玩爛Gag?

幫潼潼檢查功課，睇家課冊既時候，見到佢將個「交」字寫成「文」字。

叫衰妹自己望清楚，佢先恍然大悟: 「呀... 係喎.......!」

潼潼媽遞上練習簿: 「快啲寫番兩撇佢呀!」

潼潼寫了一陣: 「寫好喇!」

潼潼媽一睇，係個「八」字........ 一.一! (滴汗)

潼潼笑住﹑得戚地: 「又係你話寫番兩撇既。」

唉.... 真係無佢符............. (笑) 係我講錯囉.... 唯有叫佢成個字成番好啦!

笑話連篇

雖然潼潼已經六歲喇，但好多時說話仍然令人啼笑皆非。
（因為潼潼媽太懶，以下有部份係六歲前一﹑兩個月的笑話）

一日，姐姐將買番用剩既羌放係自己裁種既一棵辣椒的盆邊。
潼潼　：姐姐好犀利呀！種得舊羌呀！


姐姐電話大頭照張相，
係將潼潼張相嵌入奧巴馬睇畫展既圖片中

潼潼睇見信以為真
整晚異常興奮：點解澳巴馬有我張相既？唔知會唔會係電視度睇到呢？


年初二潼潼好想出去出面睇煙花
但因為趕唔切，爸爸話係屋企睇電視
爸爸：一邊拎住汽水﹑一邊睇住高清電視，咪幾好
潼潼：咁你拎埋汽水出去睇咪一樣


潼潼一出生時，頭殼漲左一個似乒乓球大小物體
經醫生檢驗無大碍，長大期間呢個物體已逐漸拉平，
不過仍然令頭形唔平均，所以潼潼帶唔到頭箍，會經常「冼」落嚟。
潼潼有次好想買頭箍，經我再提醒，
潼潼不忿地：你下次生我果陣唔好生到咁喇！


潼潼問：你鐘意爸爸定潼潼多啲呀？
潼潼媽：緊係潼潼啦！
潼潼：咁你點解要同爸爸結婚呀？

10．１港殤

10月１日係國慶曰，但係呢日就發生左一件令人非常悲傷既事情。

一艘載有百多人既渡輪，準備接載乘客出海觀賞煙花時，同另一艘渡輪相撞。被撞既小輪迅速下沉，船上三十多人死亡。

本來係一個歡欣既日子，一家大細高高興興地慶祝，但係發生咁嚴重既悲劇。加上今次意外中好多罹難者都係一家大小出去玩，當中亦有小朋友，令身為媽媽既我更感心痛。

唔知點解，潼潼係同理心方面比較弱，好多事情都未能體會人家既感受。睇住新聞，我亦嘗試同阿囡講解撞船意外，希望佢明白。


潼潼媽：啲爸爸媽咪無左囝囡好可憐。

潼潼：係呀！又要生過喇!


哎呀~　囡呀！痛失自己骨肉，唔係生過就得架喇！你幾時先會明白啊?

潼潼與MICKY (第2回)

好多時潼潼臨訓前都喜歡要我扮MICKY同佢傾偈。呢日我用緊MICKY身份同佢傾偈既時候，唔小心話左佢一句，叫佢快D訓，佢竟然遷怒於MICKY。　以下係潼潼同「MICKY」既對話，當中其實夾雜左唔少我地平時對潼潼講既說話。

潼潼：我唔同你訓呀！你自己係果度訓。

媽meMICKY：但係果度訓得唔舒服架喎!

潼潼：咁你訓呢度啦！其實你都大個喇！要自己訓架喇！　（呢句係爸爸平時對潼潼講既）

媽meMICKY：你都唔錫我既!  (呢句係媽me學潼潼講)

潼潼：唔可以講晦氣說話架。 （平時潼潼媽就係咁回應潼潼，又輪到潼潼學番我既說話）

媽meMICKY：咁我同媽me訓唔同你訓。

潼潼：聽日我會同番你訓。

之後果句先犀利，嚇死潼潼媽。

潼潼一邊用毛巾仔幫MICKY冚被，一邊自言自語：MICKY真係大個喇！張毛巾都已經唔夠喇。估唔到公仔都會大個。

 公仔都會大個??? 咁真係好得人驚喎!

