歲半會挑衣？

姨媽成日話潼潼唔似BB樣，好似乜都知咁。我初頭都好疑惑，但係而家開始明白。

尋晚放工番屋企，見到又有袋小朋友既衫係度，呢D通常係婆婆嫲嫲既傑作。我諗住SETTLE好自己先拎黎睇既時候，潼潼已經逐件逐件衫由紙袋度抽出黎拎俾我睇。既然係咁，我亦助下興。

「嘩！好靚喎！！」

潼潼繼續逐件衫拎出黎，最後所有衫仔都拎左出黎，然後將其中一條黑白色圓點連身裙件併係自己身上。（當然係併得亂七八糟）

「等我幫你啦！」拎住條裙走到鏡前

「潼潼，過黎呢邊照鏡丫」將裙仔併係潼潼身上面

「好靚喎！！」潼潼好滿意咁一邊望住塊鏡，一邊用手拍下拍下身上面條裙

我又揀起另一條連身裙併係潼潼身上「試下呢條？好靚喎！」潼潼不為所動

攪完一輪，潼潼媽先食晚飯！潼潼就繼續攬住佢條裙。見潼潼咁鐘意，姐姐就幫佢著上裙仔。

潼潼媽跟姐姐講：「呢D裙平時點著呀?」所指既係其中兩條裙擺係紗裙款，好似花女著果D裙款。

姐姐:「我都同婆婆講太太實唔鐘意架喇！」

潼潼媽:「都係呢條裙最靚。(潼潼著緊黑白圓點既一條)」

姐姐:「潼潼都係最鐘意呢條呀!今日下午都已經係咁拎住呢條裙。」

潼潼媽詑異地:「係？潼潼真係有眼光！」

真係估唔到，一個未夠歲半既小朋友竟然都會識得自己揀衫？