圖像記憶

潼潼升小一，英默內容多左。同佢默寫好幾次，佢都好快就唔記得。因為潼潼無學過併音，所以要用併音記得啲字點串亦有啲難度。所以潼潼媽就用故事同圖像幫佢一把。

幫咁多個字諗故事同圖像，攪到潼潼媽頭都大埋。我邊有咁好幻想力，幫咁多個字諗故事。於是潼潼又話幫手諗，就諗個"FRIEND"字。

見佢係個字上面點左幾個笑面，咁就記得點串? 好! 就試一次。

潼潼: 呢個係我同盈盈同表弟一齊玩。
潼潼媽: 咁點串?
潼潼: f - r - i - n - d
潼潼媽: 差唔多喇! 差個e字
潼潼望下個字，笑住: 係喎.... 漏左盈盈添......
記得有盈盈之後，潼潼再串幾次都串岩個字喇!

潼潼媽真係覺得小朋友既想像力超神奇。明明個字上面有六對眼睛，六個人物，潼潼係點樣將個呢六個字化為三個人物既呢? 佢又係點樣記得佢既順序既呢?

圖像記憶真係幾有效好玩，不過長此下去，潼潼媽真係會腦爆炸。

功課泄私隱

呢個鬼靈精係咪有心戲弄媽ME呢，居然係作句功課上寫上呢一句。睇下左下角，仲要連老師都教埋佢點寫馬桶個桶字，幫兇呀! >_<咁既情況下，緊係俾我利誘，然後要佢改成另一句啦! :P你個衰妹，下次唔好再出賣我喇!

小學生了

呢日，潼潼番小學喇!

由於仲喺北角住，所以要搭地鐵番學。好彩今日未係正式番學，只係俾小朋友實習下上學既安排唶 ! 潼潼，俾心機啊!

畢業旅行

原定於4月26日既畢業旅行，因為天雨關係，改左係5月10日出發，目的地係海洋公園。

呢日上午既天氣還可以，不過唔知係咪潼潼掛住玩，所以影相既笑容有d牽強。

影完相就即係去威威樂園玩。但由於潼潼媽無幫相機叉足電，所以之後既行程係無相睇。

而且下午係暴雨，加上強國人旅行團充斥海洋公園，混亂情況可想而知。潼潼媽係嬲到寧願衝番出去俾雨淋都唔同佢地爭排隊，都係拿拿聲走人算喇。

畢業表演服裝

收到學校通告，要為小朋友準備七月畢業禮上的表演服。家長可以選擇由學校代勞從淘寶代訂，或者依學校指定既基本式樣自己選購。

呢個就係學校會係淘寶訂既款式，全套只係HKD85.00

不過款式加上模特兒既打扮同甫士，實在令我受不了，於是決定自己配搭。呢個就係我努力之後既結果。

應該比較好卦? 個蝴蝶結本來扣係裙度，而家正好可以扣係衫領度。只可惜後黎發現原來蝴蝶結一定要經學校代訂。

好! 到潼潼既真人示範喇。

小一派位 - 超級LUCKY

現今既香港社會，即使入幼稚園都好似上戰場咁，個個媽媽準備十足，為子女報讀多間名校再從中篩選。相比之下，潼潼媽就懶散得多。

可能每個人既教育方針都唔同，還好我同潼潼爸係呢方面都比較有共識，再加上客觀條件，係潼潼升小一選校之中，我地只準備讓潼潼參加香港教育制度下，可以話好公平，亦都可以話唔公平既「大抽獎」。

小一派位分兩個階段 - 「自行分配」及「統一派位」。係第一階段公佈結果之前，我地已經參加左交表學校既簡介會。係會中學校都俾左一D已知既數據我地，聽完之後，真係心中一涼，知道潼潼只憑「首名子女」既「優勢」而獲得學位既機會極渺少。加上結果公佈前一日，新聞節目已經報導今年在第一階段獲派位的成功率係過去十多年新低，基本上可以話希望 = 零。

但點都好，到呢個大日子，我盡量懷著正能量，再希望加上潼潼既少少運氣，故且上網查一查結果。

結果??? 卻令我喜出望外!!!!! 潼潼竟然得左

我同潼潼爸都開心到不得了。第二階段係6月先會有結果，潼潼咁快得左，我同潼潼爸都少頭痛半年喇!!

阿囡，你係得既!!! 希望呢個會係個好開始。

K3學校旅行

又係幼稚園既學校旅行喇! 今次既行程係香港文化博物館 > 嘉湖海逸酒店自助午餐 > 香港濕地公園。今年已經係o係幼稚園最後一次旅行，明年潼潼已經升小學，到時可能無機會同佢一齊參加學校旅行喇!

 

去到濕地公園，花左d時間係門口大斜坡既大草地上，同埋入面既遊樂室度玩，媽咪同潼潼又想係濕地公園集齊蓋章同拓印，所以時間就變得非常緊拙。整個行程像走馬看花，連相都無乜點影過。

就係咁匆匆忙忙就完結左最後一年既幼稚園旅行， 雖然係咁，不過都希望潼潼玩得開心啦!

交小一派位表

呢個星期開始要遞小一入學申請表，開始第一階段 - 自行分配學位。
 
同其它媽咪唔同，我無周圍幫潼潼張羅學校，無去面試，所以相比下輕鬆好多。講真，要面試的話，我地真係無乜野可以比人睇，憑乜野同一爭丫!

