呢排因為太懶，因為放假，因為地震上唔到網，因為.......
好耐無再寫blog，儲埋一次過講哂先 。
37週，整個星期屋企都掛滿萬國旗。囡囡o既衣服被鋪都係時候要清潔好喇。
對腳好腫，老公成日叫住「豬仔腳，豬仔腳」。究竟有幾腫？俾你地睇下丫。
都幾犀利架，原來水腫用力按落去ｄ肉真係唔識彈番上黎架喎
！我都係第一次見咁既情況，有時覺都幾過癮架。
聖誕節期間無乜特別點慶祝，只係老公請左幾個朋友上黎食下o野傾下偈。到午夜兩三點鐘過後。所有人離開哂，屋企開住柔和o既燈光，播住d慢歌。突然感到好relax，好enjoy，好悠閒。我首次感受到對將會所去o既二人世界唔捨得.......
事件簿四
38週。報報數先：增磅共27磅，肚腩37吋。原本以為B囡大約會o係呢個星期出世。但一直都無乜動靜。
完成左愛心編織 - 披肩。仲差個毛毛球要搵人代勞添
。
都39週喇。囡仲未出世，而家訓覺好辛苦，好多時都唔係訓得咁好。個肚既位置亦好似開始向下移，好似隨時準備要生咁。我一方面想囡囡快d出o黎，唔駛而家馱得咁辛苦。但另一方面又好驚。唔知要痛幾耐呢？
http://www.youtube.com/watch?v=TuXqSMPwPg8&mode=related&search=
無意間發現呢個廣告
雖然只係一個廣告，不過實在太感人喇！
又或者因為自己剛懷有BB，睇完段廣告更加感到心疼。
其中廣告入面有幾段說話：
「我們為何生於今世？而今世我們又該做些甚麼？」
你會唔會有呢個疑問呢？而你又搵到你個答案未呢？
生命的結束．．． 生命的開始．．． 每天不斷的重複著。
究竟為何？我亦不知所以。
人生實在太玄妙。
而我亦不打算找尋答案。只願我身邊的人都生活得快樂。
你睇下我，肚腩圓圓，係咪大左好多呢？我都覺呢個幾月黎個肚大得好快。
唔知個肚臍遲ｄ會唔會消失呢？不過最緊要唔好凸肚臍就得喇 
，好肉酸架嘛！
雖然個肚係咁大，但係而家都算圓滑，無肚紋架！
可能咁係因為我比較少打側訓既原故啦，因為聽人講側訓好易有肚紋架。
我個ｂ女又曳曳，我一打側訓佢就猛咁踢，做就左我唔會打側訓囉。
但係亦可能係因為無打側訓而壓親條腰，每次想轉身條腰都好痛呢。
除此之外，而家行路都覺得好辛苦，辛苦到唔想出街。
已經唔識分係因為舊患定係因為馱住阿囡，而家行路真係好辛苦好痛，要行得好慢好慢。
每朝番工要慢動作起身，心怕動作太快會因對腳無力而跌親。
又要預早出門口，對腳好似無力咁，行唔得快。
仲有個股關節位行路會痛，有時痛到連大腿內側o既肌肉都痛埋，真係好痛苦呀 ＞＿＜
唔怪得之ｄ準媽媽臨生果個月成日嗌住想寶寶快ｄ出世啦。
聽日去做物理治療，希望情況會好轉啦，不停食止痛藥都唔係辦法呀！
其實我都幾鐘意行街睇D家用品同傢俱咁
大約三年前，剛結婚無耐，行過一間普通燈飾公司，
就見到下面盞燈減價，只售200多元，雖然係陳列品，但係我同老公都覺得好抵好靚。
所以就將佢搬左番屋企。
三年後，可能老公見靚野多左，就對呢盞燈睇厭，話好想換過第二盞燈。
其實而家出面好多呢類型o既座地燈，只係價錢都唔平。
當你去d傢俬名鋪，更加會見到款式差唔多既座地燈，但價錢幾乎要達千元。
但係其實如果有機會到泰國旅遊的話，你會見到街上到處有呢類o既燈，而且價錢極便宜。
所以我一直唔捨得用接近千元換過第二盞燈，而且亦覺得呢盞藤燈的確不俗呀！
試過買過d盛盤的確幾好用，但係其實價錢對於我地黎講都幾貴。
通常會等至減價先捨得到呢間店購物，其餘大部份o既時間都只係入去逛逛。
老公就好鐘意呢間店o既座地燈，但係都係因為價錢問題，一直都只係"遠觀"。
近幾個月呢間店既分店都做緊大減價，我地都分唔清佢地係執笠還是清舊貨後重新轉換產品風格。
我地每次經過都會入去睇下有咩平野，零零碎碎咁買o左d文具﹑挽袋﹑手錶等等。
但係幾過月以黎，一直都唔見佢有將座地燈擺出o黎賣。
今日再次經過，竟然俾我地見到終於擺左d燈出黎喇，
