今日帶潼潼去MEGABOX逛。潼潼之前去過兩三次MEGABOX，而呢次係第一次潼潼唔駛用BB車，自己行過去MEGAOX。
雖然我地唔俾潼潼入廚房，但係潼潼對呢套廚櫃系列玩具依然玩得有板有眼。
當然唔少得玩滑梯啦！潼潼已經係會自己行上樓梯去玩滑梯喇！
跟住再行左陣，差不多八點半先食飯。潼潼係咪好肚餓呢，睇佢食得幾心急。
2008年9月27日 星期六
2008年9月25日 星期四
談工作態度
之前曾經寫過一篇網誌提到公司係用聘員工方面出現好多問題，令人沮喪。估唔到呢個問題一直纏繞到而家，令到我每日番工都提不起勁。
當時引用左黃毅力一篇文章入面既故事。
公司來了一個暑期工，他是位修讀工商管理的大學生，給他一個學習的機會，就是cold call(撥冷電話)給一些顧客。在兩日後，這位暑期工竟發了一個電郵，他說：「我沒有甚麼興趣做cold call，我相信自己不適合這份工作，也接受不了在來臨三個月的internship(實習)，也是做這些cold call的工作，所以希望你能夠安排我做其他的工作。」
當我朋友複述完後，我第一句便說：「現在的年輕人，視工作如遊戲，像是到海洋公園或者是迪士尼遊玩。」他們對工作要求多多：要有舒適的工作環境、還要交通方便，更希望公司能夠包早午餐、甚至要求公司給予良好機會發揮，好讓他們從中學習，而公司還要付他們薪金，現在他們還要揀工作！
而家公司遇到既情況正同故事裡所提到既情況相似。
80年代就係一個幸福既年代。就因為咁，呢個年代以後出世既人都被嬌縱了。長大以後出黎做事，就不願受委屈，不想辛勞，不會承擔，不接受批評，不能捱罵，不能受壓力。他們唯一優越之處，就係手上拎著一張大學畢業證書。我就曾經見過一個大學生，全無工作經驗，就因為手持呢一張紙，「謙遜」地自降身價，要求以11K月薪當船務文員一職。
想當年自己剛出黎做事，好多事情不懂，膽子亦細，但公司吩咐要辦的，就算有多不情願，亦係硬住頭皮，戰戰競競的頂硬上。而家一代呢？每遇到不如意的，就只會選擇逃避，一走了之，不願嘗試，不願挑戰，寧願選一份平平穩穩，既舒適又高薪兼好福利既工作。
我記得以前公司裡面一位位高權重既同事講過，香港人既價值，就在於香港人的拚搏。不論遇到咩問題，我地會用盡辦法將事情完成。而家既貿易行業，大部份都係由東南亞到歐美。而家內地人英語講得唔好咩？外國人不懂普通話嗎？呢兩種語言，佢地分分鐘講得比我地好。不過香港人會用腦，所以我地成為有價值既中間人。如果我地連呢點都做得唔好，香港人係呢個行業入面仲有價值嗎？
未來既香港，就靠而家呢班社會棟樑，究竟會變成點呢？實在有點令人擔心。同時，我亦都好擔心將來自己囡囡都係用呢種態度工作，我真係接受唔到。
而家我每日工作都好苦惱，幸好番到屋企見到潼潼就悶氣全消。希望將來潼潼長大出黎工作既時候，亦可以做到幫老闆解除悶氣，咁樣先係一個好員工。
一家公司裡面員工既價值，並不在於佢能完成幾多文件上既工作，而係在於佢既腦力﹑解決問題既能力同埋擁有精明既決策力。
2008年9月22日 星期一
2008年9月20日 星期六
20個月
遲來的報告：潼潼20個月大，身高82cm，牙仔依然係門前8隻，入面見到有幾隻正在出緊。
潼潼20個月大。講說話既能力進步唔少。而家識講好多野喇：GOOD NIGHT﹑GOOD MORNING﹑SEE YOU等等英文字詞會講；有次叫佢拎野俾姐姐，姐姐同潼潼講「唔該」，潼潼會回番一句「唔駛唔該」；又有時會聽到潼潼講一Ｄ簡單既短句，例如「食餅」。雖然識講咁多野，不過閒時都仲係講BB話。
另一方面，由於呢個時候潼潼既既學習能力好強，我地大人既一言一行都要特別小心。好似大人講野「扯扯」聲﹑用扶手電梯時其中一隻腳企高一級﹑用腳踢埋個櫃門，呢D小動作潼潼都學埋，我見到都會出聲要大人留意。
另外最令人頭痛既，係潼潼既小姐脾氣。雖則話佢呢個年紀唔識表達自己，所以「脾氣」既問題係呢個年紀既小朋友黎講係好普遍，不過總不能就咁由得佢任意妄為。我就係姨媽到學本領 - 大人絕不能妥協。其實呢招係書本上總會有提到，但係未經過實戰原來真係好難識得運用番出黎。今日再努力嘗試，已經有兩次成功既經驗，繼續努力。
