故事書

潼潼又有新創作，今次話要自己整本故事書，由佢話圖畫，媽咪撰文喎!

雖然故事內容唔知講乜，插圖亦畫都唔好，不過都係好嘗，值得鼓勵。

寫新歌

潼潼話要自己寫首歌喎! 不過似練字多D。

東莞嘉輝會旅行

早前從團購買左東莞嘉輝會既套票，兩大一小，唔包車票，售價不用四百大元，幾抵玩。我地趁潼潼星期一係學校假期，揀左禮拜六﹑日同潼潼上大陸玩。

雖然天氣報告話天氣唔係咁好，會落雨，還好去到第一日只係天陰。

今次算係潼潼第一次正正式式同我地「外遊」，到達酒店房間，見到張大床已經開心到不得了，o係大床上雀躍地跳 - 就好似潼潼媽細個第一次同屋企人去旅行(只係澳門)一樣，三姐弟一齊床上跳。當時我係升小六，應該十一歲?才第一次出外旅行。

放好物件我地就去嘉輝會。雖然比較有意義既陶藝製作同士多啤梨園都無開，但呢度要景有景﹑要玩有玩，要求唔高的話都算唔錯喇!

入面有個小型動物園，不過都幾頹.... 只係有d禽鳥類﹑小動物，但係潼潼已經嚇得不得了，連相都無影。 計

仲有其它玩意，全部都逐項收費，不過套票平左，而且出黎玩，所以都無計，樣樣都俾潼潼試﹑俾潼潼玩。當然機動遊戲唔敢亂黎，爸爸睇過覺得新淨﹑安全先敢俾潼潼玩。睇下，個袋鼠彈彈得潼潼一個玩咋!

花海幾靚，好多新人係度影相。

玩完食完，番去洗白白浸浴缸，潼潼又再興奮。因為平時家中只有企缸，今次係佢第一之浸浴缸，傻妹話好似浸溫泉。

第二日已經落雨，好彩之前一日已經玩左嘉輝會，呢一日出番深圳大型商場，食飯溜冰，跟住就回程番香港喇!

第一面獎牌

呢日係潼潼學校既舉行運動會既日子



比賽項目只有一項: 四十米賽跑
起跑喇!! 努力!! 加油!! 努力!! 加油!!

賽前話要跑第一既潼潼，最後奪得銅獎。

其實係每場賽事跑八條線分冠亞季軍，所以得獎機會係八分三。真係好易中，好易買餐餸。
ANYWAY，潼潼得到獎我地都好開心既。

賽事之後仲有遊戲玩添!

溜冰

潼潼第一次溜冰，老實講，又再一次顯示俾我睇，佢比我強，因為有咁既勇氣去做，潼潼媽真係自愧不如。


其實以第一次溜冰，我覺得佢玩得唔錯，最緊要ENJOY。諗住佢有咁既興趣，都想試下俾佢學，唔係要玩得好叻，不過只係想佢識。

佢玩左一段時間，番黎綁過鞋帶後，我問佢要唔要休息下，佢都話唔洗，要再出去玩。不過再玩多陣，到走果陣佢表現得有點疲累，仲竟然話唔再玩喇 !

好可惜.... 唯有暫時停一停! 等佢再有興趣時先再試過啦!

衣服配襯

我地屋企地方淺窄，潼潼到而家都無佢自己既房間，更加無一個配合佢高度既衣櫃。每次拎衫都係地幫佢拎，或者佢俾自己指住黎揀。

潼潼媽又好懶散，照顧得潼潼唔係咁週到。有時掛住自己裝身既時候，就無乜點理潼潼。呢日又係咁，準備出街，顧得掂自己就理唔到個囡喇！到潼潼叫我既時候，我望下個房，剩係見到衣櫃開左，同埋有張凳仔係度。之後再去另一間房，見到潼潼排好兩件衫，然後問我襯唔襯。原來潼潼已經自己從衣櫃都揀好衫同埋拎左落黎放好添。

呢件就係潼潼揀既衫喇。其實顏色配搭都ＯＫ既。不過其實入面果件係配legging既衫款黎，比較長。但係為左唔想打繫潼潼既第一次，我都即管幫佢試下著。

 

還可以罷?後面咁岩有個小蝴蠂，將佢放埋出黎仲好趣緻添。



見睇落都唔算太差，就一於就咁帶潼潼去街街咯。好!! 出發!!!!!

寫生字

之前潼潼番K1一直都只係線條練習，無寫過一個生字。潼潼媽一直以為要等K2下學期先開始寫字，所以潼潼仲有時間慢慢練習。點知呢個暑假派番黎既功課，竟然要開始寫生字，實在嚇我一跳。

潼潼寫生字既工作紙無虛線﹑無筆順，只得一個字俾你參照。潼潼要寫既中文字有「一」﹑「土」﹑「口」同「王」等，另外仲有D阿拉伯數目字。個衰妹緊係無咁易就範乖乖寫字啦，寫到個「土」時已經同媽me角力喇!

呢日又居然好專心好俾心機咁寫字喎! 好啦! 幫你錄低佢俾你認下叻啦!

