受唔住靚相既誘惑，潼潼媽又買左新玩具喇！
呢部SAMSUNG NX100係潼潼爸推介既，係可換鏡DC中最平，爸爸話以呢個價錢抵玩喎！
好! 試下機先!
呢張係用CANON S90影。
跟住係NX100 + SAMSUNG 20-50mm變焦鏡
最後係NX100 + NIKON定焦鏡
咁樣比較，其實CANON S90出黎效果都唔錯，只係NX100可以做到淺景深既效果，亦都無S90既偏色問題。不過我未係好習慣扭鏡頭黎ZOOM鏡。
呢部機仲有其它濾鏡既FUNCTION可以玩下。潼潼見我試機又扮個鬼臉要我幫佢影。
呢個就係魚眼效果。嘩~~ 好得人驚呢!!!
雖然買左新玩具，不過我未打算捨棄S90。我諗平時出街都係帶番S90，真係出去玩樂影相先會帶新機。希望到時會影到多D滿意既相片啦!
潼潼係電視見到花卉展既廣告已經叫住話想去，呢日係花卉展最後一日，所以就同潼潼去行下。
唔好以為潼潼鐘意睇花，佢對d花一d興趣都無。叫佢影相要佢自己揀位置，如果你自己揀位置叫佢埋位，佢會扁哂咀，勉強同佢影左相都影得唔靚。
無乜影相，潼潼一心掛住去玩遊戲。
一黎到首先就玩充氣彈床，然後咁岩係魔術表演時間。諗住睇完魔術再去玩攤位遊戲，但係原來好多攤位遊戲已經截人龍準備收拾。真係可惜.... 潼潼無得玩扭波波呢！（臨訓前同潼潼傾偈，先知道原來佢記掛住無得玩扭波波）
去左其它「大人既攤位」換左唔少禮物，都算幾豐富啦！
其中有個白兔仔小電筒，貪得意同潼潼玩下光影拍攝。
潼潼話個電筒可以用黎寫字喎！
之前係冒險樂園買左d套票未用哂又怕過期，所以昨晚應承左潼潼帶佢去冒險樂園玩。
呢日朝早訓醒都未起身，個衰妹已經問我：你記唔記得應承左我兩樣野呀？
潼潼媽故意問：邊兩樣野呀？
潼潼：去冒險樂園玩同埋玩遊戲機囉！乜你唔記得咩？
真係俾佢激死！
去到冒險樂園，見到有小朋友好專注咁同媽媽做緊小手工，可能因為佢專注個樣太吸引我，所以我就問問潼潼有無興趣試下做，估唔到潼潼會話想試喎！呢個時候反而輪到潼潼媽怯起上黎。我就問負責既嬸嬸會唔會好難做？邊d圖案容易做？我怕最後要由自己一手包辦執手尾等等。點知嬸嬸答我：你都要俾佢試下架，總有第一次。
竟然俾嬸嬸一語道破。枉我睇咁多育兒書籍，竟然犯呢個大錯：對小朋友無信心之餘，因為怕麻煩到自己而唔俾佢嘗試。
好！就選一幅比較簡單既圖畫俾潼潼試下先。
潼潼一向對繪畫都不擅長，今次做呢幅圖畫竟然出乎我意料之外地專心做美工。在場另外兩位小朋友其實都由家長代勞，只有潼潼真係有份參予其中，好俾心機咁慢慢做。當然，仍要媽媽幫忙啦！
完成啦！效果理想，潼潼都好滿意！到夜晚訓覺既時候都仲講緊話自己屋企裝飾得好靚。
其實呢個美工都幾易做，最重要係如果做既時候出現小問題要修改亦不難。製成品又令小朋友有滿足感，潼潼都話下次會再玩。
咁以後去冒險樂園就多一項有益既活動喇！
潼潼學校每個學年有三次評估報告家長會，呢日係第二次既家長會。
今次潼潼既評估報告依然理想，幾乎無乜野可以批評。不過明顯地潼潼係學校既表現係比屋企好。睇下?左邊係潼潼媽既評分，右邊係老師對潼潼係學校既表現既評分，真係相差太遠了。當我提到潼潼係屋企既行為時，老師多數既回應係：「係咩? 佢係學校又無試過咁喎．．．．」
整個會談老師提出兩個問題係：
1. 潼潼最近一星期開始會同同學仔搶玩具。我諗呢個不難解決
2. 老師都發現潼潼經常無故跌倒。呢點其實連跳舞老師都提出過。以我觀察，潼潼好多時跌低，都係好慢動作咁自己跌係地上，連我都唔清楚佢究竟係佢自己貪玩，還是真係跌倒。老師話如果有需要，佢可以寫信俾我地再去健康院作大肌肉/平衡力方面既針對性檢查。
唔......... 
