潼潼：「你睇下我靚唔靚？」
潼潼：「媽咪！我睇唔到你呀！」
2010年4月25日 星期日
遊香港動植物公園
呢日同潼潼去動植物公園。以前潼潼媽細個既時候，耐唔耐都會黎呢個公園玩下架!諗住俾潼潼多Ｄ睇下真實既動物，決定帶佢黎行下。
點知．．．． 未到目的地已經筋疲力竭．．．．． 
呢個公園位處半山，好多斜路。
潼潼唔夠力行，兼且佢兩歲半左右開始有生長痛情況，我怕佢夜晚又嗌腳痛，所以我地要抱住佢行，仲要係行斜路。
行到公園後，最初潼潼媽坐左係度唔願郁。點解印象中細個果陣唔係行得咁辛苦既呢？真係年紀大左喇！
潼潼就好好精力。
潼潼一路嗌住「唔好影！唔好影呀！」我偏要影！！
玩完先去睇動物。
去完動植物公園，兩個大人散哂。不過慶幸當晚潼潼無叫腳痛，我有覺好訓。
不過原來我地呢Ｄ「平民百姓」，要實踐「蒙」的教育概念真係唔易。潼潼爸都話下次再去要坐的士，否則唔去。
2010年4月24日 星期六
2010年4月23日 星期五
峰迴路轉 - 再見G10。S90戰記
大約去年11月o係CANON擺ROAD SHOW時見到S90已經對佢喜愛不已，可惜當時買左G10只係大約一年，而S90亦都唔平，所以一直繼續用住G10。反正G10質素的確唔錯，只係部機我始終嫌大部，變左唔係成日帶出街。
上星期奶奶同姑仔買相機時，店員話S90只係$3180，而G10亦可以TRADE到$19XX。嘩!好吸引呀!決定加D錢換左部相機佢。
星期四晚拎埋部G10去豐X諗住TRADE機，店員報價G10可以TRADE到$20XX。咦?個價仲高左喎!開心啦!! 
點知CHECK機果陣話部G10個機鏡頭有水跡，TRADE價只可以做七折。
心大心細諗左陣，無理由咁樣蝕$600蚊，決定拎部機去維修再TRADE。
第二日打電話去CANON維修部，佢話CHECK機收$100，之部維修的話零件再報價。由於部相機真係之前一路影開都無問題，又無出過咩意外，所以深信應該抹下鏡之後部相機就應該無事。一於拎番去俾佢睇，俾$100賺番$600咁都無咁傷丫。
同潼潼影完相，拎埋部機去CANON維修中心俾佢睇。櫃檯個姐姐一睇就話係入左塵。心諗今次掂啦，入左塵好少事唶，抹番攪店，可以$100換番$600，夠划算啊!
跟住果位姐姐話要$1380。唔係呀嘛!! 唔係入塵清潔番就得架咩? 佢然話要成個鏡頭換。CANON認真識搵錢呀! 要俾$1380，我諗九成人都會選擇買過部。希望又落空，又要拎番部機走喇 !
既然CANON唔整，拎出去俾人整。於是又拎埋部相機落旺角俾人整機，報價話要$350。咁既情況下，係咪TRADE機都要整架啦!
等左大約個半小時，部相機整好喇! 一整好就拎去X澤TRADE機。店員CHECK機時，竟然話因為個LCD SCREEN有死點所以唔收。激死!!
又要拎番部機走喇!
我唔忿氣，行過幾步又一間X澤，決定再試一次。呢個時候，蝦子餅發現相機底部原來黐左張STICKER寫住保用期3個月。之前話部機有水跡都係話7折收機唶，無理由今次只係LCD SCREEN有死點唔收架。我地覺得應該係剛才個店員就係睇到張STICKER，知道部機曾經維修過所以唔收。於是拿拿臨搣走個貼紙再上試過。
一於再拎部相機去再試過。個店員CHECK機時，個心真係撲撲跳。好彩最後都過左關，真係安樂哂!!!
唉! 呢部S90真係得來不易呀!希望可以多D帶出街，影番多D靚相補數啦!
第二次影樓照
今日一家人請左假帶潼潼去影佢第二次既影樓照。
唔知係咪我地要求高，或者因為我地既要求比較另類，好老實，對今次既影樓照並唔係太滿意。PACKAGE可算26張相，但我地幾乎揀唔到26張相。
其實攝影哥哥都算俾心機同有耐性，可惜技術同硬件不足。
基本上攝影師係不斷要求我地望鏡頭﹑露齒笑﹑擺指定甫士。而我地想要既係希望佢能捕捉被拍者自然流露既神態。而攝影師既拍攝角度亦嫌過於死板。
硬件方面，影樓好細，一眼望哂，無指定地方俾你休息/換衫/揀相。而我最不滿意既係連一個用黎挑選相既PROGRAMME都無，揀相時係自己MARK NUMBER。我地要求將揀好既相篩選出黎再重睇一次都攪左好耐。總之就係小本經營。
整體上黎講係有D失望。
2010年4月21日 星期三
2010年4月15日 星期四
2010年4月11日 星期日
我家的小天使
心理學家發現，未成年的小孩對自己的看法，完全取決於周圍人的評價，哪怕只是一句話，或一個眼神
真的是這樣嗎?
