潼聲潼戲: 6月 2007

2007年6月30日星期六

去Shopping喇

「今日媽媽帶我去超級巿場shopping呀！你睇下我坐住架車幾醒目！好多姨姨都望住我呀！」

狂風大雨

今日下午突然刮起大風，感覺好似要打風一樣。
我鐘意大雨時望街，因為屋企樓下大風，每當大風大雨時就好似有一陣陣煙飄過咁，好得意好靚。不過ｄ路人就比較狼狽ｄ喇！

每當變幻時 II

要有一段幸福美滿既婚姻，究竟應該以感性出發，還是由理性出發呢？

「每當變幻時」入面既楊千嬅，佢感性上喜歡「魚佬」，但係理性上佢知道如果佢選擇左「魚佬」，佢既人生將唔會再有太大既改變，佢亦得唔到一個佢想要既理想生活環境。最後楊千嬅選擇左離開，佢既決定令佢既一生有左好大既改變，佢增值自己，生活質素提高左不少，只係感情生活相對而言可以話係失敗。

每一段愛情既開始，基本上都先由感性開始。但係當愛情漸轉為感情，好多時就會變得樣樣事以理性出發，就係因為咁，「無冤不成夫婦」既情況就經常可見。既然最後都係以理性行先，點解唔係一開始就以理性去選擇自己既另一半呢？或者，故事入面楊千嬅係做左英明既決定，儘管佢既感情生活落空，但原來卻並不失敗。

2007年6月29日星期五

讀書時期既我都好「自閉」，係課室內從來不多言，亦無任何既課外活動，生活只有讀書同家庭聚會。完成學業，出黎工作先開始認識第一個男朋友，開始學人拍拖，果陣已經廿歲出頭。四年後，我地分手喇！我開始我既網上生活，係網上認識左一大班朋友，廿五歲人先跟十幾歲既一樣去周圍玩，夜晚出街唱Ｋ玩通宵，過住「背逆青年」既生活。廿五歲，畀人追，畀人暗戀，好似人地十幾歲少女咁，享受被愛，被追求（雖然果陣唔覺得）。過左三十歲結婚，而家三十幾歲人，有左我既女兒潼潼，仲有排捱添！

今日睇「每當變幻時」，戲入面楊千嬅係三十歲作出佢人生一個重大既改變 - 佢毅然離開菜巿場，學習化粧，重新開始佢既人生，開始佢既事業，幾年後終於學有所成，發展佢既事業。

早前同朋友閒談當中，我話我覺得自己既事業已經到達頂峰，好難再有發展。但係其實係咪真係咁呢？而家再起步會太遲嗎？我應該為我既家庭繼續努力，繼續發展我既事業嗎？一切會太遲嗎？我能夠做到嗎？

2007年6月28日星期四

日本絹豆腐

今日俾大家欣賞下呢件$8.5，俾皇帝女享用既富貴日本絹豆腐。大細跟我部S1差不多喇！

話說尋日為皇帝女再次購買豆腐用黎加落糊仔度，經潼潼爸再三囑咐唔好買富貴豆腐之後，我就去左百佳超巿買左件$5.5既山水豆腐。番到屋企，當潼潼爸知道我用左$5.5買平民豆腐後，佢話只差兩三蚊，咁緊係買富貴豆腐啦！

原本都只係價值幾蚊雞既豆腐，差價當然亦只係幾蚊，你以為可以相差幾多呢？好啦！而家大條道理買富貴豆腐喇！

2007年6月26日星期二

Burger店

從前要吃BURGER就只有麥當勞一家，但近黎突然的興起一陣BURGER店熱潮，出現了好幾家專吃BURGER的快餐店，而且價錢可不便宜，一個套餐動輒$60有多，但追捧的客人仍然不少。我家公司最近收到傳單，在附近亦同樣開了一家專吃BURGER的店鋪，打正旗號以有機咖啡作賣點，傳單上之介紹似乎很不錯，因此今日下午特來試試。

香港人都喜歡貪新鮮及喜歡排隊嗎？遠遠的已經看到在排隊等候買BURGER的人龍。

這家新開的店子正進行優惠，只要填好表格，就有兩款優惠：分別是買一個BURGER送一個指定BURGER；以及買一個BURGER送薯角。我們一行三人，決定買兩個BURGER，再加一個洋蔥圈，另外再ORDER飲品。

這個就是那日式照燒牛肉漢堡。賣相並不甚討好，大小亦跟麥記的差不多，味道很一般，個人覺得跟麥記魚柳包+照燒汁的味道無異。

這個是贈送的甚麼甚麼BURGER，賣相依然是一般，味道嘛？聽聞還可以。

這兩個分別是熱抹茶奶茶及凍鮮奶咖啡。賣相一般，味道亦不見得有意外驚喜。

薯角強差人意，完全不脆口，像已經弄好多時。還好有洋蔥圈是比較出色之作。

在多重優惠以後，這一餐每人平均消費是43大元，但表現令人沮喪，唯一得著就是這隻免費贈送的咖啡杯嗎?

