出街唔著片片

潼潼大約歲半開始戒片，就算冬天都好，我地都繼續係屋企無俾潼潼著片片。但係可能係我地一向對潼潼戒片都唔太嚴苛，所以戒片差唔多一年，都未能成功戒片，潼潼間唔中都仲係因為掛住玩唔識去廁所而尿濕左褲仔。

上個星期去左幼兒園為潼潼註冊入學，校長並不鼓勵學生仲著片片。反正潼潼戒片都有成年時間，我諗我地都應該切切實實地為潼潼戒片喇！

除左係屋企唔著片片外，我地準備連出街都唔俾潼潼著片，當然，我地需要準備十足。首先俾潼潼著較厚既戒片褲，著左戒片褲之後即使尿濕左都唔會濕到一地都係；第二係帶多套衫仔/褲仔/襪仔出街；最後係多提醒潼潼佢無著片片，每隔一段時間/搭車前都問潼潼要唔要去廁所。

今日係第一次潼潼無著片片既情況下去到沙田咁遠，最後都無尿濕，似乎成績唔錯，希望潼潼可以早日戒片成功啦。