童真 - 潼潼與MICKY

這算是童真嗎? 都已經五歲半喇! 仲係咁單純，都唔知好嬲定好笑。

潼潼: 我好嬲呀!

媽咪: 做咩事嬲呀?

潼潼: Micky 笑我 (其實係媽咪笑)

媽咪: 邊有呀? 我都聽唔到!

潼潼: 有呀! 我聽到! (唔係咁嚇人呀?)

潼潼: Micky要同我講對住，我先攬佢訓

我當然無扮Micky同佢講對唔住，最後潼潼唔肯原諒Micky，將佢卷埋張蓆入面由得佢自己訓。

竟然可以嬲一個毛公仔，我真係服左你。

一齊去旅行

「媽咪同嫲嫲﹑姑姐去旅行好唔好呀?」

「唔好!」

「咁潼潼同嫲嫲﹑姑姐去旅行好無呀?」

「唔好! 我要同媽咪一齊去。」

「咁潼潼﹑媽咪﹑爸爸同嫲嫲﹑姑姐一齊去旅行好無?」

「咁姐姐呢?」

「咁姐姐要放假同朋友玩嘛! 」

「不如我﹑媽咪﹑姐姐同嫲嫲﹑姑姐去旅行。」

「咁爸爸呢?」

「爸爸搵佢啲朋友玩。」

好玩遊戲 - 我家之最

呢個晚上，同潼潼閒聊時發現一個好好玩既「遊戲」。

最初係問潼潼:

「邊個最乖?」

「邊個最曳?」

「邊個最鐘意喊?」

呢d都係父母最鐘意問﹑用黎椰榆小朋友既問題。不過問問下，覺得有趣，就越問越不著邊際，發現小朋友既答案真係好有趣好好笑。

「邊個最肥?」

「(笑) 咪你(媽咪) 囉! 」(好直接呀)

「邊個最有錢?」

「爸爸!」

「點解?」

「因為爸爸成日係你度拎錢。」

「邊個最窮?」

「媽咪!」

「因為成日俾爸爸拎哂錢。」

哈哈~~ 小朋友睇野好表面，唔會明白大人間o係金錢上既分工。

聽聽小朋友眼中既世界，真係好可愛好有趣呢!

五歲的迷思

以下內容係潼潼媽既面書寫過，不過都想係潼潼BLOG度記錄番。

潼潼三歲時，問我地幾多歲。
潼潼：「姐姐幾多歲?」
潼潼媽：「四歲!」
潼潼：「媽咪幾多歲?」
潼潼媽：「五歲!」
潼潼：「五歲就生bb呀?」
潼潼媽：「係呀!」
今日............
潼潼：「12月姐姐生日之後就到我生日喇!」
潼潼媽：「係呀! 你生日就係媽咪肚好痛好痛生你果日」
潼潼：「你果日肚痛生左我? 我就快五歲喇，我五歲可能會生BB」

另日：
爸爸：「潼潼五歲生日喇喎！係咪可以生BB呀？」
潼潼：「都可以嘅！唔通一百歲先生咩？」

姐姐仲同我講，潼潼話要生個BB，第日要同佢一齊番學添。

學數之購物遊戲

阿女對數既概念仍然比較差，只會數數至二十幾，所以都會諗下點樣教佢100以內既數。

今日同阿囡購物遊戲：

潼潼：呢本書幾多錢呀?
潼潼媽：十蚊
潼潼：我俾咭
潼潼媽：　....... （一心諗住教佢數數，收咭點教呀？）我呢度唔收咭架！
潼潼：我嘟咭
潼潼媽：無呀！我呢度鋪頭仔唔收咭架！！


潼潼：本書咁貴架？
潼潼媽：係咁貴架！你落下睇下，無收貴你架！
潼潼話：我去圖書館，唔洗錢，我下次唔嚟你度買喇！
潼潼媽：

同慶中秋

仲有幾日中秋節，但係潼潼已經買左燈籠喇!

