唔會出現啦。

 

星期一番左將軍澳醫院覆診，真係各有各講，

個醫生只係話我可能本身身型細小，所以個b都比較細小，應該問題唔大。

但係可能佢怕我又俾健康院d人掉番過黎，

所以佢建議我兩星期後再番醫院檢查，比較呢兩星期既進展，

如果唔理想先會再照超聲波。

 

似乎今次bb可以順利過關喇！

愛心編織

尋日(10月7日，星期六)去買左呢本嬰兒編織書同埋幾舊冷，

開始左我呢個愛心編織大行動。

 

為左令自己既時間過得更充實同埋令自己精神上有所寄託，

我決定為BB編織愛心包被，披肩，襪仔同埋帽仔等等。

而家開始緊既就係呢個波浪形淡綠色包被，

大家認為如何呢？　

小Ｂ囡

 

又兩個星期喇！

 

兩個星期前去檢查俾醫生話BB既體型偏小，所以被安排兩星期後再番健康院檢查。

係呢兩個星期，我好努力咁增磅：

朝早食雞蛋，夜晚食芝士，

仲有寧願一人留係屋企，而避免減少夜晚外出遲返夜訓。

 

今日再番健康院檢查，做完一般檢查之後，跟住就見護士喇。

護士：「幾好丫，兩個星期重左0.45kg，重0.5kg就超標架喇。」

我心諗，點解好似咁兒嬉的呢，可能SIZE呢樣野實在太主觀喇。

因為上次係醫生認為要番黎再檢查，所以後黎都要再見一次醫生跟進。

醫生為我度肚摸肚後：「你而家已經26週，但係個肚既SIZE只有24週....」

「你由第6週開始黎做檢查，到而家26週，增磅並不理想。」

「20週時你番醫院照過超聲波無問題，咁你就番醫院再做多次檢查啦！」

醫生話輕磅有可能係我吸收營養不夠，但亦有機會係BB本身出現問題。

最後安排我一星期後番醫院再作檢查。

 

實在太令人擔心............. 

 

P.S. 增磅共11磅