影樓照

早前同潼潼去影樓影相，今天特意請左半日假去揀相。

又影相？係呀！因為早前舅夫送左一張影樓既免費攝影套餐贈券俾我地嘛！以前我地同潼潼去影既影樓照都係二﹑三百蚊就已經包幾個造影，廿多張相。今次呢個套餐已經三千蚊，只係得十五張相，真係唔講得笑。

其實呢間影樓又真係幾專業既，剩係裝潢已經比以前影過既兩家好唔同。而整個攝影過程亦比之前既順利，攝影師好識得逗潼潼玩。以前亦係網上睇到其它人對呢間影樓既評語都錯。呢日約左下午一點鐘揀相，地點係我公司附近，所以連飯都未食就「中」左上去。上到去未開始揀相，果位小姐已經大讚我地批相影得好，話潼潼笑得好燦爛，攝影師影得好有心機，輯相影左百多張，又話一般只係會影八﹑九十張相。

好！潼潼媽開始揀相喇！ 全程呢位 小姐坐係我身邊睇住我揀相無行開過。睇完第一轉，篩剩七十多張相。呢位小姐開始sell我各種套餐喇。甚麼四合一﹑三合一既相片連相架﹑包幾多張相﹑連相簿，各式各樣，由九百蚊至四千多元既都有。潼潼媽真係聽到一額汗，然後繼續挑相。一路揀到得番廿多張相既時候，呢位小姐都算好好，無黑面，不過就表現得有點沮喪。係咁叫我唔好再揀，連員工價都出埋，話加一千蚊額外包三十張相，係咁叫我係相片既捨棄區選番d出黎。我以前幫潼潼影既相都唔過四百，無理由今次影免費套餐要俾成千蚊出去呀？我依然繼續挑相，我諗呢位小姐想喊咁滯。

最後用左兩小時 (加上佢部電腦都load得好慢)，我揀左19張相 - 只因為唔好意思，所以比原本揀多左四張，要俾$190。不過，我諗對於小姐黎講，其實同唔加相無乜分別。我感受到佢行出去開單時的超級無奈。

批相係咪影得咁差，百多張相可以只揀出19張？其實都唔係既，不過對於挑相，我真係做得好絕。即使以前影婚紗照都唔俾錢人地賺。再多既相，其實亦不外如是。多看幾次就會看膩。

講左咁耐，終於有相睇喇!

以下兩張係我最愛的兩張，一睇就覺得係必揀。

揀完相都未食野，就把握機搭車番去接阿囡放學。落車經過炒栗子既車仔，買左袋蛋鵪鶉蛋食左三隻充饑咋！仲要留番幾隻同阿囡一齊分享添。

大人的對話

呢排好似寫潼潼既「說話」好似寫得好多，而且感覺有點負面。唔想講佢咁多壞話，所以將呢篇網誌設為私人網誌。

以下係今晚臨睡前跟潼潼既對話，佢講說話時的用字實在有D嚇親我，完全唔似一個小朋友既說話。噢 ! 我天真可愛既潼潼咩時候突然長大呀! 希望呢個情況只係偶然發生。

可能係學校岩岩練習過剪紙，今晚潼潼自己要求要剪紙，將白紙剪成一條條既紙條。

差唔多到訓覺時候。

潼潼媽 : 「潼潼，要訓覺喇 !」

潼潼 : 「我剪埋先丫。」

潼潼媽番入房整理好床舖，再望下個鐘，時間實在唔早，諗住出去提醒潼潼，預告俾佢知剪完手上紙條就要訓。出到去見到潼潼將紙條剪剩好幼。

潼潼媽 : 「唔好剪喇 ! 咁幼好易剪到手。」

潼潼好專心，眼睛無離開過張紙，淡淡的回答 : 「我剪埋先呀! 你番入去啦!!!」

 我腦內突然出現一個畫面 : 年老既我因為管束女兒，而被喝罵番入房，不要多管閒事。

臨場執生能力極弱既我，呢個時候求救於潼潼爸。

(唔記得潼潼爸同潼潼講乜)

潼潼繼續低頭剪紙 : 「我做緊野呀! 一陣先。」

潼潼爸再叫潼潼 : 「我叫你，你聽唔聽到?」

潼潼一本正經地 : 「我聽唔到，咁你大聲D講我咪聽到囉!」

對話期間，潼潼真係成個大人咁。佢無耍脾氣，亦無表現嬲怒，語氣平淡，一直專注於自己既工作。對於佢既專注，本來值得加許。不過呢個態度實在不要得呢 !

