遊迪士尼樂園

得到潼潼爸朋友既介紹，我地被邀請做一份遊迪士尼樂園既調查。就係咁，我地可以一家人免費遊迪士尼樂園，今次亦係我地第一次到迪士尼樂園玩。

雖然興奮，但係呢幾日天氣好熱，天文台都發出酷熱天氣警告。我地做好消暑準備，包括帶備遮﹑電風扇﹑紙扇﹑毛巾﹑冰水﹑化妝用既噴霧式礦泉水。

仲有，被封印左接近一年既士的車重見天日喇!

潼潼番學時成日見到小朋友坐「BB車」佢都話要坐，今次終於俾佢恨到喇 !

轉乘迪士尼列車，可惜太多人，無乜影到相。

終到到迪士尼站喇 ! 個天好靚，睇見令人好雀躍，不過其實好熱。

到達迪士尼樂園就趕住會合工作人員，因此途中經過既景點都無影相。我地第一個節目就係同佢地做調查。其實佢地真係幾專業，調查係用傾談形式，佢地唔會一邊問問題一邊掛住自己記NOTES架。

做完第一節調查我地就開始第一個活動喇 ! 就係迪士尼朋友史迪仔既巡遊。巡遊活動歡迎大家加入，我地一齊打球，一齊跳舞。我掛住領潼潼出去玩，所以都無影到相。巡遊完畢之後放既紙炮，散出黎既彩紙竟然係MICKY頭象，好有心思呀 ! 潼潼好落力咁執呀執。

執左好多MICKY頭，潼潼好開心呢!

跟住排隊玩飛船同巴施光年。

上午既活動到此為止，跟住又再會合番工作人員做調查。

天氣實在太熱，上面影既相潼潼已經係笑得最開心架喇！到下午時潼潼同我地都疲態畢露。想同佢去睇３Ｄ動畫等大家坐下涼下冷氣消消暑，但係潼潼嚇到喊住話要走。之後雖然玩轉轉杯都玩得開心，但係都已經無乜笑容。

之後情況更惡劣，潼潼生長痛「病發」，同佢搓搓下腳仔就訓左喇！

以為等佢訓醒太陽無咁猛烈可以再行下影下相，點知潼潼一直嗌痛，攪到佢無哂心機玩，於是我地唯有離開。沿途時見到有人賣氫氣球，潼潼一直想要。諗住今日入黎反正完全唔駛自己花費都慳左，又見潼潼痛到無哂心機，打算貴Ｄ都好，買個氫氣球氹下佢啦！點知問價要$80 - $100，實在吃不消，最後都係無買就離開喇。

最初以為黎到迪士尼可以影好多靚相，但由於太熱，最後都無乜影到相。連米奇同米妮都未見過。真係好可惜呀！