這天朋友小衰婆到訪,而且送上給我們一家三口的「家庭裝」T恤。多謝小衰咁有心。
當日既照片都由小衰拍攝,我仍未有時間接收相片呢!
而家潼潼好會使脾氣,動輒哭鬧發惡,令我不得不開始正視潼潼既教育問題。唉!我諗,原來我係享受左一年唔夠既蜜月期。(照顧小朋友真的比嬰兒更複雜困難呢!)
潼潼脾氣好大,我實在唔明咩原因,只有自我反省過去用既方式係咪有問題。平時潼潼做左D唔應該做既事,雖然我不至於會好大聲咁鬧佢,但係都會用比較重既語氣喝止佢。不過而家見潼潼成日都咁惡,會唔會係因為我地成日對住佢惡既原故呢 而家唯有嘗試改變自己用既方法,每次佢使脾氣,我都用平和既語氣同佢講唔可以咁樣,如果佢係想要某一物件,我就要佢靜落黎先會俾佢。剩係今日同佢落去公園一陣間,已經唔知有幾多次同佢講道理,叫佢唔可以咁樣發脾氣。
希望潼潼便脾氣既情況會有所改善啦!
呢日既節目係同潼潼再去MEGABOX。
出發前係屋企樓下影番張相先。
上次去MEGABOX潼潼仲係要坐係車仔度,對於佢黎講無乜好玩,所以全程都好呆。今次去MEGABOX好好多喇!潼潼去到九樓既「童真天地」之後就係咁周圍走。佢都好曳呀!係咁走又唔肯俾人拖住。「童真天地」入面仲有個滑梯,潼潼係果度玩左好耐,係咁不斷爬樓梯玩滑梯,玩到唔願走添!
講講個商場,原來童真天地入面有間好靚既育嬰室,不過入面只有一張小梳化放係俾母乳媽媽餵母乳既房入面,而出面就只有俾BB換尿片既地方。如果多過一個媽媽要餵母乳,真係唔知點算,而且餵奶粉既媽媽,我相信唔可以使用育嬰室,而要坐係出面俾人休息既矮凳度餵喇!呢個設計實在有點奇怪。
今日下午兩點幾,我同潼潼爸就已經準備到阿豬屋企,因為潼潼爸今晚要參加佢地既聖誕夜BBQ,而我就唔想潼潼太夜,所以陪潼潼去玩一陣就提早離開。
本來呢D日子一個人番屋企都幾孤單,不過上天都似乎對我唔錯,當我一踏出屋企地鐵站出口,就碰巧有一大班教徒係度唱聖詩,正好唱完最後一首聖誕歌,一群人講左恭祝既說話就離開喇;之後上到東港城,又係咁岩又有FUNCTION攪緊,又係咁岩唱緊最後一首聖誕歌。還好,總算有咁多人對我講「聖誕快樂」。
之後我本來係唔想太刻薄自己,決定往新開既TASTE好好咁為自己買一份聖誕大餐。不過行左好一陣都攪唔到有乜野好多可以買。好失望啊... 最後只係揀左一份沙律。
我就係咁樣同潼潼渡過左第一個平安夜 - 一個絕對平安既平安夜。
今日既節目太豐富喇!
首先約左婆婆同姨媽﹑舅夫佢地一齊係太古城既黃家紗食午飯以慶祝聖誕,連行動不便既公公都有一齊出黎添呀!之後姨媽仲去左玩具反斗城買左份聖誕禮物俾潼潼添。
之後我地就係太古城行左一陣。期間溜冰場有一班麥嘜朋友表演,實在太可愛喇!只可惜潼潼完全唔欣賞。
之後又同潼潼去左鰂魚涌公園玩。
跟住夜晚就入左沙田同嫲嫲姑姐食飯。食完飯之後潼潼情緒仲好高漲,潼潼仲同嫲嫲姑姐係新城巿廣場影完相先走添!
今年聖誕老細話要攪攪新意思,慶祝聖誕唔係去食lunch,而係食dinner;唔係食西餐,而係食中菜。除左各位員工之外,仲要係攜眷出席。地點係銅鑼灣農圃。
睇下我地食D乜:
南瓜翅
黑豚肉
小菜四碟
燕窩杏仁菜
仲有D前菜,炸子雞同埋蟹粉小籠包。只可惜個蟹粉小籠包卻失水準呢!
除左食之外,我地仲準備左D餘興節目。首先係呢個2007年大事回顧。俾大家欣賞下我精心炮製既傑作先。
今次「大事回顧」其實只係借題發揮,重頭戲當然係新鮮熱辣,係18號發生既微波爐爆炸事件啦!
點解會攪成咁?詳情我實在不便透露喇!
唔少得既就係抽獎節目。好老實,今次既禮物份份都係精心挑選,其實都無分邊份係大獎,不過為左令到氣氛緊張D,我地都將獎品列為三個等級。好好彩,我同我老細竟然進入最後兩強。結果係點?哈哈!竟然係我抽到大獎喎!真係好少咁好彩呀!大獎就係....
精美蠟燭台一個。
「媽媽」﹑「爸爸」﹑「姐姐」潼潼都會叫,不過平常都係隨意亂叫,對住姐姐叫「媽媽」,對住媽媽時叫「爸爸」或者「姐姐」,大部份時間都隨口咁叫住「爸爸」。總之就係隨佢心情喜好而亂叫。
今晚晚飯既時候,潼潼又係咁纏住我腳下要我分食。 佢一邊扯住我既褲,一邊叫住「姐姐」,我無好氣咁同佢講「唔係姐姐呀!」點知佢突如其來的大叫一聲「媽媽!!!」哈哈哈~ 笑死我喇!我同姐姐都俾佢笑死 佢好耐都無試過咁清楚咁叫一聲「媽媽」,或者潼潼真係覺得我地好麻煩,所以係好不耐煩咁應酬我地一聲「媽媽」啦!
