行過新城巿廣場，見到好多CHOCOLATE RAIN既擺設呀!! 潼潼媽都幾鐘意呢個BRAND既STYLE。而家用緊既銀包都係CHOCOLATE RAIN架!
可惜我地要趕車呀! 走馬看花地同潼潼影幾張相就要走咯!
2010年10月31日 星期日
2010年10月23日 星期六
2010年10月18日 星期一
想念媽媽
今日下午陳老師打電話俾我，向我交代幾件事情。
1. 潼潼而家每日都有運筆練習，不過全日班學生既習作一般都會係下午完成，所以我只要留意一下。不過週末會另有兩項習作，需要由家長協助小朋友完成。
2. 見潼潼有點鼻水，老師話潼潼都識自己話自己個鼻好塞抖唔到氣。老師當日俾左口罩潼潼戴，要我地留意一下，同埋為潼潼準備口罩。
3. 係潼潼媽比較著意既問題。
陳老師 : 「潼潼話俾我知佢今日喊。」
我第一個反應 : 「唔.... 但佢講野時間上會有混亂，唔知係咪今日既事呢?」
陳老師 : 「平時潼潼唱歌時候都好投入做動作，但今日就唔肯一齊做。我地問佢咩事，佢話佢唔開心。我地問佢點解唔開心，佢最初都唔肯講，之後同佢講話如果佢唔講我地唔知佢咩事，佢先話佢掛住媽咪。」
好似好sweet，不過潼潼媽聽到時第一個感覺其實係有點難過，可能呢D就係在職媽媽對小朋友既愧疚心 : 「哦..... 係呀.......?? 佢今朝都lur我要送佢番學。」
陳老師 : 「可能佢有時見同學仔有媽咪送番學，所以都只係撒下嬌。我地都明白家長要番工，都有同佢解釋過媽咪夜晚放工番黎就會見到佢，之後佢都無乜事喇 ! 」
唔知點樣講下講下又講到潼潼語言發展上既問題。
陳老師 : 「其實潼潼平時都同我地講好多野，佢講既內容好豐富，只係組織上有d混亂，有時都要好細心問多佢幾次。班入面既小朋友講野既表現都有差異。當然，有d小朋友講野係好叻，不過潼潼既情況唔算好差。或者你地平時多d同佢傾下計之外都可以同佢講下故事。」
潼潼媽 : 「其實除左有時因為太夜之外，而家潼潼每晚都有故事時間。如果係一d佢熟悉同埋簡單既故事，都有嘗試由佢自己講。」
陳老師 : 「或者試下平時同佢講野慢慢講，唔好太急﹑唔好幫佢講佢未講完既說話，俾d耐心慢慢等佢講。同埋都多d同佢傾計。」
潼潼媽 : 「不過佢到而家都好少講佢學校既事情。上次去旅行時都見佢好似無乜特別要好既朋友。」
陳老師 : 「可能家長同小朋友都唔係咁熟悉其它小朋友既名。遲d我地學校會有校訊，係每三個月出版一次。到時會有小朋友既名同相。佢地有相片睇住講可能會好d。」
好多謝陳老師不定期地致電黎同我跟進潼潼番學既情況，亦好多謝佢既指點。佢好明白在職父母平時無辦法接觸到老師，就好依賴佢地去了解小朋友平時上課既情形。
拜託了。
2010年10月13日 星期三
三歲九個月
潼潼剛剛滿三歲九個月，身高96cm，人長大左不少。好多時候，訓到半夜潼潼就爬到我既床上，要跟我地一齊訓。以前因為佢身體短少，攬住佢時，好似可以攬住佢整個身體咁。早前先發現，而家即使我將手盡量伸直，已經掂唔到佢既腳板。想深一層，潼潼而家既身高都幾乎係我身高既三份二喇 ! 真係大個囡喇 !
潼潼越大，越發現自己既時間唔夠用。有時因為晚歸，怕潼潼晚睡，最後被逼縮短講故事既時間，揀故事書時都要挑內容簡短既故事。英文故事就更加唔係晚晚可以唸。還好，潼潼己經認得部份圖書書名，可以讀出「晶晶的耳朵」﹑「湯姆去海灘」﹑「幾點鐘」﹑「邋遢先生」﹑「傷腦筋先生」等等的一堆既書名，總算有點成績。我諗潼潼未必真係認得字，而只係記得書名，但總算係個好開始。現階段潼潼只接受我「讀」出書名，不過就唔准我「讀」內容。我諗等佢遲d有多d機會接觸文字既時候，我再開始嘗試對佢「讀」故事會比較好。
呢兩星期媽me感到好沮喪，感到工作好困身。好希望可以花更多既時候係潼潼身上，但就成日夜歸。姐姐就快完約，考慮到經濟問題，兼且想訓練潼潼既自理能力，所以打算唔再僱用外傭，而改為由本地姨姨接潼潼放學。但係媽me成日咁夜放工，根本照顧唔到潼潼，如果連姐姐咁親近既人都唔係身邊，怕會對潼潼做成傷害。
能做一個全職媽媽多好!
2010年10月10日 星期日
十週年校慶活動 - 親子旅行
潼潼就讀既幼稚園今年有三項十週年校慶活動，今日既節目就係佢地其中一項活動 - BBQ親子旅行。
一早起身，個天灰灰暗暗，而且早上落過雨，唔通連個天都唔鐘意我地? 