呢日請左假同潼潼番健康院做四歲檢查。雖然放假，但都爭取機會，早起身同潼潼一齊番學。每次湊潼潼番學/接佢放學佢都好開心架 !
本來約左四點三檢查，諗住有時間做下自己嘢。點知到下午一點幾老師打電話俾我，佢話潼潼有d唔舒服，好多鼻水，兼且有點呆滯，叫我地不如早d接佢放學去睇醫生。咁唯有又即刻去接番潼潼番屋企。番到屋企同佢食葯水，叫佢飲多d水兼快d訓覺休息。訓醒覺又精神好d，去檢查lu。
去到首先係度高磅重。姑娘問佢幾多歲﹑咩名，潼潼都識答人，叫佢自己除鞋度高佢又會跟住做，醒目!
四歲兩個月既潼潼而家係98.5cm高，體重13.4kg。係跟住佢條25%既生長線平穩上升囉！
之後就係驗眼喇！視光師首先要確定潼潼係咪認識幾個英文字母：U﹑X﹑Y﹑V﹑H﹑O。因為之後就係要試下潼潼係咪睇到同讀到呢D漸細既英文字。結果呢?好理想呀!有大約100度遠線同50度散光。視光師話係正常，仲話以潼潼既年紀讀到果一版已經夠有餘。最重要係佢釋除左潼潼媽既疑慮。因為我自細已經係有斜視，而家都有一隻眼係弱視。但係視光師話潼潼完全無呢個問題，安樂哂!!!!!
之後就見姑娘，了解下潼潼媽係小朋友既脾性上﹑飲食上﹑肢體發展﹑語言等各方面既發展有無咩問題。我就提出左潼潼生長痛同語言發展上既疑問。生長痛果方面都如我所料係無野可以做到。語言發展方面，我就解釋潼潼有咬字不清既問題，導致有時說話要潼潼媽替佢翻譯呢!於是乎又等見醫生，最後醫生都話有少少字潼潼讀字未正，不過尚可接受，咁就再約四歲半既時候再番去跟進。
潼潼呢?本來好合作，不過可能因為佢一心以為係黎睇醫生，唔知道係黎檢查。點知黎到就係咁俾人考佢讀字﹑行路，所以後黎顯得有點不耐煩係咁叫住走。係喇係喇!!! 走得喇!!!
