大部份學生係9月1日已經開學喇! 不過潼潼學校就9月5日先開課。潼潼既幼稚園9月1日同9月2日係K1開學，因為K2同K3都未開學，所以就可以撥多D老師去K1既課室幫手照顧初入學既小朋友。其實我覺得呢個安排都幾好幾細心。
暑假最後一個星期日，我地去左旺角SHOPPING，順便同潼潼行下朗豪妨。
下午茶係潼潼最愛既西多士，平時可以一個人食哂整份。不過唔知係咪今次太大份，竟然食唔哂!
跟自己星座影相。
暑假終於完結喇! 早D番屋企抖足精神聽日開學喇!!!!
呢日請左假同潼潼番健康院做四歲檢查。雖然放假，但都爭取機會，早起身同潼潼一齊番學。每次湊潼潼番學/接佢放學佢都好開心架 !
本來約左四點三檢查，諗住有時間做下自己嘢。點知到下午一點幾老師打電話俾我，佢話潼潼有d唔舒服，好多鼻水，兼且有點呆滯，叫我地不如早d接佢放學去睇醫生。咁唯有又即刻去接番潼潼番屋企。番到屋企同佢食葯水，叫佢飲多d水兼快d訓覺休息。訓醒覺又精神好d，去檢查lu。
去到首先係度高磅重。姑娘問佢幾多歲﹑咩名，潼潼都識答人，叫佢自己除鞋度高佢又會跟住做，醒目! 四歲兩個月既潼潼而家係98.5cm高，體重13.4kg。係跟住佢條25%既生長線平穩上升囉！
之後就係驗眼喇！視光師首先要確定潼潼係咪認識幾個英文字母：U﹑X﹑Y﹑V﹑H﹑O。因為之後就係要試下潼潼係咪睇到同讀到呢D漸細既英文字。結果呢?好理想呀!有大約100度遠線同50度散光。視光師話係正常，仲話以潼潼既年紀讀到果一版已經夠有餘。最重要係佢釋除左潼潼媽既疑慮。因為我自細已經係有斜視，而家都有一隻眼係弱視。但係視光師話潼潼完全無呢個問題，安樂哂!!!!!
之後就見姑娘，了解下潼潼媽係小朋友既脾性上﹑飲食上﹑肢體發展﹑語言等各方面既發展有無咩問題。我就提出左潼潼生長痛同語言發展上既疑問。生長痛果方面都如我所料係無野可以做到。語言發展方面，我就解釋潼潼有咬字不清既問題，導致有時說話要潼潼媽替佢翻譯呢!於是乎又等見醫生，最後醫生都話有少少字潼潼讀字未正，不過尚可接受，咁就再約四歲半既時候再番去跟進。
潼潼呢?本來好合作，不過可能因為佢一心以為係黎睇醫生，唔知道係黎檢查。點知黎到就係咁俾人考佢讀字﹑行路，所以後黎顯得有點不耐煩係咁叫住走。係喇係喇!!! 走得喇!!!
潼潼剛剛滿三歲九個月，身高96cm，人長大左不少。好多時候，訓到半夜潼潼就爬到我既床上，要跟我地一齊訓。以前因為佢身體短少，攬住佢時，好似可以攬住佢整個身體咁。早前先發現，而家即使我將手盡量伸直，已經掂唔到佢既腳板。想深一層，潼潼而家既身高都幾乎係我身高既三份二喇 ! 真係大個囡喇 !
