這樣算是叫做動靜皆宜嗎?
2009年4月28日 星期二
2009年4月27日 星期一
夜哭
媽媽今日好眼訓
，因為潼潼尋晚半夜一點多鐘醒來喊左好耐，連姐姐都出來哄過，潼潼依然不斷喊。最後都係潼潼媽抱住佢等佢收聲，慢慢等佢再訓番。跟住唔知訓到幾多點，潼潼又係喊醒。
潼潼昨晚咁喊法，究其原因可能有二：
- 星期日早上既時候我同姐姐話要帶潼潼落去買早餐，潼潼唔知扭咩計唔肯行。我同姐姐本來打算假裝出街唔理佢，點知潼潼真係自己閂埋房門匿係房唔出黎。於是我唯有叫姐姐落去買野，潼潼媽就企係屋企門外聽下有咩風聲。最後到姐姐都買完野番黎（大約15分鐘，即係呢15分鐘係只有潼潼自己一個係屋入面）仲未見潼潼係房行出黎，咁潼潼媽入去睇下啦！一入去潼潼見到我就大喊：「唔要你呀！唔要你呀！」係咁推開我。姐姐後黎入去都係咁。潼潼喊得好犀利。我地諗，可能呢15分鐘其實潼潼一直都好驚，不過佢又真係好硬頸。
- 夜晚訓覺既時候又扭計要呢樣果樣，總之就係多多要求。潼潼媽唔知點解呢晚EQ奇低(可能因為之前潼潼已經一直有扭計唔聽話)，一怒之下叫左姐姐出房，然後好粗暴咁幫佢換褲訓覺。潼潼好驚係度喊，或者佢好少見媽媽咁惡，又無人「救」佢。
雖然潼潼半夜喊醒未必真係同以上兩件事有關，但係自覺係呢兩件事情上自己既處理手法都有好大問題。
2009年4月24日 星期五
砌圖遊戲
今日又花錢買玩具俾潼潼喇！
鍾SIR話潼潼呢個年齡要開始學玩砌圖，其實潼潼媽都知道。之前就已經係「反斗城」嘗試買簡單既砌圖俾潼潼玩，最後揀左立體積木型既砌圖。試過俾潼潼玩，把圖案砌好俾佢睇一陣，再分開，佢係唔識砌番埋，仲會將積木轉錯係另一面。
唯有由最簡單 - 兩塊砌圖開始。
之前明明係「反斗城」睇唔岩先會買左積木砌圖，但係今次再去居然有新產品。
下面一盒砌圖畫之餘，仲可以學埋串字；上面一盒數數兼數字，都唔錯。
後黎又見到呢個三角形既顏色筆，又買左。
其實屋企已經有唔少顏色筆，不過我覺得筆桿太幼，潼潼拎起上黎比較吃力，所以又替佢買左盒新顏色筆。三角形筆桿既設計可以幫助佢地學習揸筆既正確手勢。
又有新玩具喇，希望潼潼會鐘意同埋岩玩啦！
2009年4月20日 星期一
2009年4月18日 星期六
2009年4月14日 星期二
兩歲三個月
兩歲三個月既潼潼係過去一個月突然高左好多，係因為發燒發骨節 
，還是好似爸爸所講因為佢最近飲多左奶呢?
兩歲係小朋友既語言敏感期，潼潼踏入兩歲既第三個月亦都好似突然識講左好多野，一D我地無諗過佢會識講既說話佢都會講，有時都幾令人驚訝。
係呢個時期，潼潼媽係兒歌CD中加入左普通話既系列。潼潼似乎都幾鐘意，有時都會跟上一兩句。係呢個時期學既如果以後不加運用，可能將來未能完全記得，但係起碼佢對呢種腔調有印象就好了。
唔知點解，潼潼媽總覺得兩歲係幼兒一個重要既轉捩點，可能係因為呢個階段，小朋友係開始對「我」有概念。由乜都唔識，開始有佢自己既意思，要學好多好多既野。潼潼媽好怕係呢個階段做得唔好，唔夠努力，就錯過潼潼既最佳學習時機。
但另一方面，又好唔捨得潼潼天真既笑聲。見佢因為一D無聊事都笑得卡卡聲，我就想佢永遠都係咁開心，怕佢過於成長。
矛盾的在職媽媽開始進入「早教」既迷思：早教好呢？還是好好增取僅有既時間同潼潼親子一番，好好的笑一晚比較好呢?