潼潼食飯係肯坐定定既，不過就唔係每次都肯乖乖食哂飯，有時我懷疑佢係咪想練神仙肚。
今晚放工番屋企時潼潼又扭計話唔想食飯，姐姐話佢D飯都未食過。呢個時候我俾佢選擇，要係15分鐘內食哂飯，還是唔食飯。不過唔食飯聽日放學後無得去公園玩同埋無得食小食(姐姐話佢今日放學食左幾塊梳打餅)。潼潼揀左唔食飯，姐姐收起哂碗佢仲好開心添。
之後一陣，姐姐竟然問我食唔食甜品，潼潼聽到又話要食，我緊係唔俾，既然無食哂飯，餐與餐之間必然唔可以有其它野食。
潼潼聽到無得食甜品好唔開心，好嬲咁番左入房，然後又聽到佢係入面叫，仲自己責罵自己「唔俾食呀!」
果刻本來準備入房教訓潼潼，但係突然記起，人有情緒好正常，佢唔開心係必然事，既然佢自己入房發洩而並無係度哭鬧，咁又有何不可?於是我讓佢一個人留係房度好一段時間，然後先再入房睇佢。入到房後我再誇讚潼潼做得好，即使唔開心都無哭鬧，而只係自己係房度冷靜同發洩。潼潼聽到我無怪責佢之餘仲要讚賞佢，佢都好愕然，人亦開始冷靜落黎。
之後佢仲有少少脾氣同唔高興，我再同佢講等佢係房入面發洩一下，心情好番再出黎。不消一會，潼潼係房度大叫：我發洩完喇！
PS 訓覺既時候潼潼仍然有少少扭計話要食甜品。根據過往經驗，佢會不斷重複又重複佢既要求，情緒管理中"acknowledge feeling"對佢黎講已經唔管用，我就只有摟住佢等佢安心訓覺而唔作任何回應。
每個孩子都係獨立既個體，每個孩子性格都唔一樣。有些孩子十分乖巧，做父母既唔需要太操心，潼潼就絕對唔係呢類。不過雖然潼潼有唔聽話既時候，但還算受教。
最近就發生左兩件事，我想記錄同分享一下。
前一個星期六，潼潼準備去學跳舞既時候，經過屋苑商場時巡例要玩夾公仔。因為今次佢帶左自己既小銀包，所以我就嘗試俾佢自己決定玩幾多次。點知玩到第三次都夾唔到既時候佢就喊起上黎。咁既情況過往係未曾發生過，潼潼講到話「一定要夾到」，我覺得佢太過份，於是就帶佢離開現場。點知佢就係度大聲哭鬧，最後又再一次缺席芭蕾舞堂，番左屋企俾爸爸教訓一輪，仲罰佢一個星期無得去公園玩/無得玩夾公仔。
到岩岩過去既星期六，潼潼再經過夾公仔機又要玩，今次佢都係用自己小銀包入面既錢。佢每玩完一次夾唔到，都話再試多一次。睇住佢最初話留番三蚊一陣放學玩，跟住再改口話兩蚊﹑然後一蚊，到最後決定用哂所有既錢，話一陣放學唔玩。唉... 真係好似大人上左賭癮咁..... 
最後夾唔到時，佢既表情真係失落又傷心，咪就係好似大人輸身家咁囉！我知佢又開始想喊喇，不過因為岩岩先滿刑期放番出黎，所以佢都強忍住而唔敢太過份。就係呢個時候我再乘機讚一下佢，話佢夾唔到公仔都唔會哭鬧，做到好好，咁佢就更加要撐住喇！
到放學經過另一部夾公仔機無錢再玩，雖然唔開心，但都無得再扭計。
雖然未知效果如何，不過我想趁佢年紀還少，呢D無傷大雅既少事情就由佢自己親身經驗一下，總比由大人說上千百倍還好。
潼潼呢個年齡特別喜愛為自己編造借口，佢地其實無意識講大話，只係自我保護既自然反應。不過潼潼借口真係幾多，連老師都係咁講，但係d借口都幾亂黎。
事件一
俾塊曲奇佢食，佢又話唔食，但之後又拎左一塊話要試下。
潼潼媽：你又話唔食？
潼潼：我試下唶! 你睇下我個口好細，係試下唶! 個口好大先係食。
事件二
姐姐投訴潼潼放學去公園玩極都唔肯走
潼潼：係個藍色衫果個男仔唔俾我走呀!
事件三
潼潼抖動身體扭計
潼潼媽：你做咩呀？
潼潼：震震震囉！
潼潼媽：做咩震震震
潼潼：我凍丫嘛！
事件四
同潼潼出街食緊野，佢不斷重複又重複地要求想睇之前YOUTUBE睇過既一首兒歌VIDEO。
潼潼：媽me~ 我想睇kulala！.................... 媽me~~~~~~
潼潼媽不耐煩地：我講左好多次喇！我話係邊度先有得睇呀？
潼潼：kulala係咪「我愛洗澡」呀?
潼潼媽：係！
潼潼：我係想問個名咋！