阿囡，靠你自己喇! 睇睇你有幾好運氣。

K3開學

放左悠長暑假，9月4日新學年開學喇! 同往年一樣，潼潼媽特別請左日假陪阿囡番學。



個多月無見，好多老師同嬸嬸見到潼潼第一句就話佢高左。日日見住又不為意，後黎認真望下佢條裙，再度下高，又真係高左喎! 小朋友真係大得快。



潼潼今年升高班喇! 係幼稚園生活既最後一年，其實我都係好唔捨得。一黎呢間學校上至校長﹑下至校工都對幼兒教育好有熱誠，對小朋友好有愛心。其次就係因為潼潼媽既蜜月期就快完喇! 升到小學真係有排捱。

陪左潼潼開學三年喇! (如果計埋學前班就四年添) 特登搵番之前開學首日既相回顧下。

K1首日開學

K2首日開學


睇下潼潼，K1同K2既時候都仲係面圓圓，變化唔大。而家塊面尖哂，真係變左大姐姐喇!

 

K2散學禮

又係一個期待既日子 - K2散學禮。

點解咁期待?因為散學禮有表演睇囉! 今次學校散學禮既主題係「化粧舞會」，而潼潼一班係揀左「非洲歷險記」黎表現。不過可惜既係，爸爸今次要加班，無辦法參加今次散學禮 ; 亦好遺憾，無左爸爸既協助，呢個媽媽係「攝」唔到位 + 唔夠高 + 眼盲搵唔到阿囡既情況之下，係唔能夠錄到阿囡既表演情況。

散學禮除左表演項目，仲有頒獎，潼潼今年係得禮貌獎。

跟住仲有遊戲及抽獎，學校真係好肯花心思，好好玩。抽獎禮品真係好多份，我同潼潼一直都好緊張幫手叫名，但係一直都抽唔中。不過我都好欣賞潼潼，即使只係其它同學仔抽中，佢都會替人開心。

去到最後開始抽最後三份大獎，居然抽中潼潼! 真係好開心呀! 潼潼媽未試過咁LUCKY，阿囡你係得既。

遲熟

潼潼尋日因發燒請左日假，今日照常上課之後又再發燒。所以媽me同老師通左次電話，諗住了解一下潼潼o係學校既況，點知傾傾下，又去到潼潼既社交問題上。

從老師口中得知，潼潼今日o係學校情況依然活躍，好多說話。不過亦提到潼潼呢排多野講左，而且係講到老師望住佢，其它小朋友靜番哂，佢都唔識停。 老師話佢係唔識睇人眉頭眼額。

於是就同老師分享潼潼媽比較擔心既問題，就係潼潼交友既問題。因為潼潼表現遲熟，亦即係唔得世故，到而家講說話都好似小朋友咁，想講就講，有時真係怕得罪左人都唔知。最近就從潼潼口中聽到話邊個邊個唔啋佢，邊個邊個唔同佢玩，令潼潼媽擔心潼潼既「無心之失」令佢無哂朋友。我知有時潼潼既說話可能傷到其它小朋友，不過佢又真係好傻瓜咁不自知，只要有人同佢玩，佢真係可以唔理果個咩人都可以玩一餐，個個小朋友係佢心目中都係「朋友」，仲未識得「選擇」，無「好朋友」既等級。

老師只著我多d同潼潼講下同小朋友應有既相處方式，不過就叫我唔洗太擔心，認為潼潼同其它小朋友相處既問題其實唔係咁嚴重，可能只係班中其中一d比較早熟既小朋友已形成自己既圈子，所以潼潼先容入唔到佢地。而且老師認為無固定朋友係一件好事，起碼去到小學都會好快有新既朋友，會比較易適應。

唔知老師係咪只係想tum住我。不過點都好，學汪培延話齋，遲熟唔係孩子既錯，唯有等佢慢慢長大。現階段可以做既，就只有向佢解釋俾課堂上應遵守既秩序。

超人來了

這學校太可愛了。o係呢個「專題研習活動」中，容許小朋友自選生字，所以今日係潼潼既功課中搵到「超人迪加」

但係係咪寫錯字呢?

用心做家課

未番到屋企，潼潼已經打電話俾我。

「媽me，你唔駛檢查我啲功課喇！我已經檢查咗，做得好整齊好靚呀！」

「咁我番嚟欣賞下得唔得呀？」

「好吖！」

咦？今次又真係寫得唔錯喎！媽咪唔記得影相，就第二日影番張相補數啦！反正寫既生字都係一樣唶！

遊北潭涌渡假營

呢日參加左潼潼幼稚園家校會既活動 - 遊北潭涌渡假營。

到達目的地之後既第一個活動係集體遊戲



其實d遊戲都幾好玩，好多小朋友都玩得好開心

只係潼潼係度玩性格，獨家村，人地玩到笑呵呵，佢就好似舊雲咁週圍遊，我真係俾佢激死。

係營內午飯之後就係自由活動時間，最初潼潼只肯賴係遊樂場，唔肯去其它地方玩。唔係嘛?! 咁遠黎到剩係玩遊樂場? 咁不如係屋企附近遊樂場玩? 又激死....  之後先tum到佢去玩跳彈床。跳跳扎....岩哂潼潼。

再去玩其它遊樂設施

下面張相叫「強顏歡笑」 其實潼潼驚到不得了，不過仲要笑住咁俾我影相。

我同老師傾緊對潼潼既升學問題既時候，潼潼就同其它小朋友玩肥皂泡

最欣慰係見到潼潼都同其它小朋友玩得埋，而且亦算主動 (減低潼潼媽對獨生女既內疚感)。