我會......

原來唔覺意將爸爸攝左入鏡，我又唔識幫video打格仔，唯有照去。

「Hello」呢個手勢係尋晚同潼潼睇故事書既時候佢學識既，因為新鮮熱辣，所以潼潼做得特別雀躍。

窮人及富翁

我老闆多次推介黃毅力係都巿日報寫既專欄 - CEO實戰手記。雖然佢既文章刊於「財富」版，但所寫既並不單純係物質上既財富，亦有心寧上既財富，以及財富哲學。(咩係財富哲學?應該係潼潼媽自創既名詞罷！)

今日所刊既文章亦都幾有趣，所以轉載入面部份精彩內容係度分享一下，希望有緣人睇過後會有所得著。

有一次我面對一位印度富翁，他是這樣教兒子：「在經濟繁榮時，這是儲錢的時候，因為物價是『超買』的，價值不高，服務亦不會特別好。當社會環境是處於經濟低迷的情況，其實是應該用錢及作出投資，因為選擇會更多，消費得到的將會更加超值及超賣。」

私人奉勸大家一句說話，窮人及富翁的分別是：「窮人是先消費，後儲蓄；富翁是先儲蓄，後消費。」希望大家能夠克服「病態消費狂」這個惡魔，祝你好運！

要看全文嘛？咁就請移玉步喇！

說聲再見

唔駛咁驚，我唔係要同大家講再見，係潼潼講再見。唔..... 係潼潼學講「再見」先岩。

潼潼識講「拜拜」，婆婆要教潼潼講「再見」。婆婆話講「再見」好聽d，話我點解唔教潼潼講「再見」。我就覺得既然意思一樣，唔想特別再教，寧願教佢其它。 但係婆婆依然堅持一聲拜拜，一聲再見。

今日中午既時候婆婆打電話俾我，順便俾潼潼同我「傾」幾句，傾完之後聽到婆婆係背後講左句拜拜，潼潼跟住一句拜拜；然後婆婆又一聲再見，潼潼竟然都跟住一句再見。　嘩！好野喎潼潼！真係識講再見，而且仲幾清楚喎！我同婆婆都有點估唔到。不過之後再講已經無咁清楚喇！

家裡有個小朋友真好，簡單一聲「再見」已經令人充滿驚喜。

蝙蝠俠 - 黑夜之神

潼潼媽同爸爸去左睇蝙蝠俠。好唔好睇?我想話鐘意既依然鐘意，唔喜歡既依然唔喜歡。哈哈哈!! 老實，呢套戲唔咁差(尤其下半部，上半部我有點想死既感覺)，不過我就係唔鐘意呢類劇種。況且人大左都受唔起太沉重既心情，我都係覺得睇功夫熊貓呢類，一邊睇一邊嘻嘻哈哈的比較好。

去圖書館

估唔到潼潼爸今次會有咁有建設性既好去處 - 帶潼潼去圖書館。

而家d天氣真係反常到令人擔心，出門口果陣仲係好曬，特登同潼潼帶番頂帽仔型下，點知去完麥當當食野出黎就個天陰哂，仲要雷暴警告添。

我地今日去將軍澳兒童圖書館。潼潼去到都無好嘈，只係佢唔肯乖乖坐係度睇圖書，而係周圍爬高爬低攪住哂d哥哥姐姐，一時又訓地踩單車，一時又做哂動作唱歌仔，不過附近d哥哥姐姐﹑姨姨叔叔都無人理佢喎。唔知潼潼會唔會諗：點解今次我唱歌仔無人讚我叻既？

潼潼@麥當當

「媽媽話薯條無益唔俾食，好彩有粟米食一樣咁開心啦!」

中國加油

雖然奧運將至，不過潼潼媽既民族意識一向唔強，我唔會係度大嗌「中國加油」，不過係超級巿場見到呢個由各種罐裝飲品砌成既「中國加油」四字又真係幾特別。

小意外

今日潼潼係屋企發生了小意外。

潼潼已經識得自己爬上椅度好耐，由於佢成日都會做呢個動作，一直都無發生乜野事，潼潼亦識得自己爬番落地，所以我地都不以為意，將警覺性降低。就係咁，潼潼o係我地有三個大人o係屋企，卻各顧各地做事傾計既時候，由椅上面跌左落地撞到個頭。仲要係姐姐最先發覺，第一個上前抱起佢。

係果一刻，其實我同潼潼爸都有點被嚇親，潼潼第一次發生呢種小意外。我亦見住潼潼由跌低到俾姐姐抱起好一陣子，依然未能喊出聲，我睇見咁既情況，知道潼潼今次真係跌得好應，心裡面都有點自責同難過。好彩後黎潼潼都喊左出黎，亦唔算喊得好犀利，只係好似被嚇親，呆左好一陣子，要姐姐一直抱住唔放。

