缺席芭蕾舞堂

今次係潼潼第一次缺席芭蕾舞堂，其實潼潼媽覺得好可惜，但都要硬著心腸。

話說今日趕住帶潼潼上芭蕾舞堂，行過樓下商店，潼潼扭計要玩扭蛋機。因為時間緊逼，快要遲到喇，所以拖著潼潼走。點知走左好一段路，潼潼依然吵鬧住話要玩扭蛋。我一時氣上心頭，恃住潼潼喜歡上芭蕾舞堂，就俾潼潼選擇要去跳舞還是扭蛋，點知個衰妹都係揀左要扭蛋。帶潼潼行番去扭蛋機前，再問潼潼一次 :「玩完扭蛋就要番屋企，唔去跳舞架喇!」點知潼潼都要揀扭蛋。準備拎個一蚊出黎俾潼潼既時候，個衰妹仲懶醒咁提我 : 「要一個五蚊呀!」真係俾佢激死。

玩完扭蛋潼潼仲好開心，不過到我地真係行番入屋苑既時候潼潼知驚喇 ! 企係度唔願行。我同佢講 :「你應承左架! 玩左扭蛋就要番屋企。」佢就跟住我行番屋企。我唔忿氣佢若無其事，就落重藥要佢後悔 : 「好啦! 今日無去學跳舞，你唔識跳喇 ! 無得著靚靚公主衫跳舞喇!」潼潼呢排中左公主毒，聽到無得著公主衫就喊起上黎: 「唔好呀! 我要做公主呀! 」

番到屋企，爸爸問個究竟之後，就「教訓」左潼潼 ，解釋左俾潼潼聽點解無得去跳舞。而呢堂芭蕾舞就咁犧牲左喇 !

雖然潼潼媽極度唔情願潼潼缺席上堂，但係學潼潼爸話齋，鬼叫自己玩大左咩 ! 不過都好，潼潼真係受到教訓。我地之後出街，再問潼潼要唔要去扭蛋，佢都話唔去。希望佢以後都會記得呢個教訓啦 !