星期日上堂玩過一個遊戲，係將物件收埋係幾個杯入面，再係小朋友面前調轉位置，問番小朋友件物件放左係邊隻杯入面。潼潼係呢個遊戲入面表現好差，我覺得係佢唔專心。
呢日係屋企又同潼潼玩呢個遊戲，收埋既物件換轉係糖。但係潼潼依然唔肯專心。雖然係坐係我前面，但係都係掛住周圍望，玩自己手上面既玩具。結果？當然係猜唔中粒糖放係邊啦！
由於潼潼猜唔中粒糖係邊，我將粒糖俾左姐姐食。呢個時候潼潼先「醒覺」原來粒糖唔係一定係俾佢食，係度呱呱大叫，然後要去搶。但係姐姐已經將粒糖放入口，潼潼竟然想伸手入姐姐口度拎，笑死我。
之後潼潼仲喊住咁伸直手板對姐姐：「嗚嗚~~ LUR番出黎呀!!!」
潼潼，LUR番出黎你會照食嗎?
我以後都會繼續同潼潼玩呢個遊戲。
呢晚潼潼食飯唔乖，唔知係咪咁樣夜晚肚餓嗌住要食餅，但係爸爸又要罰佢無餅食。呢個時候，潼潼突然係地上撿起一D野放左落口。
潼潼媽嗌住，潼潼爸趕住想出手，但係潼潼已經將果舊唔知乜野放左入口。潼潼媽嘗試「了」番出黎，又叫潼潼吐番出黎，但係已經喇無左喇！
潼潼媽：你食乜呀？
潼潼：餅餅呀！
無端端係邊度搵塊餅出黎呀？
潼潼媽：你究竟食左乜呀，你吐番出黎。（伸手要接住）
潼潼：唔知呀唔識呀！唔知呀唔識呀！
呢排問親潼潼野，佢一不耐煩就係乜都答你「唔知唔識」
跟住佢作勢好似想吐D野出黎咁。
潼潼指住個口：吞左呢度入面喇！
潼潼媽同姐姐對望，真係又好笑又俾佢激死！！
最後我地都唔知潼潼放左乜野入口，不過潼潼爸話潼潼由細到大都未試過將D唔食得既野放入口，既然已經食左，唯有等佢自然排出啦。
兩歲幾既小朋友開始學講野，成日跟大人講野，有時你教訓佢既說話佢會用番黎教訓你，都幾攪笑。
潼潼媽要番工，除左假期之外，平時對住潼潼既時間唔多。好彩有時姐姐都會講番當日潼潼發生既趣事俾我知。
由於以上兩點，我決定將姐姐話俾我知既潼潼有趣既說話記低，將來睇番我諗都幾有趣。
*****************************************
姐姐帶埋潼潼出街買餸時
姐姐：潼潼，食乜好呀？
潼潼：食豆腐丫！
行行下．．．．．
潼潼：姐姐，我要食呢個！（指住火龍果）
潼潼已經有自己主意，所以今晚晚餐食豆腐同有火龍果做飯後果。
*****************************************
姐姐：潼潼，食飯喇！
（潼潼望住電視機，叫左幾次無反應，姐姐去熄左電視）
潼潼：你熄左我電視呀？我打你PAT PAT架！
潼潼大約歲半開始戒片，就算冬天都好，我地都繼續係屋企無俾潼潼著片片。但係可能係我地一向對潼潼戒片都唔太嚴苛，所以戒片差唔多一年，都未能成功戒片，潼潼間唔中都仲係因為掛住玩唔識去廁所而尿濕左褲仔。
上個星期去左幼兒園為潼潼註冊入學，校長並不鼓勵學生仲著片片。反正潼潼戒片都有成年時間，我諗我地都應該切切實實地為潼潼戒片喇！
除左係屋企唔著片片外，我地準備連出街都唔俾潼潼著片，當然，我地需要準備十足。首先俾潼潼著較厚既戒片褲，著左戒片褲之後即使尿濕左都唔會濕到一地都係；第二係帶多套衫仔/褲仔/襪仔出街；最後係多提醒潼潼佢無著片片，每隔一段時間/搭車前都問潼潼要唔要去廁所。