我地實在太大意，照顧小朋友真係一刻都不能放鬆，即使佢平時係應付自如卻仍然要處處小心。

 

抖左一陣再帶潼潼出街玩，見佢依然活潑，我地就放心哂。

去清水灣

帶潼潼去健康院檢查完之後，我地俾潼潼休息左一陣就去左清水灣。

清水灣真係一個好適合小朋友既海灘，因為佢既淺水區比較闊，行出海面頗遠既地方依然只係水深及腰，俾小朋友玩水的話係比較放心。

有幾次「游水」經驗既潼潼，已經識得踢水喇。可惜，短片被大意既潼潼媽刪去左。唯有下次再拍過啦。

 

歲半番健康院

今日潼潼番健康院檢查。

原來潼潼之前打開私家既五合一同六合一防疫注射，所以都要番私家疹所繼續注射埋呢支歲半打先配合到之前既預防疫苗。所以今次潼潼番健康院，主要都只係進行發展評估。

一開始潼潼先去磅重，係9.7kg，即係21磅左右，潼潼年頭已經係20磅大右，其實無乜點重過。 跟住姑娘就俾左個洋娃娃叫潼潼餵洋娃娃食野，而姑娘就趁呢個時候用好快既速度問左我地好多問題，多到我都唔係好記得佢問左d乜。係姑娘問潼潼識自己講(唔係跟人講)咩說話既時候，我一時間都答唔到好多。 仲有問下潼潼識唔識自己食飯咁。

不過潼潼好似知道自己俾人考緊咁，成個過程都出奇地合作。首先姑娘俾左個洋娃娃同匙羹俾潼潼，潼潼就好自動咁餵洋娃娃食野；然後俾幾件積木佢叫佢疊高，佢又真係好快咁疊好三舊積木（我之前係屋企試過叫佢砌高高佢都唔理我）；我又問潼潼邊度係眼睛，潼潼就即刻指住自己眼睛（平時又係唔多啋我）。到最後我地要走喇，潼潼仲識得同人講拜拜。真係好神奇！！

整個過程都好順利，姑娘都讚潼潼精靈醒目，下一次番健康院就會係四歲既時候，三歲半既時候要約時間喇！

幼兒成長家庭測驗量表

以下內容資料係由一位出色既早教媽媽既網誌轉載過黎既。由於潼潼下次番健康院或者會係兩年半後既事，所以以下資料就可以俾我地媽媽係呢兩年半內作為一個指引喇。

 

幼兒成長家庭測驗量表

(摘自<<潛能遊戲開發書>>

測試說明: 本測試表有四個測試部份, 針對每個測試項目, 提供不同測試觀察期, 家長可以間隔一定時間做同樣測試,並做紀錄)

一. 項目的指表

1. 對情感的認識, 接受能力和表達能力

2. 對各種狀態做出反應的能力

3. 個性的融合程度

4. 形成價值觀

5. 手眼/眼腳協調能力

6. 大肌肉運動能力

7. 非大肌肉運動能力

8. 身體支配和控制能力

第一階段 (18-21個月)

1. 會用動作和言語來明確表達自己的個人需要

2. 當哭鬧的時候很容易就可以利用玩具把他平靜下來

3. 受到表揚時會表現出自豪的樣子

4. 看到其他小朋友哭泣時, 會要求家長抱

5. 可以用小積木砌六七塊高

6. 可以一手扶欄杆上樓梯

7. 可以輕鬆地爬進出床/桌底

8. 可以輕鬆地掂腳尖走路

第二階段 (21-24個月)

1. 遇到媽媽哭或悲傷時, 會表現出安撫

2. 自己的玩具被搶走, 會主動採取措施

3. 當看到新玩具, 會嘗試

4.會把自己心愛的東西交給媽媽管理

5. 細線穿過釦子的洞, 並會拉線

6. 可以雙腳跳離地面

7. 可以輕鬆地做連續翻滾動作

8. 可以跟大人做蹲下, 點頭, 舉手等動作

第三階段 (24-27個月)