每朝早姐姐叫潼潼起身番學，都係入房吵醒潼潼，攪到潼潼哇哇大叫話要訓覺，唔起身。我好唔鐘意聽到呢d聲音，覺得一大清早就被攪得心情不佳，之後既時間何來好心情。於是每朝早呢個時候我都會入房，輕聲跟潼潼講早晨，會哄佢。或者有人會覺得咁做一d都唔夠效率，又或者覺得我係太寵太遷就潼潼。
其實潼潼平時都幾難攪，唔係想像中咁依人，差不多事事都要吵一番。呢日姐姐放假，爸爸遲起，早上只有我同潼潼。唔知點解，今日潼潼特別乖巧。
- 早上佢拎左好多玩具出黎玩，叫佢執拾佢都肯執。
- 中午佢想食麵包，我話佢知要出街食野喇！佢就放低個麵包：咁我唔食麵包啦！
- 出街時一直拖住我行，一邊行一邊一齊睇路邊既植物，無扭計要抱。
- 潼潼話要食BURGER KING，我話尋日食完，唔食喇 ! 佢都依。
- 雖然要哄，但都乖乖食哂飯。
- 買外賣番屋企俾爸爸，我話要行快D喇 ! D麵會「林」哂 ! 潼潼就一邊加快腳步走，一邊叫住「要快D喇 ! 林哂喇 !」
- 途中見到人都會同人打招呼，仲贏得藥房既哥哥送佢一盒贈品作禮物添。
- 同佢洗白白時會依指示自己幫自己沖涼，仲識得話我 : 「你掛住搽(皂液)，我都未起身。」
總之幾乎整日都如同一個小天使。潼潼心情好，落街都主動叫我幫佢影相。
直至到．．．． 係由果一刻開始嗎？係因為接收到負面評價嗎？
晚上番到屋企，潼潼有D扭計。
而家我地每晚都要俾潼潼食氣管敏感既葯 - 甜甜的咀嚼片，好似糖一樣。我正想俾潼潼食既時候，卻被爸爸止住：「潼潼有無乖？唔乖無得食！」潼潼即刻喊住：「唔乖！唔乖呀！」呢個囡，很會鬥氣。
真的嗎？小朋友既行為，真係如書本所講，完全受我地一言一行﹑甚至心中對佢地既主觀想法所影響嗎？
別人眼中既小天使，今日到此為止了。不過卻仍然係媽媽既小天使。
2010年4月9日 星期五
這就是港女?
今晚放工搭巴士番屋企時，坐我後面的一對情侶，一上車時就好似已經有點「爭拗」(講老實的其實應該是女的在表示不滿)。
男：你永遠只係講做得唔岩既，但要點做又唔會話我知，剩係叫我自己諗。
大概是男的在工作上有些惱人事。
男：你俾我靜下得唔得！
女：係你叫我出黎架！
男：咁你而家番去啦！
女：你唔好去死？我上左巴士你先叫我走？
女的不罷休：乜你咁不負責任！
我一直望窗外，呢個時候先發現原來我隔離原來坐左個四﹑五歲既小朋友，佢媽咪坐係佢前面同佢講緊野，為左方便媽媽照顧小朋友，我同小朋友既媽媽調轉左位，坐左前一排。再聽唔到呢對男女講d乜，只係再吵左一陣然後靜左落黎。
哎呀！真係好怕！潼潼，你將來千萬唔好可以變成咁 
，不體貼之餘說話仲好難聽。
放大孩子的優點
而家網誌亦可以係一個豐富的資料庫。
係某網誌中見到家長推介書清單，其中一本係「放大孩子的優點」。我見書名已經被吸引，唔執輸地搵資料。
從千百次的實驗與觀察中，心理學家發現，未成年的小孩對自己的看法，完全取決於周圍人的評價，哪怕只是一句話，或一個眼神，都有可能會對孩子的一生產生影響。
(CLICK上文可看詳細介紹)
睇過介紹，令我想起一件事想分享一下。
早一段時間買了「邏輯狗」這小玩意給潼潼，裡面包含左好多個訓練小朋友邏輯思維的小遊戲。初初買番黎，潼潼雀躍的玩完一個又一個，之後佢隨意挑了一個難度較高的遊戲。
潼潼媽不其然：「呢個好難架喎！」
最後潼潼當然唔成功。之後潼潼每見難度較高或之前失敗過既遊戲都要跳過，話好難，話自己玩唔到。於是潼潼媽知出事喇！
而家潼潼再玩邏輯狗時，有時都會問：「呢個難唔難架？」
我就會答：「呢個唔難，只要潼潼專心就玩到架喇！」
雖然而家潼潼有時仍然會跳過之前失敗過既遊戲唔玩，但我諗總比一開始就否定佢既能力好。
育兒真係要從經驗中不斷反省學習呢！
2010年4月6日 星期二
2010年4月4日 星期日
深圳半天遊
爸爸約左朋友到深圳逛書城同晚飯，潼潼媽放不下潼潼，就帶埋潼潼一齊上去。諗住都無乜景點好影，所以無帶相機，只有用手機影，相片質素麻麻。
先去吉之島走個轉。(很無聊嗎?
香港都有吉之島啊!)
潼潼有得坐呢個購物車仔已經開心到不得了。
不倒翁，以前年宵總會見到，不過而家係香港已經好少見。潼潼第一次玩不倒翁覺得好有趣，佢居然捨棄POOH POOH，揀左隻無名兼便宜一D既鱷魚仔不倒翁。
跟住去書城，時間太少，揀唔到咩書。不過潼潼就有個好不快既經驗。佢拎左本書同其它小朋友坐係地上面睇既時候，有一個比潼潼大(我估五﹑六歲吧)既小妹妹行埋黎，用普通話好惡咁鬧潼潼坐左佢個位。我一方面同潼潼講要問過姐姐，但另一方面又覺得不忿，所以又話番果位小朋友。
雖然七點幾八點離開書城，不過就等到夜晚差唔多九點先有得食飯。潼潼都好肚餓喇！等食期間不停咬住匙羹，見佢個樣又覺得可憐又覺得攪笑。
訂閱：
文章 (Atom)