今日係第一次潼潼無著片片既情況下去到沙田咁遠，最後都無尿濕，似乎成績唔錯，希望潼潼可以早日戒片成功啦。
因為豬流感，潼潼參加既親子課堂都停哂，所以好得閒，呢日可以約嫲嫲同姑姐去沙田飲茶喇。潼潼拎住姑姐掀蓋式電話玩得好開心，可能潼潼好少見呢類電話，所以覺得好新奇。
飲完茶番嫲嫲屋企坐陣之後，諗住帶潼潼去中央公園玩下啦。點知去到翳焗得好犀利，雖然天陰，但係一ｄ風都無。終於支持唔住，都係帶潼潼番入商場行下算喇。
經過廣場ｄ巨型擺設，潼潼少有地擺哂甫士俾我地影相。
番到商場，整番杯雪糕解解暑先。
之後又諗住不如去宜家俾潼潼玩下波波池，又或者係兒童傢俬部睇下有無咩活動可以俾潼潼玩下。知點又碰著大減價，入面人又多，冷氣又唔夠，真係好辛苦。兼且波波池又封埋無得玩，唯有又番嫲嫲屋企。
呢日就係咁帶住潼潼係沙田兜左個大圈，行到身水身汗，但係就好似乜都無玩過咁。
早一段日子個好少UPDATE個BLOG，主要係因為平時開電腦怕潼潼又要玩埋一份，到夜晚呢，陪潼潼覺豬時連自己都訓埋，所以變得好少時間可以用電腦。
由於今年九月潼潼開始番全日N班，所以潼潼媽開始培養潼潼自己一個訓既習慣。如果潼潼可以自己訓覺，咁潼潼媽夜晚就會多左私人時間，到時就可以多D記低潼潼既生活點滴。
尋晚開始TUM潼潼自己訓：
潼潼媽：乖乖地自己訓，媽媽出去一陣，轉頭再番黎睇潼潼。
（過一會兒，潼潼媽番入房）
潼潼：你番黎喇？
潼潼媽：係呀！我番黎喇！點解潼潼仲未訓既？
潼潼別過臉背著媽媽：訓左啦！
***************************************
早前有一段時間潼潼自己好努力咁戒啜手指，亦見到佢真係無乜點再啜手指。不過唔知點解近排訓覺既時候又會再啜番手指。
潼潼媽今朝訓醒見到潼潼啜手指，於是就扯開佢隻手，佢又放番入口，如是者幾次以後，潼潼終於坐起身。
潼潼不滿地推潼潼媽隻手：行啦... 行啦.....
哈哈！想趕我走呢！
對於六四紀念活動，印象中潼潼媽係無參予過。不過對於六四仍然係有著沉重又深刻既感受。當年既剪報今日仍保留住。
今年參加六四燭光晚會，並不本著「平反六四」既意願。我個人認為「平反六四」絕無可能係呢幾十年內成事。只係對於現今社會既年青人，對於六四既事實完全歪曲而感到痛心，亦替當年死去的學生不值，更對於國內既洗腦教育感到可恥。如果話六四事件中天安門無流過一滴血，咁我地都無資格批評日本人係侵華事件中篡改教科書。
可能多得近黎傳媒對年青一代對六四睇法既廣泛報導，好多香港人有同我一樣既諗法；可能係因為二十周年；亦可能多得曾特首一句「我代表香港人」，所以今年出席紀念活動既人特別多。晚上七點多鐘既天后地鐵站裡面人頭湧湧。
我地去到都只可以係後面既籃球場坐。不過街上仍然有好多人未入到黎，但係警方已經封左路唔俾人入。(真的如警方所講的六萬多人嗎?)
潼潼都有份參予，不過當然好唔專心，嚷著要走。一時玩下蠟燭，一時係度唱歌自娛。好不容易先tum到佢留係度兩個鐘。
潼潼，爸爸留左唔少有關六四既新聞片段。希望你大個囡之後真係可以對呢件事有較客觀既認識﹑了解，然後再交由你自己分析事情既對錯。
