潼潼既幼稚園要我地幫潼潼改個英文名，方便外藉老師稱呼學生。潼潼媽係咁搵BABY NAMES既網頁。
最近先發現呢個網頁非常好。
除左有解釋，有RANKING，有類同既其它名稱介紹，最重要係有埋發音，好多BABY NAMES既網頁都無得聽發音架。要同小朋友改英文名又未諗到的話，快D去研究下。
2009年9月28日 星期一
我好嬲 {全日班的決定)
姐姐放假，潼潼媽好唔得閒，都無乜時間寫blog。不過.. 我尋晚真係好嬲，好想寫下。
在我個人黎講，其實都唔係咁想咁細個小朋友就讀全日班。不過決定俾潼潼番全日班係有兩大原因。
- 姐姐下午煮俾潼潼既一餐飯實在太求其，見過佢只係齋煎一條魚，乜野配料都無。我自己睇見都無食慾。所以寧願潼潼係學校食飯，起碼有均衡膳食。
- 由於婆婆同嫲嫲黎探潼潼既時間好唔一致，令到潼潼既生活好唔規律。試過午後五﹑六點先訓覺，跟住訓醒又無心機食飯，兼且攪到好夜先食飯同訓覺，咁對身體都唔好。
就係因為呢兩個原因，我決定要俾潼潼番全日 - 雖然都有d心痛。
尋晚發生左件事令到我好嬲，令我覺得點可以唔俾潼潼番全日呢?
由於姐姐放假，今個星期就由嫲嫲接潼潼放學。我晚上八點九放工番到屋企，嫲嫲同潼潼沖緊涼，檯上面就有一大碗潼潼既飯，望落去幾乎係未食過。問下爸爸，爸爸話潼潼岩岩訓醒，可能係咁而無胃口食飯。嫲嫲:「頭先食左兩舊瓜。」「不過佢三點幾果陣食左好大碗粉架喇。」
點解會三點幾黎食一大碗粉?咁邊會有胃口食飯?
點解咁晏先訓覺?攪到咁夜食飯?
係咪三點鐘食左粉咁就可以夜晚唔食野就訓覺至到第二朝?
我真係好嬲好嬲!!! 識唔識湊小朋友架?雖然兩個老人家都唔想潼潼番全日而見唔到個孫，不過點可以俾呢d事情再發生呀!!!!!
2009年9月22日 星期二
沒有姐姐的日子
自從,姐姐番印尼之後，由上星期五開始，都由我負責湊潼潼番學，亦由上星期五開始，潼潼每日番學都喊住唔肯入學校，令潼潼媽都好心痛。
諗住向老師了解一下潼潼係學校既情況，所以昨日請老師打電話俾我，中午就收到老師來電，以下係老師談話既大約內容。
- 潼潼由上星期尾表現最差，老師話原來潼潼喊起上黎反應好激烈，完全埋唔到佢身。
- 由於姐姐唔係身邊，所以變得依戀媽媽。要其它人放更多注意力係自己身上。
- 潼潼食飯時要餵。(佢平時都肯自己食) 佢最初都係自己食，不過最近就要餵。咁老師會同佢講: 老師餵一陣啦，你大個女，第日要自己食。
- 係心理學黎講，小朋友會覺得老師係屬於自己，所以唔鐘意老師對其它小朋友好。所以見到老師哄其它小朋友訓既時候，潼潼亦要求要抱。(佢平時係屋企訓覺都唔駛抱) 老師同佢講: 「老師係度睇住你，哄完呢個小朋友就黎睇你。」咁潼潼就一直望住老師等佢。
- 潼潼呢日既表現好番d，喊左兩分鐘左右已經無喊 (以我所知就唔止)，仲識得拎紙巾幫小朋友抹眼淚。
雖然知道老師或多或少可能有些隱瞞，不過聽到話潼潼情況好左，個心都定D。怪只怪媽媽一心諗住等你開始番學先俾姐姐放假，咁樣就會減低對屋企人既不便。但係就完全忽略左潼潼既感受，無為潼潼設想，要佢一時間接受兩件大事情既轉變。
今日送潼潼番學，情況更糟。潼潼係屋企既時候已經不斷叫喊著唔番學。最後帶左佢去學校附近既公園仔玩左一陣，然後先同佢番學。不過要入學校既時候依然喊得犀利，不斷反抗！
雖然明知呢個係必經階段，但係依然心痛死媽媽．．．．． 
2009年9月18日 星期五
湊潼潼番學
姐姐放大假番印尼，兩個星期都由我湊潼潼番學。