潼潼越大，越發現自己既時間唔夠用。有時因為晚歸，怕潼潼晚睡，最後被逼縮短講故事既時間，揀故事書時都要挑內容簡短既故事。英文故事就更加唔係晚晚可以唸。還好，潼潼己經認得部份圖書書名，可以讀出「晶晶的耳朵」﹑「湯姆去海灘」﹑「幾點鐘」﹑「邋遢先生」﹑「傷腦筋先生」等等的一堆既書名，總算有點成績。我諗潼潼未必真係認得字，而只係記得書名，但總算係個好開始。現階段潼潼只接受我「讀」出書名，不過就唔准我「讀」內容。我諗等佢遲d有多d機會接觸文字既時候，我再開始嘗試對佢「讀」故事會比較好。
呢兩星期媽me感到好沮喪，感到工作好困身。好希望可以花更多既時候係潼潼身上，但就成日夜歸。姐姐就快完約，考慮到經濟問題，兼且想訓練潼潼既自理能力，所以打算唔再僱用外傭，而改為由本地姨姨接潼潼放學。但係媽me成日咁夜放工，根本照顧唔到潼潼，如果連姐姐咁親近既人都唔係身邊，怕會對潼潼做成傷害。
能做一個全職媽媽多好!
潼潼3歲8個幾月大，潼潼媽諗起一d潼潼既瑣碎事，怕日後忘記，還是先記錄一下。
潼潼自細俾媽me讚得多，有時候自信心大到有點自大。
好似有時潼潼睇到係blog上自己既相片時會話：「我笑得好靚呀！我真係好叻呀！」
對於潼潼會既野，當潼潼媽問佢：邊個教你架？佢既答案永遠係：我自己識架囉！
潼潼又好大膽，最近見佢由第二級樓梯跳落黎，呢個囡有時成個男仔咁百厭。
另外，潼潼媽為免潼潼學錯師，從前都無刻意教潼潼英文生字。不過番呢個幼稚園後，潼潼都開始學懂一d英文生字喇。我所聽過既有DOG, CAT, CAR 同埋PENCIL。另外知道佢識BUTTERFLY，不過就唔肯定係兒時既光碟中學到還是學校教既呢?其實潼潼對英文唔抗拒之餘好似都幾有興趣，希望佢學英語唔會有問題罷! (潼潼媽自己英文唔叻，所以好似特別擔心呢個問題 
)
唔好被嚇怕，潼潼並無大損傷。
潼潼兩歲多就開始有生長痛(發骨節)，由最初個多星期痛一次，發展到而家三歲半大，已經係一個星期痛兩三次。痛得犀利既時候一晚要醒四五次幫佢搓腳，真係大人細路都無覺好訓。問過西醫，都只係叫我地俾止痛藥佢食。潼潼咁細個，我緊係唔想俾咁多葯佢食啦。於是問個中醫朋友，佢建議我多D幫潼潼做按摩，亦都俾左一條食療方俾我。
而家每晚要幫潼潼按摩雙腿，做伸展運動。已經兩個星期，進展良好，效果明顯。潼潼生長痛既情況已經減少好多。潼潼媽要繼續努力，持之以恆先得喇!
點知呢個星期同潼潼去上跳舞班後，老師話潼潼駝背情況嚴重(其實係成日坐唔直個身)。建議我地平時多同佢做背部肌肉既伸展運動。噢! 以後晚上既時間又多一項任務喇。
到左呢個年齡，小朋友既發展已經無咁明顯，所以都少左記錄潼潼既成長檔案。要想一想，才稍為想到一點點可以記錄落黎。
得到怡怡媽既啟發，潼潼講故事既時候我通常都唔會多加意見。(所以由得佢亂講，你唔會聽得明佢講乜)
不知不覺已經三歲四個月，潼潼係爸爸心目中依然頑劣，不過潼潼媽就覺得佢開始受教，感覺比兩歲時舒服好多喇!
