潼潼玩既模擬遊戲越來越出神入化。
除左係床上面玩搣麵包餵魚之外，竟然同潼潼媽搶食。潼潼將麵包放入自己口入面，仲話唔俾媽媽食，潼潼媽裝著要搶，潼潼緊張得係度跺腳大叫。跟住潼潼又假裝分部份俾媽媽，正當媽媽要將麵包放入口既時候，潼潼又要過黎搶，仲即刻將搶到既麵包放入自己口裡面唔俾媽媽添！
以上遊戲無任何道具，全部只有動作，就係咁玩得一餐。真係夠豐富既想像力。
2009年7月26日 星期日
書展2009
今年既書展，可算是大豐收。
上面最埋邊一棟係潼潼爸買俾自己既書，另外潼潼媽只買左100蚊4本既育兒書，不過而家最主要想講下買俾潼潼既書/教具。
今年潼潼爸去左兩次書展，星期三果次同朋友去，星期五晚就再同潼潼媽去。其實星期三果晚爸爸已經滿載而歸。
呢個畫冊一套三本，每本10蚊，係創意畫冊，有好大既空間俾小朋友發揮。
呢個唐詩咭10蚊一盒，每盒有35首唐詩，分開初中高級。潼潼而家都會拎住初級果盒要我逐張逐張讀俾佢聽。
下面呢個故事繪本潼潼媽真係覺得超抵，每本10蚊，潼潼爸第一日買左三本番黎，星期五我地再去時又掃多三本。呢幾本書本來係一套八冊，我地只搵番其中六本，而且相信已經所餘無幾，遲一日去都搵唔到喇!
故事書係硬皮書面，而且仲大大本，每本故事都有一個學習主題。好似下面呢本就係講數字既。
後面仲有導讀。
同埋「給家長的話」
仲替姨甥買左一套12本既「十萬個為甚麼」，都只係$110。
到星期五果日潼潼媽請左半日假去幫潼潼掃貨。
呢個係一套12本既經典童話故事書，每本入面有二至三個經典童畫故事，都只係100蚊咋。
呢個係晶晶出版社既習作紙。係比較喜歡右手邊關於「上學」既習作，希望可以令潼潼更投入8月份時入讀N班幼稚園生活。
呢個穿線遊戲，可以訓練小肌肉發展﹑手眼協調，同埋空間感。
呢個聽聲音遊戲都好好，已經同潼潼玩過好幾次喇！最初係一組一組咁俾潼潼玩，之後一次已經係放哂42張咭片出黎，再隨機播放聲音，然後我地同佢一齊鬥快搵番D咭片。當然，我地都要扮下野等潼潼可以有機會快過我地搵到D咭片啦!玩完之後，仲可以由潼潼根據顏色幫我地張D咭片分番好一組組添。
仲有其它散裝既書仔唔講喇！真係估唔到，果晚我同潼潼爸由下午四點行到午夜十二點人地收檔先走，連飯都無食！走果陣真係想死咁濟，成8個鐘頭，真係連訓覺時間都未必有咁長呀!阿囡~ 你真係要生生性性呀!
