爸爸去狂歡，剩低我同囡囡兩個孤單係屋企點得架! 碰岩姐姐係呢日生日，一於一齊出去食晚飯啦! 仲臨時約埋婆婆出黎添!
到年終年頭就係雙糧+花紅既時候，一於食好D。
潼潼又表演食檸檬喇! 睇下佢表情幾滑稽。
其實我覺得潼潼未必真係咁鐘意食檸檬架，只係佢見每次佢食檸檬時我地都笑得咁開心，所以佢故意整古做怪唶。
之前等位果陣潼潼一直嗌肚餓，但係食左唔係好多佢就話嘴痛唔食。問佢咁仲食唔食甜品，佢又話食甜品時就唔痛喇喎!
睇佢食得幾落力，同潼潼媽一樣，個胃有第二個甜品格。
食完野出黎，商場有活動喎!人山人海。
潼潼又黎湊下熱鬧先。
見到女兒甜美既笑容，就係我一生最大的幸福。
番到屋企都十一點幾喇! 潼潼雖然話眼訓，但都堅持住，同我一齊睇埋電視上既倒數同煙火表演。
無諗過可以同潼潼一齊迎接2011年既來臨，多謝! 希望新一年大家都平安快樂。
同潼潼去MEGABOX，爸爸志在行街買野，潼潼媽就一心想帶潼潼去睇飄雪。
潼潼最初對D飄雪表現得頗厭惡。
不過後黎潼潼媽同佢講濕左唔緊要，拍下佢無事囉! 之後佢又好接受，笑住咁俾我同佢影相啦!
但係其實D飄雪效果真係麻麻咋。
大匯演完畢以後就去接番潼潼，沿路潼潼見到好多同學仔，一邊行一邊自己追住d朋友仔，一時叫呢個，一時叫果個，都唔理我地係咁走。原來潼潼都幾「蘇SO」，仲有同學仔媽咪走過黎「投訴」，佢個囝囝話潼潼唔肯同佢玩，叫潼潼以後侵埋佢玩。哈哈~ 我平時只見到D大姐姐大哥哥唔肯同潼潼玩，原來潼潼係學校咁受歡迎，反而調轉頭唔同其它同學仔玩添。
係沙田大會堂做完大匯演之後，一出黎就係史諾比公園，幾乎所有小朋友都衝哂入公園玩。但係因為太晏，我地就帶潼潼去食完野先再黎玩過。
嘩~ 公園依然咁多人，真係好難得星期五都咁熱鬧，相信公園入面都係同學仔咯！
潼潼就快四歲喇！基本上公園裡面既遊樂設施都難佢唔到。
呼~~ 小朋友大得真係快。
又係潼潼媽期待已久既一日。今日係潼潼幼稚園既十周年校慶大匯演。
因為小朋友要去表演場地準備，所以今日要比平時早一小時 - 八點鐘番到學校。怕潼潼訓唔夠，前一晚八點半已開始叫潼潼執拾同清潔準備訓覺，不過攪掂所有野又講埋故事都九點半。唔知點解，呢晚潼潼整晚碌黎碌去，遲遲未能入睡，唔通連佢都識緊張? 
最後都係同平時一樣，攪到十點幾先訓著。
到第二日朝早叫潼潼起身時
潼潼 :「唔~~~~~」
潼潼媽諗住又要安撫潼潼 : 「係咪好眼訓呀?」
點知潼潼 : 「要起身呀~~~ 」辛苦你了。
抱著未訓睡既潼潼，佢聲音還未開就話 : 「唔飲得奶呀，坐旅遊巴會嘔架 ! 」好好啊! 潼潼無忘記老師既叮囑。跟住就趕住食早餐(一定要食早餐，因為無得食茶點喇，要表演完一點幾先有野食)﹑梳洗﹑換衫，然後就同姐姐一齊拖住潼潼跑番學校。番到學校，發覺好多學生都係度趕，d媽媽都話小朋友唔肯起身呢! 相比起上黎，潼潼都算聽話。
好喇! 睇睇潼潼既表演先。
個表演係咪好「無料到」呢? 哈哈!! 我都唔係幾滿意。原本老師都講左會「咪嘴」，不過我以為係錄低小朋友既歌聲到表演時「咪嘴」，無諗到居然係用番原唱者既碟播歌，早知唔駛幫潼潼練啦。
不過見整個大匯演都似模似樣，我都因為阿囡入到間好學校而感動。
曾繁光醫生的正向管教。唔鐘意睇字的話岩哂，入面部份內容係《How to Talk so kids will Listen & Listen so kids will Talk》呢本書入面亦有提及過。
早前係網誌上介紹過《How to Talk so kids will Listen & Listen so kids will Talk》呢本書。呢本書真係幾好，亦見過有唔少父母都有介紹呢本書，真係天書黎架！
今日又發現左一個比比菇既網誌，入面有好多教養上既實例都係運用左呢本書入面既技巧，而且亦寫得非常詳細。如果無睇過《How to Talk so kids will Listen & Listen so kids will Talk》呢本書，或者無心機睇書的話，呢個比比菇既網真係好值得參考。
另外網主亦介紹左另一本書《Silblings without Rivlary》(《如何說孩子才能和平相處》)，呢本書對於我黎講似乎用不著喇，因為主要係講述如何解決兄弟姊妹之間的紛爭。
以上兩本書只係YAHOO BLOG都已經可以SEARCH到唔少資料，教小朋友教到好頭痛既爸爸媽媽真係要睇下。至於我，咁好既網誌我當然又訂閱左啦! 