2009年4月13日 星期一
錦田鄉村俱樂部
一個多星期前約好哂姨媽同舅夫去錦田鄉村俱樂部玩，但係之前天文台預報呢日都係有雷暴，所以潼潼媽一直都好擔心呢日去唔成。好彩最後都算天公做美，行程如期進行。
去到之其它人就準備BBQ，爸爸就帶左潼潼出草地玩一陣先。
之後番入黎開餐喇！嘩~ 好熱呀!! 潼潼除左件面衫都依然熱到面仔紅卜卜。
食完野就出去玩彈彈床。呢次係潼潼第二次玩彈彈床，上一次俾人撞到喊，所以潼潼今次都好似有所顧忌咁，最初都唔敢走遠。不過玩玩下好似好D，雖然都無行到好遠玩，但係都係咁不停係咁跳，仲跳得好高，連隔離果位女士都讚潼潼犀利，因為場中潼潼係最細果個。
後黎小朋友越黎越多，而且多左好多年紀較大既哥哥姐姐，潼潼媽怕潼潼又再一次俾人撞親而嚇怕左佢，所以就叫潼潼走喇！
都係番去玩唱泡泡好D。
玩玩下，天色開始陰，而且突然一下巨大雷聲，我地都不便久留即刻走喇 ！有少少可惜玩唔齊入面其它設施，不過能夠如期進行都算唔錯啦！
回程時潼潼係車上訓左陣，之後番到屋企又係唔願訓。四日假期，潼潼有兩日都無訓晏覺，呢個小朋友真係懶玩。
2009年4月12日 星期日
2009年4月11日 星期六
黃埔冒險樂園
呢日帶左潼潼去全港最大既冒險樂園 - 黃埔冒險樂園。
未出發，先興奮。
上到巴士，潼潼一路上同路上既汽車打招呼。
「爸爸，我要落去玩呀！」
我地買左$50蚊套票，可以選擇玩三個大型遊戲。但係其實好多遊戲潼潼都未夠高玩。本來諗住個波波池有三層高咁好玩，可以玩兩次波波次搭夠啦！點知原來潼潼只可以留係幼童區，果度好細，又無乜設施，連潼潼都不感興趣。到夠鐘要走既時候，潼潼係少見地肯行出黎，無賴住唔肯走。
最後唯有玩兩次搖擺車。
去完冒險樂園，再去玩具反斗城，仲有附近既商場逛逛。
潼潼媽：「潼潼！ 扁咀丫！」
我地係附近食埋晚餐先走，但係潼潼似釆毫無倦意。佢全日無訓過覺，連搭巴士番屋企既時候都仲係眼仔碌碌。番到屋企仲係度扭計話「去街，唔番屋企！」
真係俾佢激死，咁細個就做左「街精」
2009年4月10日 星期五
2009年4月9日 星期四
2009年4月6日 星期一
邊個發脾氣?
潼潼又黎一招語出驚人。
潼潼拎住盒糖話要食，媽媽唔俾，跟住就唔知係佢唔小心定係故意，盒糖跌左落地散開哂。我為左教訓潼潼，故意走開入房唔理佢。
最初潼潼都無理會我，仲要爸爸提醒：「你激嬲媽媽喇！」潼潼先識得入房黎搵我，點知又出人意表地．．．．
潼潼：邊個發脾氣？邊個發脾氣？
佢問左好幾次，好明顯係學左我地大人平時既口吻。潼潼媽扮緊嬲，唔可以啋佢，兼且真係唔識可以俾咩反應。
潼潼：唔理你！！
仲要幫我閂埋房門，真係俾佢激死
。不過好明顯又係學左我地平時對佢既做法．．．． 點解而家D小朋友真係咁精架？潼潼媽相信係而家D食物太多添加劑 (AHA... DHA....AABBCCDD) / 激素所累，令小朋友過於成熟，救命．．． 
潼潼媽絕對唔會俾潼潼得逞，係佢閂好門既時候走左出房唔理佢。潼潼呢就因為唔可以困住我等我「自我反省」而發脾氣哭鬧。
幸好．．． 最後潼潼都知道自己鬥唔過媽媽，肯走過黎同我講「對唔住」
2009年4月5日 星期日
導師的COMMENT
之前講過新一期既SUPER BABY學堂既上課形式已經有變，好多時候要求小朋友自己獨立上堂，家長既角色只係個「旁聽生」。而係上堂既頭10分鐘，鍾SIR更加會對家長進行briefing。
呢堂鍾SIR俾潼潼既COMMENT係：
潼潼有男仔性格，所以處理潼潼既問題行為時，要用對男仔既方法 - 即係唔可以長氣講理，要即時指出正確行為。
另外，鍾SIR話潼潼好有創意，好有自己既主意，叫我地唔好沒殺佢既創意。
潼潼呢種唔聽指示既舉動竟然被說成「有創意」，真係令我呢D做父母既振奮。
大個女？
呢日同潼潼食完早餐番黎既落上，潼潼唔願行要姐姐抱。
姐姐：你要抱咁一陣唔夾波兒架喇！（註：係屋企樓下一蚊玩一次既夾公仔機）
潼潼：唔夾波兒
媽媽：哦，唔夾波兒，咁好啦！你記住！唔夾波兒架！
潼潼媽不只一次再三強調，潼潼仍然話唔夾波兒。
經過部夾公仔機，最初都無事，行多幾步，潼潼開始記得ｄ野．．．
潼潼：夾波兒呀~~ 夾波兒呀~~ 
一直扭計扭到番屋企，仲要自己開門出去添，姐姐都怕左佢要即刻lock番住度門，如果唔係我相信潼潼一定夠膽自己走出去。
佢一直喊，我唔理佢，佢喊到聲嘶力竭好可憐咁。
隔左好一陣，我先行埋去，諗住開始處理佢既情緒，點知．．．
潼潼：唔要你呀！！ 唔要你呀！！
一邊講一邊喊一邊將我推開，我一直後推，佢將我推遠左先又企番原位繼續喊！
最後緊係我夾硬抱起佢再說教一番啦！只係潼潼之前既反應真係好似個大人．．． 
訂閱：
文章 (Atom)