去完幼稚園面試，去附近公園輕鬆下先。
繼上個星期去公園玩過攀爬架，潼潼好似對攀爬好有興趣同好有信心。
2009年10月31日 星期六
K1面試 - 青衣商會
今日十點去青衣商會幼稚園面試。
面試前有個七分鐘既短片介紹間學校。本來呢間學校同救世軍已經令我唔知點決擇，睇埋個短片，更加放毒，令我更加想潼潼讀呢間學校。可惜.... 
入到課室，老師叫早晨，潼潼有答番早晨，不過好細聲，而且無望人，都唔知個老師有無聽到。
老師俾個冬甩玩具俾潼潼：呢個係冬甩，俾你丫。
潼潼：冬甩呀？
老師：你講多謝！
潼潼：多謝！
（以為合格，點知老師再有要求）
老師：多謝老師！
潼潼：多謝吳老師！
（弊！潼潼既世界只有一個「吳老師」）
老師：你今日有無食野呀？
潼潼：無呀！
（唔係嘛呀囡．．． 我同你食左早餐架喎！）
老師：咁你咪好肚餓囉？咁你食冬甩丫！
（潼潼拎住個冬甩玩具咀郁郁咁扮食野）
老師：你俾一塊餅媽媽丫。
（潼潼拎左一塊玩具餅俾我）
老師：再俾一塊爸爸丫。
（潼潼又拎一塊俾爸爸）
老師拎起一個波：呢個咩黎架？
潼潼：呀．．．．
老師：可以打既呢．．．．咩黎架？
潼潼：唔知呀．．．．
（唔係呀嘛囡？？？？ 呢個係你好鐘意既波波，出街每逢見到波都話要買既波波呀，你唔識？
）
老師：呢個係波！
老師再拎起架玩具車：呢個咩黎架？
潼潼：．．．．．．．．
潼潼媽幫一把：會BE BU BE BU叫既係咩呀？
潼潼：．．．．．．．．．
老師：呢架係車！
（唉~ 潼潼...... 你平時係街聽到BE BU車聲都識叫「消防車」啦！點解而家連「車」都唔識講？ 
）
到老師向家長發問。問平時邊個湊？點解揀佢地間學校？潼潼有乜優點？
潼潼媽唔係報乜野名牌學校，冷不提防老師會問呢D問題，自覺回答時表現同潼潼一樣差。
最後老師問我地俾潼潼到全日班，會唔會有咩問題想問佢。我亦都無問題問，我望下爸爸，想知爸爸有無問題想問，點知爸爸都係無反應。好一對無乜反應既父母．．．．
最後老師俾左兩份見面禮俾潼潼揀。
老師：咁你應該講乜呀？
潼潼：唔該！
老師：多謝老師
潼潼：多謝「吳老師」
到走既時候，潼潼依然係再見「吳老師」。
睇黎我都唔駛諗咁多．．．． 疊埋心水寄望救世軍啦．．．
P.S. 收到循道衛理既取錄信，我都知應該無咩問題，只可惜爸爸對呢間學校無乜好感，應該都唔會去註冊．．．． 
2009年10月29日 星期四
三歲前常看電視 七歲專注力降一成
越黎越多文章報導小朋友睇電視既害處。潼潼兩歲以前，潼潼媽對此禁令尚算嚴格遵守。但係兩歲後眼見潼潼學習上既進度好似有所不及，開始接受光碟教學。最近更加開始妥協而「疏於職守」。係度借BLOG友蛋媽既文章而示警戒。
〔記者胡清暉／台北報導〕三歲之前是幼兒腦部發育的關鍵期，部分父母為了強化寶寶的腦部發育，刻意讓嬰幼兒早早就看電視、看教學ＤＶＤ。不過，國外研究指出，讓嬰兒看電視，對腦部有害，而且會影響日後成長時的專注力表現，建議多與人互動。
對真實生活不感興趣
信誼基金會舉辦幼兒發展國際研討會，今年主題是探討「媒體與幼兒早期發展」的關聯性，邀請美國華盛頓大學兒童健康中心主任Dimitri Christakis、美國喬治城大學兒童數位媒體中心Sandra Calvert等國外知名學者專題演講。
Dimitri Christakis表示，刺激太少對嬰幼兒腦部發育是絕對有害的，但是刺激太多也會對腦部成長有害，一般為嬰兒製作的電視節目，為了吸引嬰兒的眼光能停留在螢光幕上，影像變動、聲光變化通常非常快速，可能導致嬰幼兒大腦預期接受的刺激都是如此快速，反而對於真實生活不感興趣。
此外，三歲以前看電視愈多的孩子，到七歲時就愈可能出現無法專心的問題。Dimitri Christakis強調，美國已有研究發現，三歲以前平均每天看一小時電視，到七歲時，無法專心的可能性會提高十％，原因在於電視節目節奏太快。