之前潼潼岩岩開學既時候，我都試過自己湊潼潼番學，果陣都無乜問題，點知今次．．．．．
潼潼番學番八點九，我地大約七點三左右起起手，本來以為有大把時間，點知到最後竟然係差點遲到。一路上潼潼都扭計要我抱，我又唔想就範，就同潼潼爭持起黎。眼見住就快遲到，潼潼又因為媽媽唔抱佢而扭計唔肯自己行，最後唯有「的」佢番學。可能咁樣影響左佢番學既心情，潼潼去到學校門口之後，我第一次聽到佢話：「唔番學」。最後都係交左佢俾嬸嬸帶左佢入去，連揮手再見都無講。
好失敗．．．．竟然攪到潼潼唔想番學，呢個媽媽真失敗．．．．
湊完潼潼番學，潼潼媽又要番工喇！去巴士站既路上好熱．．． 真係好辛苦．．．
放工番屋企，嫲嫲話接潼潼放學既時候潼潼眼仔腫哂，而潼潼自己亦都話自己有喊過，仲識得話「掛住媽媽」添！（不過我諗呢句係佢聽老師嬸嬸講過學番黎）。
仲有個多星期要湊潼潼番學．．． 吃力不討好．．．． 點算．．．？
（未番學前，潼潼掛住同媽媽玩，要匿埋係床單入面，所以攪到差ｄ遲到囉）
2009年9月17日 星期四
留宿
開始番學兩週多，不過因為學校有師生染上豬流感而同潼潼停課兩天，另外因為颱風又停課一天，潼潼實在番學既日子好似唔係好多。
潼潼番學一段時間，除左有一日有喊過要搵姐姐，其它一切都算順利。而番學時間亦由最初每天上課兩小時，到目前已經增長到由早上八點九至下午兩點三先放學。期間潼潼要係學校食早點﹑午飯，同埋午睡。尋日係潼潼第一次係學校訓覺，不過佢無真係訓到，仲識得同老師講：「我訓唔著呀！」
而今日呢，問番潼潼佢係學校有無訓覺，佢依然係話訓唔著。不過聽講佢都有係學校訓過一陣。都幾好，訓醒都無扭計。
不過聽日潼潼又有新挑戰喇，因為姐姐放大假番老家。今晚潼潼訓覺前都有少少扭計要搵姐姐。姐姐唔係度，唔知會唔會影響佢聽日番學既心情呢？
2009年9月10日 星期四
說話的進步
唔知係咪因為潼潼好少機會接觸其它人，亦好少睇電視，所以潼潼講野不嬲都唔算叻。不過番左學只係一個多星期，講野已經唔同左，說話有時真係嚇親人。
三號風球的晚上，房門突然被風吹埋左，潼潼媽不期然「嘩」一聲。
潼潼：媽媽，嚇親你呀？
*****************************
食早餐既時候，潼潼媽食完一個包，再拎第二個。
潼潼：你食左一個喇喎！
潼潼：呢個潼潼架！（潼潼都未食完佢自己個包就霸住哂）
姐姐同潼潼講仲有包包，唔夠再整囉！
潼潼：呢個爸爸架！（爸爸都番左工啦！
）
我再拎一個包食既時候
潼潼：你唔好食咁多丫！
我知好多好似潼潼咁大既小朋友講野已經好叻，上面既說話其實唔算得乜野。不過對於潼潼黎講，佢會咁清楚表達自己既意思，已經係一個好大既進步。
停課了
之前講潼潼番學時喊既網誌有四個回應，其中三個回應入面都出現四個字：「唔駛擔心」。或者我真係太小題大做。
就如大家所講，潼潼真係無乜野，只係星期一喊過，之後兩日番學都好好。學校仲延長左番學既時間，直到中午食埋午飯先放學。
今日潼潼要提早番學，由九點半提早到八點九 - 即係平時番學既時間早少少，我諗係俾小朋友食埋早餐就岩岩好九點開始上課。不過....... 潼潼今日開始停課了。
事緣潼潼同班既同學仔之中，有一個小朋友被確疹患上H1N!豬流感，聽聞入左醫院 (後黎得學校更正只係到過醫院，並唔需要留醫)。學校雖然無停課，不過就由家長自己決定係咪俾小朋友繼續上課。
老實講，我見潼潼剛適應上幼兒園，我真係唔係好想係呢個時候要佢停課。不過為著要向各方長輩交待，都決定暫停兩日唔俾潼潼番學住。
下個星期一再戴住口罩上學去喇!! 
