尋日陪婆婆，今日陪嫲嫲。我地繼續拎住相機同潼潼周圍影相。
我地首先去屋企附近既東港城。潼潼唔係對咁靚既聖誕佈置有興趣，佢只係對上面既波波有興趣。潼潼對波波既鍾愛就黎可以用「瘋狂」黎形容呢！
想潼潼企定定俾你影相？依然用舊方法，放佢係D佢郁唔到 / 唔敢郁既地方。
不過個樣就會好呆...... 真係投哂降。
跟住再去新都城，都影唔到幾多滿意既靚相。
其實想影潼潼笑，最有效既方法原來就係.....
冒險樂園囉！
呢個懶玩精，今日玩左成日無訓過晏覺，到夜晚走既時候依然精神過人，真係服得佢好緊要。
2008年11月29日 星期六
時代廣場試影
今朝一早出發去同婆婆食飯，兼準備影靚相。
我地先去太古城同婆婆食飯，婆婆好失望，同潼潼影唔到靚相，因為潼潼極度唔合作。
之後食完飯落左銅鑼灣行街，去左時代廣場影相。
買左部好既相機唔一定影到靚相。潼潼係咁不停走黎走去，兼且唔鐘意俾人影，會故意擰歪面，所以好難影到佢。
我放佢係呢D木條同花糟位上面，潼潼唔敢行，終於走唔郁企定定，不過咁都唔一定影到靚相，因為潼潼好驚，最後變成咁既驚青樣。
唯有分散佢注意力，引佢睇佢覺得有趣既外牆玻璃電梯。終於影到第一張會笑既相。
呢張相之後仲成功吸引到一位外籍女士過黎要同潼潼影相添！果位女士係咁讚潼潼得意靚女，要佢朋友幫佢地影多幾張合照。
潼潼呢排對「HELLO」「BYE BYE」同飛吻係絕對唔吝嗇，所以都呃到唔少途人，TUM得人鬼咁開心。不過就反而對自己熟悉既人唔多理踩，真係激死人！
2008年11月28日 星期五
2008年11月23日 星期日
新相機 - CANON G10
早兩三個星期前，潼潼媽幫潼潼影光頭照既時候相機突然壞左，影出黎既相全部有紋，好似打左個大指模咁。潼潼爸話係潼潼媽成日俾部相機潼潼玩而「日子有功」。
拎部相機去整，報價話要500蚊，睇下出面既DC而家真係好平，俾500蚊整真係好似唔係好值，所以決定買果部。
潼潼媽一直都嫌之前既相機成日唔夠好，影潼潼又影唔清，所以今次做足功夫諗住搵部好D既DC用黎潼潼。點之一做RESEARCH就弊家伙喇！真係架！個個都話DC仔用咩機都無用，小朋友動作咁快以DC仔既反應係好難補捉，除非用單鏡反光機。單鏡機？潼潼媽真係無信心自己有咁既能耐捧住部單鏡機出街幫潼潼影相。最後唯有降GRADE搵半專業級相機。最後鎖定CANON既G9同埋PANASONIC既LX3。
G10都出左喇！仲搵G9？係呀！因為我貪G9細過G10嘛！可惜搵左兩日，周圍都話無哂G9喇！我就唯有係G10同LX3之間做決擇。其實以我既要求(最緊要係影囡囡)，G10係絕對比LX3好，但係我又鐘意LX3係比G10細。最後？都唔駛講啦！見到有部G10既價錢比出面低咁多，所以揀左G10囉！
係呀！！！潼潼媽係好心急想拎部G10黎幫潼潼影相架！只可惜呢排忙到爆，連BLOG都好少UPDATE。希望忙既日子可以快D過去就好喇！！！！
2008年11月22日 星期六
貪靚潼潼
今日同潼潼出街先發覺潼潼著住出街果對鞋仔原來爛左。本來都諗住幫潼潼置番D冬天用既鞋仔，既然而家對鞋爛左，就過去幫潼潼睇睇啦！
去到揀鞋，先揀左一對白色既皮鞋仔，我地嫌佢略為太FIT，唔著得耐。之後又試左另一對靴。咦?潼潼似乎好歡喜喎！一著上BOOT仔潼潼就照鏡睇睇，然後好滿意好開心咁笑，跟住仲著住對鞋四圍走添。行左一陣，又企番係鏡前面望住對鞋笑。見潼潼咁鐘意，潼潼媽緊係買左呢對BOOT啦！
原來潼潼真係識得咩叫靚。我地著住對新鞋仔走，潼潼就一路行一路低頭望住對鞋仔，連路都唔睇。跟住番到屋企樓下，仲指住對新鞋仔同管理員叔叔講太空話添！
想知潼潼對新鞋仔有幾靚？睇下一篇BLOG既VIDEO啦！
2008年11月15日 星期六
22個月
潼潼22個月大喇！潼潼媽媽好想俾潼潼番學學多ｄ野，但係因為太漏氣而到而家都無著落。
唔知點樣報告潼潼而家既情況，所以轉一轉形式，由一日既生活日程開始講起。
