巧遇blog友

潼潼打針後發燒再加上傷風流鼻水，雖然天氣放晴，難得一見太陽，潼潼爸仍是反對我帶潼潼落樓下逛。只不過係我堅持之下，潼潼爸唯有著我只准帶潼潼到樓下走，而且唔准幫潼潼除帽。　落到樓下，風的確唔細，有太陽照住既地方亦唔多。但憑經驗，一般情況下我屋企樓下都係比外面還要大風。所以我冒險一試，帶潼潼到屋苑外面既公園仔走一趟。

走出屋苑之外，果然天氣大好，我總感覺到有d熱添！太好喇！可以俾潼潼玩一下，舒展一下，唔駛全日困係屋企面嘛！

到兒童遊樂場之後我就放低潼潼由得佢自己玩。佢剛走到一個轉轉板度諗住用手撥之際，就俾正係度玩緊既小朋友推開佢，本來都無乜野，公園入面總會有d小霸王，一般情況下潼潼都未識得對佢地既霸王行為有任何反應。只不過呢個時候，個小朋友既媽媽即時好惡咁喝止住果個小朋友唔准推人，潼潼見到就即時轉身過黎要我抱，之後仲放聲大哭！原來佢係俾果位媽媽嚇親，以為人地鬧佢呢！　經此一役，潼潼全程係公園都比較膽怯，有時玩玩下都會走過黎要我抱。

係陪潼潼玩其間，留意到一位小朋友特別面熟，我望左個小朋友好幾眼都未太確定。係呢個時候，就聽到有人問：「你係咪潼潼呀？」「係呀！」我聽到呢位太太咁問，開始確定自己係無認錯人，「佢係咪日希呀？」係呀！佢就係日希喇！佢就係我從blog度認識既日希喇！而面前呢位太太咪就係日希媽媽囉！哈哈！原來咁都可以碰到從blog度認識既blog友，感覺好有趣。

我同日希媽媽只係閒聊左幾句，然後又各自顧住照顧自己既小朋友，走既時候都未有同日希媽媽講再見。唔好意思啊日希媽媽！