英文故事分享

早排係書局見到"I CAN READ"系列既書做特價，就挑左兩本書。一本關於DOG，另一本關於CAT。就係因為見潼潼岩岩學識"DOG"同"CAT"，所以揀左呢兩本書。

以為一本PRESCHOOL既故事書好簡單嗎?潼潼媽卻要趁潼潼午睡時重複又重複地查YAHOO字典，然後自己讀了一遍又一遍。

書名係《TOO MANY DOGS》

內容如下:

Big dog.  Bigger dog.  Biggest dog of all.

Small dog.  Smaller dog.  Smallest of the small.

Waggy dog.  Shaggy dog.  Doggies in a bunch.

Floppy dog.  Sloppy dog.  Doggies eating lunch!

Sprinkly dog.  Wrinkly dog. Scratchy dog.  Patchy dog.

Tricky dog.  Picky dog.  Happy, lappy, licky dog!

Spotty dog.  Dotty dog.  Doggies all about.

Howly dog.  Growly dog.  Doggies, please get OUT!

WOOF!

呢個故事究竟係繞口令還是詩歌呢?   不過對於小朋友黎講或者會覺得好有趣既。而潼潼學識既竟然係"too many"呢個詞。佢好得意地數"too many眼睛"﹑"too many鼻哥"﹑"too many嘴巴" ................................. "too many肚腩"﹑"too many pat pat" 。 嘩~~ 好得人驚呀!! 阿囡做乜數數下數哂阿媽d缺點出黎呀?

說教潼

潼潼媽想起一D又寫一D。

時代唔同，由潼潼出世到而家，佢無俾我地打過幾多次，通常都係向佢訓話說道理。或者因為咁，小朋友都學會道理多多。

 

9月25日  星期六早上

潼潼媽係洗手間

潼潼係外面叫 : 「媽me，你未收番好電腦同凳呀 ! 」

潼潼媽年紀大無記性，唔太肯定，向外一望 : 「係咩? 唔係呀! 收好左呀!」

潼潼 : 「係我幫你收好囉 ! 下次你要自己收好知唔知呀?」

潼潼媽 : 「哦! 知道喇 !」

 

又有時，當我係筆筒拎起支筆黎用既時候.....

潼潼 : 「呢支筆我架喎 ! 你用支筆要問我先架 ! 」

潼潼媽 : 「咁可唔可以借支筆我用一陣呀? 」

潼潼 : 「好啦 !」

潼潼媽 : 「唔該 ! 」

潼潼 : 「唔! 乖喇 !」

 

假日朝早，爸爸遲遲未起身。

潼潼 : 「爸爸!! 起身喇!! 快d起身啦! 你訓左好耐喇! 」

 

當潼潼認為爸爸唔岩既時候

潼潼 : 「你曳呀! 我唔同你講野呀! 我好眼訓，我要訓覺呀! 」

3歲8個月

潼潼3歲8個幾月大，潼潼媽諗起一d潼潼既瑣碎事，怕日後忘記，還是先記錄一下。

潼潼自細俾媽me讚得多，有時候自信心大到有點自大。 

好似有時潼潼睇到係blog上自己既相片時會話：「我笑得好靚呀！我真係好叻呀！」

對於潼潼會既野，當潼潼媽問佢：邊個教你架？佢既答案永遠係：我自己識架囉！

潼潼又好大膽，最近見佢由第二級樓梯跳落黎，呢個囡有時成個男仔咁百厭。

另外，潼潼媽為免潼潼學錯師，從前都無刻意教潼潼英文生字。不過番呢個幼稚園後，潼潼都開始學懂一d英文生字喇。我所聽過既有DOG, CAT, CAR 同埋PENCIL。另外知道佢識BUTTERFLY，不過就唔肯定係兒時既光碟中學到還是學校教既呢?其實潼潼對英文唔抗拒之餘好似都幾有興趣，希望佢學英語唔會有問題罷! (潼潼媽自己英文唔叻，所以好似特別擔心呢個問題 )

 

執生

潼潼說話好會執生，有時都唔知算唔算係好事。

以前我問潼潼鐘意邊個，佢會答鐘意姐姐同媽me；對住爸爸既時候，又會識答話潼意爸爸。之前亦有篇網誌寫過潼潼會為自己想動手打媽me而解話。今日又有「新作」

潼潼用匙「不」蛋撻食既時候，「不」極都「不」唔起，於是欠缺耐性既潼潼又發脾氣。

潼潼：「呀~~ 呀~~ 不唔到呀~~~」

潼潼媽已經提醒過潼潼好多次，又乜野唔順心既事情都唔需要呀呀聲叫，只需要講。一係自己努力嘗試，或者請大人幫手。

潼潼媽：「仲乜又呀呀呀咁叫？」

潼潼立即給我回答：「我呀呀聲咁唱歌唶！」

對於潼潼咁強既應變及執生能力，不善辭令既潼潼媽真係無言以對。

再添寶寶?