最後結論：以價錢及其相對的質素而論，麥記，我還是覺得你最好。

2007年6月25日星期一

大冒險

星期日首次帶潼潼到冒險樂園，潼潼睇得興奮。

遊戲機上既汽車因為靜止太耐而自動開動左一陣，潼潼以為係自己努力轉動輪盤既成績嗎？所以一邊努力開動，一邊望住上面既汽車。哈哈哈~~ 正一傻豬！！
潼潼玩過呢個遊戲之後興奮了好一陣子呢！

會挑吃的潼潼

話說當初選擇米糊給潼潼的時候，姨媽介紹的那個品牌已經再沒有在巿面售賣，只能致電到代理訂購，而且費用必須超過100元才能安排送貨，因此我最少也得訂購5罐米糊。由於潼潼初試吃糊仔，所以我選了奶米糊4罐，而姨媽及職員都推介的橙味米糊我則購了一罐。

吃過兩罐奶米糊，潼潼都非常喜歡，心想是時候給潼潼轉轉口味罷！那就開了那橙味的米糊。怎知道潼潼淺嘗第一口已經扁咀縐眉。　潼潼啊！橙味的，很酸嗎？工人姐姐嚐過了，也是淡淡的沒甚麼味道啊！怎麼你樣子這麼難看啊！哈哈，她的樣子笑壞了我及工人姐姐，只是可憐的潼潼卻笑不出來了，很勉強的完成了那一餐橙味米糊。到了昨天晚上，為她在米糊裡添一點香蕉茸，但似乎仍是沒有多大的改善。

潼潼吃了米糊一段時間後，我一直都想為她在米糊裡再添其它固體食物，好讓她慢慢適應吃固體食物，亦同時幫助她吸收更多營養，我想豆腐應該是不錯的選擇罷。今晚下班的時候，我到CITYSUPER為潼潼買了一磚日本絹豆腐，不便宜的啊！小小的一磚要$8.50。哈哈，我知爸爸一定抗議的了，但我怕潼潼會吃下太多有害的防腐劑及石膏粉嘛！貴一點就是貴一點罷！

我帶著這小小的一磚豆腐趕忙的回家，吩咐了姐姐改用奶米糊去調這豆腐米糊。我想，這個配搭應該不錯罷，我自己也蠻喜歡的。　最初餵潼潼吃這豆腐米糊，潼潼的小咀是不願張開的。是對橙味米糊的無聲抗議嗎？姐姐告訴我你今天下午把橙味米糊踢翻呢！潼潼，嚐一口吧！潼潼最初是勉強的吞下去，慢慢的．．．　最後當然是吃過不停喇，咀巴還張得大大的。

想不到這小妮子也很會挑吃罷！想的也是，因為潼潼媽也不愛吃橙，所以潼潼也不願吃橙味米糊喇！還有一點她像極潼潼媽的，就是愛吃的話，即使吃飽了也要把心頭好往咀裡送，哈哈哈！！嘿！潼潼！吃夠了沒有？　

或許是因為她吃得太飽的緣故，不消一會，便沉沉入睡了。

2007年6月23日星期六

Blog Pet

大家知道blog pet是甚麼東東嗎？我也不知道，只是在日本像是非常流行，亦似乎很是可愛，大家可以到blogpet研究研究一下，但好像YAHOO BLOG是不支援的。

這裡好像介紹一個中文版本的BLOG PET，但同一個問題：不肯定YAHOO是否支援。你們也來嘗試一下罷！成功的話不要忘記告訴我啊！

大細超

「媽媽！你見我咁醜樣，做乜仲要影我相呀？」

事緣尋日工人同潼潼玩緊之際，唔小心將手上既玩具跌左係訓係床上既潼潼度，剛巧跌正潼潼右眼既位置。當時潼潼只係「嗯」左幾聲，亦無大喊，眼角只係輕微紅腫，所以我都無特別責怪工人，只係叫佢小心ｄ。之後一直都無乜異樣，眼角既紅腫亦已經退左。