呢個囡... 有時似懂非懂咁,真係俾佢笑死。
昨晚睡的不好,半夜睡來以後久久未能入睡,或許是因為給老公拉了去看這一套電影的原故。
在《魔間傳奇》這部科幻驚慄鉅片中,韋史密夫飾演一個傑出科學家羅拔紐維爾,但是他對於一種擴散至整個地球、無所不摧、無藥可治的人為病毒朿手無策。由於某種原因紐維爾身懷對抗這種病毒的免疫力,因此他成為了紐約市,甚或至地球上唯一的僅存者。在這漫長的三年期間,紐維爾不斷發出電波訊息,希望能尋找及聯擊到其他倖存的人類,可是一直得不到回應。但是,他絕不孤獨----受病毒感染的變種人類一直匿藏於黑暗世界中,窺視著紐維爾的一舉一動,靜待他稍一鬆懈的機會,肆機將他徹底殲滅。紐維爾已成為人類的最後及唯一希望,他必須以他具有免疫力的血液,去破解將令人類滅絕的病毒。在千鈞一髮之間,在變種人環伺之下,他能否完成任務?
從前也愛看這類電影,但不知是否因為年長了,就承受不了這沉重的氣氛。我是給這電影的橋段嚇著而無法入睡嗎?我倒不覺得有驚恐的感覺,只是那緊張及不安令人太透不過氣。
另一方面,自從當了母親的角色以後,看事物總是比以往感性。每看到有關小朋友遭遇不幸的新聞都很感概。片中看到這恐佈的傳染病拆散不少幸福家庭,心內很難過。做父母的,總希望能用一生去保護自己的兒女,願他們幸福快樂的啊!
看來,人的確是老了,都唔適合過去緊張刺激的生活。
呢日又係帶潼潼去公園喇!點解成日去公園?因為小朋友真係多d要出街先學到野,而且潼潼每次去公園都玩得好開心。
潼潼真係大個女喇!而家都知道出街有得玩,所以都唔會成日掛住訓覺,去到公園仲成日周圍走無時停,真係想同佢影番張相都好難。
今日潼潼都好叻呀!識得自己爬樓梯上去滑梯度。雖然會整污漕條裙,不過我都唔係太介意,裙污漕左係可以洗,最緊要係有機會俾小朋友學到野。潼潼今日仲識得同其它小朋友打招呼添!
呢個公園仲有樣好,就係入面有個小斜坡。其實俾小朋友走斜坡都係一個好好既訓練黎架!
呢日潼潼玩得好開心,玩到唔願走。不過佢都好攰喇,我地放低佢係車仔無耐佢就訓著左lu。
今日潼潼爸要番工,全日只剩得我﹑潼潼,仲有姐姐係屋企,諗唔到咩節目,最後都只係附近個小公園玩左一陣。
係公園玩緊既時候好多小朋友,有D小朋友會特登阻住個滑梯唔俾潼潼玩,有個小朋友又係咁一邊追住潼潼,一邊講「曳曳」,仲會用手打打添。我諗果位小朋友平時一定成日俾人打,話佢曳曳。所以我都無乜印象打過潼潼,我怕佢會學識「打」。我諗,潼潼可能連咩叫「曳曳」都未知。
又一個月喇!寫下寫下... 潼潼都就快一歲大喇!
呢個月潼潼進度唔錯:
說話
教育
行動
就快一歲大,潼潼懂的會越來越多喇!
潼潼進入鸚鵡學話的階段喇!
話說潼潼近月以來都很喜歡沒頭沒腦的大叫「爸爸!」這天潼潼爸在浴室洗白白,而姐姐亦準備好將飯菜都端出來。這時潼潼便大叫一聲「爸爸!」我地不曉得她是真的在叫爸爸要吃飯,還是隨便的一句。我就襯著她的一句,應著講「食飯喇!」誰知小妮子跟著的在說「#&@!」很明顯她是學著我在說話喇!之後我在重複一次,她也是依著我的高低音叫出聲音呢。
潼潼,你很棒啊!你開始學話喇!
老闆上星期去美國「述職」番黎。
因為公司轉左新logo,咭片有新design,英文版本仲有埋title添,為左更加一體化,今次老闆去美國順便跟果邊既同事商量一下title中所用既字眼。講到我既title... 其實我初初見工時,公司請既只係一個普通既shipping clerk,而當時offer俾我既人工亦只係9000蚊,可見當時公司要既呢個職位係幾咁微不足道。因為只係2人公司(我 + 我老闆),所以兼顧既野越黎越多,漸漸我都唔係咁清楚自己既實際身份係咩,曾經被改作為Acc & Admin Executive,但我仍從來無用過呢個title,反正做既野都係一樣。
今次老闆再review我既title,佢竟然話:「你既工作主要係account,但係又有d「九唔撘八」既工作.... 」佢竟然用上「九唔搭八」黎形容我既工作範疇 ,「所以跟佢地(美國總公司)叫法,大家都覺得應該用Office Manager。」
Office Manager???????? 唔係呀嘛????? 我只係一名小小既職員咋!仲細咩,你俾我用到「Manger」既title又點?做既野咪又係一樣,又唔算係升職喎,反而心理壓力好似大左,負擔大左。你話呢個title係負責咩工作,諗深一層,咪又係一個大打雜。
其實乜都假,最緊要今年加人工會加幾多就真。