昨晚潼潼伏係我係姐姐身邊「恰」眼訓既時候嘔了一灘，當時潼潼媽不以為意，以為只係因為潼潼伏係度訓令胃酸倒流所致。所以整理好一切之後就帶潼潼去訓覺。
睡至午夜兩時多，潼潼間間斷斷的邊睡邊喊，潼潼媽心知不妙，心想潼潼可能係肚仔痛，帶左潼潼去廁所之後，佢依然扭計，於是我地幫佢搽左葯油同埋食左「樋屋」之後抱住潼潼哄佢訓。突然間... 吐~~~~ 潼潼媽身上滿是潼潼當日既晚餐 - 米線。
潼潼媽大叫爸爸同姐姐黎幫手，潼潼就嚇得係度不斷喊。手忙腳亂的整頓好潼潼同媽媽後準備再訓既時候，潼潼又再次係床上吐了一點點．．． 
今朝起來，潼潼有點肚瀉，吃過一點點早餐又吐回來，所以爸爸帶左潼潼去睇醫生。醫生話可能係受輪狀病毒感染，而非一般的食物引起的腸胃炎，仲話呢排好多小朋友都有類似情況。唔知會唔會係因為早兩日租單車玩既時候單車唔乾淨而受感染呢？我上網睇左一點資料，發覺而家無乜野可以做，唯一係好似普通腸胃炎一樣，等佢自己嘔清痾清。
今日潼潼媽放工番屋企，見到平時病既時候都一樣活潑既潼潼沒精打彩的，真係好少見佢病得咁辛苦，希望佢可以盡快好番啦！
大年初二既節目緊係晚上去睇煙花啦！我地原打算去尖咀既中間道兒童遊樂場睇煙花，可惜原來果度整個平台係屬於封鎖區域。潼潼見住個遊樂場又無得入去玩，好失望咁係出面望左好耐。
上次睇煙花係十一國慶，果陣潼潼俾D煙花聲音嚇到係咁喊。相距約四個月，今次睇煙花潼潼無再喊喇，不過後黎就係咁嗌住要去尿尿。唔知佢係真係想尿尿定係想借尿遁呢?
睇完煙花走喇！嘩！好難得可以係平時繁忙既馬路中間走呢！
去醫肚先。
哈哈~ 見唔見到前面有幾多張紙巾?潼潼食野真係食到好污糟架!真係嚇死人。有時真係多得有姐姐，我先可以係咁惡劣既環境下，依然好ENJOY咁為潼潼拍照。如果要我收拾殘局，我未必可以咁輕鬆咁面對潼潼既「惡行」喇！
爸爸唔夠喉，再買薯條。睇下潼潼又為食喇！
再多得薯條既利誘（又用呢招，潼潼媽太差勁喇），成功為潼潼拍下咁有節日氣氛既照片。
星期六﹑日潼潼媽都唔舒服作感冒，除左星期日帶潼潼上playgroup之外都無出過街，連累潼潼o係難得既假期都要陪我一齊困係屋企。
講講潼潼今個星期上PLAYGROUP既情況。
好開心見到潼潼既進步。雖然好多既情況依然係唔聽指示，但係好明顯係比上一堂進步左。雖然動作仍然唔願意跟住做，叫佢舉手又唔肯舉手，正正係叫佢做果樣偏唔願做果種，但係圍圈走既時候已經比較合作，亦都肯將手上「教材」由自己交番出去俾導師鍾SIR；穿珠仔亦做得好好，我見潼潼真係好俾心機穿，而且動作比上一堂純熟，兩隻手既相互協調係好左。至於輪候出去做打筋斗同持桿動作時，依我觀察，潼潼其實係好有興趣，只係走到出去果陣未輪到佢玩，佢以為被拒絕，佢就會唔鐘意。就好似平時係屋企既情況一樣：佢要做既事情，若你唔俾佢做佢就會發脾氣，到叫佢去做既時候佢就唔理睬你，偏偏唔做。（唔知我有無理解錯呢?）我諗潼潼仲未習慣係團體入面「輪候」既概念，要再俾D時間佢。
大致上潼潼係課堂上既主動性並不如係屋企時理想 (無咁多野講)，不過似乎學了一點點規矩。潼潼，媽媽期待著你一次比一次進步，只要看到進步就夠喇。
(上完堂，去APM逛一陣影番幾張相先)
兩歲喇!! 兩歲喇!!
