今日十點去青衣商會幼稚園面試。
面試前有個七分鐘既短片介紹間學校。本來呢間學校同救世軍已經令我唔知點決擇，睇埋個短片，更加放毒，令我更加想潼潼讀呢間學校。可惜.... 
入到課室，老師叫早晨，潼潼有答番早晨，不過好細聲，而且無望人，都唔知個老師有無聽到。
老師俾個冬甩玩具俾潼潼：呢個係冬甩，俾你丫。
潼潼：冬甩呀？
老師：你講多謝！
潼潼：多謝！
（以為合格，點知老師再有要求）
老師：多謝老師！
潼潼：多謝吳老師！
（弊！潼潼既世界只有一個「吳老師」）
老師：你今日有無食野呀？
潼潼：無呀！
（唔係嘛呀囡．．． 我同你食左早餐架喎！）
老師：咁你咪好肚餓囉？咁你食冬甩丫！
（潼潼拎住個冬甩玩具咀郁郁咁扮食野）
老師：你俾一塊餅媽媽丫。
（潼潼拎左一塊玩具餅俾我）
老師：再俾一塊爸爸丫。
（潼潼又拎一塊俾爸爸）
老師拎起一個波：呢個咩黎架？
潼潼：呀．．．．
老師：可以打既呢．．．．咩黎架？
潼潼：唔知呀．．．．
（唔係呀嘛囡？？？？ 呢個係你好鐘意既波波，出街每逢見到波都話要買既波波呀，你唔識？
）
老師：呢個係波！
老師再拎起架玩具車：呢個咩黎架？
潼潼：．．．．．．．．
潼潼媽幫一把：會BE BU BE BU叫既係咩呀？
潼潼：．．．．．．．．．
老師：呢架係車！
（唉~ 潼潼...... 你平時係街聽到BE BU車聲都識叫「消防車」啦！點解而家連「車」都唔識講？ 
）
到老師向家長發問。問平時邊個湊？點解揀佢地間學校？潼潼有乜優點？
潼潼媽唔係報乜野名牌學校，冷不提防老師會問呢D問題，自覺回答時表現同潼潼一樣差。
最後老師問我地俾潼潼到全日班，會唔會有咩問題想問佢。我亦都無問題問，我望下爸爸，想知爸爸有無問題想問，點知爸爸都係無反應。好一對無乜反應既父母．．．．
最後老師俾左兩份見面禮俾潼潼揀。
老師：咁你應該講乜呀？
潼潼：唔該！
老師：多謝老師
潼潼：多謝「吳老師」
到走既時候，潼潼依然係再見「吳老師」。
睇黎我都唔駛諗咁多．．．． 疊埋心水寄望救世軍啦．．．
P.S. 收到循道衛理既取錄信，我都知應該無咩問題，只可惜爸爸對呢間學校無乜好感，應該都唔會去註冊．．．． 
照妳咁講, 潼潼媽一家三口都唔係好在狀態咁噃 (妳同先生見亞女表現失準, 自己打定輸數所以都冇乜嘢想問老師哩?) 媽媽同老師對話時其實可以揾機會幫潼潼 補補飛 ger (例如話佢bb 班ger 兩位老師咁啱都係姓吳, 小朋友至誤會每個老師都姓吳囉 ). 其實老師冇理由唔明小朋友ger 表現係好講臨場狀態. 而臨場反應係睇好多因素0既. 重要ger 係, 潼潼而家讀緊bb 班, 加上係大女 (年頭出生), 呢兩樣都係幼稚園心頭好架, 所以妳又唔駛咁灰心住. 幾時放榜呀?
回覆刪除[版主回覆11/03/2009 00:38:00]佢話11月7號前有消息。
其實我同爸爸真係無乜問題想問老師，可能我地兩個都唔算係咁緊張囡囡既人，哈哈!
不用太擔心，青衣商會多數會收的。 但我個人對這間學校不是太感興趣。 如果你家住青衣，你可以選田家炳，因我有兩個朋友都在那裡就讀，他們的小朋友讀得很開心，老師同家長不時保持溝通，令家長好清楚自己小朋友在校的情況及進度，不過沒有全日班，這點可能你需要考慮。
回覆刪除[版主回覆11/03/2009 00:42:00]唔好意思，因為我諗住睇既都係自己朋友 / 只係自己睇番，所以我無講清楚。我地係住將軍澳，面試既係青衣商會將軍澳幼稚園。田家炳將軍澳區都有，不過我就無幫囡囡報。而家仲有兩家要見，希望會順利D啦!
(不過呢個媽媽依然不知悔改，並無汲取教訓去做足準備，幫潼潼惡補 ，始終覺得順其自然比較好。 )
我都贊成順其自然，因為小朋友就是甚麼都不懂，才要上學去。
回覆刪除但以我這三年經驗，選擇學校時，應留意該校老師的教學態度為首要條件，不論該校的教育理念有幾好，學校師資有幾多幾新，但老師的教學態度不跟隨亦是無用。
有些教學多年已經甚麼都好像機械化，完全沒有心。
有些新投身幼兒行業，有心但沒有經驗。
這些都是經驗之談，你可考慮一下。 希望你女兒能入讀一間完全適合她的學校，讓她從快樂中學習成長。
[版主回覆11/04/2009 00:09:00]多謝你既意見。你講得好岩，最緊要睇老師有無心教。