好!! 無有怕，準備好雨具，向屯門小欖出發!!!
好彩天公又再造美，去到屯門天氣唔錯。
我地既第一站係金海豚廣場。潼潼見好多小朋友企係高台上面影相，佢又話要企上去影。
不過實在太高喇! 唔過十秒已經嚇到喊哂口。
再學下人玩掌上壓先
係金海豚廣場打個轉之後就黎燒烤場BBQ喇! 咪以為潼潼好威水識自己燒野食，佢燒完呢兩條腸之後就收工咯!
燒烤場附近有個簡陋又殘舊既遊樂設施，不過我就好欣賞佢呢個「滑梯」。佢其實只得兩條桿支持兩條腿然後滑落去。我覺得可以訓練小朋友膽量同埋平衡。
潼潼初初玩都驚到係咁叫，要人扶，不過玩左一兩次後就唔怕喇!
可惜除左呢度之外，我從來無見過呢種滑梯，如果唔係真係想同潼潼再去玩下咁特別既滑梯。
2010年10月7日 星期四
身份調換
唉...... 我而家成日俾潼潼訓話
，就黎我似做囡多過佢。
呢日潼潼學校開生日會，拎左一個萬花筒玩具番黎。我拎黎睇下。
潼潼:：「你都無問我，你問我玩唔玩得先。」
唉．．．．．．． 又黎．．．．．．
潼潼媽問完拎黎玩左陣。
潼潼：「玩完玩具要唔要洗手呀？」
呢個好習慣黎既，我附和佢一齊去洗手。洗完手我又手多多拎番個萬花筒望一陣，然後俾番潼潼。
潼潼：「你擺番好丫！」
正以為潼潼指我做野．．． 不過又真係我自己拎黎玩，係咪應該自己擺番好呢？
潼潼:：「我洗左手唔掂呢個。」
原來如此．．．．
潼潼媽：「咁擺邊度呀？」
潼潼：「擺係檯上面丫！」
姐姐切好生果拎過黎
潼潼：「玩完玩具食野要洗手喎！」
潼潼媽明知衰左亦死撐
：「洗左囉！」
潼潼：「但係你頭先掂左呢個喎！」
潼潼媽：「唔緊要啦！」（差點就想搬出「我係大人唔怕」既歪理
）
潼潼:：「唔得架！掂完玩具要洗手啊，有細菌架嘛！」
潼潼好努力搬出「細菌」呢個詞語，講時有點結巴，證明佢只係剛剛學會呢個詞，仲未係好熟悉。
潼潼媽：「唉！！！！」好無奈地入去隨便地洗左手就出黎食生果。
2010年10月3日 星期日
極度挫敗
呢排潼潼好鐘意喊，好易喊，少少事唔稱心就喊。
呢日同潼潼行街，潼潼話想去冒險樂園玩。我叫佢打電話問爸爸，然後我都同爸爸傾左幾句，都打算同佢去。點知到我問佢潼潼點同佢講果陣，佢就已經雙眼紅哂，然後喊左出黎。
呢排佢成日喊，我已經話左佢好多次。有乜野事只需要講，唔駛喊。但係唔知點解呢排咁鐘意用喊去表達自己既不滿情緒。於是我決定唔帶潼潼去冒險樂園玩。潼潼就一直扭計，就算我拖佢埋一邊同佢傾，佢都係咁繼續扭計。佢一直係度吵吵鬧鬧，我唯有同姐姐一人一邊拖住佢隻手將佢拖番屋企。
佢一路上係度大叫大喊。我從來無諗過呢D情況會係我身上發生。
我真係好嬲，自言自語 :「你竟然夠膽咁樣係街度嘈，緊係我好耐無教訓你 !
」
行到番屋企都一直係咁吵鬧，真係好失禮。去到電梯大堂，潼潼仲居然喊住咁話 : 「唔該 ...... 嗚................ 教訓我丫............ 嗚....... 唔該......」唉! 真係唔知好嬲定好笑。究竟潼潼明唔明白咩叫「教訓」呢?
番到屋企，其實我真係好有衝動想打佢，不過最後都無咁做，只有繼續訓話。呢個時候潼潼又出招 : 「嗚~~~ 收唔到聲........ 點算好呀??? 」唉.... 講到好似好無辜咁。
最後都唯有同佢解釋番宣洩情緒既正確方法，仲俾左盒紙巾俾佢。用黎抹眼淚嗎?唔係! 係俾佢搣。佢初初都無理到盒紙巾，不過同佢講講下，佢又喊，呢個時候佢真係識拎紙巾出黎搣。唔知咁樣係咪真係幫到佢宣洩情緒呢?而我亦再重申，我唔會接受「喊」呢個做法，如果佢下次再係咁喊，我一定會即刻同佢走。
希望潼潼真係明白啦 !
後話 : 之後幾日，潼潼每有想喊，雙眼通紅，即使已經滴出眼淚，但仍未喊出聲既時候，我都會讚佢做得好，忍住唔喊。佢聽到又會更加努力忍住唔喊。然後再鼓勵佢講出佢既想法。情況好似好轉左一點。
訂閱：
文章 (Atom)