今次係潼潼的一次去飲宴。
去之前都有少少擔心潼潼係咪可以坐定定咁長時間。果然，係剛入席既時候潼潼就叫住話要走。
好彩呢個時候開始播放一對新人既生活照，或者潼潼以為有SHOW睇，又乖乖咁坐番係度睇「節目」。期間又好ENJOY舉杯飲勝的「環節」(可能因為有得乘機飲橙汁)，仲有回禮小禮物玩，同埋同朋友一歲多既BB一齊玩。 (我有點意外潼潼接受到BB，肯同佢一齊玩)
雖然食野唔乖，但總算順利過渡。
2010年5月28日 星期五
有其母必有其女
為左怕上網時被潼潼纏住，所以我每次上網都要等晚上潼潼熟睇以後。但係唔知點解好多時潼潼半夜都會醒，然後發現房入面無人就會喊住叫「媽咪~」咁我又要番入房拍番佢訓先再出黎上網。
尋晚又當我上網既時候，突然聽到好響亮既「撻撻」聲由遠而近。我轉個面就見到潼潼光著腳子，扁著咀，縐著眉的由睡房走出黎搵我。我連忙抱佢番入房訓，仲要連聲「對唔住」哈哈! 好有趣！潼潼唔再剩係識得係房入面喊喇！而係走出黎搵我表示不滿（潼潼心底話：老是趁我睡著的時候就上網唔陪我訓覺。）呢個情況似曾相識，就似當年潼潼媽半夜起黎，然後怒「啤」在深夜時候仍然在上網既潼潼爸時一樣。不過唔同既係潼潼媽會好緊張咁陪潼潼番一房，而爸爸當年就無咁聽話咯！
陪潼潼訓番之後，潼潼媽又唔聽話坐番係電腦前面。過一陣，又聽到潼潼係房入面叫「媽咪~」哈哈！好有命令式既語調。今次走唔甩喇！要乖乖熄電腦番入房陪寶貝喇！
2010年5月25日 星期二
提子
呢晚爸爸媽媽開餐既時候，潼潼食緊提子。
爸爸：我有無得食架？
潼潼：有～～ 俾一粒你。
最後潼潼將所有提子食哂。
爸爸：你又話留番一粒俾我既？
潼潼：你未食哂飯！
爸爸：你都無留番俾我，咁我食哂飯咪無得食。
潼潼：你都未食哂飯！
（所以話潼潼的語言發展比較差，只有重複語句，未識因應對方說話答話）
潼潼：我俾三分鐘你！
（潼潼媽常用的招數）
爸爸：三分鐘咁少？三分鐘點食哂飯呀？十分鐘啦！
潼潼：好啦！十分鐘！
爸爸：你話留番粒提子俾我，咁你食哂，咁我十分鐘食哂飯你邊有提子俾我？
潼潼無理會爸爸，只催促姐姐：姐姐，拎個鬧鐘俾我丫！
跟住潼潼媽幫潼潼調校好鬧鐘。期間潼潼不時望下鬧鐘，又望下爸爸。
潼潼：仲有五分鐘丫！
爸爸食哂飯之後：我食哂飯喇喎！我粒提子呢？
潼潼毫不在意，揚揚手：聽日買啦～ 唔緊要～～
爸爸：咁我而家食哂飯，但係你食哂提子我無得食。
潼潼又重複（扮傻嗎）：聽日買啦～ 唔緊要～～
最後姐姐從雪櫃拎出剩番既少量既提子俾潼潼遞俾爸爸。
潼潼：喇！有囉！
爸爸：呢D姐姐俾我黎架喎！係你留俾我既咩?
