處理情緒

 

星期六參加左潼潼學校辦既一個講座，題目係「作孩子的情緒教練」，講者係心靈梯培訓總監余國健先生。



其實去年都有類似既講座，不過我就無參加。記得潼潼仲係手抱時，得健康院姑娘介紹，叫我去參加一個健康院攪既乜乜輔導班之類，於是就請左假去。點知去完覺得勁無聊，入面既內容對於我黎講其實只係一D育兒常識，竟然仲有媽咪會問係咪可以俾小朋友邊玩玩具邊食飯。感覺去呢個講座係浪費時間，之後就對呢類活動好抗拒喇。

今次考慮參加學校辦既情緒輔導班，一個原因係呢排我為左處理潼潼既小姐脾氣好頭痛  ；二黎係見入面既內容似乎有我未知既部份；再加上潼潼爸竟然願意二人同行，所以就報左名喇！

不負我所望，講座內容生動有趣，亦好實用。縱然潼潼爸聽完之後堅持依然固我，但我卻感覺穫益良多。就等我係度做少少記錄，當作分享也好，當作俾自己既筆記亦好。

認識情緒　

情緒只有正負之分，並沒有好壞之分

情緒由右腦管控，當情緒高漲時，右腦充血。呢個時候可以多ｄ問小朋友問題　（你幾多歲？四歲幾多個月？點解唔鐘意，係咪因為ＸＸＸ），讓小朋友用左腦既邏輯思維平伏番情緒

保本行動　－　管理好自己既情緒

調整觀念

當小朋友鬧情緒時，父母不應對孩子有以下期望
孩子不應對父母無禮貌
孩子是講理的　（不要嘗試在呢個時候同孩子講道理）
鬧情緒是不好的
孩子不應該駁咀
父母講過一次，孩子就應記住　（「都講過幾多次了，你仲係要再犯」呢類番舊帳說話不宜說）

認清扭計及傷心

處理方法　（我覺得好有用）
認清問題所在，俾我知道要劃分清楚小朋友鬧情緒要分清三個唔同情況，有三種唔同既處理手法。
１　家長感到困擾　－　例：孩子唔肯飲水
　　家長回應　－　運用「我的訊息」。例：我擾心你飲太少水會去便便好辛苦
２ 孩子感到困擾，需要支援　－　例：孩子心愛的玩具不見了
　　家長回應　－　共情回應。例：下？唔見左呀？咁點算呀？會唔會擺左係茶几到？（同理心 / 積極聆聽）
３　孩子感到困擾，找父母發洩　－　例：想買玩具遭拒絕，賴皮不走
　　家長回應　－　果敢的溝通

情緒輔導四步曲
呢個好熟喇！有睇過《HOW TO TALK SO KIDS WILL LISTEN & LISTEN SO KIDS WILL TALK》呢本書既都應該好清楚，書入面有更詳細既闡述。
- 全神聆聽
- 確認感受/想法/需要，但否定不當行為
- 感受形容詞
- 展望將來/給予希望 (講者舉例佢開左好多「支票」俾小朋友，例如今次唔舒服無得食雪糕，可以開張雪糕換領券俾小朋友，下次病好時可以拎出黎用)



後話:
有d方法我當晚已用上了，好管用。(係屋企樓下，潼潼發緊脾氣話我曳，我不斷擾亂佢問：係咪媽me咁樣曳，如果咁樣係咪唔曳，潼潼咁樣乖，係咪..........，潼潼俾我問到有少少文，話我係度亂講　。最後番到上屋企時雖然面上仲有滴眼睙，但係已經無再發脾氣喇）但講者余先生講得岩，學做父母係學一世都唔夠，希望有機會碰上更多有質素的講座啦。