兩歲大既潼潼身高83cm，體重23磅。 (24磅減番1磅衫)
潼潼進入「TROUBLE TWO」，爸爸媽媽真係要比以前有加倍既耐性先得喇！而家既潼潼已經好「TROUBLE」，唔受得人話，少少野就已經唔高興發哂脾氣，令爸爸媽媽好頭痛呀！真係唔知應該用咩方法應付先岩。
另外潼潼比以前更加貪靚，早幾日仲識得出街要揹番個手袋仔，又鐘意戴帽，仲識揀鞋仔，仲試過拎媽媽支唇羔黎搽添！
認知方面，得到教學CD的幫助，潼潼已學會大階A-Z，少量既英文生字；另外亦會念1-10，不過就無數既概念；顏色方面既認知似乎仍然缺乏；玩砌圖板比以前進步。
大小肌肉發展一般，穿珠仔問題不大，不過塗鴉方面就有待改善。
自理能力方面潼潼會識得除鞋，著鞋就只會穿拖鞋或SIZE稍大既鞋；用匙食飯一般，飲湯就似乎好好多喇，用水杯飲水都可以；開始緊用可吞服既牙羔刷牙；呢個年齡既小朋友鐘意凡事都親力親為，所以係可能既情況下我都由得潼潼自己做佢想做既事，甚至乎抹檯抹地；出街前會知道要執拾好自己既玩具；夜晚有時會識得起身叫去廁所，不過反而朝早好多時掛住玩而賴左尿尿。
基本上我對潼潼既發展係滿意，只係脾氣方面真係比較難處理。不過點都好，最緊要係潼潼永遠健康，平安，快樂。(講左好多次)
今日潼潼上左佢第一堂playgroup。一直以為潼潼既表現上playgroup應該無乜問題，但係原來剛剛相反。
呢日上playgroup大約有5-6個家庭 (潼潼媽真係唔夠細心)，而新生連埋我地應該有三個。年齡有比潼潼少既(歲半)，亦有比潼潼大既。上課既地點其實係一個空曠既既課室(瑜珈室)。課堂未開始，潼潼已經係度不斷走黎走去，一d都唔怯場，潼潼媽仲以為係好事，點知........
大家都跟住導師既指示叫小朋友做動作，走圈，停步，搖手.... 等等，全部小朋友都好聽話咁係成人既帶引下做出動作，就只有潼潼一個係幾乎全場都不受控制，只係自己係場內不斷走黎走去，我地想捉都捉佢唔住，一捉住佢佢就反抗。
還好就只有玩穿珠仔既環節潼潼係肯乖乖地咁坐係度完成。
整個課堂好似好簡單，其實都值得家長留意：唱HELLO歌同大家打招呼，唱體操歌，再見歌，學習專注力，學禮貌，學規矩 (整個課堂流程潼潼媽都唔係好記得喇 )
到課堂完畢，導師既COMMENT係: 潼潼因為未上過PLAYGROUP (但係其它新生都未上過都唔係咁)，所以末習慣呢種結構性既課堂，佢要自由，想破壞呢種結構。我地要俾佢慢慢習慣，遲D會好D。同埋佢話潼潼比較活潑 ，同有D男仔性格(呢點絕對唔似潼潼媽)，要減少俾潼潼食糖，飲汽水，食有味精既食物，同埋少睇電視。(其實呢D潼潼都好少做，但係佢都依然超級活躍)。
希望繼續上多幾堂潼潼既表現真係會好D啦。
潼潼媽一直反對用利誘方法去拎潼潼做出應有既禮貌行為，但礙於大年初一呢D喜慶節日，都破例一次。
