潼聲潼戲: 5月 2008

2008年5月31日星期六

「我要尿尿」

潼潼對便便既示意已經開始左一段時間，最近姐姐就更加開始訓練潼潼去尿尿。今日早上就無幫潼潼著片片喇！

之後玩玩下，潼潼入廁所攪個廁所板，姐姐就即管試下抱潼潼上廁所坐，點知潼潼真係o係度尿尿喎！　我地就緊係有理無理都讚左潼潼先啦！雖然唔知係咪只係撞彩，不過總算叫做一個好開始丫。

Fashion Show

呢日小衰又黎探潼潼喇！仲買左新裙仔俾潼潼添。碰巧婆婆又係買左泳衣俾潼潼，而婆婆又無乜節目，所以上埋黎搵我地。唔知係咪人多同佢玩，又有靚衫著，潼潼心情大好，史無前例地係鏡頭面前擺出各種引人發笑既甫士。

首先係著泳裝出場

之後試埋小衰送既裙仔。

唔知點解有時潼潼係好鐘意匿埋係檯底，仲要將ｄ椅移埋黎封住自己。

跟住就係試埋件浴袍

仲有好多甫士係潼潼媽無辦法捕捉到。

之後我地就全部人一齊去食飯，其間潼潼依然表現得非常興奮。睇下潼潼玩得幾開心。

唔好睇少呢三盒糖果，潼潼對佢地興趣好大架，全靠咁我地先有啖好食，潼潼仲曾經自己將三盒糖果一齊疊高添呀，認真犀飛里。

不過到食完飯大家要走既時候，睇到潼潼個表情好似好失落咁呀．．．　緊係啦，屋企無乜幾可咁熱鬧，咁多人陪佢玩丫嘛！

想睇更多照片，可以稍移玉步去睇睇小衰個blog丫。

2008年5月29日星期四

水痘

以防萬一，留個記錄先。

藥房買"蠟梅油", 茶左d痘痘就會冇咁痕同痛架.
煲d竹庶水飲, 都可以幫佢清下d熱毒架.
仲有買多d芫西煲水, 同佢沖身, 千祈d水唔好太熱, 暖暖地, 等d水涼左就可以起身,

如果出水痘,最好就係唔好帶佢周圍去,因為水痘會傳染比d未出過既人或者孕婦,所以如果佢去診所都好,都可以同姑娘講聲,姑娘會儘快安排比你小朋友睇先.

出水痘係會好痕,所以小心唔好比小朋友"r"損.你可以買d芫茜番去煲水同小朋友沖涼,沖涼之後你小朋友就會舒服好多.但記緊你煲芫茜水之後要等佢自己灘涼,唔可以溝生水落去.

食物方面你唔好比鼓油,鷄蛋果d佢食,因為鼓油會令到個水痘印加深,另外鷄蛋會令到個傷口有機會"發",所以都要避免.你可以煲d竹蔗芧根水佢飲,對佢會有幫助.

我建議戒口會好快d同冇咁辛苦。
戒口係指唔食所有濕毒熱氣食物，連蛋、牛、魚同豆都唔食(驚傷口會發同埋得唔好)。
煲金銀花水飲或浸浴都得，金銀花係清毒同醫皮膚病ge。

日講開「蠟梅油」，而家補充一下d資料，希望幫到有需要o既小朋友。
我買o既係「凌萬全堂」，$5/支，其實之前我唔知製造商係咩名，只係我買開o個開藥材舖係買哩個牌子，其他o既可能會唔同。
主治：兒科痘症、爛耳流膿、小兒臍風、濕毒疥癩、爛頭胎毒、無名腫毒、火灼爛肉、皮膚各症。
說明：蠟梅性耐寒嚴冬不凋凌霜雪吐艷收天地清氣故擅解毒清熱驅風專治天行痳痘凡種痘出痘用此油搽之免種痛破爛之苦兼治皮膚風濕諸症(佢真係無標點符號)
我第一次睇d名堂真係幾驚，乜o野「爛耳流膿」「天行痳痘」，好似好恐怖咁。
不過上次璇璇出水痘，搽左之後一d都唔痕(唔知關唔關我另外煲芫茜水佢沖涼)，所以覺得佢都幾得。
後來有次德德俾蚊叮到腫晒，一粒蚊癩腫到成隻腳好似兩隻腳咁粗，o個晚我用哩隻油同佢搽，第二朝已經消腫。
不過佢o既唔好處係好「油立立」，所以我只係o係夜晚先幫佢地搽，日頭會搽癢即消。
仲有，搽o既時候要用綿花棒來搽，千其唔好用手指，係藥材舖d人教我o既。