同時，Dimitri Christakis的另一項研究指出，嬰兒時期看的電視愈多，會的字彙反而愈少，至於親子一起玩積木，孩子的語彙增加了十五％。因此，對照證實，真實成人的引導與個別化的互動，才是嬰幼兒最佳的學習助力。
扼殺早期閱讀能力
Sandra Calvert認為，美國六個月至六歲大的嬰幼兒，平均每天暴露在媒體前面二點五小時，和台灣差不多，已違反了美國小兒科醫學會建議的「兩歲以前，別讓孩子看電視」。
她提醒家長應注意，幼兒太早暴露在電視和電腦前，尤其生活在電視全天開著的居家環境中，會扼殺孩子早期的閱讀能力。
信誼基金會執行長張杏如建議，二歲以前嬰幼兒的人際互動，遠比看大量的電視、嬰兒影片對成長有所幫助。同時，家長在挑選ＤＶＤ教材時，避免選擇有暴力情節、聲光畫面跳動過快、可以讓親子互動的內容設計。
2009年10月26日 星期一
2009年10月24日 星期六
K1面試 - 循道衛理
呢日潼潼去左循道衛理幼稚園進行K1入學面試。
面試時間係九點半，但係就差唔多十點先輪到潼潼。潼潼係幼稚園度等得無聊，曾經一度嚷著要走。好彩潼潼媽後黎同佢去睇下幼稚園入面養既龜仔，先可以俾潼潼打發時間。
到我地入去見老師喇！入到去先黎一個「親子遊戲」，然後再等逐個接見。到潼潼見老師：
老師：早晨！
老師叫左幾聲早晨，潼潼唔應老師不特止，仲唔肯望佢添。
老師問潼潼係咪第一個小朋友，係咪好少出街玩。我等左係，跟住佢地開始考潼潼喇：
老師首先拎出一盤花既剪紙，然後要潼潼將波子放係花心位置。潼潼放好之後，又叫潼潼執番好波子放番入碗仔度。潼潼都做到喇！
跟住老師又拎出一面鏡，問潼潼：呢個邊個呀？潼潼答左自己個名，但係老師聽唔明，仲問我佢講乜。
之後又用鏡向住媽媽，問呢個邊個。潼潼答左「媽媽」。呢個時候老師順序問潼潼眼耳口鼻既位置，潼潼都指岩哂。（不過呢D唔歲半時已經要識既咩?)
呢個時候佢又拎出幾舊積木，要潼潼講出顏色，潼潼答對左。然後再要求潼潼將同顏色既併排一齊，潼潼都做到。
最後拎左四隻玩具出黎，問潼潼識唔識數，潼潼又數岩左。之後送左其中一隻玩具俾潼潼做見面禮拎走。
老師係咁讚潼潼好叻，問潼潼有無上PLAYGROUP，我話有，老師話唔怪之得咁叻。冤枉呀老師！認顏色同數數都係我地係屋企好俾心機同時間咁教潼潼架！
之後我地離開去聖安德肋幼稚園報名。呢間幼稚園環境超靚，真係非常吸引，一路去老師都有同家長/小朋友打招呼。我地交完表格，有個老師同潼潼講再見時，仲發現到潼潼有流鼻水，然後主動帶潼潼去隔離課室，用紙巾濕D水俾潼潼抹鼻。呢度D老師真係好細心。
潼潼爸都好鐘意呢間學校，佢話唔計個校園有幾靚，但係起碼D老師就同剛才既差好遠。爸爸話除非我好想潼潼讀循道衛理小學，否則寧願潼潼讀番原校都唔會轉循道。
2009年10月20日 星期二
How to talk to kids so kids will listen & listen so kids will talk
前文提過呢本書，再搵到一d資料，作少少補充。
原來呢本書係有中文版既:
如何跟孩子有效的溝通
譯者：王明華
出版社：世茂
http://www.coolbooks.com.tw/books_product.asp?bookNo=00942899
http://www.parentwonder.com/pdf/How_To_Talk_So_Kids_Will_Listen.pdf
失敗個案
曾經寫過我點樣應付潼潼既脾氣，好似好掂咁，但係其實唔係次次都咁理想。
