原來爸爸果套唔用附助轆學踩單車真係得既。
相隔第一次學單車一星期，潼潼再學踩單車，已有進步，起碼取得平衡。
再隔一星期，已經成功了。掌聲鼓勵。
2012年7月2日 星期一
2012年2月26日 星期日
2012年1月27日 星期五
第四次溜冰 - 勇字當頭
呢日爸爸問潼潼想去邊度玩，岩岩尋日玩完溜冰既潼潼意猶未盡，話再去溜冰。
行路依然跌跌碰碰既潼潼，係爸爸去換過對溜冰鞋既時候，勇字當頭地自己衝左出去玩
喇!
之後媽咪番左工，聽聞潼潼已經可以比較快地自己滑溜喇!
2012年1月26日 星期四
2011年10月4日 星期二
畫班
一向覺得潼潼無乜畫畫天份。一般三﹑四歲時小朋友就開始在塗鴉階段，喜歡亂畫，會畫上周圍遇件既物件，但係潼潼依然不願畫。功課既塗色部份，經常出界又多留白，又每每表現得無耐性。潼潼媽不敢勉強，只有不斷鼓勵。最初鼓勵潼潼用色多左，之後係少出界，又或者漏白少左，等等.....
暑假期間，唔知點解潼潼突然向我提出想學畫畫，我當然贊成。想俾潼潼好畫畫，全因為我功利地想潼潼練好手指仔既力度，等佢將來練寫字時比較易掌握。不過因為當時為潼潼報左d暑期班，我唔想佢d活動排得太緊密(竟然呢個年代仲有咁既諗法既媽咪)，所以準備放完暑假先為潼潼搵畫班。
開學之後，潼潼學校有興趣班可以報讀，但需以抽籤形式報名，我就不妨一試。幸福地可以報到畫班，以後逢星期二放學後就留係學校上畫班喇！
呢日係潼潼第一堂既畫畫班。咦？唔錯喎！真係潼潼既作品？
樹上無留有白色，滿滿既綠色唔係單純既一隻綠。樹幹上﹑草地上亦有深淺色既部份。哈哈~ 其它媽咪見到可能覺得好小兒科，不過潼潼畫到咁既畫，我已經十分意外同滿意喇! 估唔到學校既畫班又幾認真喎!
希望之後潼潼係畫班上可以好好緞練一下佢既畫功啦!
2011年9月11日 星期日
舞蹈學校大匯演
終於到左大匯演既日子，地點係屯門大會堂。嘩~~ 去到屯門..... 其實幫潼潼報大匯演時學校都未決定到地點，早知要去到屯門咁遠就唔參加喇！
呢日要十二點半去到屯門大會堂集合，之後就係綵排同表演，潼潼無時間食野，所以一定要早少少去到俾潼潼食左野先。不過原來爸爸研究巴士路線時又出現錯誤，攪到我地好趕呀! 好彩都順利用超速食野﹑換衫同化妝。
雖然我（唔計爸爸）係好期待潼潼今次既表演，不過一如上次既比賽一樣，小朋友整體表現都係麻麻。不過能夠見到潼潼企係台上，作為媽媽的我都依然係開心既。
經過上一次比賽既經驗，其實潼潼媽好唔放心將小朋友交俾學校照顧。好彩今次演出至中場休息既時候已經可以接番小朋友走，小朋友仲有小禮物添。
今次匯演無論地點﹑流程﹑舞衣等都好遲先confirm到，潼潼媽基本上對呢間學校已經失哂信心。呢次表演之後，都唔知仲會唔會有下次。
今次匯演無論地點﹑流程﹑舞衣等都好遲先confirm到，潼潼媽基本上對呢間學校已經失哂信心。呢次表演之後，都唔知仲會唔會有下次。
2011年8月31日 星期三
最後一堂戲劇班
潼潼媽係暑假幫潼潼報左青年協會既「幼兒戲劇班」，到八月三十一日就係最後一堂，協會邀請各家長於當日黎欣賞小朋友既學習成果，俾家長係課室參觀。
雖然只係一個少少既暑期班，而且只係有十五分鐘既參觀時間，不過潼潼媽都請左假去睇下，了解一下幼兒戲劇班究竟係玩乜，同埋知道潼潼既表現如何。
今次參觀可以進行錄影，不過我都唔打算放片，因為實在太混亂。好明顯咁睇到，原來男仔同女仔真係差好遠，女仔點頑皮都好，都比男仔定性，一叫會停。但係d男仔真係失控咁，見到佢地不受控咁通場走，真係幾驚。點都係覺得生囡好d。
話雖如此，潼潼就幾乎係唯一一個有點失控既女仔，同d男仔一齊圍住個場係咁跑，不過好彩話得佢聽，叫到佢停囉! 