潼潼三歲，體重27磅，身高92cm。
又記錄一下潼潼各方面既發展先。
語言
潼潼呢一兩個月黎講野叻左，有時說話都似個大人，有點語出驚人。「係咪呢，都話左你架啦!」「我嬲你架喇!」「你唔識! 我先識!」之類之類既說話都令我地啞口。不過不難發現，佢講野既用詞同語調大部份從姐姐度學番黎，亦有部份由我度學番黎。所以話大人講野真係要好小心。
另外，可能同語言能力無太大關係，不過潼潼就係好鐘意將d野套係人地身上。自己想食既野，佢會問你想唔想食；佢想你陪佢玩，佢就會話佢陪我玩。
自理能力
無太大既進步，不過就凡事喜歡由自已動手，乜都要自己做。可以的話我都讓佢做。佢有時會幫我地遞碗，（玩）掃地，抹檯，總之要學大人。不過要佢執番自己d玩具又唔係次次都肯。
比較的概念
識得分高/矮﹑大/小﹑多/少，但未能正確地使用前/後。
認顏色
紅﹑橙﹑黃﹑綠﹑藍﹑紫﹑啡﹑黑﹑白都認得了，連灰﹑粉紅都無問題。大致上都叫認得所有顏色。
數數
唸數係可以由一唸到廿幾，認數字就只係1至9，數數量就數到十幾都試過。另一方面由以下事例，我相信潼潼已經對數量有一定概念。
潼潼媽同潼潼一齊係屋揸車時：
潼潼媽：玩多兩個圈啦！
潼潼：五個圈！
潼潼媽：三個圈啦！
潼潼：五個圈！
潼潼媽：咁唔玩喇！
潼潼：三個圈！三個圈！
認字
除左以前教識潼潼佢自己個名﹑「爸爸」﹑「媽媽」之外，而家我主要都只係教學校書本入面附設既字咭，所以學字並不多。潼潼從字咭中最早學會既字係「月餅」，呢個詞真係隨時問佢都隨時會，無論隔左幾耐。其它學會既字有「三輪車」「花燈」「毛巾」「手」「口」「眼睛」「耳朵」，不過間中有錯。
潼潼2歲9個月，身高90cm，人都重左好多，有26磅。
好快潼潼已經2歲9個月，就快3歲喇！雖則話０－６歲係小朋友發展既重要階段，但我認為三歲以前更是關鍵之中既關鍵，所以對於潼潼既成長，潼潼媽開始感到有點壓力。老實的說，潼潼既發展並未算十分出眾。
說話：潼潼說話明顯的仍然比較「論盡」，好多時都未能暢順咁講出一句句子，亦未完全懂得表達自己。而家希望潼潼番學後可以幫助佢係語言上既發展以外，潼潼媽亦好多時慢慢給潼潼講一次佢想要既野 / 所做錯的事 / 所應承的事，然後要求潼潼自己將說話重複去講一次。
數數：潼潼而家會由1「讀」到20，但認真的數數就未完全掌握。呢方面我地會係日常生活中讓潼潼認識「數」。有時會話俾潼潼知食「一」塊餅﹑「兩」條魚仔餅﹑「四」粒豆豆，然後將物件逐一逐一放到佢手上面，一邊放，一邊跟她一齊數，然後問佢總共有幾多。而家好像是有了一點點的進步，今天可以數到「四」，然後可以話我知一共有「四粒」。
顏色：大致上都認得了。
自理：除鞋除襪都算可以了，著波鞋就顯得有點困難，其它較易穿的都可以自已穿。上星期日(10月11日)，爸爸媽媽顧著自己換衫的時候，就發現潼潼已自己穿好了鞋，令我非常驚訝呢!