第一張八達通

雖然潼潼已經四歲，但生得細粒。本來三歲已經要俾車資，不過就賺左一年多。呢日潼潼終於擁有佢人生既第一張八達通喇，小妮子好興奮呢。

寫英文字

「專家」話小朋友學寫字先要配合手部小肌既發展，所以我從來無勉強潼潼學寫字。

「專家」話小朋友對各方面既發展都有各自既敏感期 。想要好好培養小朋友，就要懂得把握佢地既敏感期。

係學寫字方面，學校係有做線條練習，不過懶媽媽就無額外要佢多練習。

不過呢日潼潼就無端端自發地寫左幾個英文字。

姐姐話潼潼自己係度寫英文字母，唔識寫時就自己走去門口貼住既字母表度，用手指指劃住，之後再自己坐番埋位寫。

或者，潼潼已到左學習寫字既敏感期。

 

後話:  雖然我有即時誇讚潼潼，但之後幾日潼潼都唔肯提起筆寫字喇。

書面語運用

昨日老師做家訪既時候都提到講故事既時候可以嘗試讀書面語，我都解釋俾老師聽，潼潼對於用書面語講故事表現抗拒，暫時只接受我讀出書名。老師就提議我同潼潼協議一星期一次用書面語講故事。

今朝食早餐既時候，潼潼自言自語地：「食早餐，好味的早餐！」

哦．．．　雖然平時講故事時只係讀書名，但係潼潼原來已經學懂了佢第一個書面語　－　「的」。都唔錯丫！

2010除夕夜+倒數

爸爸去狂歡，剩低我同囡囡兩個孤單係屋企點得架! 碰岩姐姐係呢日生日，一於一齊出去食晚飯啦! 仲臨時約埋婆婆出黎添!

到年終年頭就係雙糧+花紅既時候，一於食好D。

 

潼潼又表演食檸檬喇! 睇下佢表情幾滑稽。

其實我覺得潼潼未必真係咁鐘意食檸檬架，只係佢見每次佢食檸檬時我地都笑得咁開心，所以佢故意整古做怪唶。

之前等位果陣潼潼一直嗌肚餓，但係食左唔係好多佢就話嘴痛唔食。問佢咁仲食唔食甜品，佢又話食甜品時就唔痛喇喎!

睇佢食得幾落力，同潼潼媽一樣，個胃有第二個甜品格。

食完野出黎，商場有活動喎!人山人海。

潼潼又黎湊下熱鬧先。

見到女兒甜美既笑容，就係我一生最大的幸福。

番到屋企都十一點幾喇! 潼潼雖然話眼訓，但都堅持住，同我一齊睇埋電視上既倒數同煙火表演。

無諗過可以同潼潼一齊迎接2011年既來臨，多謝! 希望新一年大家都平安快樂。

初嚐兒童餐

今日去商場購物行街街，經過一個餐廳爸爸已經睇中左個兒童餐，話諗住夜晚係度食飯俾潼潼試下。

潼潼第一次自己一個人食一個兒童餐好興奮呀! 一邊食一邊不停咁話好好味，仲食得好快好乾淨添。

呢間餐廳有d甜點，全部都係細細件，於是爸爸又俾潼潼自己點一樣甜品。唉..... 最後潼潼又係俾d卡通呃左囉! 好多唔同蛋糕都無揀，竟然揀左個米奇樣既啫喱。

我地要潼潼自己同侍應哥哥「點菜」，個哥哥故意逗潼潼，問潼潼果個係咪hello kitty啫喱，好彩潼潼都夠膽答人，同個哥哥傾左幾句。

潼潼自己「點完菜」好興奮，我同潼潼爸見到佢古靈精怪d表情真係俾佢笑死。

潼潼的寵物

同潼潼講故事時講開老鼠，講講下就變左去買倉鼠喇!

好攪笑，潼潼成日話「唔駛驚~ 唔咬人架~」但係其實佢都好驚。當我打開門隻倉鼠想走出黎果陣，潼潼嚇到即刻閂番埋度門，攪到夾到隻倉鼠個頭添!

不過其實我都好驚呢d鼠鼠架!

中獎了

呢日係萬勝節，不過我地既節目係約左嫲嫲去飲茶。

去禾軬飲完茶經過商場，原來麥記係度攪緊活動，有好多小朋友係度扮鬼扮馬呢！姑姐買左飛俾潼潼入去玩遊戲。

潼潼媽就一邊排隊，一邊好努力咁填好問題紙上既答案然後拎去抽獎。

嘩~~ 潼潼真係被抽中呀!!!

入面係一套十三件既迷你叮噹公仔。本來排隊排到悶哂既潼潼當堂開心哂!!

 

多謝姑姐買飛俾潼潼入去玩先有機會得獎

多謝爸爸係媽咪埋首排隊之際通知我原來潼潼被抽中，我先識得帶潼潼上台咋

仲有緊係多謝好努力幫潼潼搵答案既潼潼媽啦!

用筷子進食

潼潼平時食飯有兒童專用既學習筷子。不過今日係無準備之下出左去食午飯，潼潼唯有用普通筷子喇！

可能因為用慣左學習筷子，潼潼第一次用筷子手勢都似模似樣呢！

舞蹈表演

潼潼上芭蕾舞班既機構，係暑假之後安排左表演節目，讓我地呢班虛榮既家長，可以睇到小朋友係呢個暑假上興趣班既成績。

中午到達中心作間單既綵排。潼潼媽梳髮唔叻，下面係併死努力之下既效果。

最後都要老師幫忙，重新幫潼潼再梳過頭。

梳好頭加番個蝴蝶仔，當堂唔同哂

仲有姐姐幫忙化妝

好!! 完成大變身

等候上台表演喇

開始時還蠻正經

後黎做出趣怪表情

跳跳跳!! 跳高d罷!!

哈哈!! 原來既舞蹈編排係比較多變化，只可惜小朋友跟唔到，越改越簡單。好! 係時候睇下呢個極兒嬉既舞蹈表演喇。

跳完舞之後仲有張感謝狀。(又係為左滿足家長既需要?)

對於今次既表演，潼潼既感想係：好好玩！！