潼潼都幾鐘意星期六晚去厚德村聽人地唱歌，當然佢志不在此，只係有時會有d小朋友陪下佢玩。
呢晚潼潼又去聽歌，不過今晚一幫三個小朋友都唔肯同佢玩。見住三個小朋友都不停鬧住潼潼「喂呀! 你唔好跟住我!」﹑「我唔同你玩呀!」但係潼潼一d都無退縮，依然不停跟住三個小朋友，有時仲會加把嘴同人家理論。雖然潼潼媽非常不值果三位小朋友既行為同態度，但係又好欣賞潼潼既勇氣同毅力，因此都忍耐住唔出手而在旁觀察。見佢「以一敵眾」咁同人家對抗，有時都幾好笑。
好一段時間後，我地要走喇! 潼潼就主動同果三位小朋友講拜拜! 小朋友既回應係:「我唔你拜拜呀!」哈哈~ 真係要讚一讚潼潼，雖然人家一直都對佢好唔客氣，但潼潼依然無忘記「以禮待人」，真係連媽me我都做唔到。
回家路程上我不忘誇讚潼潼，無論人家點樣不禮貌，但都要做好自己。而潼潼呢，亦頓變牢騷王，話人地唔岩，唔同佢玩，又拉佢，仲識得話果D哥哥姐姐係BB，要坐BB車。哈哈~~ 我家小姐實在太可愛，竟然識得咁樣比喻幾位小朋友。
潼潼一時又話下次唔同佢地玩，一時又話俾多次機會佢地，就係咁一路數到番屋企。見到佢咁都幾攪笑，所以又錄低佢D牢騷對白。不過佢知道我錄緊其實都拘謹同收歛左。
對於潼潼既任何事情，潼潼媽都好期待，包括12月10日既學校十週年匯演以及今日既家長日。好想知道潼潼係學校表現係點，老師對佢既評語又係點。
結果係令人非常滿意。
睇番份「學習歷程檔案」，語文﹑早期數學﹑藝術﹑科學與科技﹑體能與健康﹑個人與群體六個範疇中，入面每個重點項目潼潼都得到最高既評分。
最後係檔案上既評語係 :
乖巧守規的潼潼，富有同理心，看見別的小朋友哭泣時都會主動上前安慰，社交能力發展不錯，能與同伴愉快相處。在課堂上潼潼會嘗試回答老師的提問及分享自己的生活經驗，且懂得利用不同的禮貌用語來表達需要，且待人有禮，值得同伴學習。
老實講，潼潼媽都算懶散，潼潼有咁既表現，都算執到咯。
收到反斗城的宣傳電郵，知道佢地星期六﹑日係蘭桂坊攪嘉年華。爸爸呢個星期六要開工，潼潼媽怕潼潼無節目，就帶左佢去嘉年華玩。
去到先發覺被騙，所謂攤位遊戲只有寥寥幾個，而且唔算遊戲，只可以叫做擺賣。
同潼潼排隊玩彈彈床，玩5分鐘要10個大洋，不設找贖。潼潼媽無零錢，就夾埋前面個媽咪一齊俾。小朋友既友誼好單純，只係一齊俾錢，轉個頭就見到兩位小朋友手拖手做左朋友，連跳彈床果陣都拖住手一齊玩。
時間夾唔岩，睇唔到表演節目，又無野玩，見到幾個人扮玩偶走出黎就個個爭出去影相。
影完相，功成身退咯！超無聊！！
