倒水係蒙特利梭利既教學入面,係一項好好既訓練專注力既練習。今日偶然之下,潼潼自動玩起呢個小遊戲,潼潼媽當然探取不干預政策。
2008年12月31日 星期三
迎接2009
今日太多節目喇!!
同姐姐食完飯之後,潼潼就檢閱爸爸新買番黎既玩具,竟然玩到凌晨時份都毫無倦意。今日潼潼竟然同媽媽一齊除舊迎新,迎接2009呀!!
希望新一年有新開始,大家都得到平安,健康,同埋喜樂。
唸ABC
雖然話睇電視對寶寶的確有不少壞影響,但係無可否認的是聲﹑畫﹑影既配合的確令人印象深刻,有利學習。
從前用字母海報潼潼學字母的速度很慢(也不能怪,因為潼潼媽未有每日給她在海報面前唸字母),現在加上了教學CD,潼潼已學會了大部份的英文字母。
2008年12月27日 星期六
2008年12月25日 星期四
2008聖誕夜
尋晚平安夜玩得太夜,全家一齊大覺訓,包括潼潼。
今日既節目係晚上去表姨屋企大食會。表姨屋企好大又好多玩具,基本上潼潼每次去到都會自己搵玩具玩,唔駛媽媽粗心,所以今次潼潼媽都落得清閒,好少理潼潼,連相都唔記得影,只係最後食蛋糕果陣影左少少相。
呢日潼潼仲收到表姨一份好大好大既禮物添。
2008年12月24日 星期三
平安夜.潼潼玩WII
平安夜既晚上,我地帶埋潼潼一齊同朋友晚飯之後,就上左朋友屋企坐。
呢晚其中一項節目就係玩遊戲機WII,連潼潼都睇得興奮又投入。
之後潼潼仲要玩埋一份,係潼潼首次玩遊戲機,睇見潼潼認真玩既樣真係笑死我。
聖誕自助餐
今年公司既聖誕大餐選左W酒店既自助餐。
W酒店係一間好特色既酒店,由入面既擺設到侍應既服飾外表都好有格調。圖入面既究竟係咩食物?估到嗎?其實係生蠔。除左傳統既生蠔以外,佢地仲有5款配上唔同汁料既生蠔,顏色非常美麗。
其它食物一樣比一般酒店BUFFET特色,可惜潼潼媽被多次禮貌地警告唔好向食物影相之下,所拍相片唔多。不過如果俾多起的話,我覺得真係值得一試。
平安夜.賣旗日
平安夜既早上,發覺有人o係街上賣旗。係呢個普天同慶既日子,我少有地不假思索地「幫襯」左佢地。
番到公司,先留意到今次賣旗既「組織」竟然係一間「有限公司」?我當堂有被騙既感覺。雖然只係少少幾塊錢,但係我幫既唔係乜野非牟利機構,而竟然係一間「有限公司」。點解有限公司都可以o係街都籌款架?
以後買旗真係要睇清楚!!!!!
2008年12月21日 星期日
聖誕留影@新城巿
今日係冬至,潼潼番沙田同嫲嫲食飯,順便係附近商場逛逛。
係一田樓下多左幾個疑似甲蟲物體。
潼潼係度玩左好耐,係咁捐黎捐去。
仲有撻黎撻去。
跟住經過新城巿廣場又影左幾張相。
最後去到嫲嫲屋企仲有禮物收添。
潼潼今日就開心啦!!
2008年12月20日 星期六
2008年12月19日 星期五
2008年12月17日 星期三
遊戲活動
早前潼潼媽係提過為潼潼報左幾個小組活動,其中有一個係協康會既感知遊戲活動要以抽籤形式作篩選。今日有結果喇!潼潼媽打電話去問結果,點知係失敗左,失望到連點樣辦退款既程序都忘記左問。
之後打電話去MUSICAL WAY ART CENTRE,還好有個好消息,潼潼既報名已經接納左,下個月潼潼有佢鐘意既音樂活動玩喇!
之後潼潼媽又再嘗試睇下仲有無其它活動可以岩潼潼,不過發覺真係好難搵。貴既當然俾唔起,平果d又路途遙遠。其實將軍澳係一個新區,呢區真係好多好多小朋友,可唔可以有多d非牟利團體入黎辦活動呢?
請各位blog上既媽媽幫幫忙,如果知道將軍澳區有邊d又平又好活動岩兩歲大既小朋友,麻煩報報料啦!
2008年12月15日 星期一
23個月
2008年12月13日,潼潼23個月大喇!