搽蚊蚊水

較早前潼潼試過俾蚊蚊咬左十幾啖，咬到手手腳腳都腫哂。潼潼痕到好抆係咁自己亂咁拗，我就唯有成日同佢搽蚊水止痕。

而家潼潼無事喇！不過就學識幫自己同幫人地搽搽搽。

小朋友學野真係好快。

「大」與「小」

似乎潼潼對「大」與「小」已經有概念，可以自己完成呢個套圈圈既遊戲。

除左呢個套圈圈，仲有另一個有關「大」與「小」既遊戲，潼潼有時都會疊到幾個，不過今次變左係玩杯杯酒。

繼續豆袋遊戲

今晚番到屋企，爸爸同潼潼已經又係度玩緊呢個拋豆袋既遊戲。

聽姐姐同爸爸講番，今日爸爸未入到門口，潼潼已經訓好係豆豆袋度等爸爸同佢玩。咁爸爸係門口除鞋未入屋，潼潼等得不耐煩就自己拖個豆袋去到爸爸面前，然後自動訓係豆豆袋上面等爸爸同佢玩。爸爸去廁所洗手，潼潼就企定係門口等爸爸出黎同佢玩。哈哈~~ 呢個正一懶玩精....

2008年5月26日星期一

爸爸的重要任務

真係唔好講笑，爸爸呢類咁刺激既遊戲，其實對小朋友既官能發展同情緒發展有好大幫助架！

爸爸，你終於做好你為人父親既角色喇！

2008年5月25日星期日

面黑黑

原來咁細個小朋友都識得面黑黑。

話說星期日去左同嫲嫲大邊爐，咁係嫲嫲餵緊潼潼食烏冬既時候，我同爸爸﹑姑姐就出左去拎野食，點知拎完野食番黎嫲嫲就投訴喇！原來潼潼見我地個個走哂，就唔高興，係度發脾氣唔肯食野，仲係度喊添！

唔怪得知，我行番埋位既時候見到潼潼用個背脊「得」住嫲嫲，仲要頭耷耷面燶燶咁。原來咁細個都識得嬲既，真係諗番起佢個樣都攪笑，可惜一時之間無影低佢個樣。

2008年5月23日星期五

叫人 & 唱歌仔

潼潼BB既時候最先會叫係「媽媽」，但係而家已經唔識叫「媽媽」，平時都只會叫「姐姐」同「爸爸」

學講野就麻麻地喇!不過識唱太空話兒歌喎!

2008年5月19日星期一

夢魘

我經常都會發類似既一個夢：回到校園。唔好以為回到校園係好事，每次發夢番學其實都好得人驚，因為要面對好多考試同功課，一時夢見唔記得溫書，一時夢到做漏功課。我尋晚又發夢要番學喇！！！　好彩今次發夢剩係話要開始番學，仲未入肉，但係已經feel到「有壓力」

雖然我讀書成績唔算差，但係我覺得讀書其實真係好辛苦。人地講到求學時期係幾咁好，我一ｄ都唔覺得，我真係寧願番工。番學除左應付日常課堂上老師既提問，仲有每個星期都有幾次默書測驗，到派卷果陣又係擔心成績好壞，仲要加埋每年兩次既考試。到放假既時候亦都唔會要你好日子過，一定有好多功課要你假日完成，又要溫書。等你讀到中五，仲會有一次幾乎斷定你終生幸福既考試添！衰ｄ講句，真係無日安寧。呢ｄ生活真係諗番起都得人驚，都唔知果陣自己點過。攪到咁大個人都仲係依然發惡夢。