而家每朝早起身，潼潼都會自動識得叫人早晨（當然都睇心情）。
潼潼便便都唔鐘意用potty，要坐大人坐廁，所以有時當我地係洗手間既時候，會聽到潼潼係出面拍門要入黎噓噓。不過潼潼去便便既情況仲係好飄忽，有時都仲會賴賴。
俾毛巾潼潼抹面，佢都會抹面抹手仔，當然抹得唔乾淨，抹完都仲要我地重新再幫佢清潔一下。
潼潼會學大人用牙刷刷牙，不過漱口就有時會飲埋d水。(我地係俾凍開水佢漱口)
佢又鐘意學潼潼媽，拎各種lotion黎搽面面同手手，好貪靚呢！
而家飲奶已經唔用奶樽，改用杯仔，不過都要睇住佢小心倒瀉。
潼潼已經完全識得操控屋企兩部CD機，鐘意自己揀CD播歌仔聽。
潼潼仲係成日流口水，不過叫佢拎紙巾抹佢會自己抹同將紙巾掉入垃圾筒。
中午食飯仔喇！始終有工人係屋企就比較依賴，潼潼都唔係成日會自己用匙食飯，尤其是當佢扭計唔肯食既時候。不過到大人開飯既時候佢就會自己動手。
中午落街玩前，叫佢執好D玩具先出街佢都肯幫手執。
早一排佢落街見到樓下管理處D叔叔都未肯叫人，不過姐姐話佢呢排都肯同人講拜拜喇！
潼潼鐘意行樓梯，而家扶住佢佢會自己行落樓梯。
而家潼潼出街鐘意要自己「嘟」八達通同俾錢。要錢既時候會識得搵媽媽
！
我地同佢出街既時候潼潼總係好似甩繩馬騮咁，但係嫲嫲話佢同潼潼出街果陣又唔係咁架喎！
玩完番屋企，佢會自己一步一步咁上樓梯，唔駛人扶。
番到屋企知道要除鞋，放好鞋仔，跟住去洗手。
姨媽送左套 PHONIC既CD，潼潼好鐘意睇，每次放入CD機佢都會拎個遙控器俾我地要我地開電視俾佢睇。潼潼有時都會跟住讀「A, A, A」「B,B,B」；有時又會講「BEAR」,「APPLE」,「CAT」,「DUCK」；認得O同Q (呢個同套CD無關係，係用英文海報學識既)，不過26個英文字母潼潼未認得。 (咁都俾花花? 因為潼潼媽唔覺得有需要咁快識哂D字母)
唔順潼潼意，佢會發脾氣，會唔出聲，繞埋手，一直唔啋你。佢可以同你鬥好耐，點算好呢??
潼潼特別鐘意飲湯，連潼潼媽覺得難飲既益健湯，潼潼都會好鐘意飲。
潼潼晚上訓覺會依指示收好玩具，去拎片片，然後入房訓。會講「GOODNIGHT」同「早抖」，仲識得錫錫同飛吻。
潼潼仲識得整古做怪，叫佢叫媽媽GOODNIGHT，佢會特登叫哂所有人剩係叫剩媽媽。
嘩~~ 原來咁樣寫都好多野寫同好長架喎！
2008年11月10日 星期一
失敗的「第一次」
本來以為可以又寫潼潼既「第一次」。
試過幾次我係房陪潼潼，我有事要出廳一陣，我會叫潼潼乖乖地坐係床度等我，佢都會答我「好」，然後真係乖乖坐係度等我番黎。
今晚我陪潼潼訓既時候．．．．
我：潼潼，乖乖地自己訓好無？
潼潼：好~
我：咁我出去，你乖乖自己訓喇！
潼潼：好~
我係出面廳等左好一陣，入面都好安靜。跟住我入房拎衫 ．．．
我：潼潼好叻喎！自己訓！
潼潼：叻！
我：咁好啦！乖乖訓喇！
潼潼：合埋眼睛。
跟住潼潼就自己瞇埋眼睛訓。
我見咁耐都無乜異樣，我就安心去洗白白。
沖完涼出黎，見潼潼已經訓左。但係問番爸爸，原來係工人姐姐入房睇潼潼既時候，潼潼又扭要姐姐陪。
唉．．．． 有少少前功盡廢添！不過我好相信，如果姐姐唔入去的話，潼潼一定會成功架！！潼潼努力！！你下次一定得既！！！
2008年11月8日 星期六
Para Para Dance
去完維園既嘉年華會，小休一會就繼續行程。
睇下潼潼自己坐一個位，綁好安全帶，穩穩陣陣，幾「醒目」。
下一站係尖沙咀百週年紀念公園，呢日有香港Para Para教學八週年慶祝活動。不講不知，其實潼潼爸同潼潼媽都曾經係Para Para Dance既愛好者。
潼潼初初去到都俾強大既音樂聲嚇親，不過後黎見有小朋友，佢又跟埋一齊入去玩，真係幾攪笑。不過最失敗係潼潼媽拍唔到短片。
唔緊要!! 潼潼!! 明年再帶你去玩過!!
2008年11月3日 星期一
乜小朋友唔係有得玩就乜都既咩？
訂閱：
文章 (Atom)