最雀躍o既當然係我老公啦，佢一問之下，知道各類座地燈都不高於二百大元，
嘩！！呢個價錢我都覺得係超值呀！！！我地緊係唔會放過呢個機會，
將呢盞新o既座地燈搬番屋企喇，價錢都只係$164.00咋 。
將佢搬番屋企o既路上，老公都興奮得不得了。亦都難怪，咁o既價錢買到呢支燈，又實在好抵。
時間往往都係不知不覺間流逝，尤其是當你望番轉頭既時候，
先會驚覺原來佢真係跑得咁快。
轉眼間，肚入面既bb已經8個月大喇 
8個月，終於出現左豬仔手﹑豬仔腳（水腫）。
手指好似屈唔埋咁，手指關節會有少少痛。
對腳唔知幾時開始”長大了”，又要特意買過一對新o既球鞋。
還好，自從我每晚訓覺把雙腳墊高之後，小腿抽筋o既現象得到改善。
我o既肚仔亦都大左唔少，不過其實比起好多大肚婆，
其實亦都唔算太大，所以應該都唔算太辛苦。
只係....... 3年前有次自己懶勤力咁學人做運動，又唔做熱身，可能因為咁扭親。
而家馱住左b女，令到舊患復發，痛得我要死，簡直寸步難行，坐立不安。
因為太痛，走路既速度好似一個老婆婆，有時甚至要企係度休息一行先行到。
今日番去做產前檢查，醫生都主動問我點解好似行得咁辛苦。
我將情況同醫生講左，佢就俾左d止痛藥同冬青油藥膏我，
仲排左期俾我下星期去做物理治療。
不過仲有兩個月b囡先出世。唔知我可以捱得幾耐呢?
p.s. 增磅共18磅，肚腩36"
睇小S的媽咪日記，其中一篇提到胎教。
睇完佢既文章，突然覺得好神奇。
一直以黎我都相信胎教，所以平時都有聽音樂，
最初懷有BB既頭五個月仲要讀書考試添，希望BB第日出黎都會鐘意讀書啦。
不過最神奇既係，入面提到胎教內容包括埋同BB講希望佢長得長一點，
如胎位不正的可以同BB講移番正位等，聽聞都幾有效。
突然諗番起，由知道有孕開始（應該不到一個月），
我同老公已不斷稱呼肚入面既BB做"囡囡"，
果然到懷孕20週後照超聲得出的結果果然是BB女。
唔通連BB性別都有得胎教既？？？ 
又兩個星期喇！
兩個星期前去檢查俾醫生話BB既體型偏小，所以被安排兩星期後再番健康院檢查。
係呢兩個星期，我好努力咁增磅：
朝早食雞蛋，夜晚食芝士，
仲有寧願一人留係屋企，而避免減少夜晚外出遲返夜訓。
今日再番健康院檢查，做完一般檢查之後，跟住就見護士喇。
護士：「幾好丫，兩個星期重左0.45kg，重0.5kg就超標架喇。」
我心諗，點解好似咁兒嬉的呢，可能SIZE呢樣野實在太主觀喇。
因為上次係醫生認為要番黎再檢查，所以後黎都要再見一次醫生跟進。
醫生為我度肚摸肚後：「你而家已經26週，但係個肚既SIZE只有24週....」
「你由第6週開始黎做檢查，到而家26週，增磅並不理想。」
「20週時你番醫院照過超聲波無問題，咁你就番醫院再做多次檢查啦！」
醫生話輕磅有可能係我吸收營養不夠，但亦有機會係BB本身出現問題。
最後安排我一星期後番醫院再作檢查。
實在太令人擔心.............
P.S. 增磅共11磅
唔知點解呢幾日會咁大風，但係又唔係太凍
涼風吹過黎特別暢快。
如果阿B女呢個時候出世就好喇！
可惜我個B應該會係冬天出世，真係有點令人擔心。
對於一個新手媽媽，幫BB沖涼換片已經頗有難度，
仲要係天寒地凍，一個唔小心，恐怕會令BB著涼。
報告一下而家BB既狀況先：
BB而家隨左會係我肚入面滾黎滾去之外，
亦開始快高長大喇。
每當我稍為彎腰，都會覺得俾個肚頂住。
雖然辛苦D，不過都唔緊要啦，
最緊要BB夠磅，唔好再俾醫生話輕磅就好喇！
BB，我知媽咪都無乜好野俾你食架喇，鬼叫你有對無飯父母咩。
不過你乖乖地，自己盡量吸收多D啦，媽咪都會盡量從旁協助架喇！
而家我已經盡量減少出夜街，連你老豆夜晚出街食飯都無媽咪份呀
希望多D休息會對你有幫助啦。只要你健健康康，我無街去都係值得o既。
哈哈~~ 呢個唔知係囡囡o既玩具，定係其實係我o既新玩具。
