早前努力從「國際綜藝合家歡」的節目中尋找適合潼潼參予既活動，可惜都怕潼潼年紀太少而無著落。最後只剩番呢個係伊館舉行既夏日狂歡大派對，係免費入場架! 一試無訪丫。
成個活動以食物為主題。有咩玩?
同蛋糕影下相，個衰妹擺哂(古怪)甫士。
睇表演
玩肥皂泡
同吹氣公仔影相
參加工作坊
同自己既製成品影番張相
仲有好多表演同工作坊未玩呀! 可惜跟住有家庭聚會，要走喇！臨走前仲可以係門口試下用廚具當敲擊樂玩。
唔好被嚇怕，潼潼並無大損傷。
潼潼兩歲多就開始有生長痛(發骨節)，由最初個多星期痛一次，發展到而家三歲半大，已經係一個星期痛兩三次。痛得犀利既時候一晚要醒四五次幫佢搓腳，真係大人細路都無覺好訓。問過西醫，都只係叫我地俾止痛藥佢食。潼潼咁細個，我緊係唔想俾咁多葯佢食啦。於是問個中醫朋友，佢建議我多D幫潼潼做按摩，亦都俾左一條食療方俾我。
而家每晚要幫潼潼按摩雙腿，做伸展運動。已經兩個星期，進展良好，效果明顯。潼潼生長痛既情況已經減少好多。潼潼媽要繼續努力，持之以恆先得喇!
點知呢個星期同潼潼去上跳舞班後，老師話潼潼駝背情況嚴重(其實係成日坐唔直個身)。建議我地平時多同佢做背部肌肉既伸展運動。噢! 以後晚上既時間又多一項任務喇。
係淘寶網訂左幾本汪培珽既書，不過大約要兩個星期先可以收到貨。自己心急，兼且最近家裡出現育兒書書荒，所以先從書局買左一本番黎睇。
睇汪培珽既書比較舒服。佢既書唔似得七田真一樣向你解究人腦，又唔會好似卡爾威特的教育咁提出好多現代都巿人無法實行既教育方法，令人感到壓力。無理論﹑無數據。汪培珽係一個現代媽媽向你分享自己既育兒觀念同經驗。
呢本書講既係講故事對小朋友既好處，不過作者重申好多次，所謂「好處」係利誘我地呢d功利既媽媽們去堅持講故事既習慣。其實作者認為講故事係由「愛」出發。
因為七田真鼓勵幼兒睇繪本，係潼潼好細個(大概一歲多罷?)我就開始同佢講睡前故事。最初我邊講故事，潼潼一邊亂翻書。有時講到一半就要停住，明天繼續。有一段時間我無堅持同潼潼講故事，只係隨意看看書。不過待潼潼稍大(兩歲多既時候)，我又再次嘗試向佢講故事，情況已經好好多。
最初以為俾小朋友睇繪本只係訓練佢地對「美」既觸角，同埋藉此增進親子關係。睇完呢本書之後，先知道講故事對可以培養小朋友好品格，亦可以訓練語文能力。呢個可算係意外收獲。(作者一再強調媽媽們不要太功利，就算未見成果，講故事亦係不錯既親子活動。)
而家潼潼已養成睡前聽故事既習慣，每晚訓前都要拖我一齊入房為佢講故事。最近買了另一半全文字既故事書，如果潼潼太晚睡，我就放棄同佢一齊睇繪本，而改為要佢訓係度，靜靜咁聽我講故事。
小朋友訓覺時抱住毛公仔一齊訓就好常見，抱住書訓見過未？呢幾晚，潼潼就係咁，自己聽完故事就抱住故事書一齊訓。希望佢以後都會好似而家一樣咁愛書啦！
哈哈~~ 真係「遊」宜家，而唔係逛「宜家」。
今日本來打算去PLAYHOUSE係MEGABOX開既新店，不過唔知點解只係下午去左飲茶唶，攪下攪下就到咁晏，去到MEGABOX都已經五點鐘。PLAYHOUSE好多人輪候，寫明起碼要等兩小時以上。我地唯有登記左之後，再登記埋宜家入面既PLAYROOM。
兩邊都要等，我地就趁呢個時候逛下吉之島。
到七點鐘就去番宜家食飯。去到宜家果邊話波波池有位，於是我地就俾潼潼入去玩波波池。潼潼未入過去PLAYHOUSE，見到宜家有波波池都已經好開心好滿足。
佢地個波波池好深呀! 有幾次見潼潼好似差D俾波波埋住左咁呀!! 
放低左潼潼，我同潼潼爸就去搵食。其實我就負責坐係度霸位唶，潼潼爸就去買野食。點知一去就去左大半個鐘，難得又無人CALL我地去接番潼潼喎! 而爸爸去接潼潼既時候，話潼潼仲掛住同個姐姐玩架木火車，玩到唔捨得走添。其實都唔算奇，貪玩唔黐身係潼潼既一貫作風，亦因為咁令到作為媽咪既我都好放心。
我地坐番上次去宜家食野既位 ，即係圍住中間有個小型遊樂設施果圈檯。本來潼潼一番到黎就想即刻衝入去玩，只係俾我地阻止，要佢食埋野先准佢入去玩。
潼潼，行左成日我同爸爸都好攰，而且你又無訓過覺，點解你仲可以繼續玩既？
今日出街行過樓下商店時，潼潼又想玩夾公仔。
潼潼 : 玩唔玩得夾夾呀?
潼潼媽 : 好丫。
而家會問過我先玩，都算有進步。
潼潼 : 你俾錢我丫
潼潼媽 : 你自己都有帶銀包
唔知潼潼會唔會識得後悔帶銀包出街呢?
於是潼潼自己打開手袋，再取出銀包。我見到佢銀包入面只有一D毫子，同埋有兩個兩蚊。佢拎出一個兩蚊之後就好熟練咁自己行入商店換番兩個一蚊出黎。佢好快手咁就將其中一個一蚊放入夾玩具機。玩完! 中空寶。
我以為潼潼會好似平時咁玩埋另外一個一蚊，不過呢個時候佢竟然表現得有D猶疑。佢望下我，我無任何表示，然後佢又好似諗左一陣咁，就將個一蚊放番落銀包，再收番好落手袋。之後就拖住我走喇 ！
之後我問番潼潼，佢話留番下次先玩喎！
唔知潼潼係咪真係因為見到自己無乜錢剩，所以識得留番D錢下次玩呢?
」
呢日經過商場又有推廣活動，潼潼主動叫我幫佢影相。每影完一張相，佢都要走過黎睇下，然後問我 : 「我笑得靚唔靚呀?」
