海洋公園遊

應朋友邀請，昨日我地帶潼潼去海洋公園，出發時發生一段小插曲，就係搭城巴既海洋公園專巴時，架巴士竟然行錯路......  可能係一個唔好既開始。

一如既往 + 意料之內，潼潼一出街就發呆。潼潼，你咁既樣影相唔靚靚架！

海洋公園而家有個「夏水禮」既分唇，專係玩水既，都幾得意丫，門口有Ｄ泡泡噴出黎，好似雪咁，好有趣呀！

可惜潼潼一Ｄ都唔欣賞，佢仲好驚Ｄ泡泡，唔敢掂佢地添呀！

唔知好彩定唔好彩，因為有小雨，天氣無咁熱，不過就有少少唔方便。不過都唔緊要，最大問題係我地既主角　－　潼潼姐完全不在狀態，除左呆之外就係訓，亦無乜笑容，又唔識睇，又唔識玩，下面呢張相係叫做比較士嘜既一張喇！

唔知點解潼潼成程無乜點郁過都會咁「支力」，不過佢都係同平時一樣死撐唔願訓。係拍呢張相之前，我地見佢訓著，曾經放低椅背俾潼潼訓，但係佢即刻要坐番起身，但係一秒鐘後佢又訓著左。試過有次仲成個頭伏左係嬰兒車上面既玩具訓著左添呀！

因為盈盈樂樂黎左，海洋公園已經變左做熊貓主題公園，周圍都見到熊貓。比較騎喱既係連旋轉木馬都變為旋轉熊貓。其實都幾醜怪唶．．．．　



我地最後一站係熊貓館。潼潼爸話：「潼潼，仲想叫你同熊貓影番張合照添，點知你又訓著覺。拿~ 第日大個唔好話我地無帶你黎過睇熊貓呀！」潼潼媽：「唔緊要~　照影囉！」呢張就係潼潼同熊貓既合照喇！

成個行程帶住潼潼真係好「支力」，最可惜係潼潼真係未識欣賞，唔識玩又唔識睇。