如廁 / 戒片：由7月份知道潼潼要番學開始，我地已經膽粗粗咁唔俾潼潼著片，包括夜晚訓覺既時候。而家雖然間中亦有試過有尿濕，但大致上都無問題。而去廁所既時候亦會自己除褲仔了。
最令我地頭痛既，係潼潼既脾氣問題。不過近日好似有一點點的改善。由於太長篇，我諗都係o係另一篇網誌寫。
想起潼潼一D有趣既表現，想記錄一下。
潼潼喜歡模擬既遊戲，佢係手上亳無任何道具而玩模擬遊戲：
以上事情潼潼做既時候只有動作，潼潼爸話潼潼好似演默劇。 不過有時潼潼媽都會配合，等佢有更大既發揮空間。
另一樣比較有趣既，係潼潼有時講野語調都幾誇張，呢個可能係因為我地對潼潼講野都用左好多誇讚式既口吻，又或者誇張表示食物好味去吸引佢，所以令潼潼有以下表現：
最後，潼潼有時都好古惑地會故意「做錯」一d事情。
小朋友實在太可愛，我要好好enjoy呢段時期。
7月13日潼潼足兩歲半，補番份報告先。
潼潼而家身高88cm，體重只有廿五磅。
潼潼對顏色既認知好差，差到我一度懷疑佢係咪色盲。 不過早前買左幅有關顏色配對既砌圖俾潼潼玩，潼潼對顏色既認知係明顯好左。不過咁唔等於佢答顏色可以100%正確，只係紅色﹑藍色﹑黃色﹑啡色﹑綠色同橙色等都大概知道。
個多月前開始同潼潼唸詩。小朋友學唸詩好快，一首新既詩，每晚讀一兩次，兩三日後佢已經可以自己唸出黎。不過為左印象深刻d，我大約每一個星期就換新一首詩。潼潼而家可以唸到六首詩喇！包括靜夜思﹑春曉﹑登觀鵲樓﹑清明﹑相思，仲有憫農。而家潼潼好多時都會自己指住本書要我逐首逐首唸俾佢聽，我諗之後唸詩既活動可以改為由佢主導。
為左加深潼潼對數字既概念，亦係好幾個月前開始，每晚臨睡前俾潼潼自己圈日曆。雖然潼潼對10以上既數字仍然唔識唸，亦對數量未有概念，不過打圈既功夫卻做得好左。
又由幾個月前開始，晚上飲奶既時候我地亦會俾佢試下自己「不」奶粉同埋攪伴，不過攪伴動作仍未算流暢。
另外潼潼開始都可以自己除鞋同除襪喇！
雖然我支持早教，但係我自覺自己都好懶散，亦唔算係催谷型父母。希望潼潼係緩慢既進度上可以快樂地學習同成長。
兩歲三個月既潼潼係過去一個月突然高左好多，係因為發燒發骨節 ，還是好似爸爸所講因為佢最近飲多左奶呢?
兩歲係小朋友既語言敏感期，潼潼踏入兩歲既第三個月亦都好似突然識講左好多野，一D我地無諗過佢會識講既說話佢都會講，有時都幾令人驚訝。
係呢個時期，潼潼媽係兒歌CD中加入左普通話既系列。潼潼似乎都幾鐘意，有時都會跟上一兩句。係呢個時期學既如果以後不加運用，可能將來未能完全記得，但係起碼佢對呢種腔調有印象就好了。
唔知點解，潼潼媽總覺得兩歲係幼兒一個重要既轉捩點，可能係因為呢個階段，小朋友係開始對「我」有概念。由乜都唔識，開始有佢自己既意思，要學好多好多既野。潼潼媽好怕係呢個階段做得唔好，唔夠努力，就錯過潼潼既最佳學習時機。
但另一方面，又好唔捨得潼潼天真既笑聲。見佢因為一D無聊事都笑得卡卡聲，我就想佢永遠都係咁開心，怕佢過於成長。
矛盾的在職媽媽開始進入「早教」既迷思：早教好呢？還是好好增取僅有既時間同潼潼親子一番，好好的笑一晚比較好呢?
想記錄一下潼潼既「最怕」，因為有D覺得都幾無厘頭，所以想寫一下。
潼潼怕自己會郁既物件，BB果陣好怕上鏈玩具，而家好似好左，不過都有D抗拒。除左上鏈玩具以外，有次姐姐用搖控器閂埋個CD盤，潼潼見個CD盤自己會郁都嚇到喊。
潼潼又好怕好大既聲音，行雷好大聲佢就唔驚，不過聽到風筒﹑吸塵機﹑攪拌機同埋裝修時既電鑽聲佢都好驚，一樣會嚇到跳起係度喊。
除左大聲之外，潼潼好怕奇怪既聲音，好似因為CD跳線不斷重複播放，潼潼會被嚇得大叫大喊，試過見到佢成個人跳起添。
潼潼唔鐘意毛毛質地既物件，細個既時候唔鐘意玩毛毛公仔，而家大個左就好D。除左毛毛公仔之外，連毛毛衫潼潼都好驚唔鐘意，要即刻除左件衫唔肯著。
潼潼好怕蚊，有疑似蚊既飛行物體係佢附近飛佢就會驚叫。呢個可能係因為佢以前試過俾蚊針得好厲害，所以每次我地見到蚊都好嚴陣以待。或者可能因為我地過份緊張既反應，令到潼潼都好怕蚊。
兩歲喇!! 兩歲喇!!