潼潼：係呀！
2010年5月24日 星期一
」
估唔到個衰妹已經對「金錢」有不錯既概念。2010年5月23日 星期日
情緒管理
好早既時候係淘寶買左一批書(詳情可按此看)。其中一套係讓小朋友認識自己既情緒。
呢套書當作故事講其實唔係太合適，所以都好少拎黎同潼潼讀。不過呢本書呢日就大派用場。
話說呢日係旺角行人專用區行時，潼潼見到有人拎住人家宣傳用既氫氣球，潼潼見到又好想要，於是爸爸帶佢去搵， 可惜都係搵唔到。
沿路走既時候，甚至到坐車的時候，潼潼依然叫住話想要波波。係車上面，我用學番黎既情緒管理方法去穩住潼潼既情緒，算是有效。最後潼潼倦極入睡。
誰知番到屋企，佢依然掂記住個波波，喊住話想要波波。我將佢擁抱住既時候，位置剛巧係書架旁，就係呢個時候見到呢套書其中「我不願悲傷」既一本。於是就拎出黎同潼潼一齊睇，讓佢知道每個人都會有唔開心既時候；唔開心只會係暫時性，唔會永久存在；唔開心既時候可以點做。
原來育兒都有「工具書」。呢d工具書平時真係好少用得著，不過總要放一套以備不時之需。
潼潼聽完故事當然已經心情好轉，只係我被潼潼纏住，累我要一連氣的講左四本情緒故事書呢！
2010年5月21日 星期五
2010年5月16日 星期日
2010年5月15日 星期六
「嬰屍」火化前突哭叫 醫院堅稱已死拒救
好慘啊 ! 睇黎應該係可以救，只係唔想救。
如果係先進國家，bb應該可以繼續生活好。
【明報專訊】佛山一名「死嬰」周三被送到殯儀館，即將火化時突然大哭，工作人員將其送回醫院，但院方堅稱嬰兒已死拒絕搶救，1小時後嬰兒被證實死亡。殯儀館指摘醫院「過失殺人」，但醫院堅稱嬰兒已死，又稱嬰兒是引產的不足7個月的「胎兒」，並非正常分娩的嬰兒，且患有嚴重的先天性心臟病 。
「他們還是沒把他救活」。《南方都市報》引述南海殯儀館職工稱，本周三南海獅山官窑醫院把一名「死嬰」送到殯儀館，「放在一邊幾分鐘，就聽見有BB的聲音在『啊啊』地叫，然後看到裝嬰兒的黃色塑料袋在動。打開塑料袋後，發現嬰兒是裝在一個紙盒裏，是男嬰，臍帶都沒剪斷，嘴裏塞了一塊紗布，身上還有血漬」。
嘴塞紗布 男嬰袋內蠕動
幾名工作人員見狀將嬰兒嘴內紗布取出，蓋上被子，「他可能感到很舒服，還打呵欠」。殯儀館立即致電醫院並將嬰兒送返，「送到醫院後，他們就把嬰兒放在走廊」。殯儀館員工不滿醫院拒絕搶救，「BB看起來身體比較健康，沒有畸形，哭聲還很大」。
南海殯儀館副館長潘先生說，當時醫院通知他們接收一個「流產物」，即非正常出生的嬰兒，之後未發生過「流產物」「復活」的事件，「雖然『流產物』是活體，但也是養不活的」。前天下午，死嬰再次運回南海殯儀館，保存在冰櫃中等待處理。
院方稱胎兒引產後沒心跳
官窑醫院醫務科主任劉三紅回應稱，嬰兒母親是湖南人，孕婦患有重度妊娠高血壓綜合症，胎兒存在嚴重的先天性心臟病。徵得家人同意後，醫院於本月12日進行引產手術，經過數小時觀察確認引產兒已死，隨後送往殯儀館。劉三紅堅稱，嬰兒送返後經過檢查，「沒有發現有心跳、呼吸等生命體徵」，並說如果嬰是活著的話一定會搶救。
2010年5月13日 星期四
三歲四個月
到左呢個年齡，小朋友既發展已經無咁明顯，所以都少左記錄潼潼既成長檔案。要想一想，才稍為想到一點點可以記錄落黎。
- 潼潼而家行樓梯開始可以自己兩腳輪流上樓梯喇！不過落樓梯仍要逐步行。
- 記得潼潼年頭入院時已經開始可以講簡單既故事（我講得比較多果一兩個故事）。最近先發現原來佢學校講故事前會唱歌仔同念句。潼潼媽就係咁借意要潼潼講故事俾我聽。時間許可的話，晚上就係我同潼潼分別講故事既時間。
得到怡怡媽既啟發，潼潼講故事既時候我通常都唔會多加意見。(所以由得佢亂講，你唔會聽得明佢講乜
)
- 另外潼潼開始學習畫直線﹑橫線﹑同圓形，不過線條依然生硬。
- 會自己扣衫鈕
- 佢願意的時候會自行往刷牙，有時仲要閂埋門唔俾人入去幫手添!
