遊南澳後感

今次帶潼潼去南澳玩真係好開心。開心除左因為出外玩之外，仲有係因為潼潼。

今次遊南澳，勾番起潼潼媽既一d兒時回憶。

記得潼潼媽細個既時候，有一次潼潼婆婆公司有旅行，呢次旅行只係帶左姨媽 - 即係我家姐去。果次我喊得好犀利，好想可以一齊去，但係婆婆都無帶埋我去。之後大個講番呢件事，先知道婆婆唔帶我去，係因為我個人比較怕醜，出到去粒聲唔出，唔討人愛。

但係潼潼就唔同，佢性格真係好開朗好主動，又唔怕生。今次雖然只得佢一個小朋友，但係都見到佢同其它姐姐都一樣玩得好開心 - 一時同姐姐甲係露台玩用密碼開門; 一時竟然拎左姐姐乙隻鞋走，然後係度追逐。有咁活潑既小朋友，真係好tum得人。

哈哈~~ 可能潼潼媽兒時太不滯，所以雖然潼潼有時頑皮，但同我細個時比較，真係優勝好多。亦因此我經常不期然咁用欣賞既眼光睇潼潼，我諗因為咁，係父母欣賞既眼光中成長既孩子，就更加顯得有自信同快樂。

遊南澳 - 第二日

我地去南澳十幾個大人，只有潼潼一個小朋友。通常大人都鐘意玩到夜，第二朝訓到晏。所以第二日既上午，早起既我地都非常無聊，唯有落沙灘行下。

之前係渡假至窗外見到一排排既養殖場，初初都唔知養乜，但係我諗呢日有答案喇!

因為係沙灘仔發現一隻活生生既海膽，d刺仲會慢慢咁郁架! 原來南澳都出名海膽，我諗估計出面養海膽應該都無錯卦!

到中午又出去食飯喇! 又係海鮮餐。呢餐比尋晚果餐更豐富﹑更美味，不過價錢反易更平。讚!

食完野，附件有個正正式式既沙灘，d沙比我地之前住果度既沙灘仔幼好多，d浪細好多。潼潼見到好想出去玩水呀! 可惜我地無準備，唯有只係玩下沙，幫佢挖個大水池，挖左個多小時。嘩~~ 手軟!



玩完都六點喇! 回程番香港喇! 多謝朋友 - 肥魚叔叔辛勞左兩日載我地車出車入。

遊南澳 - 第一日

朋友約我地一家人番大陸南澳玩兩日，人去我又去，最初無諗過南澳係咩地方。後黎諗起天氣報告成日出現「南澳以南，汕尾以南﹑沙堤以南.....」，哦? 算唔算已經知道自己去邊呢?

我地首先到落門州同其它人匯合，然後就由朋友開車車我地入南澳。車程都唔短呀！潼潼係個無乜耐性既小朋友，要佢同咁耐車，整個車程都要同佢諗遊戲﹑諗話題，途中都不知問過幾多次「到未呀？」「點解咁耐都未到？」

都唔知坐左幾耐車，終於到達目的地。

經過一條清幽小徑

 

到達下塌既地方　－　就只有兩間渡假屋，低密度，好舒服

從房間露台望出去係一望無際既大海


上次同潼潼番大陸玩，潼潼見到個浴缸已經開心得不得了。今次去到渡假屋，就不斷進出各房間，為的是尋找佢心愛既浴缸，但好可惜全是企缸。

我地一行十四人，隨便地食過午飯，就買埋水船仔準備同潼潼落附近既沙灘仔玩。不過落左水玩左無耐，潼潼就好驚話唔玩。事後問番潼潼，原來佢話驚大浪。佢仲好老成咁同我講：「媽ｍｅ呀！你知唔知好危險架，衝左出去好大件事架！」

好啦！唯有上番去同潼潼沖身，係露台度睇人玩啦！

之後夜晚就係豐富既海鮮餐喇！

食完晚飯，諗住潼潼玩唔到水，俾佢試下放煙花都好喎！於是行幾條街去搵煙花。買完煙花番渡假屋，管理人員話連去下面沙灘仔都唔俾放（滴滴金咋）。行出渡假屋出面小路，規矩王潼潼又堅持唔可以係果度放。連最後管理人員容許我地係門口玩兩支滴滴金，規矩王都話唔玩！最後全日無乜都無得玩，激死潼潼媽。

遲熟

潼潼尋日因發燒請左日假，今日照常上課之後又再發燒。所以媽me同老師通左次電話，諗住了解一下潼潼o係學校既況，點知傾傾下，又去到潼潼既社交問題上。

從老師口中得知，潼潼今日o係學校情況依然活躍，好多說話。不過亦提到潼潼呢排多野講左，而且係講到老師望住佢，其它小朋友靜番哂，佢都唔識停。 老師話佢係唔識睇人眉頭眼額。

於是就同老師分享潼潼媽比較擔心既問題，就係潼潼交友既問題。因為潼潼表現遲熟，亦即係唔得世故，到而家講說話都好似小朋友咁，想講就講，有時真係怕得罪左人都唔知。最近就從潼潼口中聽到話邊個邊個唔啋佢，邊個邊個唔同佢玩，令潼潼媽擔心潼潼既「無心之失」令佢無哂朋友。我知有時潼潼既說話可能傷到其它小朋友，不過佢又真係好傻瓜咁不自知，只要有人同佢玩，佢真係可以唔理果個咩人都可以玩一餐，個個小朋友係佢心目中都係「朋友」，仲未識得「選擇」，無「好朋友」既等級。

老師只著我多d同潼潼講下同小朋友應有既相處方式，不過就叫我唔洗太擔心，認為潼潼同其它小朋友相處既問題其實唔係咁嚴重，可能只係班中其中一d比較早熟既小朋友已形成自己既圈子，所以潼潼先容入唔到佢地。而且老師認為無固定朋友係一件好事，起碼去到小學都會好快有新既朋友，會比較易適應。

唔知老師係咪只係想tum住我。不過點都好，學汪培延話齋，遲熟唔係孩子既錯，唯有等佢慢慢長大。現階段可以做既，就只有向佢解釋俾課堂上應遵守既秩序。

毋忘六四

薪火相傳 - 辛苦你了。

潼潼媽的生日禮物

潼潼媽唔係特別重視生日既人，自己生日都無乜點慶祝，只係一家人食餐飯。

不過呢日潼潼就為我送上驚喜。晚上食完飯番到屋企，從洗手間一開門出黎，潼潼就向我遞上禮物。

潼潼：媽ｍｅ生日快樂，送俾你架！

打開一睇，原來係人地用黎做木刻匙扣既木板，兩面都畫上圖畫。







潼潼：你唔記得喇咩？我果日咪話左有份禮物，等你生日先送俾你架囉！

係！係媽ｍｅ無心肝，聽完就算，以為你唔知去邊度搵ｄ玩具包埋就話俾我話做禮物，但係原來真係有份潼潼親知整既生日禮物。雖然我知呢份其實係學校做既母親節小手工，只係當日潼潼請左假無番，所以拎唔到番黎母親節送俾我。不過我都好開心，你專登為我準備呢份自己親手包既禮物。