之前都有諗過想再添一個寶寶，不過礙於經濟上既考慮，所以取消呢個念頭。不過隨住潼潼逐漸長大，呢個念頭又再萌生。

其實想再添寶寶，主要都係設想到潼潼既將來。潼潼漸漸成長，開始感覺到佢要有個伴陪佢玩，大人同小朋友玩既野始終唔同，而我自己亦自覺無咁多精力陪潼潼玩。另一個考慮既係希望當潼潼成長後，有多一個人同佢一齊承擔家庭事務同開支，有多一個人同佢有商有量，唔駛佢一個人咁吃力。最後，即使將來我倆老去以後，潼潼身邊仍然會有佢既「親人」 -- 一個同佢親近既人，血濃於水嘛。

但係潼潼爸亦講得無錯，除了經濟上既考慮以外，我想再添一個寶寶，原因都全是為了潼潼。但係如果我真係再添一個寶寶，根本無咁多時間兼顧到兩個孩子，若果到時反而因此冷落左潼潼，根本係適得其反。

中秋當晚同追月夜，潼潼識自己主動搵其它小朋友一齊玩，令我有點安慰。

不過今晚同潼潼到厚德村參加佢地既週六歌舞小聚時，當時有好幾個小朋友係度，其中有三個小女孩手拖手係樓梯度走，潼潼亦跟住佢地走。不過其中年紀較大的一個拒絕其它小朋友參加，仲同潼潼講：「我唔同你玩呀！」

潼潼傷心地同我講：「佢地唔同我玩呀！」我再問另一個小女孩，佢依然拒絕潼潼參予。我只好問另一個小男孩，佢願意同潼潼一齊玩，兩個就手拖手的走了。

不過想起潼潼講「佢地唔同我玩」時既傷心既表情，實在令我感到難過。

COOKING潼潼

可能潼潼媽對買玩具太嚴謹，相對比較喜歡買故事書。中秋果日行街時爸爸提醒媽me話潼潼近黎無乜新玩具玩。於是我地同潼潼去反斗城物色玩具喇！

最初潼潼揀左洋娃娃，媽me覺得果d換衫公仔對於潼潼黎講太細件，佢幫唔到公仔玩衫之餘，d配件會好快唔見哂。於是再俾其它玩具潼潼揀，最後潼潼攪左一套整野食既玩具。

第二日開工喇！首先加入100ml既cream

再倒入15g既砂糖

加一隻全蛋後攪勻佢

倒入模具入面

媽me已經俾個托盤俾潼潼，諗住佢倒瀉都唔會太難善後，等佢可以嘗試同享受一下由自己製作食物既過程。不過潼潼都唔敢自己動手，每個步驟都要大人幫佢手。

製好後冷藏兩小時就完成。可能因為cream打得唔夠耐，製成品失敗左，最後要雪入冰箱等佢凝固。雖然係咁，潼潼依然好期待佢自己親手製既食物。

結果呢?其實味道真係唔錯架! 潼潼對自己既製成品非常滿意，仲不斷催促我地要食佢整既食物添。

無呢套玩具既都可以依呢個份量自己整黎試下。只係呢套玩具入面有模具，同埋有其它建議食譜俾你可以加入既其它配料製作唔同既口味。

 

中秋隨影

爸爸一心諗住去商場同潼潼影下相，可惜今年商場既中秋佈置比較遜色。

唔知點解，而家d小朋友好似天生識擺甫士咁。

2010中秋 - 天公造美

今日又同潼潼去影樓影相。

又影? 幾個月前先影完，潼潼媽傻左影上癮？非也，只係 潼潼媽得到舅夫贈送既攝影禮券，不過因為只限於平時使用，而潼潼媽約時間時又無留意原來今日係中秋節，所以就book左今日去影相喇!