2009年7月25日 星期六
兩歲半的補充
想起潼潼一D有趣既表現，想記錄一下。
潼潼喜歡模擬既遊戲，佢係手上亳無任何道具而玩模擬遊戲：
- 有時會係自己手上拎野食，放入口，咬咬咬，然後話好好味，仲會分D俾我食添。
- 係床欄旁邊拎住個模擬波扮係樂園入面玩投籃遊戲。佢會投幣，玩完仲要去禁機拎錢。
- 企係床邊話睇魚，跟住又落床去撈魚，然後話(紙網)爛左，叫我俾第二個佢。
- 玩家家酒 (潼潼媽完全唔理解，所以未能寫出潼潼做緊乜)
以上事情潼潼做既時候只有動作，潼潼爸話潼潼好似演默劇。
不過有時潼潼媽都會配合，等佢有更大既發揮空間。
另一樣比較有趣既，係潼潼有時講野語調都幾誇張，呢個可能係因為我地對潼潼講野都用左好多誇讚式既口吻，又或者誇張表示食物好味去吸引佢，所以令潼潼有以下表現：
- 上畫班既時候，潼潼試過每做完一個step都跨張地：「嘩~~ 好靚呀~~~~」聽到老師都係度笑。
- 有時食野既時候會話：「真係好好味呀！」
- 自己做到某D事情後會話：「潼潼真係好叻呀！」
最後，潼潼有時都好古惑地會故意「做錯」一d事情。
- 會話「我係姐姐」﹑「我係媽媽」
- 平時食野佢會肯分野俾你食，知道你同佢玩既時候佢都會「玩野」，故意唔分俾你食，然後「潼潼食哂，唔俾媽媽食」
小朋友實在太可愛，我要好好enjoy呢段時期。
2009年7月19日 星期日
兩歲半
7月13日潼潼足兩歲半，補番份報告先。
潼潼而家身高88cm，體重只有廿五磅。
潼潼對顏色既認知好差，差到我一度懷疑佢係咪色盲。
不過早前買左幅有關顏色配對既砌圖俾潼潼玩，潼潼對顏色既認知係明顯好左。不過咁唔等於佢答顏色可以100%正確，只係紅色﹑藍色﹑黃色﹑啡色﹑綠色同橙色等都大概知道。
個多月前開始同潼潼唸詩。小朋友學唸詩好快，一首新既詩，每晚讀一兩次，兩三日後佢已經可以自己唸出黎。不過為左印象深刻d，我大約每一個星期就換新一首詩。潼潼而家可以唸到六首詩喇！包括靜夜思﹑春曉﹑登觀鵲樓﹑清明﹑相思，仲有憫農。而家潼潼好多時都會自己指住本書要我逐首逐首唸俾佢聽，我諗之後唸詩既活動可以改為由佢主導。
為左加深潼潼對數字既概念，亦係好幾個月前開始，每晚臨睡前俾潼潼自己圈日曆。雖然潼潼對10以上既數字仍然唔識唸，亦對數量未有概念，不過打圈既功夫卻做得好左。
又由幾個月前開始，晚上飲奶既時候我地亦會俾佢試下自己「不」奶粉同埋攪伴，不過攪伴動作仍未算流暢。
另外潼潼開始都可以自己除鞋同除襪喇！
雖然我支持早教，但係我自覺自己都好懶散，亦唔算係催谷型父母。希望潼潼係緩慢既進度上可以快樂地學習同成長。
親子遊戲日
因為颱風關係(雖然下午一點多鐘已經取消所有風球，而且天氣還可以)，今日既課堂又取消左。正愁著有乜野好做既時候，係商場入面有人派遊戲券，原來係自己屋苑內一間幼稚園今日有親子同樂日。正合我心意，一於帶潼潼去玩下。
場內有六個小遊戲攤位，不過潼潼最感興趣同玩左最耐既係旁邊既模型屋。
其次係波波，所以佢玩左兩次呢個撈波波既遊戲。
由於係幼稚園辦既活動，所有遊戲都唔太難，好適合潼潼。好似呢個自動黏貼顏色紙係杯上既遊戲，就可以訓練手指仔既活動能力。
仲有呢個砌圖，o係係圖畫上面再放番剪開既圖畫咭紙。
住係我隔離有位小妹妹以前都係呢間學校番學，我見佢都番學番得好開心，我本來都有考慮過想近近地俾潼潼讀呢間學校。不過今日黎睇過環境覺得麻麻地，所以都可以慳番唔駛諗lu。
2009年7月13日 星期一
2009年7月12日 星期日
」2009年7月11日 星期六
2009年7月9日 星期四
冷血「大話精」 百刀插死表哥
(星島日報報道)四口家滅門慘案死者遇害經過慘絕人寰，警方綜合驗屍及現場重組案情顯示，男死者被人用鋒利尖刀狂刺，身中近百刀當場喪命，其妻救夫不果，反被制服用膠袋蒙頭，鐵綫纏頸封袋口焗至窒息慘死，兩名被牛皮膠紙封口及五花大綁女兒，同被掉進泥洞活埋監生焗死
呢單新聞真係好恐佈，我每次睇到都極都唔安樂，竟然會有人做出D咁獸性既行為。試想一下兩個年幼既小朋友，眼白白見住自己被倒落黎既沙泥活埋，當中既恐懼真係難以想像。
如果香港仲有死刑，我覺得個殺人犯一定要被判處死刑，而且仲要係同樣被活埋焗死。就算唔要佢死，都要埋佢一次，之後先救番佢出黎，等佢自己受下都好。
2009年7月5日 星期日
訂閱：
文章 (Atom)