2009年9月7日 星期一
倒退 + 輔導
潼潼上星期開始一共番左四日學，四日都無喊過。潼潼媽以為以潼潼既表現，可以開始加長番學時間。今日下午時候就打電話俾姐姐，打算問下老師有無話潼潼係咪可以延長上課時間。點知，姐姐話潼潼今日喊。
姐姐話送潼潼入學校既時候都無喊，不過接潼潼放學既時候佢雙眼就紅哂。姐姐問潼潼做乜喊，潼潼話要同姐姐番學。而老師亦都話潼潼係咁喊話要姐姐。
唔係好明白點解潼潼會咁。唔通因為尋日姐姐放假，佢太耐無同姐姐一齊？
放工番屋企，潼潼媽要同潼潼進行輔導：
- 買左條米奇毛巾俾潼潼，俾佢番學時用，等佢番學會開心D
- 同潼潼傾番學既事情，好奇怪地潼潼笑住咁話番學好玩，好開心，好似完全無咩問題。問佢聽日再番學玩好無，佢答好。
- 睡前故事係上學既故事，CALL番佢既回憶：學校有老師同小朋友陪佢玩，玩完之後姐姐會接佢番屋企。
- 入睡後係潼潼耳邊進行催眠，話佢知佢番學好開心好好玩，佢好鐘意番學。
希望潼潼聽日番學會開開心心啦！
下面係A4紙打印出黎既相片，係老師今日派既。相片係潼潼第二日番學時自己係遊戲室入面玩既情形。
2009年9月4日 星期五
2009年9月3日 星期四
幼兒園的第三天
上學第三日，呢三日既早上潼潼都好高興咁嚷著要拎書包番學。好幸運，潼潼對番學完全唔抗拒，亦唔駛我操心。
多數同學仔都係住學校附近，只有少數係好似我地咁要搭車過黎讀書。心彥係住係我家附近既其中一個，今日搭小巴番學既時候就已經碰面。我想對於潼潼黎講，印象最深刻既係掛係心彥身上既keroro八達通套。今晚同爸爸講開佢呢個同學仔，潼潼已經會加把咀：心彥有keroro呀!
今日開始，家長已經唔可以同小朋友一齊入課室喇！同潼潼進行一下輔導先。
到老師要帶潼潼入課室既時候，潼潼都唔肯，果刻我的確有d擔心。不過最後老師拖佢走，佢又無喊，望住我就自己跟老師行左入課室喇。
今日既上課時間依然係兩個小時，潼潼入左課室之後，我係附近打了個圈，聽到周圍都係小朋友既喊聲，真係聽到心都酸埋，都係快D離開呢個「傷心地」好D。我去附近商場麥記買杯LATTE，睇睇免費雜誌，然後等潼潼放學。
我比放學時間早左半小時番去學校，諗住想偷拍佢係遊戲室玩既情景，不過就影唔到。 呢個時候，我見到有個小朋友企係學校既門口度，我最初都不以為意，以為有其它小朋友排隊去活動時經過。後來發覺呢個小朋友好起勁咁向我揮手，竟然係潼潼?