潼潼每晚都唔願訓，例必係訓覺時總係說話多多，人家的談心時間，變成潼潼既獨腳戲時段。

潼潼：今日學校整左個燈籠，舅父又打電話黎話有個燈籠送俾我。咁我有三個燈籠，一個俾你，一個俾姐姐。我地三個一齊落去玩。爸爸就預備蠟燭，同埋睇住D野。

我覺得好笑，於是叫爸爸入黎，再複述潼潼既「大計」俾爸爸聽。

爸爸：咁我無得玩架？

潼潼：咁我俾你玩喇！

爸爸：咁你咪無得玩？

潼潼：唔係~~ 我地分享一齊玩。

爸爸：車~~ (出左房)

潼潼：爸爸都唔玩既！咁佢睇住D野咪岩岩好囉！

駁咀大師

潼潼已經四歲多，但平時講野依然係沒頭沒腦的。不過駁咀的說話卻好叻。

 

2011年5月27日

潼潼跟姐姐係商場入面邊行邊玩，跌跌碰碰咁。就快出商場時，媽me提醒潼潼一句，係街上走要小心，唔好再玩喇！

潼潼轉向姐姐話：媽me話唔好再玩呀！你又要同我玩！

*******************************************

同日晚上番到屋企，潼潼玩緊當日買既搖搖。爸爸話早知潼潼唔識玩搖搖架啦，但係又要買。

潼潼：咁試下加嘛！試下唔得咩？試下唔好咩？

 

2011年5月28日

潼潼好多時有人入左洗手間之後佢先話要去尿尿。今日又係咁，媽媽故意係洗手間入面打趣：無得去呀！！其實就趕緊出黎。

潼潼媽開門企係門口：無得屙尿呀！

潼潼：咁你開門做咩呀？

 

自創故事

呢日聽到潼潼自言自言係度講故事。

 

從前有個白雪公主，佢唔鐘意沖涼。

佢見到小矮人，問小矮人：你可唔可以同我玩呀？

小矮人話：唔可以呀！

（白雪公主）點解呀？

（小矮人）因為你好臭！

跟住白雪公主見到大個人　（潼潼真係話「大個人」）

（白雪公主）你可唔可以同我玩呀？

（大個人）唔可以！

（白雪公主）點解呀？

（大個人）因為你好臭囉！

咁白雪公主去沖涼，就同小矮人好開心咁玩捉依因喇！

 

佢講個故事時講得好流暢，令我有點驚訝。不過到當我要求佢再講故事俾我聽既時候，就講到亂哂龍兼結結巴巴。

借口

潼潼呢個年齡特別喜愛為自己編造借口，佢地其實無意識講大話，只係自我保護既自然反應。不過潼潼借口真係幾多，連老師都係咁講，但係d借口都幾亂黎。

 

事件一

俾塊曲奇佢食，佢又話唔食，但之後又拎左一塊話要試下。

潼潼媽：你又話唔食？

潼潼：我試下唶! 你睇下我個口好細，係試下唶! 個口好大先係食。

 

事件二

姐姐投訴潼潼放學去公園玩極都唔肯走

潼潼：係個藍色衫果個男仔唔俾我走呀!

 

事件三

潼潼抖動身體扭計

潼潼媽：你做咩呀？

潼潼：震震震囉！

潼潼媽：做咩震震震

潼潼：我凍丫嘛！

 

事件四

同潼潼出街食緊野，佢不斷重複又重複地要求想睇之前YOUTUBE睇過既一首兒歌VIDEO。

潼潼：媽me~ 我想睇kulala！....................　媽me~~~~~~

潼潼媽不耐煩地：我講左好多次喇！我話係邊度先有得睇呀？

潼潼：kulala係咪「我愛洗澡」呀?

