潼潼最怕

想記錄一下潼潼既「最怕」，因為有D覺得都幾無厘頭，所以想寫一下。

 

潼潼怕自己會郁既物件，BB果陣好怕上鏈玩具，而家好似好左，不過都有D抗拒。除左上鏈玩具以外，有次姐姐用搖控器閂埋個CD盤，潼潼見個CD盤自己會郁都嚇到喊。

潼潼又好怕好大既聲音，行雷好大聲佢就唔驚，不過聽到風筒﹑吸塵機﹑攪拌機同埋裝修時既電鑽聲佢都好驚，一樣會嚇到跳起係度喊。

除左大聲之外，潼潼好怕奇怪既聲音，好似因為CD跳線不斷重複播放，潼潼會被嚇得大叫大喊，試過見到佢成個人跳起添。

潼潼唔鐘意毛毛質地既物件，細個既時候唔鐘意玩毛毛公仔，而家大個左就好D。除左毛毛公仔之外，連毛毛衫潼潼都好驚唔鐘意，要即刻除左件衫唔肯著。

潼潼好怕蚊，有疑似蚊既飛行物體係佢附近飛佢就會驚叫。呢個可能係因為佢以前試過俾蚊針得好厲害，所以每次我地見到蚊都好嚴陣以待。或者可能因為我地過份緊張既反應，令到潼潼都好怕蚊。