時間過得好快,潼潼就快兩歲大喇!諗番起第一日從醫院接潼潼番屋企既時候,感覺依然興奮﹑溫馨又甜蜜。而家當我抱住潼潼訓既時候,我都會好好咁享受潼潼係我懷裡安睡既感覺。我知道潼潼好快就大個女,可以咁樣抱住潼潼既機會越黎越少,我會珍惜。
23個月大既潼潼,好似無乜長高過咁,去年趁減價掃貨既衫仔今年都未岩著,真失策。 體重呢?搵個機會磅下先知。
早陣子寫左一篇網誌話潼潼平時說話太空話居多,寫完之後我先特意留意潼潼既說話,先發覺原來潼潼已經會講好多說話,並唔係我所謂既「太空話居多」,我呢個媽媽實在唔夠細心。我聽過潼潼講最長既短句係「唔該媽媽抱」,心情好既時候你問佢野佢好多時都會答你「係」「好」「知」;心情唔好就會鬥氣「唔食麵」「唔食飯」「唔去街」「唔落地」「唔乖」..... 乜都識講,總之要加個「唔」字係前面;有時你講乜,佢又會跟住講,試過跟我講「大佬呀!!」 嘩~~ 我地大人講野真係要好小心,佢真係你講乜佢講乜架!
潼潼又好會發脾氣,或者呢個年齡都會有呢個問題卦,不過我地最怕佢用尖叫黎表達不滿,通常呢個情況我地會立刻制止佢,希望佢大個D之後呢個問題會有改善。另外佢又會識得唔高興既時候翹埋手。試過有次出街見到個姐姐拋個波俾潼潼之後又即刻拎番走,潼潼嬲到翹埋手,企定定,好嬲咁望住個姐姐。哈哈~~ 潼潼媽其實覺得呢個情景好攪笑,只係唔可以鼓吹佢咁做,所以都會安撫佢,叫佢唔好咁樣。
仲有呢個月潼潼學識左「跳」,或者佢覺得識跳係好叻,又或者覺得好好玩,所以而家開心既時候無端端都會跳,尤其是聽歌仔既時候,會又跳又轉又唱歌。
工人姐姐好鐘意小朋友,好鐘意同潼潼玩,有時玩到傻左,笑到卡卡聲。唔知係咪因為咁,潼潼好鐘意笑,有時候少少事情,好似話唔小心跌左D野落地,潼潼都笑得一餐。聽到潼潼既笑聲,我都會覺得好開心,好滿足。希望以後既日子潼潼都係咁快樂。
2008年12月13日 星期六
聖誕留影@德福
今日既行程係MEGA BOX同埋九龍灣IKEA。出發喇!!影番張型仔相先。
有無發覺呢張相既潼潼有乜唔同呢?潼潼係落車無耐,步行至MEGA BOX途中PK左呀,個咀撞到落D石屎路度,當堂留哂血係咁喊,連口入面都係血,我地都唔知係佢出面流血定口入面流血,真係嚇死我地呀!!幾驚佢撞親D牙仔。不過後黎見佢好似都無乜野,不過就個咀仔腫左,同埋無乜心機食野囉!!
行完MEGA BOX就番九龍灣IKEA,本來想幫潼潼物色一張梳化床 (發覺放唔落兒童床),不過最後都係睇唔岩,就順路過德福行下。
每逢節日,德福呢個商場既佈置真係好唔錯。各位媽媽真係不妨帶小朋友過黎影下相。
2008年12月11日 星期四
聖誕留影@海港城
近黎潼潼媽係公司做到天昏地暗,真係做到個人都癲癲地。潼潼媽唔理三七廿一,就趁呢日放工,約埋爸爸同潼潼一齊出黎尖沙咀影相,工作既野就暫時丟低唔理喇!
最初去到海運果邊,潼潼仲係心情大好,難得地笑住跟我地影左幾張合照。
不過好快潼潼又回復佢一貫作風 - 見鏡頭就避,所以最後都無影到幾多靚相。
去海運既反斗城度逛逛,睇下潼潼彈琴都彈得幾投入喎!
2008年12月10日 星期三
好消息
潼潼媽係屋企個白板上面寫上「好消息!!!」三個大字,究竟係咩好消息?
對於潼潼入讀N1,潼潼媽早已打定輸數,已在放棄狀態。點知而家收到幼稚園既面試信,潼潼媽好似中左六合彩(安慰獎)咁開心呀!雖然只係面試,未必一定入到,更加唔係咩名校,但起碼叫左有個機會可以俾潼潼學習下過羣體生活嘛!