潼潼媽：係！

潼潼：我係想問個名咋！

 

潼潼妙語

潼潼而家開始學識一d英文生字就成日話自己識英文。

潼潼媽：「嘩！點解你識既？」

潼潼：「緊係啦！我有番學架嘛！你番工，都無番學，緊係唔識啦！」

潼潼媽：「咁你教我得唔得呀？」

潼潼：「你自己試下學啦！」

*******************************************

2月2日

潼潼生日前，成日問係咪自己就黎四歲。而家過左生日，就話自己就黎五歲。呢日就自言自 語數住：四歲之後五歲；五歲之後六歲；六歲之後七歲．．．．．．

潼潼：八歲之後十歲係咪呀？

潼潼媽：你話呢？

潼潼：唔係囉！

潼潼媽：咁幾多歲呀？

潼潼：係咪九歲呀？

潼潼媽：係呀！

潼潼：九歲之後十一歲，係咪呀？

潼潼媽：你話呢？

潼潼：唔係呀？

潼潼媽：咁幾多歲呀？

潼潼：十歲！

阿囡，媽me最初以為你真係唔識，原來你係度玩我.......

*******************************************

2月2日

剛買完賀年禮品，又見到另一盒糖果好似唔錯。

潼潼媽：哎呀！呢個好似好食D喎.... 不過都買齊哂咯！

潼潼：咁買黎俾自己食囉！

你真係想得周到。

*******************************************

2月3日

潼潼又話要派利是

「要結左婚先派得架」

潼潼 : 我要結婚

「要兩個人先可以結婚」 

潼潼 : 咁我同姐姐結婚

「要同男仔結婚」

潼潼 : 咁我同爸爸結婚

「爸爸同媽me結左婚喇 ! 你有邊個靚仔既同學仔呀?」

潼潼 : XX

其實潼潼既答案，全部都係我意料之內。

 

 

同學仔花名

早前潼潼已經向我投訴，佢有位同學仔成日讀錯佢個名做李依「鐸」。我只好同潼潼講，叫佢講番俾同學仔知個正確發音。

呢晚爸爸問潼潼最要好既同學仔係邊個。

潼潼 : 麥卓「鐸」

潼潼媽 : 哈哈~~ 點解會叫麥卓「鐸」既?

潼潼 : 佢成日叫我李依「鐸」，咁我咪叫番佢做麥卓「鐸」囉!

估唔到咁細個小朋友就識得以牙還牙，幫同學仔改花名。

俾心機賺錢

叫潼潼去洗面刷牙，佢就多多藉口。佢見牆身有灰水剝落跌哂係地，話要幫手喎！

潼潼：你去洗面刷牙先啦！唔駛等我喇！

好啦！我一邊洗面刷牙，一邊見潼潼真係拎佢D玩具掃把同垃圾剷好認真咁掃。

掃掃下仲要係咁嗌好攰添！真定假架你．．．．．　

潼潼：間屋爛哂喇！

潼潼媽：係呀！爛哂呀！

潼潼：咁買果間屋啦！

潼潼媽：買果間屋好貴架喎！我無錢呀！

潼潼：咁你俾心機賺多D錢囉！

身份調換

唉...... 我而家成日俾潼潼訓話，就黎我似做囡多過佢。

呢日潼潼學校開生日會，拎左一個萬花筒玩具番黎。我拎黎睇下。

潼潼:：「你都無問我，你問我玩唔玩得先。」

唉．．．．．．．　又黎．．．．．．

潼潼媽問完拎黎玩左陣。

潼潼：「玩完玩具要唔要洗手呀？」

呢個好習慣黎既，我附和佢一齊去洗手。洗完手我又手多多拎番個萬花筒望一陣，然後俾番潼潼。

潼潼：「你擺番好丫！」

正以為潼潼指我做野．．．　不過又真係我自己拎黎玩，係咪應該自己擺番好呢？

潼潼:：「我洗左手唔掂呢個。」

原來如此．．．．

潼潼媽：「咁擺邊度呀？」

潼潼：「擺係檯上面丫！」

姐姐切好生果拎過黎

潼潼：「玩完玩具食野要洗手喎！」

潼潼媽明知衰左亦死撐：「洗左囉！」

潼潼：「但係你頭先掂左呢個喎！」

潼潼媽：「唔緊要啦！」（差點就想搬出「我係大人唔怕」既歪理）

潼潼:：「唔得架！掂完玩具要洗手啊，有細菌架嘛！」

潼潼好努力搬出「細菌」呢個詞語，講時有點結巴，證明佢只係剛剛學會呢個詞，仲未係好熟悉。

潼潼媽：「唉！！！！」好無奈地入去隨便地洗左手就出黎食生果。

 