- 講野有時依然係詞不達意，答非所問，同埋有童音。
不知不覺已經三歲四個月，潼潼係爸爸心目中依然頑劣，不過潼潼媽就覺得佢開始受教，感覺比兩歲時舒服好多喇!
2010年5月9日 星期日
怎樣取捨？
我家傭人差不多仲有半年就滿第四年既合約。佢一直以黎都算乖巧，不過做事就越漸懶散（外傭的通病），有時都幾激氣。加上四年約後要開始幫外傭供長期服務金，所以早已打算滿約後唔再續約。
不過我仍有所顧慮。由潼潼出生從醫院番屋企既第二日開始，姐姐就番工照顧佢。一齊生活咁耐，潼潼見佢既時間仲多過我地，潼潼都非常跟佢。而且潼潼既開朗性格，或多或少亦係受姐姐所薰陶。
潼潼學校有位老師一月份開始無做，潼潼到而家都仲間中會問：「聽日吳老師番唔番學？」我每次聽到佢呢個問題，我都會擔心如果姐姐離開，對潼潼做成既心理影響會有幾大。
究竟點抉擇好呢？要姐姐家事做得好，又要兼顧潼潼既心理成長，實在令人頭痛。
第四個母親節
潼潼三歲喇！係潼潼媽以媽咪身份過既第四個母親節，不過潼潼仲未知咩係母親節。對於子女仍年幼既母親，母親節仍然係小朋友既節日。
下午先帶潼潼去圖書館行下。潼潼仲未識揀佢自己喜愛既圖書，去到圖書館只係亂咁走，亂咁拎書，總唔肯乖乖坐係度睇書。不過都算係咁，我叫佢乖乖地坐係度等我，然後我出左去搵書，佢都無問題。而圖書館管理員果位姨姨亦讚潼潼，話佢會自己睇完既書肯自己擺番好。
之後就帶潼潼去公園玩。
去完公園就去醫肚喇！母親節亦係搶錢既節日，餐廳平時做開既套餐全部暫停。
我呢Ｄ咁實際既媽媽緊係唔會搵自己笨益人地，轉頭就走左去大Ｘ活食飯。潼潼就玩到「攰」，剩係掛住訓，唔多願食飯。咁既情況緊係急急餵飽佢先啦。果然佢一食飽就話要訓，我只有一邊抱住佢訓，一邊食飯，認真夠溫馨啦！
番到屋企，自己用泥膠整埋個蛋糕黎俾潼潼作狀影相。
2010年5月8日 星期六
2010年5月4日 星期二
2010年5月2日 星期日
2010年5月1日 星期六
拒絕再玩
今朝難得潼潼媽唔懶惰，一早諗住帶潼潼去公園兼去下圖書館。點知個衰妹話唔去公園。我問佢咁去冒險樂園好無，佢即刻好爽快咁答我話好。唉！
後黎潼潼都肯去公園。我地屋企近山，沿路都有Ｄ風，又有陽光，感覺幾好，諗住難得好天氣，遲Ｄ就會嫌太熱喇！點知越近目的地，越接近石屎森林，感覺越不對勁。去到公園，就覺得曬到不得了。
記得我地細個即使夏天去公園都唔係咁難受。
可能因為果陣去維園有石做既涼亭，亦有大樹遮陰；而家新建成既公園都被大廈圍住，而且樹木都係新種，矮矮細細，難有調節溫度既功效。
可能係因為地球變亂。
亦可能因為我老左，無左果陣活力。
最後竟然又係由我出聲叫走。
去到公園見到呢Ｄ飲水設施，潼潼最初以為用黎洗手，不過知道可以用黎飲既之後，飲完又要求再飲。
始終唔係咁衛生，俾佢試過就算，都係唔好飲咁多。
訂閱：
文章 (Atom)