咁細個小朋友上戲劇班究竟攪乜呢? 原來玩「XX話 : (做動作)」既遊戲，訓練小朋友既專注力。呢個遊戲潼潼學校都有玩，可能係咁見佢都做得幾好。之後仲有D想像遊戲，叫小朋友扮演唔同動物，遇到唔同情況，做唔同既動作。
課堂將近完結既時候，導師仲好細心咁逐個小朋友俾意見添。以下就係導師俾潼潼既評語喇!
- 潼潼好醒目，知道幾時要乖，幾時可以曳。當佢曳既時候，你叫佢要停如果唔係無得玩之後既遊戲，咁佢就會即刻停。(係呀! 潼潼真係好知幾時可以乖，幾時可以曳。所以係學校就好乖，番到黎屋企就好曳囉!)同埋佢好快會知道個遊戲係點玩。
- 潼潼語言能力好強。(我好驚訝，呢方面一直係潼潼媽所擔心) 導師話有次扮向小販買野，潼潼可以好清楚咁講到要買乜野﹑煮乜野送﹑同埋煮俾邊個食。
- 潼潼唔怕醜
仲有樣野幾攪笑，導師竟然話潼潼好得意，話佢好多靚衫，每次上堂都有唔同形象。
呢個青協攪既興趣班價錢唔貴，見導師又幾細心，對小朋友都好有耐性。遲D十月先再開班，我都考慮緊好唔好再報名俾潼潼玩。
2011年8月14日 星期日
夏日熱舞大賽
潼潼既舞蹈學校為潼潼報左名參加附近商場既熱舞大賽，潼潼跟潼潼媽都一直都好期待呢日。
唔知係咪因為潼潼細個，怕佢容易出錯，所以細細粒既佢竟然被編到企係後面既側邊位，好難先睇到佢。如果唔係我地作為父母既有心要影佢，其它人根本睇佢唔到呢! 真係有點失望....
雖然潼潼呢隊係全場最年幼既一隊，而且我地都預左係陪跑，不過就無諗過原來同其它隊伍既實力相差咁遠。甩漏好多，可以用一盆散沙黎形容，無諗過會係咁。
不過對於潼潼既表現，潼潼媽已經非常滿意。佢基本上都跟到哂原本既動作，動作亦跟到音樂既節拍，連隔離小朋友同佢傾計佢都無理會繼續跳舞。潼潼媽覺得最攪笑係見到個傻妹係咁高舉雙手同人揮手，十足D大明星咁。哈哈~ 唔知個衰妹係邊度學番黎既呢!
至於比賽結果嘛?幼兒組共八隊參賽隊伍，設冠亞季軍﹑仲有咩團體合作﹑服裝設計等獎項。八隊之中潼潼既舞蹈學校就已經派左三隊出去作賽，一項獎項都無。認真夠「體育精神」
2011年7月24日 星期日
2011年5月14日 星期六
新的芭蕾舞班
潼潼上芭蕾舞班已經一年喇。初初俾佢學芭蕾舞係覺得佢鐘意跳舞，想俾佢玩下，所以揀左間平平地既俾佢試下先，點知一跳就跳左一年 -- 雖然期間潼潼都曾經話過唔想再學。
上左一年芭蕾舞班，但係堂上經乎都係唱遊形式地練習一d手部動作﹑跳躍動作等，可以話一隻舞都未跳過。所以潼潼媽打算幫潼潼轉另一間芭蕾舞學校。好巧合，竟然係呢個時候係屋企附近差唔多同時開左兩間舞蹈學校 - SDM同小公主。
雖然SDM出名好多，亦好多演出機會，不過爸爸嫌佢商業味太濃唔係咁鐘意，所以我幫潼潼報左另一間舞蹈學校。
停左兩三個星期無上堂，呢日潼潼就著好整套芭蕾舞衣去上堂，似模似樣。而潼潼呢，見到套衫咁靚，未跳已經好開心啦!
跳完就仲開心，因為呢度真係有得跳下舞。連潼潼都話唔上以前間跳舞學校喇!