大人的對話

呢排好似寫潼潼既「說話」好似寫得好多，而且感覺有點負面。唔想講佢咁多壞話，所以將呢篇網誌設為私人網誌。

以下係今晚臨睡前跟潼潼既對話，佢講說話時的用字實在有D嚇親我，完全唔似一個小朋友既說話。噢 ! 我天真可愛既潼潼咩時候突然長大呀! 希望呢個情況只係偶然發生。

可能係學校岩岩練習過剪紙，今晚潼潼自己要求要剪紙，將白紙剪成一條條既紙條。

差唔多到訓覺時候。

潼潼媽 : 「潼潼，要訓覺喇 !」

潼潼 : 「我剪埋先丫。」

潼潼媽番入房整理好床舖，再望下個鐘，時間實在唔早，諗住出去提醒潼潼，預告俾佢知剪完手上紙條就要訓。出到去見到潼潼將紙條剪剩好幼。

潼潼媽 : 「唔好剪喇 ! 咁幼好易剪到手。」

潼潼好專心，眼睛無離開過張紙，淡淡的回答 : 「我剪埋先呀! 你番入去啦!!!」

 我腦內突然出現一個畫面 : 年老既我因為管束女兒，而被喝罵番入房，不要多管閒事。

臨場執生能力極弱既我，呢個時候求救於潼潼爸。

(唔記得潼潼爸同潼潼講乜)

潼潼繼續低頭剪紙 : 「我做緊野呀! 一陣先。」

潼潼爸再叫潼潼 : 「我叫你，你聽唔聽到?」

潼潼一本正經地 : 「我聽唔到，咁你大聲D講我咪聽到囉!」

對話期間，潼潼真係成個大人咁。佢無耍脾氣，亦無表現嬲怒，語氣平淡，一直專注於自己既工作。對於佢既專注，本來值得加許。不過呢個態度實在不要得呢 !

說教潼

潼潼媽想起一D又寫一D。

時代唔同，由潼潼出世到而家，佢無俾我地打過幾多次，通常都係向佢訓話說道理。或者因為咁，小朋友都學會道理多多。

 

9月25日  星期六早上

潼潼媽係洗手間

潼潼係外面叫 : 「媽me，你未收番好電腦同凳呀 ! 」

潼潼媽年紀大無記性，唔太肯定，向外一望 : 「係咩? 唔係呀! 收好左呀!」

潼潼 : 「係我幫你收好囉 ! 下次你要自己收好知唔知呀?」

潼潼媽 : 「哦! 知道喇 !」

 

又有時，當我係筆筒拎起支筆黎用既時候.....

潼潼 : 「呢支筆我架喎 ! 你用支筆要問我先架 ! 」

潼潼媽 : 「咁可唔可以借支筆我用一陣呀? 」

潼潼 : 「好啦 !」

潼潼媽 : 「唔該 ! 」

潼潼 : 「唔! 乖喇 !」

 

假日朝早，爸爸遲遲未起身。

潼潼 : 「爸爸!! 起身喇!! 快d起身啦! 你訓左好耐喇! 」

 

當潼潼認為爸爸唔岩既時候

潼潼 : 「你曳呀! 我唔同你講野呀! 我好眼訓，我要訓覺呀! 」

執生

潼潼說話好會執生，有時都唔知算唔算係好事。

以前我問潼潼鐘意邊個，佢會答鐘意姐姐同媽me；對住爸爸既時候，又會識答話潼意爸爸。之前亦有篇網誌寫過潼潼會為自己想動手打媽me而解話。今日又有「新作」

潼潼用匙「不」蛋撻食既時候，「不」極都「不」唔起，於是欠缺耐性既潼潼又發脾氣。

潼潼：「呀~~ 呀~~ 不唔到呀~~~」

潼潼媽已經提醒過潼潼好多次，又乜野唔順心既事情都唔需要呀呀聲叫，只需要講。一係自己努力嘗試，或者請大人幫手。

潼潼媽：「仲乜又呀呀呀咁叫？」

潼潼立即給我回答：「我呀呀聲咁唱歌唶！」

對於潼潼咁強既應變及執生能力，不善辭令既潼潼媽真係無言以對。