唔知點解，潼潼會自己一個企左係門口，附近無同學仔，又無老師，我諗佢係自己走左出黎。我唔知佢究竟之前係去緊遊戲室定係應該留係班房，想指佢行番入課室都唔知指邊個方向。我聽到潼潼好大聲咁係入面叫「媽媽」，但係佢又出唔到黎，好彩佢無因為咁而扭計喊。呢個時候亦有其它家長到左學校，佢地見到咁既情況反應比潼潼媽更大，埋怨學校點解可以俾個小朋友走漏左出黎都無人理。過左一陣，坐係接待處既老師可能岩岩聽完電話，終於行出黎帶番潼潼入課室。不過其它家長依然有微言。
我既性格係咪太淡定呢? 早兩個星期先因為咁曾經係商場走失左潼潼。或者我真係要檢討一下。
到放學喇！潼潼出黎果陣都依然係無乜異樣，老師都話佢表現好好。不過潼潼個樣就好「支力」，但係問佢聽日仲要唔要番學既時候，佢都話要番學。行左幾步，佢又話要食餅餅。潼潼，番學真係好「支力」﹑好花精神同體力嗎？點解你好似又累又餓咁既？
2009年9月2日 星期三
幼兒園的第二天
尋日放學既時候領取左校服，今日潼潼可以著住校服番學喇！
今次著住校服，再係學校門前影番張相先。
今日我帶左潼潼入課室之後，等佢拎左玩具玩，我就企埋一邊觀察。呢個時候有老師話如果小朋友無喊的話，家長可以離開課室。於是我就話俾潼潼知我會離開，叫佢自己係度玩，如果要搵媽媽就同老師講，老師會幫佢架。潼潼應左我話好。
於是我就離開左課室，但係同一般家長一樣，好想知道潼潼自己一個係課室入面既情況，所以都忍不住係外面偷睇。我見到潼潼雖然有時會周圍張望，好似係度搵我咁，但係都無喊。但有一次俾佢見到我，所以佢走左出黎搵我，不過我叫佢番入課室玩佢都肯。
之後有幾次潼潼排隊去洗手間﹑排隊去遊戲室，係進進出出既時候佢見到我，但都係笑住向我揮手，然後就繼續排隊往前走。
潼潼食茶點喇！
去遊戲室時自己除鞋放好然後去玩。
期間又見到潼潼同小朋友爭玩具玩。雖然心知呢個係小朋友們必須經過既階段，而且亦係一個好好既經驗。但係潼潼媽有一般媽媽既想法，唔想自己小朋友吃虧，心裡面一直為潼潼打氣，希望潼潼可以搶番玩具。
不過最後都係搶輸左。
直到放學，潼潼都無喊過，而且仲要掛住玩，係最遲一個離開課室。
潼潼媽好眼淺，聽到其它小朋友喊都好心嗡，眼濕濕。好慶幸有個咁硬朗既囡囡，如果唔係我怕會攬住一齊喊就醜死怪。其實潼潼由細到大都唔係見好多人，我地亦都無特別去訓練佢，唔明白點解潼潼既性格可以咁STRONG，唔通真係天生既?
以下係其它人對潼潼既評語：
老師甲：潼潼好獨立自己係度玩，完全無問題。
老師乙：潼潼OK喎！仲識擺甫士添！
老師擺出兩個勝利既手勢。
家長甲：你個囡好叻呀！剛才見到有個小朋友搶左佢D餅食佢都無事。
聽日番學就要潼潼自己進入學校喇！希望佢會好似今日一樣咁叻啦！
2009年9月1日 星期二
上學了
潼潼終於正式踏入學校既校門喇！
第一二天，家長可以陪伴子女番學，所以潼潼媽都請左假睇潼潼番學既情形。
起行喇！潼潼抖擻精神，背住書包，一邊行一邊唱住歌仔。
去到學校門前，影番張相先。難得潼潼好合作，仲擺出趣緻動作。
呢個係勝利手勢嗎？對潼潼黎講，呢個只係代表「兩歲」。
番左大半年鍾SIR既課堂，今日總算叫做有用武之地。潼潼係學校門前已經好肯同其它小朋友握手；到課室見到玩具就好自動自覺走去玩，差唔多頭也不回，無理會過媽媽係邊；做運動既時候又肯跟住做動作；會執拾；會坐定定聽老師講故事。老師亦讚賞潼潼表現，覺得係因為潼潼係１月出生既大女既原故。不過我就覺得其實係因為佢之前有「學習」過。
班房入面既坐位﹑儲物格同牆上(表示1月份出生小朋友)都有貼有潼潼既相片。(要偷影呢)
不過係末段潼潼就表現出有D疲態，但係放學番到屋企後，就意猶未盡咁擺出「勝利」手勢。
人生既道路很長，上學係其中一個重要階段，希望潼潼一直都可以好享受學校既生活。
訂閱：
文章 (Atom)