今日發生左一件頗有趣既小故事：
潼潼今日又玩我個銀包，係我銀包裡面拎出左一張20蚊紙，然後將張銀紙俾左姐姐。我地初初只以為潼潼求其拎左D野出黎玩，但當我準備將張銀紙放番入銀包既時候，潼潼就扭計喇！哦~~ 原來係因為有時我會俾錢叫姐姐落樓下幫我買少少野既時候，會順便俾潼潼跟埋落去走一走，所以潼潼就將「俾錢」同「落街」呢兩個動作連結埋一齊：佢想落街，所以俾錢姐姐。哈哈，潼潼呢個道理幾有趣。
2008年9月19日 星期五
2008年9月17日 星期三
2008年9月15日 星期一
玩具圖書館
今日帶潼潼去香港中央圖書館入面既玩具圖書館玩。
睇介紹入面既相，覺得個玩具圖書館好靚好似好好玩咁，令我非常期待。為左遷就潼潼既午睡時間，我約左四點鐘果場，但係依然好趕。潼潼差不多兩點先肯訓，訓到三點已經俾我地叫醒出街。
入到玩具圖書館，唔係想像中咁吸引。所謂既專人指導，其實極其量只係幫你揀玩具。唔要「專人指導」的話，你可以自己諗 / 自己睇目錄揀完玩具叫佢地拎俾你。而且只有45分鐘既時間玩玩具，等潼潼媽再花d時間去純習呢個圖書館既運作之後，真係唔知玩左d乜。總括黎講，我覺得唔係太值得花時間同車錢過去玩囉！又或者話，呢個玩具圖書館唔適合潼潼呢個年紀既小朋友使用。
一場黎到，唯有拍個照留念。
2008年9月14日 星期日
2008年9月13日 星期六
2008年9月9日 星期二
記「仇」?
一直以為小朋友是最不記仇兼最寬宏大量的。但係．．．．
昨晚潼潼搗蛋玩燈掣既時候，潼潼媽將潼潼抱到爸爸面前。潼潼怕爸爸，爸爸未有重責潼潼已經大喊起上黎。潼潼最叻撒姐姐嬌，於是又係度扭計要姐姐呵，我卻將潼潼抱入房要佢訓覺，點知入到房見到爸爸又喊餐飽。最後都係要姐姐陪佢先訓覺，潼潼媽同佢講goodnight佢都擰願背唔啋。
到半夜仲訓訓下喊醒要搵姐姐添。
以為事情就咁樣過去，點知今晚放工番屋企，潼潼竟然見到我就調頭走，硬要黐住姐姐，連我撩佢玩佢都唔理。我用盡方法，駛出絕招 - 高科技產品：電腦同攝錄機，先引到潼潼肯啋下我。
一直以黎，潼潼都表現得好「有性格」，有時你強逼佢做某d事情，用盡方法利誘，佢都唔會做。可以調教嗎？我覺得好似今晚呢種「高姿態」既表現，絕對唔係大人可以教出黎，要佢真係記得你曾經「出賣」過佢先可以。
睇黎要調教既可能唔係潼潼，而係要調教自己。我地對潼潼既教導方法，似乎不能用硬功的了。
2008年9月7日 星期日
大角咀體育館playroom
岩岩一期既baby-mo雜誌有介紹公共playroom，睇完之後覺得幾正喎！即刻上網搵資料，睇下最近屋企既playroom係邊。不過我發現香港政府d野都好神奇，d康樂設施全部位置偏遠，一d都唔便民。
星期日番北角同屋企人飲完茶，就諗住近近地去渣華道果邊既playroom俾潼潼玩下啦。點知去到見到非常失望，入面幾乎只係一大片空地俾小朋友走黎走去，無乜設施。
o係我同潼潼爸商量完之後，把心一橫，去全港最大既公共playroom - 大角咀體育館既兒童遊戲室。
我地搭港鐵去到奧運站，然後就步行過去，都要差不多15分鐘。長途拔涉咁過到黎，見到個playroom真係好正喎！可惜原來個playroom只可以俾25位小朋友入去玩。我地去到已經滿哂額，要等下一場。真係好無奈，走又唔係，唔走又唔係。 見到個playroom咁吸引，真係唔捨得走，而且我地仲要係專程而黎，咁樣黎到又走真係好唔抵，所以都係決定排隊等。
不負眾望，潼潼係個playroom入面真係玩得好開心呀!!潼潼爸見潼潼玩得咁開心，仲同潼潼連續玩足兩場。潼潼媽投降喇..... 
潼潼爸話值得再去 (不過初初話要等果陣又唔係咁講既
)。
不過我地下一站將會係香港中央圖書館入面既「玩具圖書館」
潼潼連叫「媽媽」都少左喇！
訂閱：
文章 (Atom)