睡前一席話 - 27/07/2010

有時真係好想可以將我同潼潼既對話錄起。

尋晚陪佢訓既時候....

 

「媽ME~ 我好掛住你呀!你唔好番工啦!你同我番學啦!」

「我唔番工就無錢俾你番學同學跳舞喎!」

「爸爸番工賺錢啦! 你唔駛番工賺錢啦!」

 

「哎呀!你無幫我買粉紅色顏色筆呀!」

我兩個星期前已應承左潼潼幫佢買，到而家都未兌現。

「媽ME放工好夜呀! 我掛住你丫嘛，趕住番黎無買囉!」

又係潼潼話好掛住媽咪架嘛，所以我套用潼潼「掛住」一詞，諗住可以過骨

「咁你買粉紅色筆，然後搭車番黎，咁咪可以見到我囉!」

 ....... 仲要我同佢勾手指尾添。

 

「媽ME~ 買粉紅色筆同買電腦。要橙色! 唔要紫色!」

「你仲咁細個!」

「我三歲喇! 我好大個.... 好大個..... 好大個..... 好大個.......好大個...........」

潼潼呢排好鐘意用不斷重複既語句係加強自己既意思，或者佢覺得好得意。

「但係你屋企咁多玩具。」

「我咁多玩具都玩唔哂! 不如你送俾人!」

潼潼真係唔會珍惜自己既玩具。我試過話佢唔執好玩具我就掉左佢，點知佢仲幫手掉埋一份，最後D玩具係真係掉左(講得出就要做得到嘛)。真係俾佢激死!!!