1. 當受到批評時, 會傷心或哭

2. 當他的意願不能被滿足, 會發脾氣

3. 喜歡參與新遊戲, 不會感到害怕

4. 孩子會照顧自己喜歡的娃娃

5. 模仿畫橫線或豎線

6. 不扶欄杆上樓梯

7. 拖媽媽一手走平衡木

8. 會聽令快速舉起相關身體部位

潼潼snap shot

「成日見媽媽拎部相機對住我，好似好好玩咁，我都好想試下玩。」

潼潼好鐘意搶我部相機，尋日行吉豬島果陣俾佢拎左一陣，之後晚上先發覺原來潼潼都影左十幾張相。

有時轉個方向，以小朋友既角度睇呢個世界，原來感覺都幾有趣。

窩心的一句

潼潼到左而家都仲係好多時會係半夜既時候睡醒，然後「依依呀呀」咁叫，要我抱起佢跟我地一齊訓。通常佢半夜睡醒既時候，當然我係第一個會起身睇佢果個。

尋晚凌晨時候，當我仍然努力係電腦面前既時候，突然聽到潼潼o係房入面叫「媽媽！媽媽！」叫左好幾聲，我即刻走入去睇佢。入到去潼潼已經企左係床邊，我抱起佢放係我膊頭，輕輕咁拍下佢，安撫左佢之後放低佢，咁佢好快就訓番喇。

今次係第一次潼潼係半夜睡醒既時候會叫「媽媽」。o係佢訓到半夢半醒既時候，仍然會想起搵媽媽，感覺好窩心呢。

大袋細袋

可能呢個年紀既小朋友都好鐘意學大人做既野。今日潼潼跟姐姐落完街買野番黎之後，就自己拎住大袋細袋，唔肯俾人幫手。

 潼潼爭住拎野既情形都時有發生，唔知到佢大個真係要佢幫手既時候，佢會唔會仲係咁落力要爭住拎呢?

爸爸媽媽

或者因為係自己囡囡既關係，感覺上潼潼叫「爸爸媽媽」係叫得特別可愛。

再次「習泳」

昨天約好左舅夫同兩個表哥今日去游水，潼潼媽仲特意出街去反斗城買左件習泳浮水背心俾潼潼。點知今早一起來就雷暴警告，原定計劃十一點開始去游水，八點幾開始雷暴警告，一直留意住生效時間，見住個生效時間一再續延，一直擔心今日特備節目要取消喇！最後到十點幾警告依然生效至十一點，未知係咪會再延長，但係我地都出發喇！ 皇天不負有心人，好慶幸十一點後無再發雷暴警告，潼潼可以再次落水喇!

潼潼玩得好開心喎！只係害了我同姐姐，雖然我地兩個已經褶起褲管，但最後依然有大部份地方係濕透。

學跳舞

潼潼媽唔係咁鐘意俾潼潼睇電視，不過星期六早上既「文化廣場」就會例外。因為我希望從中可以或多或少咁誘發到潼潼既興趣。

大懵媽媽

今日潼潼媽請左一日假，為既係想親自帶潼潼番健康院，聽下姑娘對潼潼既評估。誰知.... 潼潼媽竟然睇錯左時間，仲要係遲左兩個小時。去到健康院無得睇，感覺好無奈，仲浪費左一日假期。唯有接受，約左下星期再番健康院。阿Q地跟潼潼講：又多一個星期俾你練習下喇！

***********************************************************

晚上同姐姐帶潼潼去SUPERMARKET買野。潼潼好似搬貨工人咁，乜都要搬，最後更逐個逐個橙搬去我地既購物車 - 嬰兒車個籃度。經過既一位太太見到，打趣咁同潼潼講：你買咁多橙，有無錢架？呢個時候潼潼竟然轉頭望住我叫左一聲「媽媽~~」大家見到都係度笑。唔知潼潼呢聲媽媽係咪真係明白咩叫俾錢呢?

************************************************************

今日潼潼學識左講「唔該」。而家潼潼「多謝」同「唔該」都學識左喇！希望佢以後亦會多Ｄ講呢兩個詞語啦。

歲半喇

真係眨下眼咁快，潼潼已經歲半人仔喇！過去一個月入面，我覺得潼潼好似突然開左竅咁，係各方面都有比較大既進步。我諗，可能好多野係小朋友一直以黎都學習緊／一早已經學會，每當佢身體發展到能夠應付既時候，就會將學到既野一下子爆發出黎。

呢一個月黎，我覺得潼潼係醒左，真係識得分爸爸﹑媽媽同姐姐。我所指既識得「分」，係佢識得分咩時候搵爸爸﹑咩時候搵媽媽，而佢最親既依然係姐姐。佢只知道原來要「碼」住媽媽，去街的話要叫醒爸爸。

