為左怕上網時被潼潼纏住，所以我每次上網都要等晚上潼潼熟睇以後。但係唔知點解好多時潼潼半夜都會醒，然後發現房入面無人就會喊住叫「媽咪~」咁我又要番入房拍番佢訓先再出黎上網。
尋晚又當我上網既時候，突然聽到好響亮既「撻撻」聲由遠而近。我轉個面就見到潼潼光著腳子，扁著咀，縐著眉的由睡房走出黎搵我。我連忙抱佢番入房訓，仲要連聲「對唔住」哈哈! 好有趣！潼潼唔再剩係識得係房入面喊喇！而係走出黎搵我表示不滿（潼潼心底話：老是趁我睡著的時候就上網唔陪我訓覺。）呢個情況似曾相識，就似當年潼潼媽半夜起黎，然後怒「啤」在深夜時候仍然在上網既潼潼爸時一樣。不過唔同既係潼潼媽會好緊張咁陪潼潼番一房，而爸爸當年就無咁聽話咯！
陪潼潼訓番之後，潼潼媽又唔聽話坐番係電腦前面。過一陣，又聽到潼潼係房入面叫「媽咪~」哈哈！好有命令式既語調。今次走唔甩喇！要乖乖熄電腦番入房陪寶貝喇！
奇喇, 潼潼唔係好細個已經自已入房上床瞓咩? 點解仲要妳陪佢一齊瞓呢?
回覆刪除再者, 佢瞓覺十分醒瞓喎, 一晚醒咁多次0既! 小怡同家姐一樣, 一覺到天光, 呢排仲爛瞓到成日瀨咗尿都唔知呢!
[版主回覆06/07/2010 13:49:00]似乎係我諗得太理想。而且可能我做太多「親子」工作(基於呷姐姐醋既心態?) 所以潼潼越黎越黏我。
潼潼好醒訓架，差唔多每晚都會醒。有時醒左會爬上黎我地張床訓。我訓訓下覺得訓得逼怕壓到佢，會抱番佢落自己床。但係唔知幾時佢又會醒左自己爬番過黎我地床度訓我都唔知。