學校有份功課，要小朋友將撕好既綠色紙張貼係樹幹上。於是媽媽開始同潼潼動工。
潼潼以前細個都成日會撕廁紙/雜誌，原本以為撕紙對於佢黎講無難度，但係原來撕A4紙係唔同既，對於佢地黎講一D都唔易，係要教先做到。
潼潼學會撕紙，唔願停咁撕出紙碎，仲指示我要幫佢塗漿糊既位置，好讓佢將紙碎貼上。
可能加上我地既誇讚（特意係潼潼面前向姐姐讚佢既撕紙技巧。呢個亦係潼潼媽從書本中學會，用黎誇獎小朋友時既小技倆），潼潼似乎做得好滿足，係做完習作後依然好專心咁係度撕紙，仲越撕越仔細，越撕越細張。
潼潼一直被我認為係專注力不足既小朋友，但係原來只要我地俾機會佢，做佢地有興趣既活動，唔打擾佢地，佢一樣可以維持長時間既「工作」。潼潼就係咁撕紙撕左好耐，將整張A4紙撕得粉碎，甚至乎嫌之前撕好既紙撕得唔夠細，要檢番出黎再撕過。
係完成哂所有「工作」之後，潼潼媽先發現，原來習作唔包括要小朋友撕紙，而係「由家長替幼兒撕出紙碎」。唔緊要啦潼潼，可以訓練小指頭靈活性嘛！
秋風起，三蛇肥。早排天氣突然轉涼，就想起了蛇羹糯米飯。
呢日同潼潼行完街之後，打算跟爸爸到深水埗買野兼食蛇羹，所以著工人姐姐先帶潼潼歸家，跟住我倆就出發喇！誰知係搭巴士途中收到姐姐既來電，呢個時候我就想起了：忘記給姐姐門匙。唯有請姐姐又再搭車黎跟我地會合。然後，姐姐﹑潼潼亦同我地一齊去食蛇羹喇！
姐姐本來唔肯食蛇，我硬要佢試一試，佢好勉強咁飲左我俾佢既兩匙。
至於潼潼呢，我本來只俾佢試蛇羹湯水，點知佢試後喜歡，竟捧著碗喝，連蛇肉都吃清。
之後我仲抱潼潼去睇蛇，等佢認識一下蛇。呢個時候，剛巧有條蛇依著玻璃箱邊往上爬，我自己看見都在心裡打震
，但又因為唔想將自己對蛇既主觀感覺灌輸俾潼潼，唯有扮作鎮定。不過．．．．蛇實在太嚇人．．． 所以．．．． 一於要將佢地食清光喇！！！ 
早於十一月初，收到學校既通知，秋季旅行將更改為12月6日，地點係香港迪士尼。我地滿心歡喜，潼潼都好開心話要去迪士尼 - 雖然佢唔知咩係迪士尼，但係同佢講可以見到Minni同Micky，佢就識得數埋：有Pluto啦！有Goofy啦！有Donald啦！有Daisy啦...........
上星期四晚開阿囡書包時見到一張通告，原來係報名去迪士尼，名額260位，先報先得。截止日期........... 11月19日，正正就係當日。咁咪無得去? 