而家有左阿女，真係無乜野望，除左希望佢平平安安﹑健健康康以外，就係希望佢係個鐘意讀書既人，咁就唔駛好似潼潼媽以前讀書讀得咁可憐，攪到咁大個人都仲發埋ｄ咁既夢啦！

市民街上靜待默哀

不少市民在默哀即將進行之前，靜靜地在街頭等候，在二時廿八分一刻，低頭為四川地震死難者默哀。

好想參予今天默哀三分鐘既哀掉儀式

由兩點二十六分開始，一邊工作一邊望住電腦右下角既時鐘，睇住時間一分一秒咁過去，心情就越黎越沉重。等到正正兩點二十八分既時候，聽到輪船既氣笛聲，心裡十分難過。想起就係呢一刻以前，當地人仲係如常咁生活，就只係呢一刻鐘，突然的地動山搖，奪走無數人既家園。

兩點二十八分，礙於係辦公地點及辦公時間，唯有坐係自己既位上面，默默渡過呢三分鐘，心裡面想著要為遇難者送上祝福。

同時，亦祝福我的孩子，願你一生平安，健康，快樂。

2008年5月18日星期日

汶川大地震

5.12汶川發生7.8級強烈地震。

在救援進行當中，有很多賺人熱淚的故事，看了令人心痛。

http://hk.news.yahoo.com/080517/60/2u63i.html

四川大地震後的第二天即十三日下午，在都江堰河邊一處坍塌的民宅，數十名救援人員奮力挖掘，尋找生存傷者，一個令人震驚的場景突然出現在拯救人員眼前。以志願者參加都江堰救災的廣州中山大學附屬東華醫院的婦科醫生龔晉說，一名年輕的媽媽雙手懷抱一個三、四個月大的嬰兒，蜷縮在廢墟中，她低頭，已經失去了呼吸，但上衣向上掀起，懷裏的女嬰依然含母親的乳頭吮吸。「我無法想像，一個死去的媽媽還在為自己的孩子餵奶，從母親抱孩子的姿勢可以看出，她是很刻意地在保護自己的孩子，或許就是在臨死前，她把乳頭放進了女兒的嘴裏。」龔晉又說：「我們小心地將女嬰抱起，離開母親的乳頭時，她立刻哭鬧起來。」

在北川縣的一處廢墟，搶救人員也發現一位偉大的母親：她以雙膝跪地，弓背，整個上身向前匍匐，雙手扶地以支撐身體，就像是古人行禮一般，但身軀已被壓得變形，早已氣絕身亡。

當搜救隊員小心翼翼地把她周圍的砂石清開，發現她的身體下果然躺著她的孩子，約莫三、四個月大，因為媽媽的身體幫她擋住坍牆，她竟然毫髮無傷，被抱出來的時候，還安靜睡。

隨行的醫生替女嬰解開被子做檢查，發現有一部手機塞在被子裏，醫生下意識地看了一下手機的屏幕，發現上面有一條已寫好的簡訊：「親愛的寶貝，如果妳能活，一定要記住我愛妳。」

http://hk.news.yahoo.com/080519/12/2u6yc.html

地震搜救人員在北川縣陳家壩鎮掘挖時，發現一對緊緊相擁的母女，救援人員未能將兩人分開，於是將她們合葬。

母女的屍體是在陳家壩一個山坡下面的一間店舖裏，店舖的一面牆整個垮塌下來，將那對母女壓在了最底下。由於水泥板太過沉重，救援人員用十字鎬一點點將水泥鑿開，當遺體終於被拖出來時，眼前的景象令人震驚：一位不到40歲的婦女，懷中緊緊摟著一個6、7歲左右的小女孩，由於抱得太緊，救援人員無論怎樣都不能將兩人分開，最後只得合葬到一起。一個目擊者說，母親是面朝下倒地的，看她的姿勢，是在牆塌下來的最後一刻，用身體保護著小姑娘。

讓我們一起為死難者送上祝福

網路公祭: http://www.china5000.org.cn/flower/