生日會

今日潼潼要參加兩個表哥既生日聚會，所以潼潼食過午飯之後，我地就準備出發為表哥選購禮物。

我地首先去醫五臟廟。去到麥記，潼潼出奇地無扭吃，只係玩佢既兒童餐玩具。潼潼好少咁乖喎！　　　　　　　

之後我地就搭車去銅鑼灣購物。係搭車同係商場購物期間，都有唔少人讚潼潼可愛，做媽媽的當然開心啦！不過我諗爸爸買既呢頂帽仔亦居功不少呢！

買完野就去表哥屋企喇！原來幾個表哥落左樓下泳池游水，咁我都帶埋潼潼去俾佢試下濕濕腳。平時潼潼沖涼都好鐘意玩水，以為佢見到咁大個「浴盤」會好興奮啦！但係原來對小朋友黎講，玩水同游水真係兩回事黎架！你地睇下潼潼幾驚。最後我唯有同姐姐領住潼潼係泳池邊走左好一會，係佢面前表現得好興奮咁玩下水，潼潼先開始會笑同踢下水咋！我都要俾多ｄ機會潼潼試下玩水先得喇！

上到表姨屋企，潼潼表現實在太差喇！佢實在太怕生喇！每次帶佢見ｄ姐姐姨姨佢都扭計。潼潼呀~ 你幾時識係人地面前表現你可愛既一面俾人睇呢?你實在有點失禮呢！