老師對潼潼既評語係:
記性好。事緣潼潼上堂時講到佢岩既話題時佢就講過不停，老師提醒佢跳緊舞唔講住，到跳完既時候潼潼竟然提老師佢剛才未講完....... 
其實咁唔係記性好，係多野講唶。
潼潼多野講，反而令我擔心佢上堂時唔守秩序，但係老師話只要同佢講清楚，佢就好清楚乜野做得，乜野唔做得。哎呀! 差d唔記得潼潼好叻係人地面前扮乖既添! 
老師話潼潼好鐘意照鏡，會越坐越近塊鏡度
。係呀! 潼潼係好貪靚，兩歲已經識得照鏡喇!
最後老師話潼潼轉數快，我唔知老師係點樣睇得出潼潼轉數快，我只係即時答左句: 係呀!駁咀好快!
2010年9月20日 星期一
拗腰練習
早前係淘寶買左四本台版育兒書藉，已經睇到第三本了，只剩下大家以為我會最先看既「放大孩子的優點」反而還未有看。
其實係誇讚小朋友方面，自覺已經做好多，多到已成為習慣，多到要慎防自己讚得無技巧，係又讚唔係又讚，最後弄巧反拙。所以我並唔太擔心自己唔識「放大」，而暫時將呢本書放到最後先睇。
就好似潼潼而家每晚除左腰部的伸展運動以外，就隨她興緻做拗腰練習。
其實潼潼到而家都未成功可以將腳仔掂到個頭，不過每次我都會讚潼潼。有時係讚佢手伸得夠直，有時讚佢姿勢做得好。做得好既時候，又會專登叫爸爸入黎睇下。再或者撥佢既頭髮到腳上，俾佢知道仲差少少就成功。甚至乎好似今次咁，話潼潼做得好，要用相機幫佢影低。
而家潼潼上芭蕾舞堂，坐係度時腰已挺得好直，而且亦好俾心機咁做好呢個拗腰既動作。
2010年8月29日 星期日
2010年4月24日 星期六
2009年10月4日 星期日
2009年8月23日 星期日
可憐的小姐
今日帶潼潼去上堂既時候，可能訓唔夠，佢發哂脾氣，好唔合作。終於要由鍾SIR出馬整治佢。
鍾SIR要潼潼向我地SAY SORRY，但係呢位大小姐一向硬頸，雖然已經眼仔紅紅，依然唔肯就範，於是鍾SIR就話要爸爸媽媽出去，剩番潼潼係度。呢個時候潼潼終於流出兩行淚水。其實平時潼潼係屋企都成日扭計喊，我地都習慣，可以好狠心咁由得佢係房入面喊唔理佢。但係今次係課堂上潼潼表現就唔同哂，可能佢自尊心真係好強，佢唔似一般小朋友咁係度大喊大鬧，而係忍住一路都無喊出聲，只係不斷流眼淚，俾紙巾佢又自己係度唔出聲抹眼淚。睇到呢個情形，連平時見慣潼潼喊既媽媽都覺得佢好可憐。
鍾SIR話潼潼有D小姐脾氣，好多野佢肯做，但係只係唔願做。提醒爸爸媽媽俾潼潼既指令太柔弱唔夠強硬，我地兩個要係呢方面再好好調節下先得喇！仲有既係媽媽對潼潼採用TIME OUT既方法都好適合。
好!!繼續努力!我唔相信潼潼會係個討厭鬼，一定可以調校佢成為可愛小人兒既。
2009年4月5日 星期日
導師的COMMENT
之前講過新一期既SUPER BABY學堂既上課形式已經有變，好多時候要求小朋友自己獨立上堂，家長既角色只係個「旁聽生」。而係上堂既頭10分鐘，鍾SIR更加會對家長進行briefing。
呢堂鍾SIR俾潼潼既COMMENT係：
潼潼有男仔性格，所以處理潼潼既問題行為時，要用對男仔既方法 - 即係唔可以長氣講理，要即時指出正確行為。
另外，鍾SIR話潼潼好有創意，好有自己既主意，叫我地唔好沒殺佢既創意。
潼潼呢種唔聽指示既舉動竟然被說成「有創意」，真係令我呢D做父母既振奮。
2009年3月15日 星期日
新一期超級寶寶學堂
隔左兩個星期，潼潼今日開始另一期既超級寶寶學堂。
