生日禮物

今日係潼潼媽既生日。

早幾日同潼潼婆婆有以下既對話：

潼潼婆婆：生日買咩禮物呀？

潼潼媽：唔駛啦！你買埋俾潼潼咪得囉！

潼潼婆婆：潼潼生日咩？你生日丫嘛！

潼潼媽：潼潼咪係一件大禮物囉！你買野俾潼潼就得架喇！

無錯！我成日都覺得潼潼係個天送俾我既一份禮物。對於生BB，我有太多既顧慮，如果要我自己計劃，可能呢一世都唔會有BB。但係偏偏個天幫我決定左，唔駛我左諗右諗。「船到橋頭自然直」，一切無可能已經變成事實，解決唔到既問題亦都解決左。而我亦好慶幸，因為有左潼潼，我既世界再無孤獨，生活變得快樂又精彩。雖然我本身無宗教信仰，但有左潼潼之後，我學識左感恩。我真係好感謝上天送俾我呢一份大禮：一個可愛﹑聰明﹑健康既女兒。

我生日有咩願望？我只希望潼潼永遠地健康，快樂同埋平安。