給聖誕老人的信

去年係潼潼第一次收到聖誕老人送既禮物。到而家，佢依然深信佢個阿B係聖誕老人送既。

今年，我又提醒潼潼要寫番聖誕咭俾聖誕老人。

睇唔睇到潼潼今年想要咩聖誕禮物呢?

認真又逼真

潼潼對佢個洋娃娃既逼真程度，有時真夠令人呆眼。

呢個洋娃娃除左有名有姓，仲有生日。有時佢會唔聽話亂食嘢病左，潼潼需要餵同佢食藥(爭在未計時四個鐘食一次); 有時又要帶佢出街，不過又唔會食街外嘢，潼潼話屋企已經煮左飯俾佢。

呢日潼潼俾娃娃做數學。




















有兩題錯左喎! 得一題岩，只得10分。

後嚟再做另一個測驗。

今次有滿分30分喎!

潼潼話: 係啦! 反而無教過佢減數佢又識哂喎!

係啦! 點解你又會知佢無學過既? 又再一次，潼潼媽真佩服你的想像力。

阿B的冷帽

潼潼話天氣涼了，要我幫阿B勾番件衫。

勾衫咁高難度，不如勾帽算啦!

於是係完全無PATTERN既情況下，胡亂地幫阿B勾左頂冷帽。

都算唔錯啦! :)

坐車車剪髮

潼潼就嚟考試，連日嚟都係不停嗌住佢溫書溫書，連我自己都覺得好煩厭。唉.... 香港既教育制度真係好差勁...... :(

潼潼啲前蔭長咗，呢日想同佢剪頭髮。經過呢間髮型屋，潼潼話想坐入面既車仔。見呢幾日咁辛苦，當氹下佢俾佢玩下啦!

 靚哂! ^_~

環保大使?

潼潼係一個環保小先鋒，但係潼潼媽其實唔多欣賞，點解? 睇下就明白。

喇! 飲完既飲管又拎嚟剪剪剪。

蛋糕盒又留嚟做展示箱

呢個糖果盒用嚟為MICKY做「相架」 

曲奇餅紙用嚟做檯墊

糖紙﹑  廁紙筒﹑紙盒..... 全部都係佢既收藏對象，又唔可以隨便丟左去。無辦法，唯有次次等佢唔覺唔覺咁掉左佢。:P 

巨鴨

全城一片巨鴨熱，今日都同潼潼黎接潼潼媽放工，順便影下鴨鴨先。

聽聞呢日已經唔算多人，但係都一樣人山人海，好難同巨鴨合照。睇勻d相，係呢張影得最好，要犧牲爸爸post張合照出黎。

太多人，太多強國人，影左唔係好多相就走喇! 好無聊呢!

閒遊MEGABOX

阿囡個BLOG好耐都無UPDATE喇! 一嚟潼潼媽太懶惰，又無特別同潼潼安排啲乜嘢節目，再加上呢個雙子座既媽媽興趣多多，攪到都無乜時間寫BLOG。

難得呢個星期六比較清閒，但都只係帶阿囡去MEGABOX行下咋。

MEGABOX前既公園仔。唔知點解阿囡咁鐘意呢個公仔，係咁嗌住話要同豬咀影相。

好耐無帶潼潼嚟溜冰喇，因為爸爸話潼潼玩得唔耐，唔夠成本效益，唔肯同阿囡嚟溜冰囉! 隔左幾耐無溜呢.....  都唔係好記得。好彩阿囡仲敢自己落場，都算唔錯喇!

之後又去宜家玩個兒童天地玩，又去買佢想要既攬枕。阿囡開心哂啦!

夜晚嚟呢間餐廳食飯，設計成個電動火車咁，都幾得意。

阿囡揀左呢個超級唔抵食，連嘢飲都無杯既兒童套餐。

夜晚咁岩仲有場冰球比賽。

原來冰球好有速度感好刺激架，潼潼都睇到超興奮，係咁叫，係咁跳。連爸爸都話有機會的話再要睇添呀! 我呢.... 諗起木村做既「冰之驕子」，真係見到套裝備都已經覺得超型。

六歲生日

潼潼六歲喇!!