一分錢一分貨，個套餐原價要三千幾，攝影師幫潼潼影相時真係好專業。潼潼媽好期待今次影出黎既相。

影完相就去沙田同嫲嫲食飯。

今年都算天公告美。尋日剛打完３號風球，整日落雨都落得好兇。天文台亦預告今年中秋難以見到月光。但到今日呢？只係落住毛毛雨。到晚上亦都停左雨，仲偶而會見到月亮探頭出黎添。

而因為尋日落左一整日雨，今日天氣都涼快好多，玩起上黎比去年舒服好多。（記得去年中秋晚上天氣悶熱極了）

潼潼係從沙田回家既程途中小休一會，番到屋企樓下見到有得玩就即刻醒哂！仲叫住要買螢光棒。最初係要求用螢光棒砌成佢最喜愛既波波。

後黎見到其它小朋友有靚靚蝴蠂，貪靚既潼潼亦都要做蝴蝶喇！

屋企樓下真係好熱鬧，連潼潼都玩到十二點幾先番屋企呢！

用筷子進食

潼潼平時食飯有兒童專用既學習筷子。不過今日係無準備之下出左去食午飯，潼潼唯有用普通筷子喇！

可能因為用慣左學習筷子，潼潼第一次用筷子手勢都似模似樣呢！

拗腰練習

早前係淘寶買左四本台版育兒書藉，已經睇到第三本了，只剩下大家以為我會最先看既「放大孩子的優點」反而還未有看。

其實係誇讚小朋友方面，自覺已經做好多，多到已成為習慣，多到要慎防自己讚得無技巧，係又讚唔係又讚，最後弄巧反拙。所以我並唔太擔心自己唔識「放大」，而暫時將呢本書放到最後先睇。

就好似潼潼而家每晚除左腰部的伸展運動以外，就隨她興緻做拗腰練習。

其實潼潼到而家都未成功可以將腳仔掂到個頭，不過每次我都會讚潼潼。有時係讚佢手伸得夠直，有時讚佢姿勢做得好。做得好既時候，又會專登叫爸爸入黎睇下。再或者撥佢既頭髮到腳上，俾佢知道仲差少少就成功。甚至乎好似今次咁，話潼潼做得好，要用相機幫佢影低。

而家潼潼上芭蕾舞堂，坐係度時腰已挺得好直，而且亦好俾心機咁做好呢個拗腰既動作。

潼潼語錄 - 3Y8M

一次潼潼正在發脾氣時，正要遞手打媽me既時候，手在半空停住了。

潼潼：「砵砵！我揸車呀！」

之後我同潼潼爸都向潼潼說教。但今次既題目唔係「唔可以打人」，而係「唔可以講大話」。不過到最後潼潼都堅持地話自己唔係想打媽咪，而只係揸車。

人地話識講大話既小朋友比較聰明，不過父母總唔希望小朋友講大話罷？

係開始講英文故事以前，我都無刻意教潼潼英文。不過佢係學校都應該有接觸過「英文人」，有時都會亂發音扮講英文，或者係因為佢覺得好得意。

開始讀K1，潼潼開始識一D英文單字，早幾日就呢住架玩具車話俾我知係CAR。

又一次.....

潼潼：「姐姐係Ｘ」

Ｘ代表一個英文發音，不過我聽唔清楚潼潼想講乜野。

跟住潼潼又話：「WOO WOO狗係DOG」

潼潼媽：「咁姐姐係乜野呀？」

潼潼：「姐姐係ENI。」

 簡單﹑直接﹑正確既答案.........

潼潼媽朝早食緊朱古力米通條。

潼潼：「你食左早餐先食喎！」

潼潼媽：「咁你有無食早餐丫？」

潼潼：「你唔好學我啦！」

阿茂整餅

潼潼媽見到一個整鬆餅既簡單食譜，於是又貪得意試下整。

呢個鬆餅既材料好簡單，只有自發粉﹑cream同埋汽水。

外觀勉強的還可以，味道..... 很一般 ，比較淡，一定要搽果醬/牛油才可以。

屢敗屢戰!! 搵日再試試先。

一星期的K1生活

潼潼番K1剛好一星期，一切都好順利，潼潼亦由今日開始留係學校午睡。

潼潼既班主任陳老師亦係級主任。陳老師好好，好明白家長既心態，呢幾日都有打電話俾我，向我交待潼潼係學校既情況。

以潼潼既性格，加埋佢之前都有番開全日班，其實都無乜值得潼潼媽擔心。只係媽媽們都會對自己子女好有興趣，想知更多﹑聽更多。而且呢間學校的確唔錯，潼潼每日都好開心咁番學。