就係尋晚，潼潼又嚷著要玩新玩具，我地順口應左佢一句：「我地星期日同埋姑姐嫲嫲一齊去玩。」跟住就出事喇！之後潼潼幾乎整晚只有一句說話：「嗚~~ 要同姑姐嫲嫲去玩呀！」仲要拖住我出房，好似準備出發去街咁添！其實果陣都已經好夜要訓覺，但係唔明點解潼潼到而家都未有呢方面既concept。我用盡方法想去平息今次事件。我去講佢既感受，亦容許佢玩一陣玩具，話佢知玩完一陣就訓覺。但係玩完之後，佢仍然堅持地叫嚷住同一句說話。最後我忍無可忍，自己走左出廳，由得佢喊。好一陣子，佢個人喊到累既時候，我先再番入房氹佢訓覺。
今朝訓醒，佢竟然繼續扭，繼續講「要同姑姐嫲嫲去玩呀~~」。果刻真係唔知可以做乜，我無答任何說話，直情唔想答，唔想面對。不過最後都係投降，再嘗試用我僅餘既耐性，一邊數住手指，一邊向潼潼講：「今日星期二，跟住星期三﹑星期四﹑星期五﹑星期六﹑星期日，星期日先同姑姐嫲嫲玩。」潼潼無乜反應，我都知佢唔會明白乜野係星期日。跟住再講：「我地5日之後先同姑姐嫲嫲去玩。」我諗潼潼對數字會比較熟悉。我又舉起手同佢由1數到5。之後潼潼都係無出聲，不過亦都無再嘈話要同姑姐嫲嫲去玩。
唔知佢明唔明白，不過謝天謝地。
好喇！講完失敗個案。因為知道好多媽媽都要面對小朋友耍脾氣既問題，所以係度分享少少係書入面教既內容。
之前睇過一本「好個性勝過好成績」既書，係講點樣解決小朋友既情緒問題。但果陣潼潼仲細，所以無乜實戰經驗而疏於練習。
最近我家姐見我教囡教到咁嘔心瀝血，所以借左本書俾我，叫做「如何說孩子才會聽，怎麼聽孩子才肯說」（HOW TO TALK SO KIDS WILL LISTEN & LISTEN SO KIDS WILL TALK)。呢本說好似係美國被譽為育兒聖經，但係我就香港同台灣既網上書店都搵唔到有繁體版，只見國內有簡體版。呢一本書比前一本書講既有點相似，但又似乎更全面。因為懶，所以只係COPY重點。
第1章 帮助孩子面对他们的感受
⊙如何面对孩子的负面感受？很简单，接受他们的感受。
⊙我们和孩子是完全不同的个体，不能用我们的感受代替孩子感受。
⊙感受没有对错之分，所有的感受都是被接纳的，但某些行为必须受到限制。
⊙孩子的感受被接纳了，他们才能开始集中精力改变自己的情绪。
⊙帮助孩子面对他们感受的四个技巧：
1． 全神贯注地倾听
2． 用“哦……”“嗯……”“这样啊……”来回应他们的感受
3． 说出他们的感受
4． 用幻想的方式实现他们的愿望
接納孩子感受好重要。有一次潼潼係我話佢既時候，發脾氣話：「我嬲！番入房！」（佢已經習慣左俾我地罰佢自己番入房）。我呆左一陣，心入面答佢：「你唔可以咁樣架！」但係好彩我自己停住左呢句話，然後同佢講：「係呀.. 潼潼好嬲！咁嬲一陣啦好無？」潼潼即時語氣放輕哂：「好丫。」跟住已經無事。係！小朋友都可以嬲，點解我地唔可以俾佢嬲呢？
2009年10月18日 星期日
幼稚園開放日
今日去左循道衛理幼稚園開放日，潼潼亦參予左唔少遊戲同示範教學。
呢間幼稚園既教學方法同教材已經唔駛多講，我諗幾乎每個家長見到都會喜歡。
今次既開放日敗筆之處，在於我地臨走時本來想叫潼潼先去洗手間，點知呢個時候咁岩學校宣佈商場入面既污水經渠道湧緊上黎，請各位家長離開，而開放日亦提前終止。另一方面學校已經即時堆起沙包
，莫非呢個情況會經常出現 
如果真係咁的話都幾麻煩。
離開後問下潼潼爸既睇法。潼潼爸話好鐘意入面既硬件，尤其是JELIC，因為成套教材好整齊咁擺哂出黎好震撼，仲可以俾小朋友學懂做事有條埋﹑有規矩。不過直覺覺得呢間學校既老師好無"HEART"，感覺好似係純粹「番工」多於用心去教育小朋友。
點解潼潼爸有咁既感覺，經分析後，我地發現以下幾個問題。
- 我地去到幼稚園時，入面既教職員似做SHOW，大家(校長)拍照寒喧，反而唔覺佢地有同家長們溝通同解釋學校既教學理念。