呢期開始，課堂既形式有變。之前番既六堂課程，主要由家長帶住小朋友一齊活動，唱下歌仔，做下動作。鍾SIR話兩歲既小朋友要開始訓練小朋友獨立﹑聽指令同埋學習良好EQ。所以呢堂開始，家長係課堂上只係一個附助既角色，好大部份既時間潼潼都係同其它小朋友一齊坐係課室中間聽鍾SIR既指導。
潼潼要學習聽指令。鍾SIR以哨子聲發號令，而潼潼就要依指示做簡單既坐立動作。而派茶點既部份，由以前鍾SIR走到各小朋友面前要求佢地舉手示意，改為由鍾SIR叫小朋友既名字，而小朋友要自己應聲企起身出去。另外仲有搶球遊戲，追逐遊戲﹑打筋斗等等。今堂亦有學習「多」與「少」，可惜潼潼呢方面完全唔合格。
2009年2月22日 星期日
超級寶寶學堂
潼潼已經完成左一期既超級寶寶學堂，睇住潼潼既進步，潼潼媽當然會俾潼潼繼續啦。
早前鍾SIR派左份問卷係關於小朋友既日常生活情況，今日就派番份分析結果俾我地。佢話潼潼既活動能力好強，專注力卻一般，兩樣加起上黎就係無時停，坐唔定，可以介定為「活潑型」。鍾SIR一再強調，潼潼只係「活潑」，唔叫「活躍」，好彩唶。鍾SIR話由於潼潼係咁「活潑」，所以我地亦都唔可以勉強佢長時間坐定定上堂，係適當既時候由得佢跑個圈番黎
，然後先再繼續課堂。 另外潼潼既適應能力都算幾高，所以潼潼係PLAYGROUP既表現亦係咁越見進步。不過亦都指出潼潼既情緒表現都好強，會好容易唔開心，又好容易會開心番，鍾SIR話佢唔開心既時候就要TUM番佢，仲話情緒係無得改，我地只可以接受同埋作出調節 。
好喇！講番潼潼今堂既表現。雖然都係有D時候要走黎走去，無端端自己跑一個圈先又走番黎，但係各樣活動都叫有正確既表現。今日除左平時既聽指令訓練﹑郁下手仔腳仔﹑學習忍耐等等活動以外，鍾SIR同大家做既小運動係將小朋友左右拋起，仲要係有一小段既時間被凌空拋起。潼潼玩呢個遊戲係毫無懼色，不過鍾SIR又再次話潼潼D骨太幼，叫我地平時唔好自己係屋企同佢玩。仲有就係滾乒乓波，叫小朋友用個膠杯「吸」番住個波。最後就係踢球遊戲，最初潼潼都唔熱衷，但係好快就玩到卡卡笑。
好快又過左一個鐘，潼潼係堂上表現越黎越出色，我地就越黎越可以ENJOY一下上堂既樂趣啦！
2009年2月15日 星期日
超級寶寶教室 - 第四堂
越黎越喜歡帶潼潼番教室，唔係因為潼潼學識好多野，甚至乎我講唔出潼潼係堂上做過/學過d乜野，不過好開心見到佢每次都有進步。
呢日潼潼係唱「MY BONNIE」既時候已經會自己坐定定係度做動作：用一雙手緊抱住自己，同埋將手放係前面做「BRING BACK」既動作；唱運動歌既時候會舉手同埋雙手叉腰扭腰。不過有D時候，潼潼都仲係鐘意走黎走去，有時會好高興咁係遠處走過黎撲埋我度。最攪笑係鍾SIR要求潼潼舉手拎玩具既時候，佢竟然捉我隻手舉起。到後黎派茶點同樣要求由媽媽舉手而唔肯自己舉手，因此鍾SIR無派餅餅俾潼潼。潼潼見到個個同學仔有得食佢無得食，終於投降，走埋鍾SIR面前一邊講「舉手」一邊舉起手要拎餅。
今次既體操練習係：讓孩子握住大人雙手大姆指，而大人握住孩子既手腕讓佢地垂吊，往左右搖擺。呢個動作我睇書有教過，我都曾經係屋企同潼潼玩過，潼潼玩得好開心。但係今日鍾SIR話潼潼對手太幼，所以放棄同潼潼做呢個動作。咁潼潼媽都唔敢再同潼潼咁樣玩喇! 希望潼潼病好之後可以食番多D野，等手仔腳仔粗番D啦。
訂閱：
文章 (Atom)