好多好多個月之前，差唔多成年之前，潼潼已經講定佢生日果日要去摘士多啤梨。適逢佢咁年生日係星期日，所以一於如佢所願，帶佢去摘士多啤梨。

我地本來打算去粉嶺香薰園隔離摘，點知原來已經荒廢哂，所以轉去流水響。呢個士多啤梨園都幾大地方，士多啤梨都算幾甜。

番到屋企既生日蛋糕係自家製芝士蛋糕 + 親手摘新鮮士多啤梨。

遊大嶼山

潼潼媽跟紅色假期，27號已經番工。不過潼潼爸就28號請左一日假，佢竟然又捉緊呢機會，一個人帶左阿囡去玩，擄劫阿囡既歡心。

不過呢日潼潼心情大好，影左好多靚相呀，好似模特兒上身咁，擺左好多唔同既甫士，真係唔知佢係邊度學番黎。

羌餅屋

12月26日，除左拆禮物之外，無乜特別節目。於是係屋企拎番早前買既羌餅屋套裝出黎，同潼潼製作自己設計既羌餅屋。

不過潼潼媽好大懵呀! 睇說明書都粗心大意，無留意tablespoon同teaspoon，誤以為用1 tablespoon既糖粉混合1 tablespoon既水用黎做黏合劑。攪到溝完出黎d糖漿超稀，根本無可能用，不停再加糖粉都唔成功。最後係外傭姐姐發現原來係1 tablespoon糖粉加1 teaspoon既水先岩，真係大意都不得了，攪到整左好耐先叫勉強完成。

好彩睇外表還可以.........用黎影相，食就..... 爸爸話太甜，好難食。

聖誕老人的禮物

潼潼媽同潼潼爸一向都唔太注重節日，加上每年聖誕，潼潼都會係表姨攪既聖誕party收到姨媽同表姨送既禮物，所以我地都唔會額外同潼潼買聖誕禮物。而關於聖誕老人既傳說，因為唔會額外送聖誕禮物，所以都無向佢提過。

今年聖誕表姨到外地旅遊，無大攪聖誕party，我又咁岩聽到潼潼話好想要個會開合眼睛既洋娃娃，所以諗起用聖誕老人名義送潼潼一個洋娃娃。

我同潼潼講聖誕老人既事，原來潼潼早對聖誕老人既幻想破滅，原來外傭姐姐已對潼潼講過聖誕老人係假既。so poor......  幸好潼潼仲細，要佢重新相信聖誕老人既存在並唔難，只要我呢個係小朋友眼中極可信既媽媽講幾句，佢就信哂啦。 我話佢知其實我地可以寄信俾聖誕老人(呢個係事實)，無寄信俾聖誕老人當然就唔會收到禮物啦! 潼潼即刻叫我幫佢寄信。弊傢伙! 佢真係要我同佢去郵局寄信點收科?  呢個時候潼潼媽又自圓其說，話而家寄信太遲，等我發電郵俾聖誕老人啦!  

平安夜既晚上，潼潼好乖，因為佢希望聖誕老人會送禮物俾佢。同時多次提醒爸爸要早d訓，唔好阻礙聖誕老人送禮物俾佢。 潼潼好興奮，不停自言自語問唔知聖誕老人會唔會送禮物俾佢呢? 係等待聖誕老人送禮物既同時，佢亦放左塊自家製曲奇係聖誕襪度，話送俾聖誕老人食，真係乖喇!

到第二日聖誕節早上，潼潼剛醒既時候好明顯係忘記左聖誕老人送禮物既事，潼潼媽亦無主動提佢。到我走左出廳既時候，潼潼就好開心咁話我知聖誕老人真係送左聖誕禮物俾佢，仲叫我入房幫佢手拎出黎。但佢見到個洋娃娃時真係好開心，話真係佢想要果種洋娃娃呀! 佢仲檢查過聖誕襪，好開心話聖誕老人有食佢塊奇曲，又話尋晚都好似聽到聖誕老人入黎添。

潼潼收到聖誕老人既禮物，真係好開心好滿足啊!



呢日潼潼整日都不時自言自語話好開心聖誕老人真係送左禮物俾佢，連夜晚去街都要帶埋份禮物出去，亦逢人都同佢地講話收到聖誕老人送既禮物。

潼潼收到呢份禮物，真係遠比平時收禮物時開心。我諗，小朋友係絕得值得保留呢份童真同幻想既。

樂富天神村

從J2台翻做「IQ博士」起，潼潼就好鐘意睇呢套卡通片集。無論幾眼訓都好，每週日早上九點鐘，佢都要起身出黎睇。

雖然而家無再做「IQ博士」，但係潼潼仲係好鐘意呢套卡通片同佢D歌架。得知呢個聖誕，樂富廣場有個天神村既場景佈置，於是潼潼爸就趁呢日帶潼潼黎睇喇。

最初潼潼唔知我地黎睇天神村架，知道左之後緊係超開心啦!