係自理能力方面，有幾方面我都幾滿意。

1. 潼潼而家係知道番屋企第一件事要除鞋，當然，佢仲係要我地幫手先除到對鞋，跟住佢就會自己將鞋放番好，然後去洗手。小朋友都鐘意玩水，所以潼潼好鐘意「玩」洗手。


2. 潼潼玩完既玩具，係我地既協助之下，佢有時都會肯一齊將Ｄ玩具執番好。當然，都好睇佢心情。


3. 係如廁訓練方面，如果要便便，潼潼大部份既時候係會識得要去廁所。但係尿尿就比較差，到而家都未係控制得咁好。


4. 另外潼潼都開始自己用匙食飯。對於佢鐘意食既食物，佢係絕對願意自己拎起匙羹進食，而且唔鐘意人地餵佢添。


5. 會用杯飲水，不過間中都會倒得一身都係。

係認知方面：

1. 基本圖形懂得方辨，玩插孔遊戲頗純熟


2. 會指出眼﹑耳﹑鼻同頭髮


3. 會係書本入面指出認識既物件，例如：豬，狗﹑鴨


4. （未確定，無仔細考究）認得某幾個英文字母

至於遊玩方面，發覺潼潼原來唔怕水，想俾潼潼學游水；另外又學識「扭駄」，打算俾佢學「渣車」；仲有就係學識自己上樓梯玩滑梯。

語言能力方面，係潼潼比較弱既一環，不過最近都多左講唔同既詞語喇！有時仲會跟住人自己講添。潼潼會講 / 曾講過既生字有：爸爸﹑媽媽﹑婆婆﹑姐姐﹑哥哥﹑鴨﹑喔喔(雞叫)﹑woe woe(狗叫)﹑魚﹑雞蛋﹑蛋撻﹑車﹑波﹑乾淨﹑知﹑畀﹑多謝﹑拜拜﹑123﹑掟﹑踢﹑高﹑矮﹑飛﹑跳﹑食... 等等

我諗今個星期五番健康院檢查都唔會太失禮卦。

潼潼好似樣樣都幾好，不過有一樣野就成日俾婆婆投訴，就係潼潼既脾氣。婆婆成日怪責我係潼潼發脾氣既時候唔鬧佢打佢。其實有時我係刻意唔理佢，唔俾反應佢，等佢知道發脾氣係無效用：我亦唔想打佢，唔想教佢唔准打人既時候我又打佢；唔鬧佢，係因為對咁細既小朋友動氣亦無意思。我會嘗試同潼潼講道理，雖然佢咁細個未必會明，不過只要佢習慣呢種方法，我相信到佢大個佢就自然會明白。好老實，對於潼潼發脾氣既問題，我並不太擔心。 (唔知咁樣算唔算縱呢? )

咁又年半，都係果一句：希望潼潼永遠平安﹑健康同快樂。

百厭精

「咪俾我外表呃到，媽媽話我其實都係百厭精一名。」

其實潼潼有時都幾似個男仔。睇下？！幾百厭！！

迪迪尼美語世界

這套教材的價錢實在不用多說，幸好得來一套被「傳宗接代」的免費二手教材。先不談這套教材對學習外語的成效如何，反正字咭不完全，不能作準，但似乎對專注力的訓練倒不錯。潼潼每次看這教材，都可以花上數十分鐘。

你看，姐姐手上的字咭都是潼潼逐一看過的。

今年第一次到泳池

今年夏天晴朗既天氣真係好少見，幾日好天氣以後又不斷落雨，根據天文台既資料，未來七日天氣仍然係下雨天。

好彩係呢幾日壞天氣之前，潼潼都有機會再落一次水。係上星期六就去左姨媽屋企度玩水喇！一開始既時候潼潼都唔願落水，但係後黎見到幾個表哥玩得咁開心，佢跟住都好興奮咁一齊玩喇！仲要唔俾人拖住係咁要自己行添！攪到飲左幾啖水，但係抖左一陣又再黎過。潼潼呀！連姨丈都話你夠神勇呀！

再黎番張大合照先

又笑又喊

潼潼睇自己既短片都睇到又笑又喊。

晴朗天氣

剛過去的星期六﹑日天氣都不好，今天難得好天氣，相信好多爸爸媽媽都會帶小朋友出外逛逛。

今日四點幾先帶潼潼去公園，但係天氣仍然熱得不得了。潼潼媽嚷著要先到室內地方避避暑，所以我地先帶潼潼去冒險樂園玩左一陣，然後先再番落去公園玩。

途中潼潼要搶姐姐既飲品解解暑。潼潼，媽媽都唔係咁贊成小朋友飲呢類色素+糖漿飲品，不過間唔中一次，就算你一次咁多啦!

 

潼潼去到公園，最鐘意就係玩滑梯。以前潼潼玩滑梯都係訓係度滑落去，而家大個女喇！可以坐直身滑落去喇！

 

唔單止係坐o係度玩滑梯，潼潼仲會自己扶住扶欄上樓梯玩滑梯添。

跟住同潼潼玩肥皂泡。今日天氣真係好熱，潼潼又周圍走，所以玩到個人濕哂，仲好「支力」咁既樣添。

 

今晚番到屋企，潼潼食得特別開胃，訓到特別快，無再扭捏子。所以話呢，小朋友都係多運動比較好。