星期五我打電話番學校，睇下仲有無機，點知話已經滿哂位。爸爸提議不如我地自費迪士尼門票然後跟學校一齊去啦！我亦打左電話俾潼潼班主任問係咪可行，老師話要問下校長，星期一再覆我。
呢個星期一直都無收到回覆，所以今日我再打電話俾老師問個情況。老師似乎完全將呢件事忘記左喇，當我再講一次事情時，佢既回覆係：
老師：我地下星期會再開會，因為當日上午係小朋友係迪士尼外面畫畫，下午先入迪士尼，所以要睇下係咪可以約埋一齊入去。
我：我地係諗住自費然後一齊出發。
老師：但係我地兩架城巴已經full哂
(要自己搭車入去，又要自費，我不如自己去)
我：咁你地之後仲會唔會有其它旅行？
(去唔到迪士尼都唔緊要喇！只希望潼潼有機會參加學校旅行)
老師：今年應該唔會有．．．． 或者明年。到時可能見反應好會再加多D名額。
明年？潼潼明年都唔會係呢間學校讀啦！況且到時咪又係限額大抽獎！呢間學校真奇怪，原以為學校旅行係全校學生都可以有份參予，點知原來要大抽獎。
就係咁，潼潼失去左佢第一次學校旅行既機會喇！
死因庭繼續研訊去年一名患有精神病的單親母親，涉嫌勒死一對子女後自殺的案件，裁判官質疑主診醫生不足診斷經驗。
昨日我就上案件到死因裁判處，因為收到傳票有機會擔任陪審員。最後結果呢?當然係未被抽中。不過都算係一個難得既經驗。
根據傳票指示，我須於九時十五分到達，但係我就攪到九時十分先到，真係好險。才到達裁判處門口，我已感到壓力，並不因為甚麼，只係見個個衣著都非常莊重，開始有D擔心自己既衣著會否被視為「蔑視法庭」
去到指定法庭門口無耐，就被叫到入內拎出身份證點名。收到傳票做陪審員既一共有五十位，但就只有其中五位會再被抽中正式擔任陪審員。期間有兩件事比較有趣。
之後各個陪審員宣誓完畢之後，其它未被選中既「候選人」亦都可以離開喇！其實我都慶幸自己未被選中，因為真係怕自己未有足夠分折能力/思考能力去應付呢！
2009年11月21日 星期六
o係屋企樓下等電梯期間，有位大約八至十歲既姐姐見到潼潼。
姐姐：BB呀!
媽媽：同姐姐HELLO丫。
潼潼： HELLO~
姐姐：BB好可愛！
(係媽媽指導下) 潼潼：姐姐都好可愛
姐姐靦腆地依著自己媽媽：嗯..... 我怕醜呀...
呢個時候.....
潼潼: 姐姐肥嘟嘟!
姐姐嘴巴即刻嘟長了。我地幾個大人除左尷尬地一笑之外唔知可以講D乜。
*******************************************
2009年11月22日 星期日
爸爸今日應承潼潼買個銀包俾佢，但潼潼一去到街見到波波又係話要買波波。屋企實在太多波波喇，為左阻止潼潼買波，媽媽出招。
媽媽：一係買波波，一係買銀包，買左波波就唔買銀包架喇！咁你要乜野呀？
估唔到潼潼有咁多波波都依然揀要波波。
好啦！既然佢咁講，就買波波啦！
行多陣見到D銀包仔。
媽媽：買唔買銀包呀？
潼潼：唔買啦！買左波波唔買銀包丫嘛。
媽媽：係喎．．．． 買左波波唔買銀包。
潼潼：聽日先啦！
潼潼乜你咁古蠱惑。
*******************************************
2009年11月22日 星期日晚
潼潼細細個已經被姐姐訓練坐大人坐廁（都唔知係咪因為姐姐自己貪方便），無乜用過potty。不過由於屋企坐廁太高，每次去解決都要大人幫手。
今朝潼潼要去尿尿既時候，媽媽做緊野，就叫潼潼搵爸爸幫手，但係潼潼點都唔肯，係都要媽媽幫佢。
今晚去完街番屋企，潼潼便便完畢：
潼潼：痾完未呀？痾完喇！！
爸爸：你痾完喇？
潼潼：我唔要爸爸！要姐姐！
潼潼，爸爸都係順便應你一句唶，你洗唔洗咁快打沉佢呀？
呢排天氣寒冷，真係好好訓，連寫blog都懶左。
潼潼學校有閱讀計劃，每星期會幫小朋友借書，然後做好簡單既讀後報告。尋日老師打電話俾我，話唔記得幫潼潼將圖書放入書包，同埋順便話我知而家潼潼非常適應學校生活，叫我放心。
我又點會就咁霸休，係咁捉住老師問潼潼係學校既情況。
據老師所講，潼潼係學校係好投入好活躍，好肯舉手出去做示範，成功左又會好自信好開心。不過潼潼有時都會唔開心，靜靜咁低頭唔講野。呢個時候老師就話會請潼潼一陣幫佢手拎點名簿或做點甚麼，咁潼潼又會開心番。至於同小朋友相處既時候，有時都會出現搶玩具既情況，老師話咁係好正常，通常都會係呢個時候教佢地要先問小朋友，同埋要一齊玩。
我就向老師投訴潼潼係屋企反而好似霸道左，D玩具唔俾人掂，要自己玩完先肯讓出黎。但係老師反而話潼潼都無錯...... 話佢學習緊「輪候」。雖然我係屋企都有訓練潼潼「輪候」，但係對於佢既「霸道式輪候」真係有點不敢恭誰。
總的來說我都對潼潼既表現非常滿意。好老實，以前潼潼媽細個真係一舊飯，係學校永遠靜靜咁，唔敢出聲，唔敢發問，唔敢舉手，我都擔心潼潼會係咁。聽到佢係學校表現得咁活躍我都好放心喇!