開學頭三天，潼潼都只係番一小時。

9月6日 (開學第四天)

雖然原本預定第二個星期每天番兩個小時，但係全日班亦可因應小朋友適應能力作調整。今日開始潼潼同部份小朋友已經開始三小時既上學時間。

9月7日 (開學第五天)

潼潼開始係學校午膳。根據老師所講，潼潼係學校食飯都食得好好，可以自己食哂飯﹑飲哂湯。上課時亦主動投入，肯一齊玩，肯答問題。老師話潼潼仲識得問老師點解唔係度訓覺添。

9月8日 (開學第六天)

今日潼潼開始番正常時間。老師話潼潼午睡時有D緊張，老師要幫佢地除左辮仔訓覺，潼潼就好介意之後係咪會幫佢梳番好條辮。訓覺時又會訓一陣又睜眼望一下，要拍拍下先訓。一訓醒覺就即刻要老師幫佢梳番條辮。老師話潼潼可能係第一日留校午睡所以表現緊張，但係我覺得潼潼係貪靚多於一切。

冒險去

我家附近開左一間新既冒險樂園，地方比以前大好多，仲多左D機動遊戲。

剩係波波池都有三層。印印姐姐陪潼潼入去玩，佢都話覺得無乜點玩過就要番出黎，唔似玩左15分鐘。可能因為地方實在太大喇! 15分鐘..... 連地方都未行哂呢!

又有海盜船。

潼潼以後可樂透了。

不再Burger King

曾經都幾喜愛食BURGER KING，不過怕潼潼食太多垃圾食物，所以都好少去。

呢日再去BURGER KING，發覺粗薯條竟然唔見左，變成同麥記一樣既幼身薯條。而包包亦都好似縮左水。

好失望啊! 以呢個價錢，咁既質素。我放棄BURGER KING喇!!!!

英文故事

大約兩日時間就睇哂汪培珽既「培養孩子的英文耳朵」，好心急想開始為潼潼講英文故事，所以今日左挑右挑的揀左幾本合心意的英文故事書。(合心意除了指內容，更包括埋價錢)

潼潼媽對自己既英語能力無乜信心。我睇左其中一本英文故事書，覺得自己可以應付得黎，就連同一本中文故事書一齊拎入房準備為潼潼講故事。

我估計潼潼唔鐘意聽英文故事，所以打算先講中文故事，如果潼潼仍未想訓覺，想再聽一個故事的話，無得選擇一定要聽英文故事。如果佢選擇訓覺，咁就由佢喇，唔會強逼佢要聽英文故事。(作者話孩子多數寧願聽英文故事都唔願訓覺 )

點知潼潼一開始就揀左先聽英文故事 。　所謂講英文故事，其實現階段係一句英文，一句中文。潼潼聽完故事後，就胡亂的講著「英文」，學著講故事。然後竟然指明要聽同系列既另一本英文故事書。下? 你想考媽媽嗎? 我未有備課喎!! 真的，作者都有教家長們要先試讀。潼潼媽唯有硬著頭皮拎潼潼要聽既一本故事書，戰戰兢兢的為佢講故事。很不中用嗎? 連小朋友故事都要講得戰戰兢兢 。最後呢? 遇上不確定意思的，憑前文後理，加上圖畫，給混過了；遇上唔會讀既，靠併音混過了。讀完故事，潼潼又胡亂咁講著英文，然後仲指明聽日要聽邊本邊本。阿囡，咪咁玩媽媽好喎！

為免誤我子弟，之後我仲要特地查網上字典確認一下讀音及字意！（呢個係作者所建議的做法。不過本來應該讀故事之前做，而家我就變左讀完先查　）

睇黎潼潼對英文唔抗拒，反而做阿媽既要努力d先得喇！希望將來潼潼既英文水平唔會好似媽媽咁不滯就好喇！

MEGABOX PLAYHOUSE

之前兩次都想帶潼潼去MEGABXO既PLAYHOUSE玩，但係都因為太多人輪候而去到玩。今日趁著我同爸爸都為左潼潼既開課日請左一日假，而潼潼又只係上一個小時課，所以下午就帶潼潼去左PLAYHOUSE玩。

雖然設施好似唔錯，但係潼潼主要都只係玩其中一項遊戲。遊戲當中亦見唔到潼潼兒時到大角咀PLAYROOM玩時既燦爛笑容。

我諗我地唔會再特登過黎玩。