睡前一席話

我成日都話潼潼好少提學校既事情，其實可能係我無俾機會佢講。

每晚陪潼潼訓覺既時候佢都好多說話，但係怕佢唔夠訓，我通常都制止佢繼續說話，要佢快d訓。但係原來佢睡前既說話內容真係好豐富，其中包括學校既生活。

今晚潼潼媽就放肆地讓潼潼不斷問，不斷講。

「我頭先抱波波番屋企，佢成日自己走黎走去(俾風吹走)，好曳呀!佢成日要我抱，都唔自己行既。」好佩服佢用既擬人法。

「媽me? 點解你成日嬲我既? 係咪我好曳呀? 」

「點解訓覺要咁耐既？我唔鐘意訓覺呀！我想朝頭早呀！」

「今日夠時間可以玩夾夾，唔夠時間就唔玩架喇！唔夠時間就唔可以玩扭蛋」

「我住醫院好驚呀! 我肚仔痛要住醫院! 但係點解你唔理我既?」(潼潼留院的一晚我無係醫院陪佢 )

「xxx 成日掹我個口罩！佢又話無掹。整跌左落地，要掉左，我無口罩用！我唔同佢玩呀！」

內容多到我都唔記得，攪到差唔多十二點佢先訓著。

發覺原來好多野潼潼細個時未識表達，但係其實佢係會記得既。同埋好多我教訓過潼潼既事情，佢真係會記得。同佢講過唔可以講既說話，有時佢講到口邊都會停住，然後再更正番。雖然潼潼平時都會扭計都會曳，但係都算受教，算係一個乖巧既孩子黎架！