兩歲大既潼潼身高83cm，體重23磅。 (24磅減番1磅衫)
潼潼進入「TROUBLE TWO」，爸爸媽媽真係要比以前有加倍既耐性先得喇！而家既潼潼已經好「TROUBLE」，唔受得人話，少少野就已經唔高興發哂脾氣，令爸爸媽媽好頭痛呀！真係唔知應該用咩方法應付先岩。
另外潼潼比以前更加貪靚，早幾日仲識得出街要揹番個手袋仔，又鐘意戴帽，仲識揀鞋仔，仲試過拎媽媽支唇羔黎搽添！
認知方面，得到教學CD的幫助，潼潼已學會大階A-Z，少量既英文生字；另外亦會念1-10，不過就無數既概念；顏色方面既認知似乎仍然缺乏；玩砌圖板比以前進步。
大小肌肉發展一般，穿珠仔問題不大，不過塗鴉方面就有待改善。
自理能力方面潼潼會識得除鞋，著鞋就只會穿拖鞋或SIZE稍大既鞋；用匙食飯一般，飲湯就似乎好好多喇，用水杯飲水都可以；開始緊用可吞服既牙羔刷牙；呢個年齡既小朋友鐘意凡事都親力親為，所以係可能既情況下我都由得潼潼自己做佢想做既事，甚至乎抹檯抹地；出街前會知道要執拾好自己既玩具；夜晚有時會識得起身叫去廁所，不過反而朝早好多時掛住玩而賴左尿尿
。
基本上我對潼潼既發展係滿意，只係脾氣方面真係比較難處理。不過點都好，最緊要係潼潼永遠健康，平安，快樂。(講左好多次)
2008年12月13日，潼潼23個月大喇！
時間過得好快，潼潼就快兩歲大喇！諗番起第一日從醫院接潼潼番屋企既時候，感覺依然興奮﹑溫馨又甜蜜。而家當我抱住潼潼訓既時候，我都會好好咁享受潼潼係我懷裡安睡既感覺。我知道潼潼好快就大個女，可以咁樣抱住潼潼既機會越黎越少，我會珍惜。
23個月大既潼潼，好似無乜長高過咁，去年趁減價掃貨既衫仔今年都未岩著，真失策。 體重呢？搵個機會磅下先知。
早陣子寫左一篇網誌話潼潼平時說話太空話居多，寫完之後我先特意留意潼潼既說話，先發覺原來潼潼已經會講好多說話，並唔係我所謂既「太空話居多」，我呢個媽媽實在唔夠細心。我聽過潼潼講最長既短句係「唔該媽媽抱」，心情好既時候你問佢野佢好多時都會答你「係」「好」「知」；心情唔好就會鬥氣「唔食麵」「唔食飯」「唔去街」「唔落地」「唔乖」．．．．． 乜都識講，總之要加個「唔」字係前面；有時你講乜，佢又會跟住講，試過跟我講「大佬呀！！」
嘩~~ 我地大人講野真係要好小心，佢真係你講乜佢講乜架！
潼潼又好會發脾氣，或者呢個年齡都會有呢個問題卦，不過我地最怕佢用尖叫黎表達不滿，通常呢個情況我地會立刻制止佢，希望佢大個D之後呢個問題會有改善。另外佢又會識得唔高興既時候翹埋手。試過有次出街見到個姐姐拋個波俾潼潼之後又即刻拎番走，潼潼嬲到翹埋手，企定定，好嬲咁望住個姐姐。哈哈~~ 潼潼媽其實覺得呢個情景好攪笑，只係唔可以鼓吹佢咁做，所以都會安撫佢，叫佢唔好咁樣。
仲有呢個月潼潼學識左「跳」，或者佢覺得識跳係好叻，又或者覺得好好玩，所以而家開心既時候無端端都會跳，尤其是聽歌仔既時候，會又跳又轉又唱歌。