- 上JELIC示範課既時候，潼潼係包尾最遲一個走 (可能係因為潼潼媽太認真，無插手幫忙潼潼而俾佢自己去嘗試，所以攪左好耐)，但係D老師都無主動過黎幫忙，反而大部份都好似「放工」咁上完示範課就走哂。
- 上完奧福音樂示範課之後，潼潼爸話老師同小朋友講再見果陣好敷衍。而潼潼爸亦留意到潼潼因為老師無認真咁望住佢同佢講再見，而顯得一臉迷惘。爸爸話，潼潼習慣要所有人目光係自己身上，所以怕學校「漠視」學生既態度，會影響潼潼既學習。
但係爸爸依然心怡果套JELIC。
唔理點都好，下個星期去埋面試睇埋結果先再諗啦！
2009年10月17日 星期六
浴盆中游水
早陣子天氣熱既時候表姨成日邀請潼潼去佢地屋企，同兩個表哥仔「一齊」去游水。(其實係一齊落樓，跟住各有各玩)。不過近排天氣開始涼，我地就再無去表姨屋企喇！
今日同潼潼出街時，佢無緣無故的話：「去表姨度游水！」我一時間唔知可以點答佢，就簡單直接地拒絕佢嗎？
番到屋企，諗住俾佢休息下黎個午睡，點知佢又開始扭計：「去表姨度游水！」呢個小妮子真係夠堅持。我又再次駛出一招「同理心」。
「好想去表姨度呀．．．． 游水好好玩好開心呀．．．．．．． 」
剩係講出感受就可以嗎？今次再進級，加上豐富想像力去幫佢「解決」問題。
「如果可以即刻跳入水度就好喇．．．．！」
靈機一觸，醒起潼潼未洗白白
「不如媽媽開一大盆水俾你玩水丫。」
潼潼好開心接受左。
媽媽又勝一仗喇！！！ 
2009年10月15日 星期四
耍脾氣
小朋友總會耍脾氣，初初我都不以為意，認為兩歲多小朋友不懂表達，所以耍脾氣係佢地既唯一「方法」。但後黎潼潼耍脾氣既次數越黎越頻密，令我感到佢開始挑戰我EQ。佢耍脾氣令人頭痛的不單單在於叫叫嚷嚷，而在於佢既「堅持」同「硬頸」，永不願妥協。
近黎情況好似有好轉，而方法係：事先張揚 / 承諾
係我需要停止潼潼進行中既活動時，我地通常會事先張揚：「玩多一陣 / 一分鐘 (其實係隨意一個時間) 要訓覺喇！」「睇多一陣就要熄電視！」。
無傷大雅的會俾佢任性少少，不過就有所限制：「要食糖，好啦！食一粒架咋！」
再加上承諾，通常會要求潼潼自己講一次，等佢加深記憶：「唔可以自己亂跑，如果唔係我地就番屋企。」
好老實，有些時候依然係失控，但我覺得比從前係有進步。同佢講只可以睇一陣電視，佢會睇完一節自己自動自覺起身去熄電視；玩多一陣要訓覺，到話俾佢知我地要收野既時候，佢會自己幫忙執好玩具。潼潼呢方面既進步令我好欣慰。希望一切會慢慢好起黎啦！
2歲9個月
潼潼2歲9個月，身高90cm，人都重左好多，有26磅。
好快潼潼已經2歲9個月，就快3歲喇！雖則話０－６歲係小朋友發展既重要階段，但我認為三歲以前更是關鍵之中既關鍵，所以對於潼潼既成長，潼潼媽開始感到有點壓力。老實的說，潼潼既發展並未算十分出眾。
說話：潼潼說話明顯的仍然比較「論盡」，好多時都未能暢順咁講出一句句子，亦未完全懂得表達自己。而家希望潼潼番學後可以幫助佢係語言上既發展以外，潼潼媽亦好多時慢慢給潼潼講一次佢想要既野 / 所做錯的事 / 所應承的事，然後要求潼潼自己將說話重複去講一次。
數數：潼潼而家會由1「讀」到20，但認真的數數就未完全掌握。呢方面我地會係日常生活中讓潼潼認識「數」。有時會話俾潼潼知食「一」塊餅﹑「兩」條魚仔餅﹑「四」粒豆豆，然後將物件逐一逐一放到佢手上面，一邊放，一邊跟她一齊數，然後問佢總共有幾多。而家好像是有了一點點的進步，今天可以數到「四」，然後可以話我知一共有「四粒」。
顏色：大致上都認得了。
自理：除鞋除襪都算可以了，著波鞋就顯得有點困難，其它較易穿的都可以自已穿。上星期日(10月11日)，爸爸媽媽顧著自己換衫的時候，就發現潼潼已自己穿好了鞋，令我非常驚訝呢!
