學習冷靜

呃完文章，又寫下自己o既故事。

潼潼係個自專心強又好勝o既小朋友，平時每有人批評佢，甚至只係提醒佢既時候，佢都會表現不悅。

岩岩過去o既星期六早上，我﹑潼潼同姐姐o係房一齊玩一款數字牌既遊戲 - 魔力橋 (Rummikub)。當然，潼潼玩得唔係咁純熟，需要提醒。有次我提醒佢可以點出牌既時候，佢雖然明知我係正確，但都堅持不依，話唔可以咁樣做。最後發脾氣話唔玩，仲要唔俾我同姐姐繼續玩落去，想要搗亂玩緊既數字牌。

我努力捉住潼潼，唔俾佢破壞我地o既遊戲，但係佢開始亂撒野，一直掙扎叫喊。我叫姐姐拎張椅入黎，要潼潼坐係度冷靜下先。潼潼繼續唔肯停落黎，無論我叫見佢坐好，企好，佢都唔肯，有點不受控地掙扎亂叫。最後我叫姐姐將d牌搬出廳，我同姐姐出去，等潼潼一個人係房度冷靜。

潼潼期間都嘗試要出黎，唔肯留係房度，但係我都努力阻止佢，唔俾佢出黎，於是佢就係房度一直喊，而我都出左廳無理佢。

慶幸o既係潼潼係女仔，比較嬌嗲。隔左一陣，就聽到潼潼係度叫「媽me~ 媽me~ 」。我入到房若無其事，好溫柔咁問佢「你冷靜完未呀?」但係佢竟然喊住咁問我要把扇 之後仲話要訓覺。我輕輕掃下佢個頭，叫佢好好訓一陣。(中間過程唔係記得太清楚，總之入過房睇佢一兩次，問過佢情況，俾佢知道我唔係罰緊佢，而係等緊佢冷靜落黎)

最後呢，潼潼當然無真係訓著，佢係入面休息左陣，就無事咁番出黎睇我地玩魔力橋。

我知道呢件事上面，可能我係一開始時處理得唔係咁好，導致潼潼既情緒有點一發不可收拾。不過因為類似經驗都有好幾次，潼潼開始懂得自己需要「冷靜」，clam down o既時間亦都短左，咁都算係成功左一半。不過作為家長，真係要好有耐性同高EQ去接受佢地果刻既情緒。

事後我都教導番潼潼，佢唔開心時可以發洩，只係唔可以破壞﹑唔可以傷害到其它人，同埋唔可以傷害自己。希望佢慢慢會學懂。