工人姐姐好鐘意小朋友，好鐘意同潼潼玩，有時玩到傻左，笑到卡卡聲。唔知係咪因為咁，潼潼好鐘意笑，有時候少少事情，好似話唔小心跌左D野落地，潼潼都笑得一餐。聽到潼潼既笑聲，我都會覺得好開心，好滿足。希望以後既日子潼潼都係咁快樂。
潼潼22個月大喇！潼潼媽媽好想俾潼潼番學學多ｄ野，但係因為太漏氣而到而家都無著落。
唔知點樣報告潼潼而家既情況，所以轉一轉形式，由一日既生活日程開始講起。
而家每朝早起身，潼潼都會自動識得叫人早晨（當然都睇心情）。
潼潼便便都唔鐘意用potty，要坐大人坐廁，所以有時當我地係洗手間既時候，會聽到潼潼係出面拍門要入黎噓噓。不過潼潼去便便既情況仲係好飄忽，有時都仲會賴賴。
俾毛巾潼潼抹面，佢都會抹面抹手仔，當然抹得唔乾淨，抹完都仲要我地重新再幫佢清潔一下。
潼潼會學大人用牙刷刷牙，不過漱口就有時會飲埋d水。(我地係俾凍開水佢漱口)
佢又鐘意學潼潼媽，拎各種lotion黎搽面面同手手，好貪靚呢！
而家飲奶已經唔用奶樽，改用杯仔，不過都要睇住佢小心倒瀉。
潼潼已經完全識得操控屋企兩部CD機，鐘意自己揀CD播歌仔聽。
潼潼仲係成日流口水，不過叫佢拎紙巾抹佢會自己抹同將紙巾掉入垃圾筒。
中午食飯仔喇！始終有工人係屋企就比較依賴，潼潼都唔係成日會自己用匙食飯，尤其是當佢扭計唔肯食既時候。不過到大人開飯既時候佢就會自己動手。
中午落街玩前，叫佢執好D玩具先出街佢都肯幫手執。
早一排佢落街見到樓下管理處D叔叔都未肯叫人，不過姐姐話佢呢排都肯同人講拜拜喇！
潼潼鐘意行樓梯，而家扶住佢佢會自己行落樓梯。
而家潼潼出街鐘意要自己「嘟」八達通同俾錢。要錢既時候會識得搵媽媽！
我地同佢出街既時候潼潼總係好似甩繩馬騮咁，但係嫲嫲話佢同潼潼出街果陣又唔係咁架喎！
玩完番屋企，佢會自己一步一步咁上樓梯，唔駛人扶。
番到屋企知道要除鞋，放好鞋仔，跟住去洗手。
姨媽送左套 PHONIC既CD，潼潼好鐘意睇，每次放入CD機佢都會拎個遙控器俾我地要我地開電視俾佢睇。潼潼有時都會跟住讀「A, A, A」「B,B,B」；有時又會講「BEAR」,「APPLE」,「CAT」,「DUCK」；認得O同Q (呢個同套CD無關係，係用英文海報學識既)，不過26個英文字母潼潼未認得。 (咁都俾花花? 因為潼潼媽唔覺得有需要咁快識哂D字母)
唔順潼潼意，佢會發脾氣，會唔出聲，繞埋手，一直唔啋你。佢可以同你鬥好耐，點算好呢??
潼潼特別鐘意飲湯，連潼潼媽覺得難飲既益健湯，潼潼都會好鐘意飲。
潼潼晚上訓覺會依指示收好玩具，去拎片片，然後入房訓。會講「GOODNIGHT」同「早抖」，仲識得錫錫同飛吻。
潼潼仲識得整古做怪，叫佢叫媽媽GOODNIGHT，佢會特登叫哂所有人剩係叫剩媽媽。
嘩~~ 原來咁樣寫都好多野寫同好長架喎！
