3分鐘的唔開心

少少經驗分享。

呢日係中秋節，所以會同潼潼番嫲嫲屋企食飯過節。點知．．．．

正在換衫準備出門的一刻，潼潼扭計：「唔去嫲嫲度~~ 我唔去嫲嫲度~~」

扭左好耐，潼潼媽又用專家所教的 (之所以用個「又」字，係因為之前o係另一個case度嘗試過卻不湊效)，以「同理心」講出佢既感受，亦嘗試替潼潼想個辦法去紓緩佢既不安情緒，可惜依然失敗，潼潼依然在吵吵嚷嚷。

係呢個時候潼潼媽心思一轉.....

「咁好啦，我俾你唔開心3分鐘啦！」

好奇怪，潼潼聽完呢句說話之後當堂靜左落黎，亦係唔夠１分鐘既時間內「回復正常」。

我諗呢個亦係「認同佢感受」的其中一種效應罷！