忿怒的遊樂場戰記

今日帶潼潼去旺角新世紀廣場既兒童遊戲場玩。爸爸係睇中左場內兩組管筒組合遊戲組，不過去到先發覺呢兩組組合都話要維修無得玩。不過唔緊要啦，對於小朋友黎講，見到遊樂戲已興奮莫明。

呢日遊樂場好多人，潼潼首先去左玩氹氹轉。氹氹轉好多人玩，而且轉得好快。不過潼潼貪玩，未有懼色。而且係一兩個年齡稍大(10歲左右)既姐姐當義務糾察隊之下，秩序還算可以。每見有小朋友要上落氹氹轉，或不慎跌倒，都會立刻叫停。又會見到有年紀細既BB級人碼係度玩既時候，將速度減慢。潼潼係度玩，我尚算安心。

之後去玩搖搖板，見有兩個小朋友係度玩得起勁，旁邊有小朋友係度排隊等候，但係小朋友不為所動，一於視若無睹。好一陣子後，一個小妹妹等到時機上坐，卻因為對面小朋友毫不客氣地搖得起勁，而立刻被嚇走。潼潼趁機上位(本來潼潼排緊另一邊，不過叔叔姨姨見潼潼等左好耐，所以讓潼潼先玩)，我亦趁機教導潼潼要輪候既道理，玩左幾分鐘後就讓番俾小朋友玩。期間亦見到有小朋友爭玩既情況，不過在旁既家長毫不干預，只見佢笑住﹑好滿足咁睇住自己既小朋友係度玩。

之後玩滑梯，情況亦十分混亂。幾個年紀稍大既哥哥係遊戲組度奔跑攀爬，潼潼被夾係中間根本不知如何是好，而旁邊亦有其他年紀幼少既小朋友係度玩緊，有D家長逼於上陣打救，而我同姐姐本來一人企一邊，連姐姐都緊張起黎，指示潼潼過去我果邊等我打救。呢個情況一直都無改善，連我都嬲得要大叫：「你地唔該守下秩序，睇住D小朋友呀！」混亂情況持續：玩滑梯時有D小朋友會「從後趕上」﹑有D又會從滑梯下面爬番上黎，試過潼潼滑緊落黎既時候，直情有小朋友跨過潼潼身邊往上爬。

我見到既簡直係一場混戰，小朋友幾乎完全失控。感覺家長們對住佢地只有無耐同放任。雖則現今流行「自由發展」，但規矩同秩序總得遵守。一個兒童遊樂場可以如此混亂，小朋友連簡單既秩序都學不懂，我真係不敢想像將來既社會會如何。看在外國人眼內，難怪我們總被認為係一羣無文化﹑未接受教育的低等族類。

雖則話大人唔應該介入小朋友既糾紛之中，不過我想基本品德教養家長總須提示指導。

呢次潼潼媽真係有點氣憤，心裡籌算住，我係咪應該教曉潼潼係某D為保護自己既情況下，使用適當的暴力。(講係咁講下唶)