係因為住係將軍澳，定係因為住低層，而家咁既天氣竟然仲有蚊。
尋晚(今朝凌晨)準備訓覺既時候，耳邊響起一陣討厭既wee wee聲，係有蚊飛過，都唔知點解用緊電蚊開都會有蚊。於是叫左爸爸入黎。爸爸拎埋電蚊拍，我就用被擋住d光免得強光弄醒潼潼，然後開始尋蚊殺蚊，搵左一陣都唔見蚊蹤。
爸爸：唔見喎．．． 咁都無計．．．
我：咁由得佢又叮到阿囡腫口腫面？
呢個時候卻俾爸爸見到蚊蹤，於是立即出手電死左隻蚊，似乎一切告一段落 - 雖則潼潼亦被吵醒左。我地熄番燈，哄潼潼訓番。點知....
潼潼突然攬住我，對腳縮起，好驚咁喊：蚊呀!!蚊呀!!
我最初諗住佢未訓醒發夢，我抱起潼潼哄佢訓。佢靜左一陣，又突然間成個人跳起：嗚~~ 蚊呀!! 有蚊呀!!
潼潼不斷咁喊，仲喊得好犀利，喊到係隔離房既姐姐都出黎睇佢。姐姐抱住潼潼，潼潼仲係不斷咁喊住話有蚊。我地安撫住佢，話俾佢知拍死左蚊喇!但佢依然好似睇到蚊咁，會不時突然跳起/縮起，又望住某一點話有蚊。停落黎既時候，又會好驚咁雙眼不斷周圍張望。潼潼真係好驚好驚，喊得好犀利，攬到人好實。我地用左好多方法哄潼潼，又抱佢出廳﹑抱佢入姐姐房﹑抱住番入自己房﹑編造唔同既故事話佢知已經無蚊，但一切依然不湊效。
最後，我俾左專治「夜睡不寧神經緊張」既XX奇應丸潼潼食。然後幾乎係以我整個人既身體包住潼潼(要攬到實，連頭都收埋係我胸前)，佢先慢慢訓著。但係事情已經擾攘左有一個小時。呢一個小時大家都好無奈，我諗連湊過幾個小朋友既姐姐，今次都感到好無奈及束手無策。
我諗，究竟係我o係潼潼訓著既時候講錯說話(叮到腫口腫面)，入左腦而嚇親佢，定係好似我講笑咁講：有蚊幽靈呢？
我地去呢間學校交報名表既時候已經對呢間學校極有好感。除左因為校舍又大又靚之外，老師亦好細心。佢地留意到潼潼流鼻水之後，會主動帶佢去課室拎紙巾抹。呢樣野我諗無邊幾個學校既老師會做到。
今日去面試，基本上潼潼媽極滿意學校係面試流程上既安排。
首先佢地開放學校既遊樂設施俾小朋友玩，等佢地熱下身。跟住安排入課室播放介紹學校既短片。係睇短片之前，佢地會安撫d小朋友，話俾佢地之一陣仲會上樓上課室玩玩具，等佢地唔駛心卦卦出面d玩具。睇完短片又會讚小朋友好留心，叫大家俾掌聲各位小朋友。呢兩件事情睇得出老師對小朋友真係好細心，連面試既時候都唔會只顧做自己既工作，而忽略教育小朋友既應有態度。
上到課室面試，整個過程都係大班小朋友玩玩具，而老師就係小朋友玩玩具期間問佢地問題。由於潼潼係大女，又好開心玩緊遊戲，所以表現好好，有問有答。老師好專業，同小朋友傾計了解佢地之餘，亦無分心卦住自己記notes。面試完畢之後，仲會請小朋友「鬥快」執番好自己D玩具。呢個亦係一個好重要學習自理能力既過程。又要給老師一讚！
樣樣都好好，只係佢地既教學方法有利有弊。短片中睇到學校既教學方法主要係從遊戲中學習，無課本，無測驗默書，一切從平日表現評估小朋友進度。呢樣野令我有D擔心小朋友到升小學既時候係咪會適應到小學既課程。
