係淘寶網訂左幾本汪培珽既書，不過大約要兩個星期先可以收到貨。自己心急，兼且最近家裡出現育兒書書荒，所以先從書局買左一本番黎睇。
睇汪培珽既書比較舒服。佢既書唔似得七田真一樣向你解究人腦，又唔會好似卡爾威特的教育咁提出好多現代都巿人無法實行既教育方法，令人感到壓力。無理論﹑無數據。汪培珽係一個現代媽媽向你分享自己既育兒觀念同經驗。
呢本書講既係講故事對小朋友既好處，不過作者重申好多次，所謂「好處」係利誘我地呢d功利既媽媽們去堅持講故事既習慣。其實作者認為講故事係由「愛」出發。
因為七田真鼓勵幼兒睇繪本，係潼潼好細個(大概一歲多罷?)我就開始同佢講睡前故事。最初我邊講故事，潼潼一邊亂翻書。有時講到一半就要停住，明天繼續。有一段時間我無堅持同潼潼講故事，只係隨意看看書。不過待潼潼稍大(兩歲多既時候)，我又再次嘗試向佢講故事，情況已經好好多。
最初以為俾小朋友睇繪本只係訓練佢地對「美」既觸角，同埋藉此增進親子關係。睇完呢本書之後，先知道講故事對可以培養小朋友好品格，亦可以訓練語文能力。呢個可算係意外收獲。(作者一再強調媽媽們不要太功利，就算未見成果，講故事亦係不錯既親子活動。)
而家潼潼已養成睡前聽故事既習慣，每晚訓前都要拖我一齊入房為佢講故事。最近買了另一半全文字既故事書，如果潼潼太晚睡，我就放棄同佢一齊睇繪本，而改為要佢訓係度，靜靜咁聽我講故事。
小朋友訓覺時抱住毛公仔一齊訓就好常見，抱住書訓見過未？呢幾晚，潼潼就係咁，自己聽完故事就抱住故事書一齊訓。希望佢以後都會好似而家一樣咁愛書啦！
多謝潼媽介紹, 其實我之前都每晚講故事俾晴晴聽, 但可惜近排我地太夜瞓, 所以無乜時間再講。我想暑假後要重新編排返
回覆刪除潼媽可否給我買書條link呀?
[版主回覆08/19/2010 00:18:00]晴晴媽~ 你想要買故事書既link定係買汪培珽既書條link呀?
如果係故事書，你search「汪培珽書單」就發覺好多台灣書店打著汪培珽既旗號賣書，你可以從中挑選一d故事書。其中 呢度 都列出左汪培珽推介既中英文書。想係香港買可以去灣仔既城邦書店，雖然買滿十本有六七折，但係都唔平，我唔捨得買。潼潼而家未到認字階段，可以選擇去淘寶買大陸版，咁就平好多。係 呢間 淘寶店都搵到唔少汪介紹既故事書既大陸版。不過晴晴而家開始認字，你可以選擇去淘寶 呢間 買台版故事書，不過佢地要從台灣入貨再寄出，都要等好耐，而且計起上黎未必真係咁抵。或者唔介意第日用唔番的話，最初階段都可以簡體書既，因為最初果陣小朋友未必有興趣自己睇，都係由媽媽講既唶。又或者自己去書局睇下有咩書自己鐘意既。
如果係買汪珽培出既書，我係淘寶 呢間店 買。都係由台灣發貨到大陸，呢段時間比較長，所以都要等幾耐，我到而家都未收到書!不過淘寶上面賣台版書既間間都係咁。如果只係睇一兩本，不如等書店減價係香港買。
如果買書時再有問題再問我丫。