如廁 / 戒片：由7月份知道潼潼要番學開始，我地已經膽粗粗咁唔俾潼潼著片，包括夜晚訓覺既時候。而家雖然間中亦有試過有尿濕，但大致上都無問題。而去廁所既時候亦會自己除褲仔了。
最令我地頭痛既，係潼潼既脾氣問題。不過近日好似有一點點的改善。由於太長篇，我諗都係o係另一篇網誌寫。
2009年10月11日 星期日
無錢喎!
今日同潼潼到西九龍中心，潼潼爸特別喜愛呢個商場有好多小店/車仔檔，唔會俾大型連鎖店壟斷，有d特別d既野睇下。
今日行一行就幫潼潼買左一件衫，一個手袋仔，同埋一d髮夾。除左潼潼既東東，仲有媽媽既東東同埋一ｄ家品。
買野買到潼潼都話：「仲買呀？我無錢喎！！」
**********************************
小插曲：
我地晚餐只係食QQ RICE傳香飯團。可能潼潼未試過食呢ｄ飯團，又係扭計唔肯食。但係佢又想食我地事先叮明要食哂飯先可以食既贈品 - 棉花糖。於是潼潼就一邊豎起手指，一邊叮囑爸爸唔可以食佢粒棉花糖。講起說話黎頭頭是道，連坐隔離檯既婆婆都話潼潼把咀好犀利。
睇黎我地都要多加留意平時對潼潼說話時既用詞同埋身體語言。
2009年10月10日 星期六
2009年10月8日 星期四
2009年10月6日 星期二
咬手
今日中午接到老師的來電。
老師：「潼潼今日食完飯後去排洗的時候咬自己既手，係手腕位置，不過咬得唔深。」
係，應該係潼潼番學之後既事，佢會不時將四隻手指一齊放入口。不過有時俾我地話得多，佢就唔敢完全將手放入口，就變左咬手腕位置。
老師：「咁你地會點做？」
老師係度考我？「我地都會叫佢唔好將手放入口。」
老師：「我同佢講『口係用黎食野既，手係用黎做野既。你咁樣老師會擔心你架！』
(係呀! 書本都教我地唔好用咁多「不要」「不准」「不可以」去同小朋友講說話，潼潼媽替潼潼進行催眠教育既時候都會好小心，會同佢講手仔用黎做野，要放低手。但係總有d時候不期然的講左唔應該講既。)
『咁啦！一陣你除好鞋仔襪仔上床訓覺果陣我過黎睇你丫』佢係有回應俾我，識對住我笑。『你笑好靚喎，老師好鐘意呀！』咁之後訓覺果陣我去睇佢，拍兩下佢，佢好快就訓左喇！」
老師解釋可能係潼潼想吸引我地既注意力，所以會做出呢d行為。叫我地係屋企多加配合。
老師：「你地有無同佢傾番學既事？」
潼潼媽：「有呀！我地都有問佢番學有無喊，有無食飯，有無訓覺。」
潼潼媽剛講完，都已經發現問題係邊。我既問題只係關心佢生理需要，無同佢傾番學既情況。
多謝老師特登打電話黎提點。我地會多加留意!
2009年10月4日 星期日
2009年10月3日 星期六
訂閱：
文章 (Atom)