直至今朝訓醒既時候．．．．　點解．．．．．．　大細超既．．．．．？？？？　　我諗都係尋日整親隻眼既緣故啦！無辦法．．．　唯有做醜樣豬啦！

「雖然我大細超，但係我依然活潑可愛啊！

」

見潼潼一切如常，仲好開心咁玩，我亦打消左原本想同佢睇醫生既念頭。

2007年6月22日星期五

我要新玩具

「ｄ掛床玩具睇到厭哂喇！等我拆左佢，叫爸爸媽媽買個新既先。」

「首先要除哂ｄ公仔落黎先。」

「然後拆埋個架。努力拉拉拉！！」

「拆唔到既？媽媽～～　仲唔快ｄ黎幫手！」

2007年6月21日星期四

第一次扶住企

6月19日，潼潼第一次自己扶住床邊企係度。潼潼好叻女呀！！

潼潼：「媽媽，我得左喇！」

2007年6月20日星期三

兒童樂園

潼潼出世以黎，未真正咁帶佢出去遊玩，我怕佢太少外出而養成孤辟既性格。所以潼潼媽開始要好好為潼潼安排一下假期既活動喇！呢個端午節假期，我就帶左潼潼去朋友屋企。朋友有一個兩歲大既小女兒津津，咁樣潼潼就佢可以有機會接觸一下其它小朋友，學習同人相處。

因為我想同潼潼既關係可以親密一d，製造更多既親子時間，所以今次去朋友家並無帶同工人姐姐。估唔到無左姐姐既幫忙，連行去地鐵站既路都變得咁漫長。不過我仍然堅持住我既做法。

潼潼見到朋友兩夫婦，初初都顯得有點不安，但係上到佢地屋企見到津津姐姐同埋咁多玩具之後，當堂生猛哂，而且仲亳不客氣，真係當左自己屋企咁，肆無忌憚係度發脾四添。不過，最後佢地都係玩得好開心既。

今次既「探訪活動」，我完全負責照顧潼潼，拍攝既重任都交由朋友代勞喇！大家想睇相的話就要稍移玉步喇！

希望遲d可以有更多機會帶潼潼到出外遊玩，或到郊外走走就好喇！

2007年6月19日星期二

家傭的好處

今日帶潼潼去探個朋友，雖然唔係乜野特別節目，但係唔知點解感覺好「支力」。

潼潼夜晚十點要飲奶喇，睇住時間番到屋企已經係十點。我地一於實行「緊急應變措施」。

※　一出地鐵站，我地首先打電話番屋企，叫工人姐姐準備好為潼潼沖涼既衣物用品。（bb沖涼所要準備既野的確不少啊）

※　番到屋企，姐姐就即刻開水，然後為潼潼洗白白

※　我執番好同潼潼出外既「行李」，然後為潼潼開奶

※　爸爸為潼潼開定冷氣房，然後佢自己先去沖涼

※　潼潼沖完涼，由姐姐餵奶，我就去沖涼

※　爸爸善後潼潼沖涼後既物品

沖完涼出黎... 呼~ 舒服哂~~~ 見樣樣野都妥妥當當，大家都終於可以安安樂樂咁坐係度休息。係呢一刻，我係真正感覺到有工人既好處。我地番到黎大家都已經又「支力」又周身汗，如果無工人姐姐，真係唔知顧得自己定顧得潼潼呢！

2007年6月17日星期日

救命CD

今日係父親節，我同潼潼一齊番左去公公屋企陪公公食飯。

可能潼潼比較少出街，膽子的確少。由將軍澳番北角娘家，潼潼全程由姨媽抱住，雖然我知道潼潼係有點怕，但以佢膽少性格，怕之餘亦乖乖就範而唔敢出聲，所以都一直平安無事到達娘家。誰知踏入家門無耐，潼潼就開始蘊釀緊佢不安既情緒，然後好似洪水缺堤咁爆發出黎。當初諗住佢只係稍為扭計，只要哄下佢就無事，點知經過姨媽同爸爸既努力，最後交番俾我呢個媽媽，都係無辦法令潼潼停止哭泣。

呢個時候既潼潼開始喊到可以用歇斯底里黎形容，見佢喊得咁可憐，我感覺係心疼又無助。諗番起係出門口時曾經閃出一個念頭，就係想帶埋一隻潼潼一聽到佢播放就會停止哭泣既兒歌CD。但係我好快又忘記左，所以無帶出街，而且根據過往經驗都未曾試過出現咁不受控制既場面。就係因為咁而減低左我既警覺性。但係我果刻真係有點後悔......

最後情況係點？都好神奇。我地諗住帶佢出街下行，或者佢有野睇會好Ｄ，我抱潼潼只係行到玄關位，佢已經即刻收聲。　

究竟公公間屋又幾嚇人呢？我諗我下次帶潼潼出街係咪都要帶埋呢隻救命ＣＤ以防萬一。