入院

人生充滿住很多的第一次，尤其剛出生的頭幾年，因此特別開了一個欄目記錄潼潼的第一次。不過今次所記錄的第一次，絕對非我想記下的一次。

潼潼昨晚午夜兩時左右開始叫肚痛，我地試過幫佢搽油﹑俾通屋佢食，佢都一直叫痛，維持好長時間都未能安撫佢，痛到連潼潼自己都識得話要睇醫生。最後唯有帶佢去睇急症。

唔知算唔算好彩，將軍澳醫院就係我地隔離。我地帶潼潼行過去，好快就可以睇到急症，而急症室入面輪候既人亦只有一兩個。潼潼本來都唔算扭計，但係俾醫生檢查時要「吉」肛門，之後又要訓係度俾頭頂一部機器怪物照X-RAY，最後仲要俾人「禁」住「種豆」抽血，然後打止痛針。呢一切一切都嚇到潼潼好驚好驚，不停喊﹑不停嗌住「媽咪」。

打左止痛針潼潼舒服少少，亦休息左一陣，不過只係維持左約半小時，佢又再肚痛。 呢個時候我地已被安排上病房留院再作觀察。我摸下潼潼既肚仔，硬繃繃的，不難想像入面腸臟的緊張狀態。上到去病房既時候已經約6點半，姑娘話要等醫生黎睇潼潼。潼潼一直嗌肚痛，但係無乜可以做，只係繼續等醫生黎檢查。呢個時候潼潼賴左便便，亦好彩賴左水水的便便，肚痛亦止住了。我又再摸下潼潼個肚，鬆好多了。潼潼話：「唔好摸下啦！一陣又肚痛呀！」　約7時，潼潼係病房訓左，但仍未見醫生。我心裡慶幸潼潼因為自己便便以後無再肚痛，否則咁長既時間一直在痛的話都唔知點算。訓訓下，潼潼仲曾經嚇到係醒夢中成個人彈左起身。

只係訓左約一個小時，又話醫生到左，叫我抱潼潼過去俾醫生檢查。醫生驗過潼潼肛門，問左幾個問題以後，幾乎乜都無講過，整個過程幾乎只係佢問我答。我只知佢話要潼潼留院吊葡萄糖水。我問佢係咪腸胃病，佢話可能係；問佢今日會唔會出院，佢好簡短咁答「閔D」。我以為佢再會有其它comment既時候，佢已經行左出去。

其它詳情，我只有問當值護士，略為了解情況以後，知道唯有再等巡房醫生。其時亦差不多十點，我去食D野之後，就番醫院，剛巧碰上巡房醫生，不過醫生都無乜comment，只係要潼潼留院觀察，無大問題就可以出院。

了解完一切，終於有時間番屋企休息，到下午四點幾先再番醫院陪潼潼。

經過多番折磨，潼潼扭計左好多。成日喊，成日叫住要番屋企，又嗌住話手痛，媽媽見到真係好心痛。 不過潼潼進食﹑排便各方面都無太大問題，相信第二天可以出院。

今次入院，係潼潼對面床既一位15歲既姐姐，因為抽筋而入院，之前亦有想講野而講唔出既情況。聽到醫生預告話有心理準備可能會係D嚴重既病症。再隔離係個14歲既姐姐，呢個姐姐似乎對病房入面既儀器操作同醫護人員都好熟悉，相信係醫院既「常客」。見到兩個姐姐，不禁令潼潼媽有點心寒：一直健健康康的成長，亦可以來一個突變。幸福非必然，健康亦如是。令我更加體會到健康係最重要的道理。